சந்திப்பு

கீழக்கரை வட்டாட்சியர் அலுவலகத்தில் பணி நேரத்தில் அதிகாரிகள் தங்கள் இருக்கைகளில் இல்லாததால் தாலுகா அலுவலகத்திற்கு பல்வேறு அரசு நலத் திட்டங்களுக்கு விண்ணப்பிப்பதற்காக வரும் பொதுமக்கள் பெரும் அவதி அடைந்து வருவதை சுட்டிக் காட்டி கடந்த மாதம் மாண்புமிகு தமிழக முதலமைச்சரின் தனிப் பிரிவிற்கு கீழக்கரை ‘சட்ட விழிப்புணர்வு இயக்கம்’ சார்பாக 65 க்கும் மேற்பட்ட சட்டப் போராளிகள் மனு செய்திருந்தனர்.

அதே போல் கீழக்கரை மக்கள் நல பாதுகாப்புக் கழகம், இந்திய தவ்ஹீத் ஜமாஅத் உள்ளிட்ட சமூக நல அமைப்பினர் மாவட்ட ஆட்சியரின் மக்கள் குறை தீர்க்கும் நாளில் கீழக்கரை தாலுகா அலுவலக அதிகாரிகள் சம்பந்தமாக புகார் அளித்து இருந்தனர்.

இந்நிலையில் இராமநாதபுரம் வருவாய் கோட்டாட்சியர் முன்னிலையில் ஆஜராகி மனுதாரர்கள் விளக்கமளிக்க அழைப்பு தரப்பட்டு இருந்தது. இதனையடுத்து நேற்று 09.05.2018 புதன் கிழமை காலை 10.30 மணியளவில் வருவாய் கோட்டாட்சியர் திரு ரெ.சுமன் முன்னிலையில் விசாரணைக்கு ஆஜரான சட்ட விழிப்புணர்வு இயக்கத்தின் சட்டப் போராளிகள், கீழக்கரை வட்டாட்சியர் அலுவலகத்தில் பணி நேரத்தில் அதிகாரிகள் இல்லாதது குறித்து தமிழக முதல்வரின் தனிப் பிரிவிற்கு செய்யப்பட்ட புகார் மனு மீது உரிய மேல் நடவடிக்கை எடுக்க வலியுறுத்தி உள்ளனர்.

மேலும் வருவாய் கோட்டாட்சியரிடம் கீழக்கரை தாலுகா அலுவலக அதிகாரிகள் குறித்து பின் வரும் குற்றச்சாட்டுக்களையும் கோரிக்கைகளையும் முன் வைத்து விளக்கமான மனு அளித்துள்ளனர். அதன் சாராம்சம் பின்வருமாறு :

மனுதாரர்களின் குற்றச்சாட்டுகள் :

1. கீழக்கரை தாலுகா அலுவலகத்தில் பணியாற்றும் அதிகாரிகள் தங்கள் பணிக்கு காலை 11 மணிக்கு மேல் மிக தாமதமாக அலுவலகத்திற்கு வருகின்றனர்.

2. வேலை நேரத்தில் அதிகாரிகள், தங்கள் இருக்கைகளில் அரை மணி நேரம் கூட அமர்ந்து பணி செய்வது இல்லை.

3. வட்டாட்சியர் மற்றும் துணை வட்டாட்சியர் பணி நேரங்களில் எங்கு இருக்கின்றனர் என்று பொதுமக்களுக்கு தெரியவில்லை.

4. இளநிலை அதிகாரிகள், கணக்காளர்கள் மற்றும் உதவியாளர்கள் அலுவலக வேலை நேரங்களில் அலுவலகத்தில் பணி செய்யாமல், சொந்த வேலைகளை செய்ய வீட்டுக்கு சென்று விடுகின்றனர்.

5. பல்வேறு அரசு சான்றிதழ்கள் மற்றும் அரசின் நலத் திட்ட உதவிகள் பெறுவதற்காக கீழக்கரை உள்ளிட்ட சுற்றுவட்டார கிராம ஊராட்சிகளில் இருந்து கீழக்கரை தாலுகா அலுவலகம் வரும் பாமர மக்கள் நாள்தோறும் அலைக்கழிக்கப்பட்டு சொல்லொண்ணா துயரம் அடைந்து வருகின்றனர்.

6. கீழக்கரை தாலுகா அலுவலகம் வரும் பொதுமக்களின் கோரிக்கைகளை, சம்பந்தப்பட்ட அதிகாரிகள் கனிவுடன் விசாரித்து நடவடிக்கை எடுக்காமல் மெத்தனப் போக்கில் செயல்படுகின்றனர்.

மனுதாரர்களின் கோரிக்கைகள் :

1. கீழக்கரை தாலுகா அலுவலகத்தில் வேலை நேரத்தில் தாலுகா அதிகாரிகள் அனைவரும் சரியான நேரத்தில் அலுவலகத்திற்கு வருவதை உறுதி செய்ய பயோமெட்ரிக் வருகை பதிவினை பொருத்த வேண்டும்.

2. அதிகாரிகள் தங்கள் இருக்கைகளில் அமர்ந்து பணியாற்றுவதை கண்காணிக்க  தாலுகா அலுவலகத்தில் முப்பரிமாண CCTV கேமரா அமைக்க வேண்டும்.

3. அலுவலக வேலை நேரங்களில், தாலுகா வேலை காரணமாக வெளியே செல்லும் இளநிலை அலுவலர்களை கண்காணிக்க உரிய பதிவேட்டில் அலுவலகத்தை விட்டு வெளியே செல்வதற்கான காரணத்தை பதிவதற்கு உத்தரவிட வேண்டும்.

4. கீழக்கரை தாலுகாவில் களப் பணிகள் மற்றும் சிறப்பு தளப் பணிகள் ஆற்றுவதற்காக அலுவக வேலை நேரங்களில் வெளியே செல்லும் வட்டாட்சியர் மற்றும் துணை வட்டாட்சியர் உரிய அறிவிப்புப் பலகையில், தான் வெளியே செல்வதற்கான காரணம், தாலுகா அலுவலகத்திற்கு திரும்பி வரும் நேரம் குறித்து அறிவிப்பு செய்து பொதுமக்களுக்கு தெரிவிக்க வேண்டும்.

5. கீழக்கரை தாலுகா அலுவலகத்திற்கு வந்து செல்லும் பொதுமக்களை, அவர்கள் மன உளைச்சலுக்கு ஆளாகாத வண்ணம், உரிய அதிகாரிகள் கனிவுடன் விசாரித்து, சரியான வழிமுறைகளை மற்றும் வழிகாட்டுதல்களை வழங்கி, தாலுகா அலுவலக புரோக்கர்களிடம் ஏமாறுவதில் இருந்து பொதுமக்களை காப்பாற்ற வேண்டும்.

அதே போல் கீழக்கரை தாலுகா அலுவலகத்தில், திடீர் ஆய்வுகளை மேற்கொண்டு, வேலை நேரத்தில் பணியில் இல்லாத அதிகாரிகளை கண்டறிந்து துறை ரீதியான நடவடிக்கை மேற்கொள்ளுமாறும், சம்பந்தப்பட்ட அதிகாரிகளை உரிய விசாரணை செய்து பொதுமக்களின் மன உளைச்சலை போக்குமாறும் கேட்டுக் கொள்கிறோம்.

மேலும் உச்ச நீதிமன்ற வழக்கு எண் 6237/1990 தீர்ப்பு நாள் : 05.11.1993 லக்னோ வளர்ச்சி அதிகாரக் குழு -Vs- M.K.குப்தா என்பவர் வழக்கில் ‘ஒரு அரசாங்க பணிக்கு யார் பொறுப்பு’ என்பதனை சட்டப் பூர்வமாக அறிவித்துள்ளது. ஆகவே மரியாதைக்குரிய வருவாய் கோட்டாட்சியர் அவர்கள் பொதுநலன் சார்ந்த இந்த மனு மீது உரிய மேல் நடவடிக்கை எடுக்குமாறு கேட்டுக் கொள்கிறோம்.” இவ்வாறு அந்த மனுவில் தெரிவிக்கப்பட்டு உள்ளது.

கீழக்கரை புதுத்தெருவை சேர்ந்த சகோதரர்கள் முகம்மது சஹீது, சித்திக் இபுறாகீம், ஃபவுசுல் அலியுர் ரஹ்மான் ஒன்றிணைந்து ‘ஸ்பைஸி ஹலால்’ என்கிற பெயரில் துணை உணவு தயாரிப்பு நிறுவனத்தினை துவங்கி சிறப்பாக செய்து வருகின்றனர். உள்ளூரில் தரமான மூலப் பொருள்களுடன், கை தேர்ந்த சமையல் கலைஞர்களின் கண்காணிப்பில், பக்குவமாக தயாரிக்கப்படும் மாசிப் பொரியல், இறால் பொரியல், நெத்திலி பொரியல், சென்னா கூனி பொரியல் உள்ளிட்ட அசத்தும் பொரியல் வகையறாக்களை வாங்கி ருசிக்கும் ‘ஸ்பைசி ஹலால்’ பிரியர்கள், இந்த பொரியல் வகைகள் தங்கள் சாப்பாட்டு தட்டில் இல்லாமல் மதிய உணவினை சாப்பிடுவதே இல்லை.

அது போல் கடல் தாண்டி வளைகுடா உள்ளிட்ட நாடுகளுக்கு செல்லும் ‘ஸ்பைசி ஹலால்’ பிரியர்கள் தங்களோடு இந்த நாவிற்கினிய பொரியல் வகையறாக்களுக்கும் சேர்த்து விமான டிக்கெட்டு எடுத்து விடுகின்றனர். ‘ஸ்பைசி ஹலால்’ நிறுவனத்தின் தயாரிப்புகள் அனைத்தும் வாடிக்கையாளர்கள் ருசிப்பதற்கு இலகுவாக தயார் நிலையில் இருப்பதால் மீண்டும் சமைக்க வேண்டியதில்லை. அப்படியே சாப்பிடுவதற்கு ஏதுவாக இருப்பது குறிப்பிடத்தக்கது. இதனால் ரமலான் நோன்பு காலங்களில் இஸ்லாமிய மக்களால் பெரிதும் வரவேற்பை பெற்றிருக்கிறது.

கீழக்கரை தொதல், பணியம், ஓட்டுமா, கலகலா வரிசையில் இப்போது ‘ஸ்பைஸி ஹலால்’ உணவு தயாரிப்புகளும் பிரபலமாகி வருகிறது. வெளி நாடுகளில் வசிக்கும் நம் கீழக்கரைவாசிகள், ஒவ்வொரு முறை விடுமுறையில் வரும் போதும், இந்த ஸ்பைஸி ஹலால் உணவு வகைகளை வாங்கி சென்று தங்களுடன் பணி செய்யும் நண்பர்களுக்கு பரிசளிப்பது வழக்கமாகி வருகிறது.

இது மட்டுமல்லாமல் சுத்தம் செய்யப்பட்ட மாசித் தூள், இறால் கருவாடு, நெத்திலி கருவாடு, சென்னா கூனி கருவாடு உள்ளிட்ட தித்திக்கும் துணை உணவு வகை தயாரிப்புகளும் இங்கு கிடைக்கிறது. தற்போது கீழக்கரை, இராமநாதபுரம் நகரின் சிறப்பங்காடிகள் மட்டுமல்லாது தமிழகமெங்கும் இந்த ‘ஸ்பைஸி ஹலால்’ உணவு வகைகள் அனைத்து கடைகளிலும் முக்கிய இடத்தை பிடித்து வாடிக்கையாளர்களை கவர்ந்து வருகிறது. அதே போல் திருவனந்தபுரம், நாகர்கோயில், திருநெல்வேலி, பாண்டிச்சேரி, கோயம்பத்தூர் நகரங்களில் இருக்கும் போத்தீஸ் சூப்பர் ஸ்டார் சிறப்பங்காடிகளிலும் இந்த ‘ஸ்பைஸி ஹலால்’ உணவு தயாரிப்புகள் கிடைக்கிறது.

இது குறித்து ‘ஸ்பைஸி ஹலால்’ நிறுவனர்களில் ஒருவரான பவுசுல் அலியுர் ரஹ்மான் கூறுகையில் ”இறைவனுடைய அருளால் எங்கள் நிறுவனத்தின் தயாரிப்புகள் கடல் கடந்து அனைவராலும் நேசிக்கப்படுகிறது. கடந்த 5 ஆண்டுகளாக ஸ்பைசி ஹலாலின் பொருட்கள் மட்டுமே பெரும்பாலோருக்குத் தெரியும், முதன் முதலாக ஸ்பைசி ஹலாலின் உரிமையாளர்களையும் இவ்வுலகுக்கு கீழை நீயூஸ் டி.வி மூலம் அறிமுகப்படுத்திய அல்லாஹுக்கே எல்லாப் புகழும். கீழை நீயூஸ் டி.விக்கு எங்களின் நன்றியை தெரிவித்துக் கொள்கிறோம். வாடிக்கையாளர்கள் உங்கள் மேலான ஆதரவை தொடர்ந்து எங்கள் நிறுவனத்திற்கு தர வேண்டும்.” என்று தெரிவித்தார்.

‘ஸ்பைஸி ஹலால்’ நிறுவனத்தாரின் வியாபாரம் செழிக்க கீழை நியூஸ் வலைத்தளம் சார்பாக மனமார்ந்த வாழ்த்துக்களைத் தெரிவித்துக் கொள்கிறோம்.

இராமநாதபுரம் மாவட்ட ஆட்சியர் அலுவலகத்தில் நேற்று (26.03.2018) எரிவாயு உருளை விநியோக குறைதீர்க்கும் கூட்டம் நடைபெற்றது. மாவட்ட வருவாய் அதிகாரி (D R O) முத்துமாரி தலைமையில் நடைபெற்ற இந்த குறை தீர்க்கும் கூட்டத்தில் சட்டப் போராளிகள் இயக்கம் சார்பாக புகார் மனு கொடுக்கப்பட்டது.

இந்த கூட்டத்தில் மக்கள் நல பாதுகாப்புக் கழகத்தின் செயலாளர் சட்டப் போராளி முகைதீன் இப்ராகீம், கீழக்கரை சட்ட போராளிகள் தளத்தின் ஒருங்கிணைப்பாளர் வழக்கறிஞர் முகம்மது சாலிஹ் ஹூசைன் உள்ளிட்ட ஏராளமானோர் கலந்து கொண்டு தங்கள் குறைகளை நேரடியாக தெரிவித்தனர். கேஸ் சிலிண்டர் வினியோக குறைகளை கேட்டறிந்த மாவட்ட வருவாய் அதிகாரி, புகாரை மனுவாக அளிக்கும் படி சட்டப் போராளிகளை கேட்டு கொண்டார். அதனடிப்படையில் புகார் மனு அளிக்கப்பட்டது.

அந்த புகார் மனுவில் ”கீழக்கரையில் தனியார் கேஸ் சிலிண்டருக்கு கூடுதல் கட்டணம் வசூலிக்கப்படுவது, கள்ள மார்க்கெட்டில் கேஸ் சிலிண்டர் விற்பனை செய்வது, எடை குறைவான கேஸ் சிலிண்டர் வினியோகம், கேஸ் சிலிண்டர் பதிவு செய்பவர்களுக்கு உரிய முறையில் சிலிண்டர்களை உடனடியாக விநியோகிக்காமல் இருப்பது, காலாவதியான கேஸ் சிலிண்டர் உருளைகளை வாடிக்கையாளர்களின் உயிருக்கு ஊரு விளைவிக்கும் வகையில் வினியோகிப்பது,

பொதுமக்கள் பள்ளி மாணக்கர்கள் நடமாடும் பகுதிகளில் எரிவாயு உருளைகளை பாதுகாப்பு இன்றி வைத்து விநியோகம் செய்வது” உள்ளிட்ட பிரச்சனைகள்  சம்பந்தமாக புகார் மனுவில்  தெரிவிக்கப்பட்டுள்ளது. புகார் மனுவை பெற்றுக்கொண்ட மாவட்ட வருவாய் அதிகாரி (D R O) முத்துமாரி விரைவில் உரிய விசாரணை செய்து நடவடிக்கை மேற்கொள்வதாக உறுதி அளித்தார்.

இராமநாதபுரம் மாவட்டம் கீழக்கரை மற்றும் சுற்றுவட்டார பகுதிகளில் தஞ்சை தொல்லியல் கழகத்தின் ஆராய்ச்சியாளர்கள், கீழக்கரை வரலாற்று ஆராய்ச்சியாளர் ஆனா மூனா சுல்த்தான் அவர்களுடன் இணைந்து பழங்கால கல்வெட்டுகளை கண்டறிந்து ஆய்வு மேற்கொண்டனர். தமிழகம் உலக வரலாற்று அரங்கில் ஒரு மைல் கல்லாக வரலாற்று ஆசிரியர்களால் இன்றும் பார்க்கப்பட்டு வருகின்றது. தமிழகத்தை சேர,சோழ,பாண்டிய மன்னர்கள் சிறப்புடன் ஆட்சி செய்து வந்துள்ளனர்.

இதற்கு முத்தாய்ப்பாக இராமநாதபுரம் மாவட்டம் மற்றும் சுற்றுவட்டார பகுதிகள் தமிழக வரலாற்றில் ஒரு மணிமகுடமாக விளங்கும் பகுதியாகும். இப்பகுதியில் வரலாற்றுச்சிறப்புமிக்க பல கட்டிடங்கள் மற்றும் பல அரியவகை வரலாற்று சான்றுகள் இன்னும் இந்த மாவட்டத்தின் நினைவுச் சின்னமாக திகழ்ந்து வருகின்றது. இந்த பகுதியை வீரமிக்க பாண்டிய மன்னர்கள் ஆண்டு வந்துள்ளனர்.

பன்நெடுங்காலங்கள் இந்திய நாட்டை அன்னிய மன்னர்கள் ஆட்சி செய்த போதிலும் கூட மதுரையில் இருந்து இராமநாதபுரம் வரை பாண்டிய பேரரசர்களை அவர்களால் வெல்ல முடியவில்லை. இப்படிப்பட்ட வீரம் நிறைந்த மண்ணாக இப்பகுதி விளங்கியது. இந்த தகவலை பறைசாற்றும் எண்ணற்ற கல்வெட்டுகளும், செம்பு பட்டயங்களும் இப்பகுதியில் நிறைந்து இருக்கிறது.

மன்னர்கள் ஆட்சியை முடிவுக்கு கொண்டு வந்த ஆங்கில ஏகாதிபத்திய பிரபுகளால் இந்தியாவின் சரித்திரங்கள் மறைக்கப்பட்டது போல் இப்பகுதி உண்மை சரித்திரங்களும் மறைக்கப்பட்டது. இப்பகுதியின் உண்மை சரித்திரத்தை உலகுக்கு பறைசாற்ற பல தொல்பொருள் ஆய்வாளர்கள் முயற்சி மேற்கொண்டு வருகின்றனர். இப்பகுதிளில் காணப்படும் வரலாற்றுச் சிறப்புமிக்க சான்றுகள், கல்வெட்டுகளை ஆய்வு செய்ய தஞ்சாவூர் தஞ்சை தொல்லியல் கழகத்தின் செயலாளர், பண்டைய வரலாறு மற்றும் தொல்லியல் முதுகலைத் துறை முனைவர் சு.இராசவேலு, தஞ்சை தொல்லியல் கழகத்தின் பதிப்புக்குழு உறுப்பினர் முனைவர் ந.அதியமான் ஆகியோர் கீழக்கரை வந்தனர்.

இவர்கள் முதலாவதாக கீழக்கரையை அடுத்த ஏர்வாடி அருகாமையில் இருக்கும் இதம்பாடல் கிராமத்திற்கு சென்று அங்கு இருக்கும் கல்வெட்டுகளையும், சிதிலமடைந்து காணப்படும் அக்கால கட்டிடங்களையும் ஆய்வு செய்தனர். இவர்களுடன் கீழக்கரை வரலாற்று ஆய்வாளர் ஆனா மூனா சுல்த்தான், கீழக்கரை வரலாற்று ஆர்வலர்கள் மக்கள் நல பாதுகாப்புக் கழகத்தின் செயலாளர் சட்டப் போராளி முகைதீன் இப்ராகீம், வழக்குரைஞர் சட்டப் போராளி முகம்மது சாலிஹ் ஹூசைன் ஆகியோர் உடன் சென்றனர்.

கீழக்கரை வரலாற்று ஆய்வாளர் ஆனா மூனா.சுல்தான் அவர்கள் கூறுகையில் ”இப்பகுதிகளில் பல வரலாற்று சான்றுகள் மறைக்கப்பட்டு பல தவறான தகவல்கள் பொதுமக்கள் கவனத்திற்கு புத்தக வடிவில் எழுதப்பட்டுள்ளது. உண்மையான வரலாற்று சான்றுகளை பொதுமக்கள் அறிந்து கொள்ள வேண்டும். இதற்கான ஆயத்தபணிகளாக கல்வெட்டுகளையும், சான்றுகளையும் முறையாக ஆய்வு செய்து பொதுமக்கள் கவனத்திற்கு கொண்டு வருவோம்” என்றார்.

ஜனநாயகத்தின் நான்காம் தூண்களாகிய பத்திரிகை மற்றும் ஊடக துறை என்பது சமூக பொறுப்புணர்வுடன் உண்மை செய்திகளை உடனுக்குடன் சாமானியனுக்கு கொண்டு செல்லும் மாபெரும் பணியினை செம்மையாக செய்து வரும் உன்னதமான துறையாகும். இதனை மென்மேலும் சிறப்புடன் செய்வதற்கு பத்திரிக்கையாளர்கள், ஊடகவியலாளர்கள், நிருபர்கள், எழுத்தாளர்கள், கட்டுரையாளர்கள் போன்றோரின் அர்ப்பணிப்பு எழுத்துக்களால் சொல்லி விட முடியாது.

இந்த பத்திரிகை துறை நண்பர்கள் அனைவரையும் ஒருங்கிணைத்து தமிழ்நாடு பிரஸ் & மீடியா ரிப்போர்ட்டர்ஸ் யூனியன் (தமிழ்நாடு பத்திரிகை ஊடகவியலாளர் யூனியன்) என்கிற பேரவை சென்னையை தலைமையிடமாக கொண்டு தமிழகமெங்கும் பல்வேறு மாவட்டங்களிலும் சிறப்பாக செயலாற்றி வருகிறது.

இந்நிலையில் கீழக்கரை ‘கீழை நியூஸ்’ அலுவலகத்திற்கு நேற்று வருகை தந்திருந்த தமிழ்நாடு பத்திரிகை ஊடகவியலாளர் யூனியனின் நிறுவனர், மாநில தலைவர், ‘சட்டம் ஒழுங்கு’ மற்றும் ‘புதுவை தேசம்’ உள்ளிட்ட மாத இதழ்களின் ஆசிரியர் டாக்டர் மு. சிவதமிழவன் அவர்களை கீழை நியூஸ் நிறுவனர் ஆசிரியர் அப்துல்லா செய்யது ஆப்தீன், கீழை நியூஸ் இணை ஆசிரியர் வழக்குரைஞர் முஹம்மது சாலிஹ் ஹுசைன் மற்றும் தமிழ்நாடு பிரஸ் & மீடியா ரிப்போர்ட்டர்ஸ் யூனியன் மாவட்ட நிர்வாகி, கீழை நியூஸ் நிருபர், புகைப்பட கலைஞர் ‘ரெட் மீடியா’ கார்த்தி உள்ளிட்டோர் சால்வை அணிவித்து வரவேற்றனர்.

இந்த சந்திப்பின் போது தற்கால ஊடக நிகழ்வுகள் மற்றும் எதிர்காலத்தில் பத்திரிக்கை துறையில் ஒருங்கிணைந்து ஆற்ற வேண்டிய பணிகள், எதிர்கொள்ள வேண்டிய இடர்பாடுகள் குறித்து ஆலோசனை செய்தனர்.

மேலும் எதிர் வரும் மார்ச் 31 அன்று சென்னையில் நடைபெறும் தமிழ்நாடு பிரஸ் & மீடியா ரிப்போர்ட்டர்ஸ் யூனியனின் பொதுக்குழு கூட்டத்தில் யூனியனில் அங்கம் வகிக்கும் அனைத்து பத்திரிக்கையாளர்களும் கீழை நியூஸ் மீடியாவுக்கு ஆதரவு அளிக்கும் அறிவிப்பினை மாவட்ட நிர்வாகி ரெட் மீடியா கார்த்தி செய்வது என்றும் கீழை நியூஸ் சம்பந்தமான அறிமுக கையேட்டினை பொதுக் குழுவில் பங்கேற்கும் அனைத்து பத்திரிக்கை மற்றும் ஊடகத் துறை நண்பர்களுக்கும்   வழங்குவது என்றும் முடிவு செய்யப்பட்டது.

கீழக்கரை நகரின் முக்கிய பிரச்சனைகளுக்கு சட்ட ரீதியில் ஜனநாயக வழியில் தீர்வு காண்பதற்காக ‘கீழக்கரை சட்டப் போராளிகள்’ என்கிற பெயரில் வாட்சப் குழுமம் கடந்த 2016 ஆம் ஆண்டு நவம்பர் 6 ஆம் தேதி கீழை நியூஸ் நிர்வாகத்தினரால் துவங்கப்பட்டது.

இந்த தளம் வாயிலாக அரசு சார்ந்த உள்ளூர் பிரச்சனைகளுக்கு நிரந்தர தீர்வினை ஏற்படுத்தும் வகையில் தகவல் அறியும் உரிமை சட்டம் விண்ணப்ப பயிற்சி, மாவட்ட ஆட்சியர் அலுவலகத்திற்கு ஆன்லைன் பெட்டிஷன், தமிழக முதலமைச்சரின் தனிப்பிரிவு ஆன்லைன் பெட்டிஷன், ஒருங்கிணைந்த மத்திய மாநில அரசு துறையினருக்கான ஆன்லைன் பெட்டிஷன், RTI ஆன்லைன் பெட்டிஷன் போன்ற அத்தியாவசிய பெட்டிஷன் செய்வதற்கான ஆன்லைன் பயிற்சிகள் வழங்கப்பட்டு வருகிறது.

இது போன்ற ஆக்கபூர்வ செயல்பாடுகள் மூலமாக வெளிநாட்டில் வசிக்கும் கீழக்கரை நண்பர்களும் ஆன்லைன் மூலம் வெளிநாட்டில் இருந்தபடியே உள்ளூர் பிரச்சனைகளுக்காக குரல் கொடுத்து தொடர் முயற்சிகளில் ஈடுபடுவதன் மூலம் நம் மக்களுக்கு கிடைக்க வேண்டிய அடிப்படை உரிமைகளை பெற முடிகிறது.

குறிப்பாக நகராட்சி, அரசு பொது மருத்துவமனை, மின்சார வாரியம், தாலுகா அலுவலம் உள்ளிட்ட அரசுத் துறை அலுவலகங்களின் மூலம் பொது மக்களுக்கு கிடைக்க வேண்டிய நலத் திட்டங்கள், நகர்ப்புற வளர்ச்சி மற்றும் மேம்பாட்டு அத்தியாவசிய பணிகள் உள்ளிட்ட செயல்பாடுகளை நூறு சதவீதம் நம் மக்களுக்கு இலஞ்ச லாவண்ய ஊழல்களுக்கு அப்பாற்பட்டு தங்கு தடையின்றி கிடைப்பதற்கான முயற்சிகளை நூறு சட்டப் போராளிகளை உருவாக்கி, அவர்களுக்கு உரிய சட்டப் பயிற்சி அளித்து  தொடர்ந்து முன்னெடுத்து வெற்றி கண்டு வருகிறது.

இந்நிலையில் கீழக்கரை சட்டப் போராளிகள் குழுமத்தின் ‘நாங்க… நூறு பேரு’ சந்திப்பு மற்றும் கலந்துரையாடல் நிகழ்ச்சி கடந்த வியாழக் கிழமை (08.03.2018) இரவு 7 மணியளவில் ஆலீம் புலவர் பவாஸ் வணிக வளாக கட்டிடத்தில் இயங்கும் சினர்ஜி இன்டர்நெஷனல் இன்ஸ்டிடியூட் அரங்கத்தில் சிறப்பாக நடைபெற்றது. இந்நிகழ்ச்சியில் கீழக்கரையில் வசிக்கும் ஏராளமான சட்டப் போராளிகள் கலந்து கொண்டு சிறப்பித்தனர்.

இந்நிகழ்ச்சியினை இஸ்லாமிய கல்வி சங்கத்தின் தலைவர் அல் பையினா அகாடமியின் பேராசிரியர் சட்டப் போராளி ஆலீம் தவ்ஹீத் ஜமாலி கிராத் ஓதி துவங்கி வைத்தார். கிழக்குத் தெரு ஜமாஅத் துணை பொருளாளர் சட்டப் போராளி முஹம்மது அஜிஹர் தலைமையேற்று தலைமை உரை நிகழ்த்தினார்.

விடுதலை சிறுத்தைகள் கட்சியின் நகர் செயலாளர் சட்டப் போராளி ஹமீது யூசுப் வரவேற்புரை பேசினார். சட்டப் போராளிகள் குழுமத்தின் நிர்வாகி சட்டப் போராளி அப்துர் ரஹ்மான் அறிமுக உரையாற்றினார். சட்டப் போராளிகள் குழுமத்தின் ஒருங்கிணைப்பாளர் முஹம்மது சாலிஹ் ஹுசைன் ”சட்டப் போராளிகள் இது வரை சாதித்து என்ன..? சட்டப் போராளிகளின் தற்போதைய நிலை மற்றும் எதிர்கால திட்டமிடல்” என்கிற தலைப்பில் சிறப்புரை நிகழ்த்தினார்.

அதனையடுத்து தமிழ்நாடு மற்றும் புதுச்சேரி பார் கவுன்சிலில் வழக்கறிஞராக பதிவு பெற்ற சட்டப் போராளிகள் ஒருங்கிணைப்பாளருக்கு வாழ்த்து தெரிவிக்கப்பட்டது. அதனை தொடர்ந்து சட்டப் போராளிகளுடனான அறிமுகம், கலந்தாய்வு மற்றும் ஆலோசனை நிகழ்ச்சி சிறப்பாக நடைபெற்றது. இந்நிகழ்ச்சியில் பின்வரும் முக்கிய தீர்மானங்கள் நிறைவேற்றப்பட்டது.

1) சங்கப்பதிவுகள் சட்டப்படி ‘கீழக்கரை சட்டப் போராளிகள் இயக்கம்’ என்கிற பெயரில் உரிய முறைப்படி பதிவு செய்து அரசாங்க பதிவு பெற்ற இயக்கமாக உருவாக்குவது.

2) இஸ்லாமிய ஷரியத் சட்டம், இந்திய அரசியலமைப்பு சட்டம், தகவல் அறியும் உரிமை சட்டம், மாவட்ட நகராட்சிகள் சட்டம் உள்ளிட்ட சட்டங்களை சாமானியனும் அறிந்து கொள்ளும் வகையில் சட்ட பயிற்சி வகுப்புகள் நடத்துவது.

3) கீழக்கரை நகரின் பிரச்சனைகளை உடனுக்குடன் அரசின் கவனத்திற்கு கொண்டு செல்லும் வகையில் தமிழக முதலமைச்சரின் தனிப் பிரிவு ஆன்லைன் பெட்டிஷன், மாவட்ட ஆட்சியரின் குறை தீர்க்கும் நாள் பெட்டிசன்கள் உள்ளிட ஆன்லைன் பெட்டிசன்கள் குறித்து விழிப்புணர்வு ஏற்படுத்துவது.

4)சிறுபான்மையினர் உரிமைகளை நிலை நாட்டும் வகையில் சிறுபான்மையினருக்கான மத்திய மாநில அரசின் நலத் திட்ட உதவிகளை பெறுவதற்கான வழிகாட்டுதல்களை பொதுமக்களுக்கு வழங்குவது.

5) முதியோர், விதவைகள், மாற்றுத்திறனாளிகளுக்கான அரசின் நலத் திட்டங்களை பெறுவதற்கான வழிமுறைகள் குறித்து விழிப்புணர்வு ஏற்படுத்துவது.

6) மாணவர்கள் மத்தியில் சட்டப் படிப்பின் முக்கியத்துவத்தை வலியுறுத்துவதோடு நல்ல சமுதாயத்திற்கான சிறந்த வழக்கறிஞர்களை உருவாக்குவது உள்ளிட்ட பல்வேறு கோரிக்கைகள் ஏகமனதாக நிறைவேற்றப்பட்டது.

இந்நிகழ்ச்சியின் நிறைவாக கீழை மர செக்கு நிறுவனத்தின் முதன்மை நிர்வாகி சட்டப் போராளி நூருல் ஜமான் நன்றியுரை பேசினார். சட்டப் போராளிகளின் ‘நாங்க நூறு பேரு’ சந்திப்பு நிகழ்ச்சியினை சட்டப் போராளி முஸம்மில் இபுறாகீம் தொகுத்து வழங்கினார்.

கீழக்கரை நகராட்சிக்கு சில வாரங்களுக்கு முன்பு வசந்தி என்பவர் நகராட்சியின் புதிய ஆணையராக பொறுப்பேற்றுக் கொண்டார்.

புதிய நகராட்சி ஆணையாளர் வசந்தியை பல அரசியல் கட்சி பிரமுகர்கள் மற்றும் சமூக அமைப்பினர் சந்தித்து வாழ்த்துக்கள் தெரிவித்த வண்ணம் உள்ளனர். இன்று கீழக்கரை தமுமுக மற்றும் மமக நிர்வாகிகள் ஆணையரை சந்தித்து அவருடைய பணி சிறக்க வாழ்த்து கூறியதுடன், வாழ்கை நெறியான திருக்குர்ஆனும் பரிசளித்தார்கள்.

இச்சந்திப்பில் தமுமுக மற்றும் மமக நிர்வாகிகள் சிராஜ், நசீர், தாகா, சுல்தான், காசிம் மற்றும் ஏனைய நிர்வாகிகள் கலந்துகொண்டனர்.

கீழக்கரையில் கடந்த சில தினங்களாக மலேசிய தூதரக அதிகாரிகள் சுற்றுப் பயணம் மேற்கொண்டனர். இச்சுற்றுப்பயணத்தில் பல்வேறு வரலாற்று சிறப்பு மிக்க பகுதிகளை சுற்றிப்பார்த்தனர்.

அவர்களுடைய பயணத்தைப் பற்றி வரலாற்று ஆய்வாளர் அபூ சாலிஹ் கூறுகையில், கீழக்கரையில் இரவு நேரங்களில் நடந்தே சென்று கடைகளயும், உண்பண்டங்களையும் மிகவும் ரசித்ததோடு இல்லாமல், மலேசியாவின் சாயல் அதிகமாக இருப்பதாக வியந்தனர். மேலும் கீழக்கரை வரலாற்று அம்சங்கள் அடங்கிய புத்தகத்தை கீழக்கரை ஆர்வலர்களின் மலேசியா அதிகாரிகள் ஆர்வத்துடன் வேண்டுகோள் வைத்தனர்.

மேலும் மலேசியா தூதரக அதிகாரிகள் கீழக்கரையின் பாரம்பரிய இடங்களை மிகவும் ஆச்சரியத்துடனும், ஆர்வத்துடனும் சுற்றிப்பார்த்தனர். விரைவில் மலேசியாவுக்கும், இந்தியாவுக்கும் இடையான பாரம்பரிய உறவு பற்றிய குறும்படம் எடுக்கும் சம்பந்தமாக மேலும் மலேசிய அதிகாரிகள் கீழக்கரைக்கு வரவிருப்பதாகவும் தெரிவித்தார்கள். மலேசிய தூதரக அதிகாரிகளை கீழக்கரை சமூக ஆர்வலர்கள், வரலாற்று ஆய்வாளர்கள் அபு சாலிஹ் மற்றும் கட்டிட கலை நிபுனர் நூருல் ஹபீப் ஆகியோர்  இணைந்து அனைத்து பகுதிகளையும் சுற்றி காண்பித்தார்கள்.

கீழக்கரை தாலுகா அலுவலம் வந்து செல்வதற்கு பேருந்து வசதி செய்து தரப்படாததால் எக்கக்குடி பொதுமக்கள் பெரும் அவதி அடைந்து வருகின்றனர். நேரடி பஸ் வசதி இல்லாததால் பெண்களும், முதியவர்களும் கடுமையான மன உளைச்சலில் இருக்கின்றனர்.

கீழக்கரைக்கும் எக்ககுடி கிராமத்திற்கும் இடையே நேரடி பேருந்து வசதியினை உடனடியாக ஏற்படுத்த கோரி எக்ககுடி கிராம பொதுக்கள் சார்பாக எக்ககுடி ஜமாஅத் நிர்வாகிகள் முஹம்மது சிராஜுதீன், அஸ்கர் அலி ஆகியோர் பாராளுமன்ற உறுப்பினர் அன்வர் ராஜாவை சந்தித்து கோரிக்கை மனு கொடுத்தனர்.

இது குறித்து எக்ககுடி ஜமாஅத் கமிட்டி உறுப்பினர் முஹம்மது சிராஜுதீன் கூறுகையில் ”எக்ககுடி கிராமத்தில் இருந்து கீழக்கரை தாலுகாவிற்கு அரசு அலுவலக வேலைகளுக்காக தினமும் பலர் வந்து செல்கின்றனர். தற்போது இரண்டு பஸ் மாறி சென்று வர வேண்டியுள்ளது மேலும் பேருந்து நிலையங்களில் பல மணி நேரம் காத்திருந்து கீழக்கரை தாலுகா வர வேண்டியுள்ளது.

நேரடி பஸ் வசதி இருந்தால் எங்கள் கிராம பொதுமக்களின் கஷ்டங்கள் வெகுவாக குறையும். மேலும் எக்ககுடி, கொத்தங்குளம், நல்லாங்குடி, களரி, மேலமடை உள்ளிட்ட சுற்று வட்டார பகுதிகளை சேர்ந்த மாணவ, மாணவிகள் உத்திரகோசமங்கை பள்ளியில் படிக்கின்றனர். இந்த நேரடி பஸ் வசதி துவங்கப்பட்டால் அவர்களுக்கும் உதவியாக இருக்கும். அது மட்டுமல்லாது இந்த பகுதியில் இருந்து கீழக்கரை முகம்மது சதக் கல்வி  நிலையங்களில் படிக்கும் கல்லூரி  மாணவ மாணவிகளும் பயன்பெறுவர்.  தற்போது பாராளுமன்ற உறுப்பினர் அன்வர் ராஜாவை நேரடியாக சந்தித்து எங்களின் கோரிக்கையை வைத்திருக்கிறோம். விரைவில் நேரடி பஸ் வசதி செய்து தர முயற்சிப்பதாக உறுதி அளித்திருக்கிறார்.” என்று தெரிவித்தார்.

பன்னெடுங்காலமாக தொடர்ந்து வரும் இந்திய-மலேசிய முஸ்லிம்களின் இணைபிரியா தொடர்புகள் இன்றளவும் தொட்டுத் தொடருகிறது. இது குறித்த ஆவண படம் ஒன்றினை மலேசிய அரசு சார்பாக விரைவில் வெளிவர இருக்கிறது. இதன் முன்னோடியாக மலேசிய இந்திய முஸ்லிம் தேசிய பேரவை (பெர்மிம்) தாய்-சபை யினர் கீழக்கரை நகருக்கு வருகை தந்து அதன் தொன்மையை பற்றி ஆய்வு செய்தனர்.

மலேசிய அரசின் அங்கீகாரம் பெற்ற மலேசிய இந்திய முஸ்லீம்களின் அரசு சாரா அமைப்புகளின் தாய் சபையான பெர்மிம் பேரவை, மலேசிய இந்திய முஸ்லிம்களின் 40 க்கும் அதிகமான அமைப்புகளின் தாய் சபையாகும்.

கீழக்கரைக்கு வருகை தந்திருக்கும் மலேசிய இந்திய முஸ்லிம் தேசிய பேரவை சபையின் தலைவர் ஹாஜி. தாஜுதீன், பொருளாளர் ஹமித் ஜபருல்லா, உருப்பிணர் சைய்து முகமத், மலேசிய இஸ்லாமிய அமைச்சக பிரிவின் ஒளிப்பதிவாளர் முஹம்மது சாஆத் பின் அப்துல்லாஹ் உள்ளிட்டோர் கீழக்கரையின் தொன்மையை ஆய்வு செய்து படம் பிடித்தனர்.

முன்னதாக கீழக்கரை தாஸிம்பீவி மகளிர் கல்லூரியின் முதல்வர் பேராசிரியர்.டாக்டர் சுமையா தாவுத், சீதக்காதி டிரஸ்ட் மேலாளர் தாவூத்கான், வரலாற்று ஆய்வாளர் செய்யது அபுசாலிஹ், பொற்கிழி விருது பெற்ற சகோதரர்கள் கவிஞர் அப்துல் ஹக்கிம், தென்பாண்டி சீமையிலே, ஆட்சி பீடம் ஆசிரியர் அப்துர் ரஜாக் உள்ளிட்டோர் கலந்து கொண்டு அவர்களை வரவேற்றனர்.

இது குறித்து கீழக்கரை வரலாற்று ஆய்வாளர் செய்யது அபுசாலிஹ் கூறுகையில் ”மலேசிய வாழ் இந்திய முஸ்லீம்களின் தொடர்பு என்பது, ஆரம்பத்தில் 7ஆம் நூற்றாண்டில் அரபியர்களால் வணிகத்தில் தொடர்ந்து 13 ஆம் நூற்றாண்டில் மீண்டும் தமிழ் முஸ்லிம்களால் தனித்துவமாய் செழிப்புற்று விளங்கியதையும்,

வணிகத்தில் துவங்கிய தொடர்பு பின் வாழ்வியல், கலாச்சாரம், மார்க்கம், உணவு, கல்வியிலும் தொடர்ந்தது என்பதாக வரலாறு உள்ளது. அது கீழக்கரை, நாகை பகுதிகளை சார்ந்த வணிக பெருமக்களால் செழித்தது என்றால் அதில் மாற்று கருத்தில்லை.” என்று தெரிவித்தார்.

மேலும் மலேசிய தொடர்புடைய சில ஆதாரங்களையும் விளக்கி கூறிய வரலாற்று ஆய்வாளர் அபு சாலிஹ் கூறுகையில் ”ஈரான் நாட்டை சேர்ந்த தாஜுன் அவுலியா சாலிஹ் முகம்மது நிசாபூரி அவர்களின் மாணவர்களும் சன்மார்க்க மேதைகளுமான ரிபாயி பள்ளி செய்குமார்களான சேகு செய்யது சுல்தானுல் ஆரிபீன், சேகு செய்யது முகம்மது, சேகு செய்யது அகமது நெய்னார், சேகு செய்யது அகமது கபீர், சேகு முகம்மது, சேகு குல்சும் முகம்மது, சேகு அப்துர் ரஹ்மான், சேகு அலி முகம்மது, சேகு செய்யது இபுராகிம், சேகு பலுலுதீன், சேகு அலாவுதீன், சேகு ஜலாலுதீன், சேகு சம்சுதீன், சேகு கமருதீன், சேகு நூருதீன், சேகு முகம்மது இலியாஸ் மற்றும் பலர் இந்தோனேசியா, மலேசிய மலாக்காவிற்கு சன்மார்க்கம் பரப்ப பயணமாகி திரும்பியதையும், சுல்தானுல் ஆரிபீன், சேகு அலி முகம்மது, சேகு இலியாஸ், சேகு அலாவுதீன் மற்றும் கீழக்கரைவால் கப்பலோட்டியர்களான அன்றய முதலியார், நெய்னார்மார்களின் பிள்ளைகளான சிறார்கள் சிலரும் மலாக்கா மன்னரால் வெட்டி கொல்லபட்டதையும் அவர்களின் அடக்க இடம் மலேசிய பூலபெசர் தீவில் உள்ளதையும் சுட்டிகாட்டி விளக்கினார்.

அரபியர்கள், சோலியாக்கள், மலேசிய பூகி இனத்தவர், மாப்பிள்ளைகள், மாபர் மலபார் தொடர்பு உள்ளிட்ட ஏராலமான தகவள்களை அறிந்து பெற்ற குழுவினர், மாபர் கரையின் தொன்மையையும் அதன் புதையுண்ட வரலாற்றையும் கேட்டு வியந்து பாராட்டினர்.

கீழக்கரை புதிய பேருந்து நிலையம் அருகே பொதுமக்களுக்கு இடையூறாக செயல்படும் டாஸ்மாக் மதுபான கடைகளை உடனடியாக அகற்றக் கோரி, இன்று 20.03.17 SDPI கட்சி மற்றும் பாப்புலர் ஃப்ரண்ட் அமைப்பினர் சார்பாக மாவட்ட ஆட்சியரின் மக்கள் குறை தீர்க்கும் நாளில் மாவட்ட ஆட்சியர் நடராஜனை சந்தித்து கோரிக்கை மனு கொடுக்கப்பட்டுள்ளது.

அதில் பள்ளி செல்லும் மாணவ மாணவிகளுக்கும், பேருந்து நிலையம் செல்லும் பொதுமக்களுக்கும், கோயிலுக்கும், வழிபாட்டு தலங்களுக்கு செல்லும் மக்களுக்கும் பெரும் இடையூறாக இருக்கும் டாஸ்மாக் கடைகளை கால தாமதமின்றி அகற்ற வேண்டும் என்று கோரிக்கை வைக்கப்பட்டுள்ளது.

அதே போல் மீன் கடை மற்றும் ரேஷன் மண்ணெண்ணெய் நிலையம் ஆகியவை இந்த பகுதியில் தான் அமைந்திருக்கிறது. அங்கு செல்லும் பெண்களும், முதியவர்களும் மிகவும் அச்சத்துடன் சென்று வரும் நிலையும் சுட்டிக் காட்டப்பட்டு உள்ளது. இந்த டாஸ்மாக் கடையில் மது அருந்தும் குடிமகன்கள் ரகளையில் ஈடுபட்டு பொதுமக்களை அச்சப்பட வைக்கின்றனர்.

தமிழக அரசு சமீபத்தில் 500 மதுபான கடைகளை அகற்றுவதற்காக உறுதி அளித்தது. அதில் கீழக்கரை புதிய பேருந்து நிலையம் அருகாமையில் இருக்கும் கடைகளையும் அகற்ற நடவடிக்கை எடுக்க வேண்டும்.” இவ்வாறு குறிப்பிடப்பட்டு உள்ளது.

இலங்கை கடற்படையினரின் துப்பாக்கி சூட்டில் பலியான தங்கச்சி மடம் மீனவர் பிரிட்ஜோவின் உடலை வாங்க மறுத்து தங்கச்சிமடத்தில் உள்ள தேவாலயத்தில் மீனவர்கள், இளைஞர்கள், பெண்கள் என அனைத்து தரப்பினரும் 6-வது நாளாக இன்று போராட்டத்தில் ஈடுபட்டு வருகின்றனர்.

இதனிடையே போராட்டத்துக்கு ஆதரவு தெரிவிக்கும் வகையில் தினந்தோறும் பல்வேறு கட்சியின் தலைவர்கள், அமைப்பினர் தங்கச்சிமடத்துக்கு வந்து செல்கின்றனர். நேற்று நேற்று முன் தினம் இந்திய கம்யூனிஸ்ட் கட்சி தலைவர் முத்தரசன், தமிழ் மாநில கட்சி தலைவர் ஜி.கே.வாசன், தமிழக வாழ்வுரிமை கட்சி தலைவர் வேல்முருகன், பெருந்தலைவர் மக்கள் கட்சி தலைவர் தனபாலன் ஆகியோர் வந்து ஆதரவு தெரிவித்து பேசினர்.

இந்நிலையில் நேற்று 11.03.17 தங்கச்சிமடம் வந்த தமிழக முன்னாள் முதல்வர் பன்னீர் செல்வம் மீனவ மக்களின் போராட்டத்திற்கு ஆதரவு தெரிவித்து மக்கள் மத்தியில் உரையாற்றினார். அவருடன் ஏராளமான கட்சி தொண்டர்கள் திரளாக வந்து கலந்து கொண்டனர்.

இந்திய கடல் எல்லைக்குள் மீன் பிடித்து கொண்டிருந்த 22 வயது இளைஞர் பிரிட்சோ இலங்கை கடற் படையினரால் சுட்டு கொல்லப்பட்டதை கண்டித்தும், அந்த இளைஞரின் படுகொலைக்கு நியாயம் கேட்டும் தங்கச்சி மடத்தில் இன்று 11.03.17 ஐந்தாவது நாளாக தொடரும் மீனவ மக்களின் நீதிக்கான போராட்டத்தில் மனித நேய மக்கள் கட்சியின் மாநில தலைவர் பேராசிரியர் ஜவாஹிருல்லா கலந்து கொண்டு ஆதரவு தெரிவித்தார்.

முன்னதாக நேற்று முன் தினம் இலங்கை கடல்படையினரால் சுடப்பட்டு மருத்துவமனையில் சிகிச்சை பெற்று வரும் மற்றுமொரு மீனவரை சந்தித்து ஆறுதல் கூறிய மமக மாநில அமைப்புச்செயலாளர் மதுரை கவுஸ் பாட்சா, மமக தலைமை நிலையச்செயலாளர் ஹீசைன் கனி அவர்கள் மற்றும் தமுமுக தென்கிழக்கு தேர்தல் அதிகாரி வாணி சித்திக் ஆகியோர் போராட்ட களத்திற்கு நேரில் சென்று தங்கள் ஆதரவை தெரிவித்தனர்.

மேலும் இராமநாதபுரம் கிழக்கு பெறுப்புக்குழு தலைவர் சாதிக் பாட்சா, உறுப்பினர்கள் தங்கச்சிமடம் ஆசிக், யாசர் அரபாத் மற்றும் இராமநாதபுரம் மேற்கு தமுமுக மாவட்ட செயலாளர் பாகீர் அலி மற்றும் மீனவ சமுதாய தலைவர்கள், கட்சியின் நிர்வாகிகள் உடனிருந்தனர்.

இன்று 09.03.17 இராமநாதபுரம் வந்துள்ள விடுதலை சிறுத்தைகள் கட்சியின் தலைவர் தொல் திருமாவளவனை கீழக்கரை நகர் விடுதலை சிறுத்தைகள் கட்சி நிர்வாகிகள் சந்தித்து உரையாடினர். அவருடன் மாநில துணை செயலாளர் கனியமுதன் உடனிருந்தார்

இந்த சந்திப்பில் கீழக்கரை விடுதலை சிறுத்தைகள் கட்சியின் நகர் செயலாளர் முகைதீன் இப்ராகீம், இஸ்லாமிய ஜனநாயக பேரவையின் இராமநாதபுரம் மாவட்ட துணை அமைப்பாளர் செய்யது யாசீன், இஸ்லாமிய ஜனநாயக பேரவையின் நகர் செயலாளர் ஹமீது யூசுப், கட்சியின் நிர்வாகிகள் நெய்னா அசாருதீன், ஜெய்னுலாப்தீன், செய்யது பாதுஷா, ஜகுபர் சாதிக் மற்றும் மாவட்ட நிர்வாகிகள் உடனிருந்தனர்.

ராமேஸ்வரத்தைச் சேர்ந்த மீனவர்கள் நேற்று முன் தினம் கடலில் மீன்பிடித்துக் கொண்டிருந்த போது இந்திய கடல் எல்லைக்குள் நுழைந்த இலங்கை கடற் படையினரால் சுட்டு கொல்லப்பட்ட தங்கச்சி மடத்தைச் சேர்ந்த பிரிட்சோ என்ற 22 வயது இளைஞரின் படுகொலைக்கு நியாயம் கேட்டு தங்கச்சி மடத்தில் நடைபெற இருக்கும் ஆர்ப்பாட்டத்தில் கலந்து கொள்ள விடுதலை சிறுத்தைகள் கட்சியின் தலைவர் தொல் திருமாவளவன் இராமநாதபுரம் வந்துள்ளார்.

அவரை கீழக்கரை நிர்வாகிகள் சந்தித்தனர். பிறகு அங்கிருந்து புறப்பட்டு தங்கச்சி மடம் சென்ற கட்சியின் அனைத்து மட்ட மாவட்ட நிர்வாகிகளும் போராட்ட களத்தில் இருக்கும் ஆயிரக்கணக்கான மீனவ மக்களோடு கலந்து கொண்டு இலங்கை அரசுக்கு எதிராக கண்டனக் குரல்களை பதிவு செய்தனர்.

இந்த ஆர்ப்பாட்டத்தில் இராமநாதபுரம், சிவகங்கை மணடல செயலாளர் முகம்மது யாசீன், மாவட்ட செயலாளர் ஜகுபர் சாதீக், இஸ்லாமிய ஜனநாயக பேரவையின் மாவட்ட அமைப்பாளர் ரியாஸ் கான், கீழக்கரை விடுதலை சிறுத்தைகள் கட்சியின் நகர் செயலாளர் முகைதீன் இப்ராகீம், இஸ்லாமிய ஜனநாயக பேரவையின் இராமநாதபுரம் மாவட்ட துணை அமைப்பாளர் செய்யது யாசீன், இஸ்லாமிய ஜனநாயக பேரவையின் நகர் செயலாளர் ஹமீது யூசுப், கட்சியின் நிர்வாகிகள் நெய்னா அசாருதீன், ஜெய்னுல் லாப்தீன், ஜகுபர் சாதீக் ஆகியோர் பங்கேற்றனர்.

கீழக்கரையில் இருந்து ஏர்வாடி செல்லும் கிழக்கு கடற்கரை சாலையில் கீழக்கரை DSP அலுவலகம் அருகே இருக்கும் நான்கு வழி சாலை சந்திப்பில் நிரந்தர வேகத் தடை ஏதும் அமைப்படாமல் இருப்பதால் விபத்துக்கள் ஏற்படும் அபாயம் உள்ளது. இந்த சாலையில் கடந்த காலங்களில் பல விபத்துக்கள் நிகழ்ந்து உயிரிழப்புகள் ஏற்பட்டுள்ளது.

இது குறித்து கீழக்கரை நகர் நல இயக்கத்தின் செயலாளர் சேகு பஷீர் அஹமது கூறுகையில் ”இந்த சாலை போக்குவரத்து மிகுந்த பிரதான சாலையாக இருக்கிறது. 3000 க்கும் மேற்பட்ட தாஸீம் பீவி மகளீர் கல்லூரி மாணவ மாணவிகளும் மற்றும் பியர்ல் மெட்ரிகுலேஷன் பள்ளி சிறார்களும் இந்த பாதையை கடந்து தான் தினமும் தங்கள் கல்வி நிறுவனங்களுக்கு சென்று வருகின்றனர்.

மேலும் இந்த சாலையை கடந்து செல்லும் கண்டெய்னர் வாகனங்கள், லாரி உள்ளிட்ட கனரக வாகனங்கள் அதி வேகத்துடன் செல்வதால் விபத்துக்களை தவிர்க்கும் பொருட்டு வேகத் தடை உடனடியாக அமைக்க வேண்டும். தற்போது தற்காலிக வேகத் தடை மட்டுமே அமைக்கப்பட்டு உள்ளது.

ஆனால் இந்த பிரச்சனைக்கு நிரந்தர தீர்வாக ஒரு நிரந்தரமான வேகத் தடை அமைப்பதோடு வேகத் தடை இருக்கிறது என்பதற்கான முன்னெச்சரிக்கை பலகையையும் இந்த பகுதியில் வைக்க வேண்டும்  இது சம்பந்தமாக நேற்று முன் தினம் மாவட்ட ஆட்சியரை நேரடியாக சந்தித்து கோரிக்கை மனு கொடுக்கப்பட்டுள்ளது” என்று தெரிவித்தார்.

கீழக்கரை தாலுகாவிற்கு புதிய வட்ட வழங்கல் அலுவலராக B உமா ராணி நியமிக்கப்பட்டு உள்ளார். இதற்கு முன்னர் இராமநாதபுரம் மாவட்ட ஆட்சியர் அலுவலகத்தில் முதன்மை வருவாய் அதிகாரி உள்ளிட்ட பல முக்கிய பொறுப்புகளில் பணியாற்றியவர் என்பது குறிப்பிடத்தக்கது. தற்போது பொறுப்பேற்றிருக்கும் இவரை இன்று 08.03.17 கீழக்கரை சட்டப் போராளிகள் தளம் சார்பாக நேரடியாக சந்தித்து வாழ்த்துக்கள் பகிரப்பட்டது.

கீழை நியூஸ் வலை தளத்திற்கு அவர் அளித்த பேட்டியில் ”கீழக்கரை நகருக்கு சிறந்த முறையில் பணியாற்ற காத்திருக்கிறேன். ரேஷன் பொருள்கள் சம்பந்தமாக அரசின் வழிகாட்டுதல்களை பொதுமக்கள் தகுந்த நேரத்தில் பின்பற்றி தேவையற்ற அலைச்சல்களை தவிர்க்க வேண்டும். பொதுமக்களின் மேலான ஒத்துழைப்பை தர வேண்டும்.” என்று தெரிவித்தார்.

கீழை நியூஸ் வலை தளம் சார்பாகவும் புதிதாக பொறுப்பேற்று இருக்கும் பெண்மணி உமாராணிக்கு இந்த மகளிர் தின நன்னாளில் அவர்களின் பணிகள் சிறக்க மனமார்ந்த வாழ்த்துக்களை தெரிவித்துக் கொள்கிறோம்.

தமிழ்நாடு வருவாய்த்துறை அலுவலர் சங்கத்தின் 2017-2018 ஆம் ஆண்டிற்கான இராமநாதபுரம் மாவட்ட தேர்தல் கடந்த வாரம் நடைபெற்றது.

அத்தேர்தலில் கீழக்கரை வழங்கல் வட்ட அலுவலர், துணை வட்டாட்சியர் தமீம் ராசா இரண்டாவது முறையாக மாவட்ட நிர்வாகிகள் தேர்தலில் மாவட்ட வருவாய் துறை செயலாளராக தேர்ந்தெடுக்கப்பட்டுள்ளார். அதன் தொடர்ச்சியாக மரியாதை நிமித்தமாக இராமநாதபுரம் மாவட்ட ஆட்சித்தலைவரை தமீம் ராசா சந்தித்தார்.

கீழை நியூஸ் நிர்வாகக்குழு மனமார்ந்த வாழ்த்துக்களை தெரிவித்துக் கொள்கிறது.

கடந்த இருவாரங்களாக தமிழகம் முழுவதும் ஜல்லிக்கட்டுக்கான ஆதரவு கரகோஷங்களும் அறவழிப்போராட்டங்களும் வலுத்து வருகின்றது. நேற்று முதல் அலங்காநல்லூர் மற்றும் மெரினா கடற்கரை இளைஞர்களின் அறவழிப் போராட்டத்தால் வாக்கு வங்கி அரசியல்வாதிகளும், அரசாங்கமும் திகைத்துப் போய் நிற்கின்றனர்.

இன்று காலையில் கீழக்கரையில் உள்ள கல்லூரி மாணவர்களும் காலை முதலே வகுப்புகளைப் புறக்கணித்துவிட்டு போராடும் மற்ற கல்லூரி மாணவர்களுக்கு ஆதரவாக களம் இறங்கியுள்ளனர். இந்தப் போராட்டத்திலட் PETA வெளியே போ, தடை செய் என்ற கோஷமே ஓங்கி ஒலித்த வண்ணம் இருந்தது. இந்தப் போராட்டம் ஜாதி மத பேதமின்றி மாணவர்களும் பொதுமக்களும் அமைதியான முறையில் நடத்தி வருகின்றனர்.

கீழக்கரையில் உள்ள கல்லூரி மாணவர்கள் அரசுக்கு எதிர்ப்பு தெரிவிக்கும் வண்ணம் திருப்புல்லானி வரை சென்று பின்னர் இராமநாதபுர மாணவ சமுதாயத்துடன் இணைந்து போராட தயாராகி வருகிறார்கள்.

இதற்கிடையில் அரசு அதிகாரிகளும் காவல் துறையும் மாணவர்களை போராடட்த்தை கைவிட்டு கலைந்து போக வைக்கும் முயற்சியில் இறங்கியுள்ளார்கள். இந்த அமைதியான போராட்டத்தைக் கண்டு சுயநல அரசியல்வாதிகள் கதிகலங்கி போய் இருக்கிறார்கள் என்றால் மிகையாகாது.

இந்தப் போராட்டத்தில் பங்கேற்றுள்ள மாணவர்களின் களைப்பை போக்கும் வண்ணமும், ஆதரிக்கும் வண்ணமும் கீழக்கரையை சார்ந்த பல சமூக அமைப்புகள் தண்ணீர் மற்றும் குடிநீர் பானங்களை வழங்கி வருகிறார்கள்.

இந்த அறவழிப் போராட்டம் மாற்றத்தை நோக்கி நகரும் மாணவர்கள் அரசியல் களம் என்பதை காட்டுகிறது.