நிகழ்வுகள்

இந்தியன் ரெட் கிராஸ் சொசைட்டி இராமநாதபுரம் மாவட்ட கிளை, யூத் ரெட் கிராஸ் ராமநாதபுரம் மாவட்டம், கீழக்கரை செய்யது ஹமீதா கலை அறிவியல் கல்லூரி, கீழ்க்கரை ரோட்டரி சங்கம், தாலுகா ரெட் கிராஸ் கிளை மற்றும் போதை பொருள் தடுப்பு நுண்ணறிவுப் பிரிவு ஆகியோர் இணைந்து நடத்திய போதைப்பொருள் ஒழிப்பு விழிப்புணர்வு பேரணி. யூத் ரெட் கிராஸ் திட்ட அலுவலர் முனைவர் ஆனந்த் வரவேற்றார்.

கீழக்கரை செய்யது ஹமீதா கலை மற்றும் அறிவியல் கல்லூரியிலிருந்து துவங்கிய இப்பேரணியை கல்லூரி முதல்வர் முனைவர் ராஜூபுதீன் தலைமையில் கீழக்கரை ரோட்டரி சங்க தலைவர் எஸ். சுந்தரம், மாவட்ட யூத் ரெட் கிராஸ் அமைப்பாளர் ஏ. வள்ளி விநாயகம் ஆகியோர் முன்னிலையில் கீழக்கரை உட்கோட்ட காவல் துணைக் கண்காணிப்பாளர் ரவிச்சந்திரன் துவக்கி வைத்தார்.

நகரின் முக்கிய வீதிகள் வழியாகச் சென்று கடற்கரை வரை யூத் ரெட் கிராஸ் மாணவ மாணவிகள் போதைப்பொருள் ஒழிப்பு மற்றும் அதனை உபயோகிப்பதால் ஏற்படும் பாதிப்புகள் குறித்த பதாகைகளுடன் கோஷமிட்டுச் சென்றனர்.

உடற்கல்வி இயக்குனர் முனைவர் தவசிலிங்கம் நாட்டு நலப்பணித்திட்ட அலுவலர், கீழ்க்கரை ரோட்டரி சங்கம் மற்றும் ரெட் கிராஸ் நிர்வாகிகள் கே.ஆர்.டி. கிருஷ்ணமூர்த்தி, T.முனியசங்கர், அல்நூர் ஹசன், ஆசாத் மற்றும் உறுப்பினர்கள் கலந்து கொண்டனர்

பேரணிக்கான ஏற்பாடுகளை போதைப்பொருள் நுண்ணறிவுப் பிரிவு காவல் ஆய்வாளர் முத்துலெட்சுமி மற்றும் ரெட் கிராஸ் மாவட்ட செயலாளர் எம். ராக்லாண்ட் மதுரம் ஆகியோர் செய்திருந்தனர்.

இராமநாதபுரம் மாவட்டம் கீழக்கரை பருத்திக்காரத் தெருவை சேர்ந்த சுல்தான் நபீல் முகைதீன் மற்றும் தொண்டியை சேர்ந்த அமீர் அப்பாஸ், ஆகிய இரண்டு நண்பர்களும் இணைந்து சென்னை மண்ணடி அரண்மனைக்காரன் தெருவில் ‘MANNADY FOREX’ PRIVATE LIMITED என்கிற பெயரில் வெளிநாட்டு பண மாற்று நிறுவனத்தை, இந்திய ரிசர்வ் வங்கியின் அங்கீகாரத்தோடு நேற்று 13.07.2018 வெள்ளிக் கிழமை ஜும்மா தொழுகைக்கு பின்னர்  துவங்கியுள்ளனர்.

இந்த நிறுவனத்தின் புதிய அலுவலக திறப்பு விழா நிகழ்ச்சியில் ஏராளமான வாடிக்கையாளர்கள் மற்றும் பொதுமக்கள் கலந்து கொண்டு வாழ்த்துக்களை தெரிவித்தனர்.

இது குறித்து மண்ணடி பாரக்ஸ் (MANNADY FOREX) நிறுவனத்தின் நிர்வாக இயக்குனர் சுல்தான் நபீல் முகைதீன் கூறுகையில் ”இராமநாதபுரம் மாவட்டத்தை சார்ந்த பல்லாயிரக்கணக்கானோர் பொருளாதாரம் தேடி வெளிநாடுகளில் உலகமெங்கும் வாழ்கின்றனர். அவர்கள் மூலமாக நம் தேசத்திற்கு அந்நிய செலாவணி வெகுவாக கிடைத்து வருகின்றது. இருப்பினும் பலருக்கு தங்கள் சம்பாதிக்கும் அந்நிய செலாவணியை முறையாக அனுப்பும் வழிமுறைகள் தெரிவதில்லை. எந்த ஒரு நாட்டினுடைய பணத்தையும் நம் நாட்டின் பணத்திற்கு ஈடான மதிப்பாக மாற்றிக் கொள்வதைத்தான் பண பரிமாற்றம் அல்லது நாணய பரிமாற்றம் என்கிறோம்.

குறிப்பாக வெளிநாட்டு பணத்தை இந்தியாவில் நேரடியாக செலவு செய்ய முடியாது. அந்த பண மதிப்புக்கு ஈடாக இந்திய ரூபாயாக மாற்றிக் கொள்வதுதான் பண பரிமாற்றம். வெளிநாட்டில் பணி நிமித்தமாக இருப்பவர்கள் இந்தியாவில் தங்கள் உறவினர்களுக்கு பணத்தை அனுப்ப இந்த வசதியைத்தான் பயன்படுத்த வேண்டும். இப்படியான பண பரிமாற்றத்திற்கு நவீன வசதிகளும் வந்துவிட்டன. வெளிநாடுகளிலிருந்து அனுப்பி வைக்கப்படும் பணத்தை உள்நாட்டிலேயே எளிதாக மாற்றிக்கொள்ள இந்த சட்டபூர்வமான வழிகளைத்தான் பயன்படுத்த வேண்டும்.

இந்த சட்டபூர்வமான வழிகளில் அந்நிய செலாவணியாக அனுப்பும்போது அதற்காக பிடித்தம் எதுவும் செய்யப்படுவதும் இல்லை. இதன் மூலம் விரைவாகவும் பணப் பரிமாற்றம் செய்து கொள்ள முடியும். இந்த வெளிநாட்டு பணபரிமாற்ற நடவடிக்கைகள் மத்திய அரசின் கண்காணிப்பில் ரிசர்வ் வங்கி இவற்றைக் கட்டுப்படுத்துகிறது. பண பரிமாற்ற நடவடிக்கைகளை மேற்கொள்வதற்கான அனுமதியை ரிசர்வ் வங்கியிடம் பெற்றுள்ள முகவர்கள், நிறுவனங்கள், வங்கிகள் மட்டுமே இதை மேற்கொள்ள முடியும்.

இறைவனுடைய அருளால் நாங்கள் இந்த நாணய பரிமாற்றத்திற்கான முகமை அங்கீகார அனுமதியினை பெற்று முறைப்படி எங்கள் நிறுவனத்தை துவங்கி உள்ளோம். ‘நாணயமே’ எங்கள் கொள்கையும் இலட்சியமும்… அனைவரும் ஆதரவு தர வேண்டும்” என்றார்.

மண்ணடி பாரக்ஸ் (MANNADY FOREX) நிறுவனத்தாருடைய தொழில் சிறக்க கீழை நியூஸ் சார்பாக நெஞ்சார்ந்த வாழ்த்துக்களை தெரிவித்துக் கொள்கிறோம்.

sdr

சினர்ஜி இண்டர்நேஷனல் குழுமத்தின் ஆண்டு விழாக் கூட்டம் ‘சினர்ஜியா 2018’ என்ற தலைப்பில் 30.06.2018 அன்று கிழக்கு கடற்கரைச் சாலையிலுள்ள அரேபியன் கார்டன்ஸ் வளாகத்தில் நடைபெற்றது. இந்நிகழ்ச்சியில் சினர்ஜி இண்டர்நேஷனல் குழுமத்தின் நிறுவன இயக்குநர் முனைவர் எம்.ஹுஸைன் பாஷா தலைமை வகித்தார். நிறுவன இணை இயக்குநர் பொறியாளர் எஸ்.முஹம்மது இர்ஃபான் சிறப்புரையாற்றினார். துணை இயக்குநர்கள் மஜ்மூனா, ஷாமிலா அவுக்கார் பாத்திமா ஆகியோர் முன்னிலை வகித்தனர்.

சினர்ஜி இண்டர்நேஷனல் குழும நிறுவனங்களான ரய்யான் ஹஜ், உம்ரா சர்வீஸ், சினர்ஜி இண்டர்நேஷனல் இண்ஸ்டிடியூட், மாஸ்டர்மைண்ட் கன்சல்டிரைனிங், சினர்ஜி இண்டர்நேஷனல் காலேஜ், சமாதானக் கலை பத்திரிகை, சினர்ஜி இண்டர்நேஷனல் மீடியா, பிளாக் அண்டு ஒயிட் டூர்ஸ், சினர்ஜி இண்டர்நேஷனல் பப்ளிகேஷன்ஸ் ஆகிய நிறுவனங்களில் பணியாற்றும் பணியாளர்கள், கிளை அலுவலக அலுவலர்கள், முகவர்கள் என பலரும் திரளாக கலந்துகொண்டனர்.

குழும நிறுவனங்களின் கடந்த நிதி ஆண்டின் செயல்பாடுகள், எதிர்கால திட்டங்கள், வாடிக்கையாளர்களின் சேவைகளை மேம்படுத்துவதற்கான ஆக்கபூர்வமான நடவடிக்கைகள் உள்ளிட்ட பல்வேறு விஷயங்கள் விரிவாக ஆலோசனை செய்யப்பட்டு தீர்மானங்கள் நிறைவேற்றப்பட்டன. கடந்த ஆண்டில் சிறப்பாக செயல்பட்டவர்களை ஊக்கப்படுத்தும் வகையில் பரிசுப்பொருட்கள் வழங்கப்பட்டன. புதிதாக இணைந்துள்ள முகமைகளுக்கான அதிகாரபூர்வ சான்றிதழ் முகவர்களுக்கு வழங்கப்பட்டன.

தொழிலதிபரும், Understand Quran அகாடமியின் உயர் அதிகாரியுமான கஜ்ஜாலி அவர்கள் சிறப்பு விருந்தினராக கலந்துகொண்டு பல்வேறு தொழில் நுணுக்கங்களை குறித்து விளக்கவுரையாற்றினார். ஊடகம் மற்றும் செய்தி தொடர்பான விஷயங்களை சிம் நிறுவனத்தின் இயக்குநர் காஜா மைதீன் குழுவினர் ஒருங்கிணைத்தனர்.

இந்நிகழ்ச்சியில் வக்கீல் சாலிஹ் ஹுசைன், ஸ்கை லைட் நிறுவனத்தின் நிர்வாக இயக்குனர் இப்ராஹீம், சட்டப் போராளி கீழை ஆஷிப் உள்ளிட்ட பலர் கலந்து கொண்டு வாழ்த்துரை வழங்கினர். குழும மேலாளர் சான்கான் தலைமையிலான குழுவினர் நிகழ்ச்சிக்கான ஏற்பாட்டினை சிறப்பாக செய்திருந்தனர்.

கீழக்கரை நெய்னா முஹம்மது தண்டையல் தெருவை சேர்ந்த ஆர்கிடெக்ட் செய்யது சித்தீக் ரிஸ்வான் வள்ளல் சீதக்காதி சாலை லெப்பை தெரு சந்திப்பில் AMD டிஷைன் ஸ்டூடியோ & கன்ஸ்ட்ரக்ஷன் என்கிற பெயரில் கட்டிட வடிவமைப்பு மற்றும் கட்டுமான நிறுவனத்தை நேற்று துவங்கியுள்ளார். இந்த நிறுவனத்தின் திறப்பு விழா நிகழ்ச்சியில் கீழக்கரை நகரின் கட்டிட வடிவமைப்பாளர்கள், பொறியாளர்கள், பொதுமக்கள் ஏராளமானோர் கலந்து கொண்டு வாழ்த்தினர்.

இது குறித்து AMD டிஷைன் ஸ்டூடியோ கன்ஸ்ட்ரக்ஷன் நிறுவனத்தின் முதன்மை நிர்வாகி ஆர்கிடெக்ட் செய்யது சித்தீக் ரிஸ்வான் அவர்கள் கூறுகையில் ”இறைவனுடைய அருளால் கீழக்கரையில் கட்டிட வடிவமைப்புக்கென பிரத்யேக நிறுவனமாக கீழக்கரை நகரின் மண்ணின் மைந்தர்களான சிறந்த கட்டிட வடிவமைப்பாளர்களை, பொறியாளர்களை ஒருங்கிணைத்து எங்கள் நிறுவனத்தை துவங்கியுள்ளோம்.

எங்கள் நிறுவனத்தில் கட்டுமானப் பணிகள் சம்பந்தமான அனைத்து சேவைகளும் அழகிய முறையில் சிறப்பாக செய்து தரப்படும். வாடிக்கையாளர்களின் மேலான மன நிறைவும், வாழ்த்துக்களும் மட்டுமே எங்களின் எதிர்கால வளர்ச்சிக்கு முதல் படியாக கருதுகிறோம். அனைவரும் ஆதரவு தர வேண்டும்” என்று மகிழ்ச்சியுடன் தெரிவித்தார்.

AMD டிஷைன் ஸ்டூடியோ & கன்ஸ்ட்ரக்ஷன் நிறுவனத்தின் தொழில் சிறக்க கீழை நியூஸ் சார்பாக மனமார்ந்த வாழ்த்துக்களை தெரிவித்துக் கொள்கிறோம்.

கீழை மரச் செக்கு எண்ணெய் நிறுவனத்தின் மற்றுமொரு ஆரோக்கியத்தின் வாசலாக ‘கீழை’ இயற்கை அங்காடி நேற்று (18.05.2018) கீழக்கரை நடுத் தெரு ஜும்மா பள்ளி பின்புறம் திறக்கப்பட்டு உள்ளது. சட்டப் போராளிகள். நூருல் ஜமான் மற்றும் ஜெமீல் முஹம்மது ஒன்றிணைந்து உருவாக்கி இருக்கும் இந்த இயற்கை அங்காடியில் நூறு சதவீதம் இயற்கையான முறையில் விளைவிக்கப்பட்ட உணவு வகைகளும், எந்த ஒரு வேதி பொருள்களும் கலக்கப்படாத இயற்கை உணவு பொருள்களும், நாட்டு மருந்து வகைகளும், இனிப்பு கார வகைகளும் கிடைக்கிறது.

கலப்படமற்ற இயற்கை உணவு வகைகளை மக்களுக்கு கொண்டு சேர்ப்பது தான் இந்த இயற்கை அங்காடியில் முதன்மை நோக்கமாக இருக்கிறது. ஏற்கனவே இயற்கை முறையில் தயாரிக்கப்பட்டு வரும் கீழை மரச் செக்கு எண்ணெய்க்கு உள்ளூர் வாசிகள் மட்டுமின்றி வளைகுடா வாழ் கீழக்கரை சொந்தங்களும் பெரும் வரவேற்பை அளித்து வரும் நிலையில் தற்போது திறக்கப்பட்டு இருக்கும் கீழை இயற்கை அங்காடிக்கு மக்கள் மத்தியில் பெரும் வரவேற்பு கிடைத்துள்ளது.

இந்த இயற்கை அங்காடியில் நாட்டு சர்க்கரை, இந்து உப்பு, ஊறுகாய் வகைகள், சிறுதானிய வகைகள், கருப்பட்டி, பனங் கற்கண்டு, பாரம்பரிய அரிசி வகைகள், சிறுதானிய பிஸ்கெட் வகைகள், சீயக்காய், சோப்பு உள்ளிட்ட இயற்கை முறையில் தயாரிக்கப்பட்ட பொருள்களும் கிடைக்கிறது.

மேலும் கீழை மரச் செக்கின் சிறப்பு தயாரிப்புகளான மரச் செக்கு எண்ணெய், நெய், தேன் உள்ளிட்ட உணவுப் பொருள்களில் கலப்படம் இருப்பதாக நிரூபித்தால், ‘தங்க காசுகள்’ பரிசளிக்கப்படுவதாக பொதுமக்களுக்கு கீழை மரச் செக்கு நிறுவனத்தினர் சவால் விடுத்துள்ளது பொதுமக்களை இயற்கை அங்காடியின் பக்கம் சுண்டி இழுத்துள்ளது.

கீழை இயற்கை அங்காடியின் தொழில் சிறக்க கீழை நியூஸ் சார்பாக மனமார்ந்த வாழ்த்துக்களை தெரிவித்துக் கொள்கிறோம்.

இராமநாதபுரம் சாலைத் தெருவில் (அறிஞர் அண்ணா சாலைத் தெரு) புத்தம் புது பொலிவுடன் “பசீர் பேன்ஸி ஸ்டோர்” ஞாயிறு (13-05-2018) அன்று திறக்கப்பட்டது. “பசீர் பேன்ஸி ஸ்டோர்” கிட்டத்தட்ட 50 வருட பாரம்பரியம் கொண்டது.

பல வருடங்களுக்கு முன்னாள் ஒருங்கிணைந்த பேருந்து நிலையமாக இருந்த இராமநாதபுரம் பழைய பேருந்து நிலையத்தில் தொடங்கப்பட்டது.  பின்னர் 25 வருடங்களுக்கு முன்னர் வியாபார முன்னேற்றத்தை கருத்தில் கொண்டு அரண்மனை பகுதியில் தொடங்கப்பட்டது.

இரண்டாவது தலைமுறையால் இந்த நிறுவனம் நடத்தப்பட்டு வருகிறது. தற்சமயம் வாடிக்கையாளர்களின் வசதியை கருத்தில் கொண்டு புதிய இடத்தில் தொடங்கப்பட்டுள்ளது.  இன்று எத்தனையோ நவீன அங்காடிகள் சந்தையில் வந்தாலும், பழைய பேருந்து நிலையத்தில் நிறுவனம் இருந்த காலம் முதல் இன்று வரை தொடர்ந்து வருகை தரும் வாடிக்கையாளர்களும் உண்டு என்பது குறிப்பிடத்தக்கது.

இந்த தொழிலில் இரண்டு தலைமுறையாக வாடிக்கையாளர்களின் நம்பிக்கை மற்றும் தரத்தோடும் தொடர்வதற்கு முக்கிய காரணம் “நம்பிக்கை மற்றும் நாணயம்” என்றால் மிகையாகாது.

கீழக்கரை 500 பிளாட் பகுதியை சேர்ந்த அன்வர் ஹுசைன், கடந்த 2011 ஆம் ஆண்டு முஸ்லீம் பஜாரில் (லெப்பை மாமா டீக்கடை எதிரில்) ‘அபியா ஆப்டிகல்ஸ் & ஜெனரல் டிரேடிங்’ என்ற பெயரில் கண்ணாடி மற்றும் வெளி நாட்டு சாமான்கள் விற்பனையகம் சிறப்பாக நடத்தி வருகிறார்.

மக்கள் மத்தியில் பெரும் வரவேற்பை பெற்ற ‘அபியா ஆப்டிகல்ஸ்’ கண்ணாடி கடை தற்போது உசைனியா திருமண மஹால் அருகாமையில் கடந்த 07.05.2018 அன்று புதுப் பொலிவுடன் வாடிக்கையாளர்களை கவரும் வண்ணம் திறக்கப்பட்டு உள்ளது. இந்த திறப்பு விழா நிகழ்ச்சியில் ஆலீம் பெருந்தகைகள், வாடிக்கையாளர்கள் மற்றும் பொதுமக்கள் திரளாக கலந்து கொண்டு தொழில் சிறக்க வாழ்த்துக்களை தெரிவித்தனர்.

இஸ்லாமிய கல்விச் சங்கத்தின் 4ம் ஆண்டு நிறைவு விழா மற்றும் கோடை கால எழுச்சி முகாமின் நிறைவு விழா வரும் வெள்ளிக்கிழமை 11-05-2018 மக்ரிப் தொழுகையை தொடர்ந்து கடற்கரை பள்ளி வளாகத்தில் நடைபெற உள்ளது.

இந்த நிகழ்ச்சிக்கு சிறப்பு விருந்தினராக உச்ச நீதிமன்ற வழக்கறிஞர் அலாவுதீன் கலந்து கொள்ள உள்ளார்.  இந்நிகழ்வின் சிறப்புரையை முன்னாள் திரைப்பட இயக்குனர் அமீருத்தீன் வழங்க உள்ளார்.  தலைமையுரையை இஸ்லாமிய சங்க தலைவர் முஹம்மது தவ்ஹீத் வழங்க உள்ளார்.

இவ்வருடத்தின் ஆண்டறிக்கையை இஸ்லாமிய கல்வி சங்கத்தின் துணைத்தலைவர் அஹமது ஃபாசில் வாசிக்க உள்ளார். மேலும் இந்நிகழ்ச்சிக்கு கல்வி சங்க செயலாளர் அஜ்மல்கான்,  சட்ட ஆலோசகர் மற்றும் உயர்நீதி மன்ற வழக்கறிஞர் சாலிஹ் ஹுசைன் மற்றும் பல முக்கிய மதரஸா நிர்வாகிகள், கல்வி நிலைய முதல்வர்கள்  முன்னிலை வகிக்க உள்ளனர்.

இந்நிகழ்ச்சி இஸ்லாமிய கல்வி சங்கம் பொருளாளர் சல்மான் கான் உரையுடன் நிறைவடைய உள்ளது. இந்நிகழ்ச்சிக்கு அனைவரும் கலந்து கொள்ள அழைப்பு விடுக்கப்பட்டுள்ளது.

கீழக்கரை நகரில் கொளுத்தும் கோடை வெயிலை சமாளிக்க ஆங்காங்கே சமூக மற்றும் சமுதாய இயக்கத்தினர் கோடை கால கால் நீர் மோர் பந்தல் அமைத்து சேவையாற்றி வருகின்றனர். இந்நிலையில் கீழக்கரை மஜ்ம-உல் ஹைராத்தியா தர்ம அறக்கட்டளை சார்பில் கோடை கால தண்ணீர் பந்தல் இன்று (15.04.2018) காலை 10:30 மணியளவில் வள்ளால் சீதக்காதி சாலையில் யூஸுஃப் சுலைஹா மருத்துவமனை அருகில் திறக்கப்பட்டது.

இந்த தண்ணீர் பந்தலை பிரபுக்கள் தெருவை சேர்ந்த சகோதரர் செய்யது அஹமது அவர்கள் திறந்து வைத்தார். இந்த நிகழ்ச்சியை அறக்கட்டளையின் துணை தலைவர் அஹமது சுஹைல், செயலாளர் முஹைதீன் அடுமை, துணை செயலாளர் அய்யூப் கான் ஆகியோர் தலைமையேற்று நடத்தினர்.

அறக்கட்டளையின் ஆலோசகர்கள் சகோதரர் சீனி இப்ராஹீம் மற்றும் சகோதரர் முஹம்மது அன்ஸாரிப்பு ஆகியோர் உடனிருந்தனர். தெருவாசிகள் மற்றும் பொது மக்கள் ஏராளமானோர் கலந்து கொண்டனர்.

தமிழகம் முழுவதும் திரு.உ.சகாயம் IAS அவர்களின் வழிகாட்டுதலின் படி ஏழை எளிய மக்களின் நலன் கருதி மலிவு விலையில் தரமான மருந்துகளை கிடைக்க செய்யும் உயரிய நோக்கில் மக்கள் பாதை இயக்கத்தினரின் ஒத்துழைப்போடு ‘மக்கள் மருந்தகம்’ என்கிற பெயரில் ஆங்கில மருந்துகள் விற்பனை நிலையங்கள் ஜெனரிக் மெடிக்கல் திறக்கப்பட்டு வருகிறது.

இதன் ஒரு பகுதியாக கீழக்கரையில் ‘கீழை மக்கள் மருந்தகம்’ என்கிற பெயரில் கிழக்கு தெரு சிட்டி யூனியன் வங்கி அருகில் இருக்கும் இமாம் ஜகுபர் சாதிக் வணிக வளாகத்தில் மீண்டும் புது பொழிவுடன் இன்று (14.04.2018) மாலை 4.30 மணியளவில் துவங்கப்பட்டுள்ளது.

இந்த மருந்தகத்தை கிழக்கு தெரு ஜமாஅத் செயலாளர் நெகர் சிகாப் திறந்து வைத்தார். இந்த திறப்பு விழா நிகழ்ச்சியில் கிழக்கு தெரு ஜமாஅத் துணைப்பொருளாளர் சட்டப் போராளி முகம்மது அஜிஹர், மக்கள் நல பாதுகாப்புக் கழகத்தின் செயலாளர் சட்டப் போராளி முகைதீன் இப்ராகீம், சட்ட போராளிகள் இயக்க ஒருங்கிணைப்பாளர் வழக்குரைஞர் முகம்மது சாலிஹ் ஹூசைன்

அல் பையினா மெட்ரிக் பள்ளியின் தாளாளர் ஜாபீர் சுலைமான், SDPI கட்சியின் கீழக்கரை நகர் துணை தலைவர் சட்டப் போராளி நூருல் ஜமான், சட்டப் போராளி முஹம்மது அஸ்லம், கீழக்கரை பாப்புலர் பிரண்ட் ஆப் இந்தியா பொறுப்பாளர் முகம்மது நதீர், S.M.மாசிக்கடை கலீல் ரஹ்மான் மற்றும் சமூக ஆர்வலர்கள் பலர் கலந்து கொண்டனர்.

இது குறித்து கீழை மக்கள் மருந்தகத்தின் முதன்மை நிர்வாகி சட்டப் போராளி ஜாபீர் சுலைமான் கூறுகையில் ”இறைவனுடைய அருளால் கீழக்கரையில் திரு.உ.சகாயம் IAS அவர்களின் வழிகாட்டுதலின் படி கடந்த ஆண்டு ஏப்ரல் 28 அன்று, மக்கள் பாதை இயக்கத்தின் மாநில பொறுப்பாளர் உமர் முக்தார் அவர்களால் இதே இடத்தில் திறக்கப்பட்டு சிறப்பாக செயல்பட்டு வந்தது.

மக்கள் மருந்தகம் மூலம் கீழக்கரை பகுதி ஏழை எளிய மக்கள் பெரிதும் பயனடைந்து வந்தனர். இந்நிலையில் நிர்வாக மாறுதல் காரணமாக ஒரு சில மாதங்கள் மக்கள் சேவை முற்றிலும் தடைபட்டு இருந்தது. தற்போது அல்லாஹ்வின் கிருபையால் மீண்டும் புதுப்பொலிவுடன் இன்று முதல் ‘கீழை மக்கள் மருந்தகம்’ என்கிற பெயரில் மருந்தகம் செயல்பட துவங்கியுள்ளது. பொதுமக்கள் அனைவரும் வழக்கம் போல் உங்கள் ஆதரவை தந்து பயன்பெற வேண்டும்” என்று தெரிவித்தார்.

தமிழ்நாடு சிறுபான்மையினர் நலத்துறை இயக்கம், சென்னை சார்பாக பொதுமக்களுக்கான விழிப்புணர்வு முகாம் கீழக்கரை கடற்கரைப் பள்ளி வளாகத்தில் இன்று (30.03.2018) மாலை 5 மணியளவில்  சிறப்பாக நடைபெற்றது.

இந்நிகழ்ச்சியில் சிறுபான்மையினருக்கு மத்திய மாநில அரசால் வழங்கப்படும் கல்வி உதவி தொகை, முதியோர், வேலையில்லா பட்டதாரிகளுக்கான ஊக்கத் தொகை உள்ளிட்ட ஏராளமான விஷயங்கள் குறித்து பொதுமக்களுக்கு விழிப்புணர்வு செய்யப்பட்டது. இந்நிகழ்ச்சியில் சிறுபான்மையினர் நலத்துறை அதிகாரி அமீர்கான் கலந்து கொண்டு சிறப்புரை வழங்கி விழிப்புணர்வு ஏற்படுத்தினார்.

இந்த விழிப்புணர்வு நிகழ்ச்சிக்கான ஒருங்கிணைப்பு ஏற்பாடுகளை கீழக்கரை பாப்புலர் ஃப்ராண்ட் ஆப் இந்தியா அமைப்பின் கீழக்கரை நகர் நிர்வாகிகள் நதீர் சாகுல் ஹமீது, ஹமீது பைசல், சிராஜுதீன், ஜுபைர், காதர் சிறப்பாக செய்திருந்தனர். இந்நிகழ்ச்சியில் ஏராளமான பொதுமக்கள் கலந்து கொண்டு சிறுபாண்மையினருக்கு கிடைத்து வரும் நலத் திட்டங்கள் குறித்து விழிப்புணர்வு பெற்றனர்.

கீழக்கரை வடக்குத் தெரு இடி மின்னல் மளிகை கடையில் இருந்து வடக்குத் தெரு தைக்கா செல்லும் சாலையில் கீழக்கரை பெண் மருத்துவர் அல் அம்ராவின் ‘அல் ஃபலா கிளினிக்’ இன்று (30.03.2018) வெள்ளிக்கிழமை மாலை 4.30 மணியளவில் இனிதே ஆரம்பமாகியது. இந்த துவக்க விழா நிகழ்ச்சியில் ஏராளமான பொதுமக்கள் கலந்து கொண்டு சிறப்பித்தனர்.

கீழக்கரை வள்ளல் சீதக்காதி சாலையில் செயல்பட்டு வரும் இஸ்லாமிய கல்வி சங்கத்தின் பாடதிட்டத்தின் கீழ் இயங்கும் அல் மத்ரஸத்துர் ராழியாவின் ஏழாம் ஆண்டு நிறைவு விழா நிகழ்ச்சி நேற்று (29.03.2018) இரவு 8:30 மணியளவில் இஸ்லாமிய கல்வி சங்க வளாகத்தில் நடைபெற்றது .

மத்ரஸாவின் ஐந்தாமாண்டு மாணவர் முஹம்மது ஸஃப்வான் கிராஅத் ஓதி நிகழ்ச்சியை ஆரம்பம் செய்தார். இந்த விழாவில் இஸ்லாமிய கல்வி சங்கத்தின் சட்ட ஆலோசகர் வழக்குரைஞர் முஹம்மது சாலிஹ் ஹுஸைன், மதரஸாவின் முன்னாள் பேராசிரியர் பிலால் ரியாஜி ஆகியோர் சிறப்பு விருந்தினர்களாக கலந்து கொண்டு உரையாற்றினார்.

இந்நிகழ்ச்சியில் அல் மத்ரஸத்துர் ராழியாவின் தாளாளர் அஜ்மல் கான், இஸ்லாமிய கல்விச் சங்கத்தின் நிர்வாகிகள் சகோதரர் முஹைதீன் அடுமை, அய்யுப் கான், முஹம்மது லாபிர் மத்ரஸாவின் ஆசிரியரகள் ஆலிம் நவ்ஸாத் அலி தாவூதி, ஆலிம் ஹுஸைன் மஸ்லஹி, ஆலிம் கஸ்ஸாலி சதகீ, ஆலிம் அப்துர் ரஹ்மான் ஆகியோர் முன்னிலை வகித்தனர்.

இந்நிகழ்ச்சியில் மாணவர்களுக்கு நடத்தப்பட்ட கிராஅத், பயான், வினாடி வினா, ப்ளாஷ் கார்டு, சொல் எழுத்து போட்டி போன்ற போட்டிகளில் வெற்றி பெற்ற மற்றும் கலந்து கொண்ட மாணவர்கள் அனைவருக்கும் பரிசுகள் வழங்கப்பட்டது. இந்த நிகழ்ச்சியை இஸ்லாமிய கல்விச் சங்கத்தின் தலைவர் சட்டப் போராளி ஆலிம் தவ்ஹீத் ஜமாலி அவர்கள் தொகுத்து வழங்கினார். நிகழ்ச்சிக்கான ஏற்பாடுகளை மத்ரஸாவின் நிர்வாகிகள் சகோதரர் சட்டப் போராளி சல்மான் கான், முஹம்மது சுஹைல் ஆகியோர் சிறப்பாக செய்திருந்தனர். பரிசுகளை மாணவர்கள் மகிழ்ச்சியுடன் பெற்றுக் கொண்டனர்.

இராமநாதபுரம் மாவட்ட அதிதீவிர குற்ற தடுப்புப் பிரிவு ஆய்வாளர் தனபாலன் தலைமையிலான போலீசார் மாவட்டம் முழுவதும் காணாமல்போன இருசக்கர வாகனங்கள் தொடர்பாக விசாரணை நடத்தியதில் ..
1)மணிகண்டன் 22/18,த/பெ கணேசன், 3/3377 பட்டினம் காத்தான்.

2)அருண்குமார் 22/18 த/பெஅங்குசாமி, 11/1658, மேற்கு தெரு தெற்கு காட்டூர்.

3)அருண்பிரசாத் 20/18 த/பெ ஸ்ரீதர், மேற்கு தெரு, சாத்தான்குளம் ஆகியோரும்…

அதே போல் சங்கந்தியான்வலசையை சேர்ந்த சிறுவன் உள்ளிட்ட நான்கு பேர்கள் இருசக்கர வாகனங்களை திருடி விற்றுவிட்டதாக தெரிய வந்தது.

மேற்படி நான்கு பேரை பிடித்து விசாரித்ததில் கேணிக்கரை ,பஜார், ஏர்வாடி ,தொண்டி, மற்றும் இராமேஸ்வரம் துறைமுக காவல் நிலையத்திற்குட்பட்ட பகுதிகளில் 11 இருசக்கர வாகனங்களையும் திருடி விற்றதை ஒப்புக் கொண்டனர். அவர்கள் கொடுத்த தகவலின் அடிப்படையில் 11 இருசக்கர வாகனங்களும் மீட்கப்பட்டு மேல்நடவடிக்கைகாக சம்பந்தப்பட்ட காவல்நிலையங்களில் ஒப்படைக்கப்பட்டது.

இராமநாதபுரத்தில் ஐஸ்வர்யா கருத்தரித்தல் மையம் திறப்பு விழா நடைபெற்றது.

இவ்விழாவில் இந்திய மருத்துவ சங்க செயலாளர் டாக்டர் கலீல் ரஹ்மான், மருத்துவர் சுப்பிரமணியன், மருத்துவர் அலை பரசு, தமிழ் மாநில காங்கிரஸ் தலைவர் ரவி சந்திரராமவன்னி, முன்னாள் சட்டமன்ற உறுப்பினர் ஹசன் அலி உள்ளிட்ட முக்கியஸ்தர்கள் குத்துவிளக்கேற்றி துவக்கி வைத்தனர்.

இவ்விழாவிற்கு முன்னதாக கருத்தரித்தல் மைய சேர்மன் மருத்துவர் சந்திரலேகா அனைவரையும் வரவேற்றார். பொறியாளர் ராஜேஸ்கண்ணன் மற்றும் பல முக்கிய பிரமுகர்கள் கலந்து கொண்டனர்

இராமநாதபுரம் மாவட்டம் கீழக்கரையில் கீழக்கரை தஃவா குழு சார்பாக “கீழை அமைதி மற்றும் வழிகாட்டி மையம்” இன்று (25-03-2018) AK Complex, இரண்டாவது மாடியில் தொடங்கப்பட்டது.

இந்நிகழ்வில் சிறப்புரையை அஷ்ஷெய்க் அப்துல் மஜீத் மஹ்ளரி மற்றும் அஷ்ஷெய்க் அப்துர்ரஹ்மான் சதகி ஆகியோர் “கீழையில் மார்க்க கல்வியின் நிலை” மற்றும் “கீழை மக்களே அல்லாஹ்வின் பக்கம் அழைப்போம் வாருங்கள்” என்ற தலைப்பில் வழங்கினார்.

அமீரகத்தில் இருந்து தாவா குழுவின் தலைவர் முஹம்மது அஸாருதீன் மற்றும் செயலாளர் சட்டப் போராளி அஹமது அப்துல் காதர் ஆகியோர் வீடியோ காணொளி காட்சிகள் மூலமாக உரையாற்றினர். இந்நிகழ்ச்சியில் தாவா குழு அமைப்பின் அலுவலக மாதிரி புகைப்படம்  வெளியிடப்பட்டது இந்நிகழ்வில் ஆர்வமுள்ள ஏராளமான சகோதரர்கள் கலந்து கொண்டனர்.

முன்னதாக இந்நிகழ்ச்சியின் அறிமுக தொகுப்புரையை சட்டப் போராளிகள் முஹம்மது அஸாருதீன் மற்றும் ஹமீது பர்ஹான் சிறப்பாக பேசினர்.

ஜனநாயகத்தின் நான்காம் தூண்களாகிய பத்திரிகை மற்றும் ஊடக துறை என்பது சமூக பொறுப்புணர்வுடன் உண்மை செய்திகளை உடனுக்குடன் சாமானியனுக்கு கொண்டு செல்லும் மாபெரும் பணியினை செம்மையாக செய்து வரும் உன்னதமான துறையாகும். இதனை மென்மேலும் சிறப்புடன் செய்வதற்கு பத்திரிக்கையாளர்கள், ஊடகவியலாளர்கள், நிருபர்கள், எழுத்தாளர்கள், கட்டுரையாளர்கள் போன்றோரின் அர்ப்பணிப்பு எழுத்துக்களால் சொல்லி விட முடியாது.

இந்த பத்திரிகை துறை நண்பர்கள் அனைவரையும் ஒருங்கிணைத்து தமிழ்நாடு பிரஸ் & மீடியா ரிப்போர்ட்டர்ஸ் யூனியன் (தமிழ்நாடு பத்திரிகை ஊடகவியலாளர் யூனியன்) என்கிற பேரவை சென்னையை தலைமையிடமாக கொண்டு தமிழகமெங்கும் பல்வேறு மாவட்டங்களிலும் சிறப்பாக செயலாற்றி வருகிறது.

இந்நிலையில் கீழக்கரை ‘கீழை நியூஸ்’ அலுவலகத்திற்கு நேற்று வருகை தந்திருந்த தமிழ்நாடு பத்திரிகை ஊடகவியலாளர் யூனியனின் நிறுவனர், மாநில தலைவர், ‘சட்டம் ஒழுங்கு’ மற்றும் ‘புதுவை தேசம்’ உள்ளிட்ட மாத இதழ்களின் ஆசிரியர் டாக்டர் மு. சிவதமிழவன் அவர்களை கீழை நியூஸ் நிறுவனர் ஆசிரியர் அப்துல்லா செய்யது ஆப்தீன், கீழை நியூஸ் இணை ஆசிரியர் வழக்குரைஞர் முஹம்மது சாலிஹ் ஹுசைன் மற்றும் தமிழ்நாடு பிரஸ் & மீடியா ரிப்போர்ட்டர்ஸ் யூனியன் மாவட்ட நிர்வாகி, கீழை நியூஸ் நிருபர், புகைப்பட கலைஞர் ‘ரெட் மீடியா’ கார்த்தி உள்ளிட்டோர் சால்வை அணிவித்து வரவேற்றனர்.

இந்த சந்திப்பின் போது தற்கால ஊடக நிகழ்வுகள் மற்றும் எதிர்காலத்தில் பத்திரிக்கை துறையில் ஒருங்கிணைந்து ஆற்ற வேண்டிய பணிகள், எதிர்கொள்ள வேண்டிய இடர்பாடுகள் குறித்து ஆலோசனை செய்தனர்.

மேலும் எதிர் வரும் மார்ச் 31 அன்று சென்னையில் நடைபெறும் தமிழ்நாடு பிரஸ் & மீடியா ரிப்போர்ட்டர்ஸ் யூனியனின் பொதுக்குழு கூட்டத்தில் யூனியனில் அங்கம் வகிக்கும் அனைத்து பத்திரிக்கையாளர்களும் கீழை நியூஸ் மீடியாவுக்கு ஆதரவு அளிக்கும் அறிவிப்பினை மாவட்ட நிர்வாகி ரெட் மீடியா கார்த்தி செய்வது என்றும் கீழை நியூஸ் சம்பந்தமான அறிமுக கையேட்டினை பொதுக் குழுவில் பங்கேற்கும் அனைத்து பத்திரிக்கை மற்றும் ஊடகத் துறை நண்பர்களுக்கும்   வழங்குவது என்றும் முடிவு செய்யப்பட்டது.

புதுக்கோட்டை மாவட்டத்தில் விளையும் பலாப் பழம் என்றாலே அது தனி சுவை தான். பலாப் பழ பிரியர்களின் பிரத்யேக பட்டியலில் புதுக்கோட்டை பலாப் பழங்கள் மட்டுமே என்றும் முன்னிலையில் இருக்கிறது. வருடம் தோறும் புதுக்கோட்டையில் இருந்து கொண்டு வரப்படும் பலா பழங்கள், ராமநாதபுரம், கீழக்கரை, உச்சிப்புளி, மண்டபம், ராமேஸ்வரம் பகுதிகளில் சாலையோரங்களில் குவித்து வைத்து விற்பனை செய்யப்படுகிறது.

புதுக்கோட்டை மாவட்டம் ஆவணம் கை காட்டி, கீரமங்கலம், கொத்தமங்கலம், குளமங்கலம், வடகாடு, மாங்காடு, மற்றும் அதனை சுற்றியுள்ள கிராமங்களில் விளையும் தித்திக்கும் சுவை மிகுந்த பலாப் பழங்கள் இராமநாதபுரம் மாவட்டம் முழுவதும் விற்பனைக்கு கொண்டு வருவது வழக்கம்.

இந்நிலையில் தற்போது புதுக்கோட்டை பகுதிகளில் இருந்து மினி வேன் மூலம் கீழக்கரை பகுதிக்கு விற்பனைக்காக கொண்டு வந்திருக்கும் பலாப்பழங்களை பலாப்பழ பிரியர்கள் ஆர்வமுடன் வாங்கி செல்கின்றனர். பலாப்பழம் ஒன்றுக்கு ரூ.60 முதல் ரூ.200 வரை விற்பனை செய்யப்படுகிறது.

தேசிய கட்சியான சோஷியல் டெமோக்ரடிக் பார்ட்டி ஆப் இந்தியாவின் கீழக்கரை நகர் புதிய கிளை மற்றும் நகர் நிர்வாகிகள் தேர்வு செய்வதற்கான சிறப்பு கூட்டம் மாவட்ட தலைமை நிர்வாகி ஜெமீல் தலைமையில் நேற்று 18.03.2018 அன்று சேரான் தெரு கீழை மர செக்கு உற்பத்தி நிலைய அரங்கில் சிறப்பாக நடைபெற்றது.

இக்கூட்டத்தில் கீழக்கரை நகர் SDPI. கட்சியின் உட் கட்சி தேர்தல் புதிய கிளை மற்றும் நகர் நிர்வாகிகள் ஏக மனதாக தேர்வு செய்யபட்டனர்.

புதிய நிர்வாகிகளின் விபரம் பின்வருமாறு :

நகர் தலைவர் –  கீழை அஸ்ரப்
நகர் துணை தலைவர் –  சட்டப் போராளி நூருல் ஜமான்
நகர்.செயலாளர் – அப்துல் காதர்
நகர் இணை செயலாளர் – வருசை இப்ராஹீம்
நகர் பொருளாளர் – ஜகுபர் சாதிக்

கமிட்டி-உறுப்பினர்கள் :

SVM. அஸ்ரப், அஹமது நதீர்
முஃபிஸ் முபஸல், சுபைர்ஆபிதீன், ஹமீதுபைசல், ஹாஜா அலாவுதீன் ஆகியோர் ஏகமனதாக தேர்தெடுக்கபட்டனர்….

கீழக்கரை நகரின் முக்கிய பிரச்சனைகளுக்கு சட்ட ரீதியில் ஜனநாயக வழியில் தீர்வு காண்பதற்காக ‘கீழக்கரை சட்டப் போராளிகள்’ என்கிற பெயரில் வாட்சப் குழுமம் கடந்த 2016 ஆம் ஆண்டு நவம்பர் 6 ஆம் தேதி கீழை நியூஸ் நிர்வாகத்தினரால் துவங்கப்பட்டது.

இந்த தளம் வாயிலாக அரசு சார்ந்த உள்ளூர் பிரச்சனைகளுக்கு நிரந்தர தீர்வினை ஏற்படுத்தும் வகையில் தகவல் அறியும் உரிமை சட்டம் விண்ணப்ப பயிற்சி, மாவட்ட ஆட்சியர் அலுவலகத்திற்கு ஆன்லைன் பெட்டிஷன், தமிழக முதலமைச்சரின் தனிப்பிரிவு ஆன்லைன் பெட்டிஷன், ஒருங்கிணைந்த மத்திய மாநில அரசு துறையினருக்கான ஆன்லைன் பெட்டிஷன், RTI ஆன்லைன் பெட்டிஷன் போன்ற அத்தியாவசிய பெட்டிஷன் செய்வதற்கான ஆன்லைன் பயிற்சிகள் வழங்கப்பட்டு வருகிறது.

இது போன்ற ஆக்கபூர்வ செயல்பாடுகள் மூலமாக வெளிநாட்டில் வசிக்கும் கீழக்கரை நண்பர்களும் ஆன்லைன் மூலம் வெளிநாட்டில் இருந்தபடியே உள்ளூர் பிரச்சனைகளுக்காக குரல் கொடுத்து தொடர் முயற்சிகளில் ஈடுபடுவதன் மூலம் நம் மக்களுக்கு கிடைக்க வேண்டிய அடிப்படை உரிமைகளை பெற முடிகிறது.

குறிப்பாக நகராட்சி, அரசு பொது மருத்துவமனை, மின்சார வாரியம், தாலுகா அலுவலம் உள்ளிட்ட அரசுத் துறை அலுவலகங்களின் மூலம் பொது மக்களுக்கு கிடைக்க வேண்டிய நலத் திட்டங்கள், நகர்ப்புற வளர்ச்சி மற்றும் மேம்பாட்டு அத்தியாவசிய பணிகள் உள்ளிட்ட செயல்பாடுகளை நூறு சதவீதம் நம் மக்களுக்கு இலஞ்ச லாவண்ய ஊழல்களுக்கு அப்பாற்பட்டு தங்கு தடையின்றி கிடைப்பதற்கான முயற்சிகளை நூறு சட்டப் போராளிகளை உருவாக்கி, அவர்களுக்கு உரிய சட்டப் பயிற்சி அளித்து  தொடர்ந்து முன்னெடுத்து வெற்றி கண்டு வருகிறது.

இந்நிலையில் கீழக்கரை சட்டப் போராளிகள் குழுமத்தின் ‘நாங்க… நூறு பேரு’ சந்திப்பு மற்றும் கலந்துரையாடல் நிகழ்ச்சி கடந்த வியாழக் கிழமை (08.03.2018) இரவு 7 மணியளவில் ஆலீம் புலவர் பவாஸ் வணிக வளாக கட்டிடத்தில் இயங்கும் சினர்ஜி இன்டர்நெஷனல் இன்ஸ்டிடியூட் அரங்கத்தில் சிறப்பாக நடைபெற்றது. இந்நிகழ்ச்சியில் கீழக்கரையில் வசிக்கும் ஏராளமான சட்டப் போராளிகள் கலந்து கொண்டு சிறப்பித்தனர்.

இந்நிகழ்ச்சியினை இஸ்லாமிய கல்வி சங்கத்தின் தலைவர் அல் பையினா அகாடமியின் பேராசிரியர் சட்டப் போராளி ஆலீம் தவ்ஹீத் ஜமாலி கிராத் ஓதி துவங்கி வைத்தார். கிழக்குத் தெரு ஜமாஅத் துணை பொருளாளர் சட்டப் போராளி முஹம்மது அஜிஹர் தலைமையேற்று தலைமை உரை நிகழ்த்தினார்.

விடுதலை சிறுத்தைகள் கட்சியின் நகர் செயலாளர் சட்டப் போராளி ஹமீது யூசுப் வரவேற்புரை பேசினார். சட்டப் போராளிகள் குழுமத்தின் நிர்வாகி சட்டப் போராளி அப்துர் ரஹ்மான் அறிமுக உரையாற்றினார். சட்டப் போராளிகள் குழுமத்தின் ஒருங்கிணைப்பாளர் முஹம்மது சாலிஹ் ஹுசைன் ”சட்டப் போராளிகள் இது வரை சாதித்து என்ன..? சட்டப் போராளிகளின் தற்போதைய நிலை மற்றும் எதிர்கால திட்டமிடல்” என்கிற தலைப்பில் சிறப்புரை நிகழ்த்தினார்.

அதனையடுத்து தமிழ்நாடு மற்றும் புதுச்சேரி பார் கவுன்சிலில் வழக்கறிஞராக பதிவு பெற்ற சட்டப் போராளிகள் ஒருங்கிணைப்பாளருக்கு வாழ்த்து தெரிவிக்கப்பட்டது. அதனை தொடர்ந்து சட்டப் போராளிகளுடனான அறிமுகம், கலந்தாய்வு மற்றும் ஆலோசனை நிகழ்ச்சி சிறப்பாக நடைபெற்றது. இந்நிகழ்ச்சியில் பின்வரும் முக்கிய தீர்மானங்கள் நிறைவேற்றப்பட்டது.

1) சங்கப்பதிவுகள் சட்டப்படி ‘கீழக்கரை சட்டப் போராளிகள் இயக்கம்’ என்கிற பெயரில் உரிய முறைப்படி பதிவு செய்து அரசாங்க பதிவு பெற்ற இயக்கமாக உருவாக்குவது.

2) இஸ்லாமிய ஷரியத் சட்டம், இந்திய அரசியலமைப்பு சட்டம், தகவல் அறியும் உரிமை சட்டம், மாவட்ட நகராட்சிகள் சட்டம் உள்ளிட்ட சட்டங்களை சாமானியனும் அறிந்து கொள்ளும் வகையில் சட்ட பயிற்சி வகுப்புகள் நடத்துவது.

3) கீழக்கரை நகரின் பிரச்சனைகளை உடனுக்குடன் அரசின் கவனத்திற்கு கொண்டு செல்லும் வகையில் தமிழக முதலமைச்சரின் தனிப் பிரிவு ஆன்லைன் பெட்டிஷன், மாவட்ட ஆட்சியரின் குறை தீர்க்கும் நாள் பெட்டிசன்கள் உள்ளிட ஆன்லைன் பெட்டிசன்கள் குறித்து விழிப்புணர்வு ஏற்படுத்துவது.

4)சிறுபான்மையினர் உரிமைகளை நிலை நாட்டும் வகையில் சிறுபான்மையினருக்கான மத்திய மாநில அரசின் நலத் திட்ட உதவிகளை பெறுவதற்கான வழிகாட்டுதல்களை பொதுமக்களுக்கு வழங்குவது.

5) முதியோர், விதவைகள், மாற்றுத்திறனாளிகளுக்கான அரசின் நலத் திட்டங்களை பெறுவதற்கான வழிமுறைகள் குறித்து விழிப்புணர்வு ஏற்படுத்துவது.

6) மாணவர்கள் மத்தியில் சட்டப் படிப்பின் முக்கியத்துவத்தை வலியுறுத்துவதோடு நல்ல சமுதாயத்திற்கான சிறந்த வழக்கறிஞர்களை உருவாக்குவது உள்ளிட்ட பல்வேறு கோரிக்கைகள் ஏகமனதாக நிறைவேற்றப்பட்டது.

இந்நிகழ்ச்சியின் நிறைவாக கீழை மர செக்கு நிறுவனத்தின் முதன்மை நிர்வாகி சட்டப் போராளி நூருல் ஜமான் நன்றியுரை பேசினார். சட்டப் போராளிகளின் ‘நாங்க நூறு பேரு’ சந்திப்பு நிகழ்ச்சியினை சட்டப் போராளி முஸம்மில் இபுறாகீம் தொகுத்து வழங்கினார்.