மகளிர் பக்கம்

முன்னாள் ஜனாதிபதி அப்துல் கலாம் கையால் ‘மூலிகைத் தாய்’ எனும் பட்டம் பெற்ற ஈரோடு மூதாட்டிக்கு, ஜெர்மனி நாட்டின் சர்வதேச அமைதி பல்கலைக்கழகம் ‘வைத்ய பூஷன் விருது’ வழங்கி கவுரவித்துள்ளது.ஈரோடு மாவட்டம் கணபதிபாளையத்தைச் சேர்ந்தவர் சாமியாத்தாள் (66).

ஐந்தாம் வகுப்பு வரையே படித்துள்ள இவர், 16 ஆண்டுகளுக்கும் மேலாக மூலிகைச் செடி சேகரிப்பில் ஈடுபட்டு வருகிறார். 2004ம் ஆண்டு இவரது கணவர் இறந்தார். இரண்டு மகன்களுக்கு திருமணமாகி விட்டது. இதையடுத்து, ஈரோடு சாவடிபாளையம் கிராமத்தில் தனியாக வசித்து வருகிறார்.சாமியாத்தாளுக்கு, காடுகளுக்குச் சென்று மூலிகைச் செடிகளை தேடிக் கண்டுபிடித்து, அதை சித்த மருத்துவர்களுக்கு வழங்குவதுதான் வாழ்க்கையாக அமைந்துள்ளது. இவரது மூலிகை சேகரிப்பு மற்றும் விழிப்புணர்வை பாராட்டி, 2012ம் ஆண்டு அப்போதைய ஜனாதிபதி அப்துல் கலாம், இவருக்கு ‘மூலிகைத் தாய்’ என்ற பட்டத்தை வழங்கினார்.இயற்கை மருத்துவம் சார்ந்த மாநாடு, கால்நடை மருத்துவ முகாம், கட்சி விழா போன்றவைகளில் குடில்கள் அமைத்து, மூலிகைச் செடிகளை வழங்கி வருவதுடன், அதன் மூலம் பல நோய்களுக்கும் தீர்வு கண்டு வருகிறார்.இந்நிலயில், பழனி சித்த மருத்துவ சங்கம் சார்பில் சாமியாத்தாளுக்கு பாராட்டு விழா நடத்தப்பட்டது. இதில் கலந்துகொண்ட ஜெர்மனி நாட்டைச் சேர்ந்த, சர்வதேச அமைதி பல்கலைக்கழக நிர்வாகிகள் மற்றும் சித்த வைத்திய மருத்துவர்கள், சாமியாத்தாளுக்கு, ‘வைத்ய பூஷன் விருது’ வழங்கி, கவுரவித்தனர்

கீழக்கரை கிழக்குத் தெருவில் இயங்கி வரும் கீழக்கரை மெடிக்கல் மிஷன் மருத்துவமனையில் புதிய பல் மருத்துவப் பிரிவு கடந்த சில மாதங்களுக்கு முன் நவீன வசதிகளுடன் துவங்கப்பட்டு சிறப்பாக செயல்பட்டு வருகிறது. 60,000 க்கும் மேற்பட்ட மக்கள் தொகை கொண்ட கீழக்கரை நகரில் பல் மருத்துவம் என்பது என்பது அவசியமான ஒன்றாக இருக்கிறது.

கீழக்கரை நகரில் இருந்து பல் மருத்துவம் பயின்ற கிழக்குத் தெருவை சேர்ந்த டாக்டர்.ஹஃப்ஸா பாத்திமா, டாக்டர்.சில்வியா ஜெயத்துடன் இணைந்து கீழக்கரை மெடிக்கல் மிஷன் மருத்துவமனையின் பல் மருத்துவ பிரிவில் பணியாற்றி வருகின்றனர்.

‘‘பல் போனா சொல் போச்சு’ என்பார்கள். இந்தப் பொன் மொழியின் அவசியத்தை உணர்ந்த நம் முன்னோர்கள் பற்களை சரிவர பராமரிக்க வேண்டும் என்பதை ஆதி காலம் தொட்டு சொல்லி வருகிறார்கள். ஏனெனில், பற்கள் தான் ஆரோக்கியத்துக்கான தலை வாசல்’’ என்பதை இன்றைய மருத்துவ உலகமும் வலியுறுத்தி வருகிறது. பல் ஆரோக்கியமின்மை இதயத்தையும் பாதிக்கும்.

நமது வாய் தான் எல்லாவற்றுக்குமே நுழைவாயில். இந்த வாயிலில் நுழைந்து தான் அனைத்துக் கிருமிகளும் நோய்களும் நம் உடலின் உள்ளே போகும் என்பதால் பற்களை பன்மடங்கு அக்கறையோடு நாம் பராமரிக்க வேண்டும். சரி… இப்போது பற்களை பராமரிப்பது பற்றி பல் மருத்துவம் மற்றும் பல் சீரமைப்பு நிபுணர்களான டாக்டர்.ஹஃப்ஸா பாத்திமா மற்றும் டாக்டர்.சில்வியா ஜெயம் என்ன சொல்கிறார்கள் என்று தெரிந்து கொள்வோமா…?

செய்ய வேண்டியவை :

உணவு சாப்பிட்ட பிறகு ஒவ்வொவொரு முறையும் தண்ணீர் கொண்டு வாய் கொப்பளிக்க வேண்டும். அப்பொழுதுதான் பல் இடுக்குகளில் உணவு பொருட்கள் தங்காது. தினமும் காலை மற்றும் இரவு படுக்கும் முன் பற்களை துலக்க வேண்டும்.

பற்கள் இடுக்குகளில் உள்ள அழுக்குகளை நீக்க பிளாஸ் பயன்படுத்தலாம். ஓரல் இரிகேட்டர் என்பது வாயில் தண்ணீரை வேகமாக செலுத்தும் கருவி. இதனை பற்கள் சுத்தம் செய்ய பயன் படுத்தலாம். இவை தவிர வருடத்திற்கு ஒரு முறை பற்களை பல் டாக்டரின் ஆலோசனை படி சுத்தம் செய்வது அவசியம்.

பற்களில் ஏற்படும் மற்றொரு பிரச்சனை வாய் துர்நாற்றம். இதற்கு பல காரணங்கள் உள்ளன. பற்களில் கறை படிவதால் அல்லது பல் சொத்தை, வெங்காயம் மற்றும் பூண்டு போன்ற உணவுகளை அதிகமாக உடம்கொள்வது, தொண்டை, வயிறு அல்லது நுரையீரலில் பிரச்னை போன்றவற்றால் வாய் துர்நாற்றம் ஏற்படும். இந்தப் பிரச்னை உள்ளவர்கள், ஒரு மணி நேரத்துக்கு ஒரு முறை தண்ணீர் குடிக்க வேண்டும். எவ்வளவு தண்ணீர் எடுத்துக் கொள்கிறார்களோ, அவ்வளவுக்கு துர்நாற்றம் வீசாது.

பற்கள் எடுப்பாக இருந்தால், அதை கிளிப் போட்டு சரியாக்கலாம். சில சமயம் தாடை எலும்புகள் தூக்கலாக இருக்கும். அவர்களுக்கு அறுவை சிகிச்சை மூலம் சரி செய்யலாம். புளோரைட் பாதிப்பால் பற்களின் நிறம் பழுப்பாக இருக்கும். அவர்களின் முக அமைப்புக்கு ஏற்ப பற்களுக்கு மேல் செயற்கையான கேப் போட்டுக் கொள்ளலாம்.

எல்லாவற்றையும் விட முக்கியம் பற்களில் சிறு பிரச்னை ஏற்பட்டால் உடனடியாக பல் நிபுணரை அணுகி ஆலோசனை பெற வேண்டும்.
கண் எரிச்சல், மூட்டு வலி, சரும பிரச்னை இருந்தால் அதற்கு பல் சொத்தையும் ஒரு காரணம் என்பதால் அதற்கான சிகிச்சையும் எடுத்துக் கொள்ளலாம்.

செய்யக் கூடாதவை :

கடினமான உணவுப் பொருட்களை முன்னால் உள்ள பற்களால் கடிக்கக் கூடாது. கடவாய் பற்களை பயன்படுத்தலாம். முன் பற்கள் அசைவ உணவை கிழித்து சாப்பிட மட்டுமே உதவும்.

பேனா பென்சில் மற்றும் பிளாஸ்டிக் பொருட்களை பல்லால் கடிப்பது , பூவின் நார் மற்றும் துணியில் உள்ள நூலை பற்கள் கொண்டு அறுக்கக் கூடாது.புகை, பாக்கு, வெற்றிலை மெல்லுவதை உடனடியாக நிறுத்த வேண்டும்.

குழந்தைகளுக்கு புட்டி பால் கொடுக்கும் போது, அவர்கள் சாப்பிட்ட பிறகு, உடனடியாக தண்ணீர் கொடுக்க வேண்டும். இல்லையென்றால், பற்களில் பாக்டீரியா தங்கி கரை படியும் வாய்ப்பு உள்ளது.

சிறு வயதிலிருந்தே நமது பற்களின் மீது தனி கவனம் செலுத்தி வந்தால் எவ்வளவு வயதானாலும் நம் பற்களைப் பழுதடையாமல் வைத்து கொள்ளலாம்.

சின்னஞ்சிறு குழந்தைகளுக்கு இரவில் பால், சர்க்கரை சேர்ந்த பால், சாக்லெட், பிஸ்கெட் போன்றவற்றைக் கொடுப்பதைத் தவிர்க்க வேண்டும். அதையும் மீறி சாப்பிட்டால், வாயைக் கழுவாமல் பல் துலக்காமல் படுக்கக் கூடாது.

ஆறு மாதங்களுக்கு ஒருமுறை பல் மருத்துவரிடம் சென்று, பற்களைச் சுத்தப்படுத்திக் கொள்ள வேண்டும்.

பற்களோ, தாடையோ சீராகச் சரியான வடிவத்தில் வளர்ச்சி பெறாமல் இருந்தால், அதைச் சிறு வயதிலேயே கவனித்து, கட்டுப்படுத்தி முக அழகை மேம்படுத்திக் கொள்ள முடியும்.

பொதுவாகவே அதிக அளவு சாக்லெட், ஐஸ்கிரீம், கார்போனேடட் பானங்கள், சிட்ரிக் ஜூஸ்கள் ஆகியவற்றை எடுத்துக் கொள்ளாமல் இருப்பது நல்லது.

வெள்ளை வெளேரென்று இருந்தால்தான் அவை அழகான, ஆரோக்கியமான பற்கள் என்பதில்லை. லேசான பழுப்பு நிறத்தோடு தான் பற்கள் இருக்கும். பல்லில் உள்ள கரையை நீக்க ப்ளீச்சிங் அல்லது லேசர் சிகிச்சை செய்து கொள்ளலாம்.

பல் தூக்கலாக இருந்தால் ப்ரேசஸ் போட்டுக் கொள்ளலாம். பற்கள் இல்லை என்றால் அதையும் நிரந்தரமாகப் போடலாம். அனைத்து வசதிகளும் கீழக்கரை மெடிக்கல் மிஷன் மருத்துவமனை பல் மருத்துவ பிரிவில் உள்ளது.

கீழக்கரை வடக்குத் தெரு இடி மின்னல் மளிகை கடையில் இருந்து வடக்குத் தெரு தைக்கா செல்லும் சாலையில் கீழக்கரை பெண் மருத்துவர் அல் அம்ராவின் ‘அல் ஃபலா கிளினிக்’ இன்று (30.03.2018) வெள்ளிக்கிழமை மாலை 4.30 மணியளவில் இனிதே ஆரம்பமாகியது. இந்த துவக்க விழா நிகழ்ச்சியில் ஏராளமான பொதுமக்கள் கலந்து கொண்டு சிறப்பித்தனர்.

கீகக்கரை தாசீம்பீவீ அப்துல்காதர் மகளிர் கல்லூரியில் நேற்று (08-03-2018) 11.00 மணியளவில் உலக மகளிர் தினவிழா கொண்டாடப்பட்டது. இறைவணக்கத்துடன் தொடங்கிய இந்நிகழ்வு கல்லூரி முதலவர் முனைவர் எஸ்.சுமையா வரவேற்புரை வழங்கினார். சென்னை சான்ட்விச் ஸ்கொயர் பிரைவேட் லிமிடெட் நிறுவனத்தின் இயக்குநர் முகமம்து தன்வீர் இக்பால் சிறப்பு விருந்தினராக கலந்துகொண்டு தன்னுடைய வாழ்க்கையில் நடந்த நிகழ்வுகள் பற்றியும் பெண்கள் தொழில் தொடங்குவதற்கான வழிமுறைகள் மற்றும் உத்திகள் பற்றியும் தொழில் தொடங்கி முன்னேற்றம் அடைவது எப்படி என்பது குறித்தும் தொழிலை எவ்வாறு கையாள வேண்டுமென்ற மேலாண்மை சூட்சமத்தையும் விளக்கி பேசினார்.

மேலும் இந்நிகழ்ச்சியில் அரியா டைரி பார்மஸ் நிறுவனத்தின் நிர்வாக இயக்குநர் மற்றும் ஆர்கான் பார்மஸ் நிறுவனத்தின் நிருவாக இயக்குநர் ஓசூர் அவர்களும் கலந்து கொண்டு பெண் இல்லையென்றால் உலகமே இல்லை; எண்ணம் போல் செயல் இருக்க வேண்டும்; எண்ணுவதை உயர்வாக எண்ணவேண்டும்; தொழில் தொடங்குவது எப்படி உள்ளிட்ட நற்சிந்தனை தலைப்புகளில் உரையாற்றினார்.

இதனை தொடர்ந்து பெண்கள் தினத்தை முன்னிட்டு பெண்கள் முன்னேற்றக் குழு சார்பாக நடத்தப்பட்ட கட்டுரை, பேச்சுப் போட்டிகளில் வெற்றிப் பெற்ற மாணவிகளுக்கு பரிசுகள் வழங்கப்பட்டது. இவ்விழாவில் கல்லூரி துணை முதல்வர்கள் முனைவர் ஏ.இ.ஜி.சி. ரஜனி மற்றும் முனைவர் பி. சுலைஹா, கில் மற்றும் தேர்வாணையாளர் முனைவர் என். கௌரி ஆகியோர் பங்கேற்று சிறப்பித்தனர்.

நிகழ்ச்சியின் நிறைவாக செ. பாண்டி சசிகலா உதவிப்பேராசிரியை வணிகவியல்துறை ஆகியோர் நன்றியுரை வழங்க இனிதே விழா நிறைவுற்றது. இவ்விழாவிற்கான ஏற்பாடுகளை சீதக்காதி அறக்கட்டளை துணைப்பொது மேலாளர் சேக் தாவூத்கான் அவர்களும் மற்றும் பெண்கள் முன்னேற்றக் குழு உறுப்பினர்களும் செய்திருநத்னர்.

கீழக்கரை வடக்குத் தெரு சமூக நல அமைப்பு NASA சார்பாக வரும் செப்டம்பர் 8ம் தேதி ORGANIC BABY எனும் மெண்களுக்கான விழிப்புணர்வு நிகழ்ச்சி பெண்களுக்காக பிரத்யேகமாக ஏற்பாடு செய்யப்பட்டுள்ளது. இந்நிகழ்ச்சி புதிதாக திருமணமான பெண்கள், குழந்தைப்பேறுக்காக காத்திருக்கும் பெண்கள், திருமண வாழ்கையில் அடி எடுத்து வைக்க போகும் பெண்கள் அனைவரும் அவசியம் கலந்து கொள்ள வேண்டிய நிகழ்ச்சி. பெண்களுக்காக இத்துறையில் அனுபவம் வாய்ந்த பெண்ணால் நடத்தப்படும் நிகழ்ச்சி. இந்நிகழ்வில் கலந்து கொண்ட பின் பெண்கள் பிரசவம் என்பது ஒரு சுகமான சுமைதான் தவிர, இன்று மருத்துவ உலகம் உருவாக்கியிருக்கும் கடினம் என்பது ஒரு மாயைதான் என்பதை உணர வைக்கும்.

இந்நிகழ்ச்சி கீழக்கரை வடக்குத் தெரு சமூக அமைப்பினரால் வரும் செப்டம்பர் 8ம் தேதி, *வடக்குத் தெரு முகைதீனியா பள்ளி வளாகத்தில்* ^மாலை 6 மணிக்கு* ஏற்பாடு செய்யப்பட்டுள்ளது. இந்த சிற்ப்பு நிகழ்ச்சியை சகோதரி. லயான் நிஷா தொகுத்து வழங்குகிறார்.

இந்த நிகழ்ச்சி நீங்கள் சாதாரணமாக கேட்கும் சொற்பொழிவு நிகழ்ச்சி அல்ல, ஆனால் உங்கள் வாழ்கை முறையை மாற்ற எடுக்கும் முன்னெச்சரிக்கை நடவடிக்கையாகும். அனைவரும் கலந்நு கொள்ளுங்கள் மற்றவருக்கும் பகிருங்கள்.

*அனுமதி இலவசம்*

பெண்ணின் மகத்துவத்தினை உலகிற்கு பறைசாற்றும் வகையில் ஆண்டு தோறும் மார்ச் மாதம் 8 ஆம் நாள் சர்வதேச மகளிர் தினம் கொண்டாடப்படுகிறது. அன்பு, ஆதரவு, அடக்கம், இது மூன்றுக்கும் அர்த்தமாய் மனிதகுலத்தில் வாழும், இறைவனின் உன்னதமான படைப்பினம் பெண்

ஒரு தாயாய், மகளாய், மனைவியாய், இல்லத்தரசியாய், சகோதரியாய், தோழியாய், நட்பாய், நலம் விரும்பியாய், வழிகாட்டியாய் காலத்துக்கு காலம் ஒரு பெண் ஏற்கும் வேடங்கள் தான் எத்தனை.. எத்தனை? பாசத்தால் வார்த்தெடுத்த உணர்ச்சிகளின் கலவையாய் பெண்ணை தவிர சிறந்த வேறொரு உயிரினை உங்களால் உலகில் காட்டமுடியுமா?

உடலுறுதி கொண்ட ஆணைவிட மனவுறுதி கொண்ட பெண் சிறப்பு மிக்கவள். சவால்களை தகர்த்து, சாதனைகள் பல படைக்க உறுதியான மனமும் உயர்வான எண்ணங்களும் வலிமையான ஊக்கமும் கொண்டு அல்லும் பகலும் அயராது உழைத்து கொண்டிருக்கும் பார் போற்றும் பூ மகள்கள் ஆயிரமாயிரம்.

வேலைக்கு சென்று உழைக்கும் ஆண் மகன் மட்டும் தான் உழைப்பாளி என்று பொத்தாம் பொதுவாக சொல்லி விட்டு செல்லும் காலத்தில் தான் நாம் வாழ்த்து கொண்டிருக்கிறோம். ஆனால் அடுப்பாங்கரையில் அறுசுவை உணவுகளை, நாவிற்கினிய சமையலை நமக்காக வியர்த்து விறுவிறுத்து சமைத்து பாசத்தையும் சேர்த்து நமக்கு பரிமாறும் அன்பான உழைப்பாளி வர்க்கத்தை மட்டும் வாழ்த்த மனமின்றி மறந்தே தான் போகிறோம்.

கால ஓட்டத்தில் பொருளாதாரம் தேடி ஓடிக் கொண்டே இருக்கும் ஆண் வர்க்கத்திற்காக அதி வேகமாய் நகரும் மணித்துளிகளில் ஏக்கத்துடன் காத்திருக்கும் பெண்ணினம் பெருமைக்குரியது.

‘பெண் இன்றிப் பெருமையும் இல்லை; கண் இன்றி காட்சியும் இல்லை’ என்பது நம் முன்னோர்களின் முது மொழிகளுள் ஒன்று. மனித உடம்பில் கண்கள் எவ்வளவு முக்கியமானதோ அதே அளவு சமூகத்தில் பெண்களும் முக்கியமானவர்களேயாவர். கடந்த காலங்களில் ஆண் ஆதிக்கத்தின் கீழாக அடிமைப்பட்ட பெண்ணியம்.. பேச்சுரிமை, கல்வி கற்கும் உரிமை, சுயவிருப்பிலான விவாக உரிமை, வழிபாட்டுரிமை என்பன அற்றவர்களாகவே இருந்தனர்.

பின்னர் சுதந்திர தேசத்தில் பாரதி கண்ட புதுமை பெண்களாய் தமக்குள் தன்னம்பிக்கையை ஏற்படுத்திக் கொண்டு ‘நாங்கள் ஆண்களுக்கு எவ்வகையிலும் சளைத்தவர்கள் அல்ல’ என்பதனை நிரூபிக்கும் வகையில் மண் முதல் விண் வரை சமூகத்தின் எத்துறையை எடுத்துக் கொண்டாலும் பெண்கள் இல்லாத துறையே இல்லை என்ற அளவிற்கு வளர்ச்சி கண்டுள்ளமையை நாம் இன்று காணக்கூடியதாக இருக்கின்றது.

இல்லத் தலைவியாக மட்டுமே இருந்த அன்றையப் பெண்கள் இன்று நாட்டின் தலைவியாகவும், உலகத்தின் முதல்வியாகவும், ஆண்களுடன் போட்டி போட்டுக்கொண்டு முன்னிலையை அடைய தங்கள் ஆளுமைகளை விருத்தி செய்திருக்கின்றனர்.

அதே வேளையில் பெண்களுக்கு எதிரான வன்முறை எனும் கொடிய அவல நிலை இன்னும் உலகில் நீங்கியபாடாக இல்லை. படிக்கின்ற இடங்கள், பணிபுரிகின்ற இடங்கள், பொது இடங்கள், வீடுகளிலும் கூட பெண்களுக்கு எதிராக வன்முறைகள் ஆங்காங்கே நிகழ்ந்து கொண்டே தான் இருக்கின்றன.

இவற்றை களைய வேண்டுமென்றால் பெண்களை கண்ணியத்துடன் மதிக்க வேண்டிய நெஞ்சார்ந்த உணர்வினை ஆண் சமூகம் பெற்றாக வேண்டும். தாமும் ஒரு பெண்ணாகிய தாய் வயிற்றிலிருந்து உலகிற்கு வந்த படைப்பினம் தான் என்பதை உணர வேண்டும். ஆகவே பெண்களின் மகத்துவத்தை மனதார உணர்ந்தவர்களாக பெண்ணியம் காக்க இந்த மகளிர் தின நாளில் உறுதி ஏற்போம்.

இந்த இனிய நன்னாளில் அனைத்து மகளிர்க்கும் கீழை நியூஸ் சார்பாக இனிய மகளிர் தின வாழ்த்துகளை தெரிவித்துக் கொள்கிறோம்.

கீழக்கரையில் இன்று (06-02-2017) தாசீம் பீவி பெண்கள் கல்லூரி சார்பாக சீம கருவேல மரங்களின் தீமைகளை விளக்கும் விதமாக பேரணி நடத்தப்பட்டது.

இந்த பேரணியில் ஏராளமான மாணவிகள் கலந்து கொண்டு கருவேல மரங்களின் தீமைகளை விளக்கும் வண்ணம் பதாகைகளை ஏந்தி சென்றனர். இந்தப் பேரணியை கல்லூரி முதல்வர் சுமையா கொடியசைத்து துவக்கி வைத்தார்கள்.  மேலும் கல்லூரியின் பல் வேறு துறைகளின் பேராசிரியர்கள் முன்னிலையில்  நடைபெற்றது.  இந்த விழிப்புணர்வு பேரணி கீழக்கரையின் முக்கிய பகுதிகளில் சென்றது.

தாசீம் பீவி கல்லூரி நிர்வாகம் தங்கள் கல்லூரி மாணவிகள் மட்டும் அல்லாமல் பிற பள்ளி மாணவ, மாணவிகளையும் கரு வேல மர ஒழிப்பு பணியில் ஊக்குவிப்பது குறிப்பிடத்தக்கதாகும்.

கீழக்கரையில் இருந்து ஜல்லிக்கட்டுக்கு ஆதரவாக பருத்திக்காரத் தெருவை சேர்ந்த வணிக மேலாண்மை பட்டதாரி பஹ்ஜத் சாலிஹ் கவிதை வடிவில் எழுதி முக நூலில் பதிந்துள்ளார். அதில் அவர் ஜல்லிக்கட்டுக்கு ஆதரவாகவும், தொன்று தொட்ட தமிழ் கலாச்சாரத்தினை காக்கும் விதமாகவும், உலகளாவிய அளவில் தமிழின கலாச்சார பாதுகாப்பு போராட்டத்தில் பங்கேற்று இருக்கும் இளைஞர் பட்டாளத்தை ஊக்குவிக்கும் முகமாகவும் எழுதி இருப்பது பாராட்டுக்குரியது

எம் தமிழின எழுச்சி

இருளில் மறைந்த தமிழகத்தை
இமய உச்சியில் ஏற்றி வைத்தது – எங்கள்
இளம் படை..

வீதிகள் தோறும் வீர நடை
பார்.. இதுவரை பார்த்திராத படை..
தமிழனின் தன்னெழுச்சியால்
தகர்க்கப்பட வேண்டும் தடை…

சமூக வலை தளங்களில் பதுங்கியிருந்த
சிங்கங்கள் எல்லாம் – சாலையில்
சங்கமித்து சரித்திரம் படைக்க…

பட்டிக்காடு தொடங்கி பட்டிணம் வரை
படர்ந்தது இந்த படை – இப்படை வெல்லும்
அரசியல் அடிப்படை சொல்லும்

காளையர்கள் கன்னியர்கள் மட்டுமின்றி
கருவிலிருக்கும் குழந்தை முதல் – கடைசி
காலத்தில் கட்டிலில் கிடக்கும் கிழவன் வரை
குரல் ஓங்கிய தமிழன எழுச்சி
இறுதியில் வெற்றி காணாது ஓயாது…

ஆங்கிலத்தில் பேசினாலும்
அயல் நாட்டில் இருந்தாலும்
உள்ளத்திலும் உணர்விலும்
உண்மை தமிழனின் ஒற்றுமையின் வேர்கள்
சரித்திரம் படைக்காமல் சாயாது….

அரசியல் வியாதிகள் ஆதரவு தருவதையும்
அரசாங்கம் அறிக்கை விடுவதையும்
நம்பி விட மாட்டோம்..
நிரந்தர ஆணை வரும் வரை
நகர்ந்து விட மாட்டோம்…

வெயில் வாட்டியும் வெந்து விடவில்லை
கடும் குளிரிலும் கலைந்து விடவில்லை
மழை பொழிவிழும் மனம் தளரவில்லை
சோதித்த போதும் சோர்ந்து விடவில்லை
சாதிக்கும் எண்ணம் சற்றும் சரியவில்லை

சீறி எழுந்த போதும் சினம் கொள்ளவில்லை
காலம் கடந்த போதிலும் கல்லெறியவில்லை
படை பலத்த போதிலும் பாதிப்பேதுமில்லை
நாளைய தலைமுறையினர் நாங்கள்
நாகரீகமாய் நடந்து கொண்டோம்

மண்ணின் மைந்தர்கள்
மன உறுதியோடு மன்றாடுகிறோம்
இது எங்கள் அந்தம் அல்ல
ஆதி என்று அசையாது நிற்கின்றோம்
விலங்கிட்டாலும் வீடு செல்ல மாட்டோம்
மெரினாவில்
விளக்கை அணைத்த போதிலும்
விடிவெள்ளியாய் மின்னுவோம்…

பகலே பாதுகாப்பில்லை
பெண்களுக்கு – ஆனால் இன்று
இருள் சூழ்ந்த இரவிலும்
இளைஞர் படை இடையிலும்
இரும்புக் கோட்டைக்குள்
இருப்பதாய் சர்வ பத்திரமாய் உணர்கிறோம்…
இளம் மங்கைகள் நாங்கள்..

சித்தெறும்பு கூட்டமென
சிதைக்க நினைத்த கயவர்களே…
சிகரமென ஓங்கி விட்டோம்…
மின்மினி என அணைக்க நினைத்தாயோ…
மின்னலென உருவெடுப்போம்

இது
மாட்டிற்காக கூடிய கூட்டமில்லை…
மாற்றத்திற்காக கூடிய கூட்டம்…

நாங்கள்
விளையாட்டுக்காக
வீதிக்கு வந்த கூட்டமல்ல – நாளைய
விடியலுக்காக வித்திட வந்த வீரர்கள்….

தமிழின கவசமாய் தன்னெழுச்சியாய்
திரண்டு விட்டோம் – இனி…..

தடைகளை தகர்த்திடுவோம்
கலாச்சாரத்தை காத்திடுவோம்
பண்பாட்டை போற்றிடுவோம்
அரசியலின் ஆழம் பார்ப்போம்
அறிவியலில் ஆர்ப்பரிப்போம்

விவசாயத்தில் வளர்ச்சி பெற்று
வறுமையை விரட்டிடுவோம்
உழவனை உலகாள வைப்போம்
இயற்கையை சுரண்டிடும்
இன்னல்கள் இடித்திடுவோம்

ஒற்றுமையால் உலகை வெல்வோம்
வெற்றிகளால் விண்ணை தொடுவோம்
தமிழனிடம் சாதி மத சண்டையில்லை
நாங்கள் சாதிக்க இனி தடையுமில்லை

தலைவனின்றி உருவானோம்
தலைவர்களாய் உருவெடுப்போம்
தன்மானத் தமிழர்களை
தன்னிகரற்ற தலைவர்களை
தரணி இனி
தலை நிமிர்ந்தே பார்க்கட்டும்..