மாநில செய்திகள்

தமிழகத்தில் மின் இணைப்பு பெறுவதற்கான விதிமுறைகளில் தளர்வு-மின்சார வாரியம் அறிவிப்பு..

14 மீட்டர் உயரம் மிகாமல் உள்ள 8 குடியிருப்பு அலகுகள் கொண்ட குடியிருப்பு கட்டடங்களுக்கு கட்டட நிறைவு சான்றிதழ் தேவையில்லை.

750 சதுர மீட்டர் பரப்பளவுக்கு உட்பட்ட வீடுகளுக்கு கட்டட நிறைவு சான்றிதழ் தேவையில்லை.

14 மீட்டர் உயரத்துக்கு மிகாமல் 300 சதுர மீட்டர் கட்டட பரப்பளவுக்கு உட்பட்ட வணிக கட்டடங்களுக்கும் கட்டட நிறைவு சான்றிதழ் தேவையில்லை.

அனைத்து தொழிற்சாலை கட்டடங்களுக்கும் கட்டட நிறைவு சான்றிதழ் தேவையில்லை- மின்சார வாரியம்.

விக்கிரவாண்டி இடைத்தேர்தல்!82.48% வாக்குகள் பதிவு..

விக்கிரவாண்டி தொகுதி இடைத்தேர்தலில் 82.48% வாக்குகள் பதிவாகியுள்ளதாக தேர்தல் ஆணையம் தெரிவித்துள்ளது.

காலை 7 மணிக்கு தொடங்கிய வாக்குப்பதிவு மாலை 6 மணியுடன் நிறைவடைந்தது.

அமைதியாக முடிந்த இந்தத் தேர்தலில்,
ஆண்கள் – 95,536,
பெண்கள் – 99,994,
பிறர் – 15 பேர் வாக்களித்துள்ளனர்.

ஜூலை 13-ஆம் தேதி வாக்குகள் எண்ணப்பட உள்ளன. இந்தத் தேர்தலில் திமுக, பாமக, நாதக என மும்முனைப் போட்டி நிலவியது குறிப்பிடத்தக்கது.

வடகரை மற்றும் வாவாநகரம் பகுதிகளில் காட்டு யானைகள் அட்டகாசம்; விரைந்து நடவடிக்கை எடுக்க விவசாயிகள் அரசுக்கு கோரிக்கை..

தென்காசி மாவட்டம் வடகரை மற்றும் வாவாநகரம் உள்ளிட்ட பகுதிகளில் காட்டு யானைகள் அட்டகாசம் செய்து வருவதாக விவசாயிகள் வேதனை தெரிவித்துள்ளனர். விவசாய நிலங்களுக்குள் புகுந்து வாழை உள்ளிட்ட விவசாய பயிர்களை அழித்து வரும் காட்டு யானைகளை கட்டுப்படுத்த தமிழக அரசும், வனத்துறையும் விரைந்து நடவடிக்கை எடுக்க வேண்டும் என விவசாயிகள் வலியுறுத்தியுள்ளனர்.

யானைகள் அட்டகாசம் குறித்து விவசாயிகளின் உள்ளத்திலிருந்து தொடர்ந்து ஒலித்துக் கொண்டே இருக்கிறது வேதனைக்குரல்..

பல விவசாய நிலங்கள் யானைக்கு தீனியாகி விட்டது. ரத்தத்தை வியர்வையாக்கி வியர்வையை தண்ணீராக்கி விவசாயம் செய்தால் அத்துனையும் அழித்து யானைக் கூட்டம் நாசம் செய்கிறது.

வட்டிக்கு பணம் வாங்கி வாழை நட்டால் குலை தள்ளும் நேரம் யானைக்கு பசியாகிறது. பட்டினி கிடந்து வாழை குலை தள்ளும் குடும்பமே பசியாரலாம் என விவசாயி நினைத்து காலம் தள்ளினால் யானைக்கு தீனியாகிறது.

அம்புட்டும் கடனை அடைக்க கடன் வாங்குவதா அல்லது விவசாயம் செய்தது போதும் என முற்றுப்புள்ளி வைக்கும் மனநிலையில் தற்போதைய விவசாயம்.

மதுவுக்கு இருக்கும் மரியாதை கூட மானம் காக்கும் விவசாயத்தில் இல்லை. விரக்தியின் உச்சியில் அச்சத்தின் விளிம்பில் போட்ட முதல்கள் ஒரே இரவில் பறிகொடுத்து விட்டு படுத்து உறங்க மனமில்லாமல் மனநோயாளி போல் நடமாடும் விவசாயிகள் பல பேர்.

தமிழக அரசும் வனத்துறையும் தயவு செய்து எங்கள் பகுதி விவசாயத்தை காப்பாற்றுங்கள்! பல விவசாயிகள் கண்ணீரை துடைக்க வாருங்கள்! யானைக்கூட்டத்தை கட்டுப்படுத்த நடவடிக்கை எடுங்கள்! என ஓங்கி ஒலிக்கிறது விவசாயிகளின் அவலக்குரல்..

செய்தியாளர்-அபுபக்கர்சித்திக்

தென்காசி மாவட்டத்தில் “மக்களுடன் முதல்வர்” சிறப்பு முகாம்; மாவட்ட கலெக்டர் தகவல்..

தென்காசி மாவட்டத்தில் “மக்களுடன் முதல்வர்” 51 சிறப்பு முகாம்கள் இரண்டாம் கட்டமாக 11.07.2024 முதல் 29.08.2024 வரை 10 ஊராட்சி ஒன்றியங்களுக்குட்பட்ட 221 கிராம பஞ்சாயத்துக்களில் நடைபெறவுள்ளது என மாவட்ட ஆட்சித்தலைவர் ஏ.கே.கமல் கிஷோர் அறிவித்துள்ளார். இது பற்றிய செய்திக்குறிப்பில், பொதுமக்களின் கோரிக்கைகளுக்கு மிகுந்த முக்கியத்துவம் அளித்துவரும் தமிழ்நாடு முதலமைச்சர், கள ஆய்வில் முதலமைச்சர் என்ற முன்னெடுப்பின் கீழ் மண்டல அளவில் ஆய்வுக் கூட்டங்கள் நடத்தி அரசின் சேவைகள் குறிப்பிட்ட காலத்திற்குள் பொதுமக்களுக்கு கிடைக்க வேண்டியதை உறுதி செய்வது ஒவ்வொரு துறையின் பொறுப்பாகும் என கோரிக்கைகளை உடனுக்குடன் தீர்வு காண வலியுறுத்தி வருகிறார். தமிழ்நாடு முதலமைச்சர் முன்னெடுப்பின் நீட்சியாக அன்றாடம் அரசு துறைகளை அணுகும் பொதுமக்களுக்கு அரசு அலுவலர்கள் வழங்கும் சேவைகளை மேலும் செம்மைபடுத்தி அரசின் சேவைகள் விரைவாகவும், எளிதாகவும், சென்று சேரும் வண்ணம் மற்றுமொரு மைல் கல்லாக மக்களுடன் முதல்வர் என்ற புதிய திட்டம் முதல்வரின் முகவரி துறையால் நடைமுறைப்படுத்தப்படுகிறது.

“மக்களுடன் முதல்வர் என்ற இத்திட்டம் அன்றாடம் இரண்டாம் கட்டமாக கிராம ஊரக பகுதிகளில் பொதுமக்கள் அதிகமாக அணுகும் 15 அரசு துறைகள் சார்ந்த கோரிக்கைகள் அடையாளம் காணப்பட்டு அரசின் வழிகாட்டு நெறிமுறைகளின் படி, தென்காசி மாவட்டத்தின் ஊரக பகுதிகளில் சம்பந்தப்பட்ட துறைகள் அனைத்தும் ஒருங்கிணைந்து ஒரே குடையின் கீழ் கோரிக்கைகளை பெற தென்காசி மாவட்ட 10 ஊராட்சி ஒன்றியங்களுக்குட்பட்ட 221 கிராம பஞ்சாயத்துக்களை ஒருங்கிணைத்து 51 சிறப்பு முகாம்கள் நடத்திட உத்தேசிக்கப்பட்டுள்ளது. முகாம்களில் பெறப்படும் அனைத்து மனுக்களும் 30 தினங்களுக்குள் சம்பந்தப்பட்ட துறைகளால் பரிசீலனை செய்யப்பட்டு தகுதியின் அடிப்படையில் உரிய சேவைகள் வழங்கப்படும். இந்த முகாம்கள் தென்காசி மாவட்டத்தில் 11.07.2024 முதல் 29.08.2024 வரை 17 தினங்களில் தென்காசி மாவட்டத்தில் உள்ள 10 ஊராட்சி ஒன்றியங்களுக்குட்பட்ட 221 கிராம பஞ்சாயத்துக்களை ஒருங்கிணைத்து 51 சிறப்பு முகாம்கள் காலை 10.00 மணி முதல் பிற்பகல் 03.00 மணி வரை நடைபெறவுள்ளது.

மேற்படி முகாம்களில் பெறப்படும் அனைத்து கோரிக்கைகளும் இதற்கென பிரத்யேகமாக ஏற்படுத்தப்பட்ட மக்களுடன் முதல்வர் இணையதளத்தில் பதிவேற்றம் செய்யப்பட்டு, சேவை வழங்குவதற்கு தேவையான அனைத்து ஆவணங்களையும் முகாம்களிலேயே பெற்று பரிசீலிக்கப்படும். மேலும் இணையவழி விண்ணப்ப முறைகளில் சம்பந்தப்பட்ட துறைகள் முகாமிலேயே விண்ணப்பத்தினை பதிவேற்றம் செய்ய ஏற்பாடு செய்யப்படும். அனைத்து முகாம்களிலும் இ-சேவை மையங்கள் அமைக்க ஏற்பாடு செய்யப்படும். முகாம்களில் கூட்டத்தை நெறிப்படுத்துதல், உரிய பாதுகாப்பு, சட்டம் மற்றும் ஒழுங்கு, போன்றவற்றை எவ்வித குறைபாடும் இன்றி செய்திட காவல் துறையினரால் நடவடிக்கை எடுக்கப்படும். இத்துடன் இணைக்கப்பட்டுள்ள பட்டியலில் கண்டுள்ளவாறு தென்காசி மாவட்டத்தில் உள்ள 10 ஊராட்சி ஒன்றியங்களுக்குட்பட்ட பகுதிகளில் 51 முகாம்கள் நடைபெறவுள்ளன. பொதுமக்கள் இந்த அரிய வாய்ப்பினை பயன்படுத்தி பயன்பெற வேண்டுமென மாவட்ட ஆட்சித்தலைவர் ஏ.கே.கமல்கிஷோர் தெரிவித்துள்ளார்.

செய்தியாளர்-அபுபக்கர்சித்திக்

கடையநல்லூர் உபகோட்டத்தில் பணிபுரியும் மின்வாரிய களப் பணியாளர்களுக்கு பாதுகாப்பு வகுப்பு..

தமிழ்நாடு மின் உற்பத்தி மற்றும் பகிர்மான கழகம் திருநெல்வேலி சார்பில், தென்காசி மாவட்டம் கடையநல்லூர் உப கோட்டத்தில், பணிபுரியும் களப்பணியாளர்களுக்கான பாதுகாப்பு வகுப்பு கடையநல்லூர் உதவி செயற்பொறியாளர் அலுவலகத்தில் நடைபெற்றது. கடையநல்லூர் உப கோட்ட உதவி செயற்பொறியாளர், மாரியப்பன் பாதுகாப்பு வகுப்பினை தலைமை தாங்கி பேசுகையில், விநியோகத்தில் பணிகள் மேற்கொள்ளும் போதும், இயற்கை இடர்பாடுகளான சூறைக்காற்று, இடி, மின்னல் மற்றும் மழை, நேரங்களில் பாதுகாப்புடன் பணிபுரிவதற்கான பாதுகாப்பு வழிகாட்டு நெறிமுறைகள் குறித்து விளக்கிக் கூறினார். மேலும் விநியோகத்தில் பணி புரியும் போது பாதுகாப்புக்காக உபயோகப்படுத்த வேண்டிய நில இணைப்பு சாதனம் (EARTH ROD), இடுப்புகயிறு (BELTROPE), கையுறை (GLOVES) ஆகிய பாதுகாப்பு சாதனங்களின் செயல்பாடுகள்‌ மற்றும் தன்மைகள் பற்றி விளக்கி கூறினார்.

இருசக்கர வாகனத்தில் செல்லும் போது தலைக்கவசம் அணிந்தும் பயணிக்கவும், பணிகளை மேற்கொள்ளும் முன் மின்னோட்டம் நிறுத்தப்பட்டதை உறுதி செய்த பின்பு பணிகள் மேற்கொள்ளவும், பணிகள் மேற்கொள்ளும் போது எக்காரணம் கொண்டும் கைபேசி எடுத்துப் பேசக்கூடாது எனவும், அதனால் ஏற்படும் சிந்தனை சிதறல் குறித்தும் முழுமையாக விளக்கிக் கூறினார். இந்த பாதுகாப்பு வகுப்பில் கடையநல்லூர் உப கோட்டத்திற்கு உட்பட்ட கடையநல்லூர் நகர்ப்புறம் 1 மற்றும் 2, கடையநல்லூர் கிராமப்புறம், கடையநல்லூர் தெற்கு, நயினாரகரம், சேர்ந்தமரம் ஆகிய கட்டுமான பிரிவு மற்றும் உப மின் நிலையங்களை சார்ந்த உதவி மின் பொறியாளர்கள், ஆக்க முகவர்கள், மின்பாதை ஆய்வாளர்கள், கம்பியாளர்கள், களப்பணி உதவியாளர்கள் உட்பட அனைவரும் கலந்து கொண்டு பாதுகாப்புடன் பணிபுரிவோம் என உறுதிமொழி எடுத்துக் கொண்டனர்.

செய்தியாளர்-அபுபக்கர்சித்திக்

கட்டணமின்றி வண்டல் மண் எடுத்து பயன்பெற அனுமதி ஆணைகள்; முதலமைச்சர் மு.க.ஸ்டாலின் வழங்கினார்..

நீர்வளத்துறை, ஊரக வளர்ச்சி மற்றும் ஊராட்சித் துறை கட்டுப்பாட்டில் உள்ள ஏரி, குளம், கண்மாய்களில் உள்ள வண்டல் மற்றும் களிமண் ஆகியவற்றை விவசாய பெருமக்கள் மற்றும் மண்பாண்டம் செய்பவர்கள் விவசாய பயன்பாட்டிற்கும் மற்றும் மண்பாண்டம் செய்வதற்கும் கட்டணமின்றி எடுத்துச் செல்லலாம் என்றும், இதன்மூலம் இவர்கள் பயன்பெறுவதோடு, ஏரி, குளம் மற்றும் கண்மாய்கள் ஆழப்படுத்தப்பட்டு அதிக மழை நீரைச் சேமித்திட இத்திட்டம் உதவும் என்றும் தமிழ்நாடு முதலமைச்சரால் 12.06.2024 அன்று அறிவிக்கப்பட்டது. தமிழ்நாடு முதலமைச்சர் ஆணைக்கிணங்க, இத்திட்டத்தினை எளிமையாக செயல்படுத்திட, தமிழ்நாடு சிறுகனிம சலுகை விதிகள், 1959-ல் அரசு ஆணை எண்.14. இயற்கை வளங்கள் துறை, நாள் 12.06.2024 அன்று திருத்தம் செய்யப்பட்டு இணையதளம் (tnesevai.tn.gov.in) மூலம் விண்ணப்பங்கள் பெறப்பட்டு, சரிபார்க்கப்பட்டு, மாவட்ட ஆட்சியர்களுக்கு பதிலாக வட்டாட்சியர்களால் அனுமதி வழங்க வழிவகை செய்யப்பட்டுள்ளது.

மேலும், பயனாளிகள் தங்களது கிராமத்தில் அமைந்துள்ள நீர்நிலைகள் உட்பட அவர்கள் சேர்ந்த வட்டத்தில் அமைந்துள்ள நீர்நிலைகளிலும் வண்டல் மற்றும் களிமண் ஆகியவற்றை எடுத்துச் செல்லலாம். நீர்வளத்துறை மற்றும் ஊரக வளர்ச்சி மற்றும் ஊராட்சித் துறையின் செயற்பொறியாளர்கள். புவியியல் மற்றும் சுரங்கத்துறையின் துணை இயக்குநர் / உதவி இயக்குநர். வட்டாட்சியர்கள், கிராம நிருவாக அலுவலர்கள் மற்றும் ஏரி, குளம் மற்றும் கண்மாய் பொறுப்பாளர்களுக்கு இத்திட்டத்தினை செயல்படுத்திட வழிகாட்டும் நெறிமுறைகள் இயற்கை வளங்கள் துறையால் 25.06.2024 அன்று வெளியிடப்பட்டது.

இத்திட்டத்தினை தமிழ்நாடு முதலமைச்சர் காஞ்சிபுரம் மாவட்டத்தைச் சேர்ந்த 10 விவசாய பெருமக்கள் மற்றும் மண்பாண்டம் செய்பவர்களுக்கு அனுமதி ஆணைகளை வழங்கி, தொடங்கி வைத்தார். அதன்படி, 08.07.2024 முதல் விவசாய பெருமக்கள் மற்றும் மண்பாண்ட தொழில் செய்வோர் tnesevai.tn.gov.in என்ற இணையதளம் வழியாக விண்ணப்பித்து பயன்பெறலாம். இந்நிகழ்ச்சியில், நீர்வளத்துறை அமைச்சர் துரைமுருகன், தலைமைச் செயலாளர் சிவ் தாஸ் மீனா, இயற்கை வளங்கள் துறை கூடுதல் தலைமைச் செயலாளர் க.பணீந்திர ரெட்டி, புவியியல் மற்றும் சுரங்கத்துறை ஆணையர் எ.சரவண வேல்ராஜ் மற்றும் அரசு உயர் அலுவலர்கள் கலந்து கொண்டனர்.

காணொலிக் காட்சி வாயிலாக வேலூர் மாவட்டத்திலிருந்து, நாடாளுமன்ற உறுப்பினர் து.மு. கதிர் ஆனந்த், மாவட்ட ஆட்சித் தலைவர் வே.இரா. சுப்புலெட்சுமி, விருதுநகர் மாவட்டத்திலிருந்து சட்டமன்ற உறுப்பினர் ஏ.ஆர்.ஆர். ரகுராமன், மாவட்ட ஆட்சித் தலைவர் முனைவர் வீ.ப. ஜெயசீலன், காஞ்சிபுரம் மாவட்டத்திலிருந்து மாவட்ட ஆட்சித் தலைவர் கலைச்செல்வி மோகன், கடலூர் மாவட்டத்திலிருந்து மாவட்ட ஆட்சித் தலைவர் டாக்டர் அ. அருண் தம்புராஜ், மேயர் ஆர். சுந்தரி, துணை மேயர் தாமரைச்செல்வன், திருவாரூர் மாவட்டத்திலிருந்து நாடாளுமன்ற உறுப்பினர் வை. செல்வராஜ், மாவட்ட ஆட்சித் தலைவர் தி. சாருஸ்ரீ, மாவட்ட ஊராட்சி தலைவர் கோ. பாலசுப்பிரமணியன், திருவாரூர் நகர்மன்ற தலைவர் புவன பிரியா செந்தில், கோயம்புத்தூர் மாவட்டத்திலிருந்து மாவட்ட ஆட்சித் தலைவர் கிராந்தி குமார் பாடி மற்றும் அரசு உயர் அலுவலர்கள், விவசாய பெருமக்கள் கலந்து கொண்டனர்.

மதுரையில் முப்பெரும் விழா; கல்வி உபகரணங்கள் வழங்கல்..

மதுரை மகால் மண்டல் பாஜக சார்பில் மஞ்சணக்காரத் தெருவில் முப்பெரும் விழா நடைபெற்றது. விழாவில் 200 மாணவர்களுக்கு 50 ஆயிரம் மதிப்பில் ஸ்கூல் பேக் , நோட், உள்பட கல்வி உபகரணங்கள் வழங்கப்பட்டது. மதுரை மஹால் மண்டல் மஞ்சணக்கார தெருவில் பாஜக சார்பில் முப்பெரும் விழா நடைபெற்றது. நடந்து முடிந்த நாடாளுமன்றத் தேர்தலில் பிரதமர் மோடி மூன்றாவது முறையாக தேர்ந்தெடுக்கப்பட்டதற்கு நன்றி தெரிவித்தும், மதுரை நாடாளுமன்ற தொகுதியில் மஹால் மண்டலில் அதிக வாக்குகள் பெற்றுக் கொடுத்த பொதுமக்களுக்கு நன்றி தெரிவித்தும் மற்றும் 47 வது வார்டில் உள்ள மாணவ மாணவிகளுக்கு இலவச நோட்புக் வழங்குதல் உள்ளிட்ட முப்பெரும் விழா நடைபெற்றது. விழாவிற்கு மதுரை மாவட்டத் தலைவர் மகா சுசீந்திரன் தலைமை தாங்கினார். மாநில நெசவாளர் பிரிவு செயலாளர் மற்றும் மண்டல் தலைவர் திருமுருகன் முன்னிலை வகித்தனர். மண்டல் பொதுச்செயலாளர் பாலசுப்பிரமணியன் மற்றும் குருசாமி ஆகியோர் வரவேற்றார். விழாவில் சிறப்பு விருந்தினர்களாக மாநில பொதுச்செயலாளர் பேராசிரியர் ராம சீனிவாசன், தென்னிந்திய பார்வர்ட் பிளாக் கட்சித் தலைவர் திருமாறன் ஆகியோர் கலந்து கொண்டனர். கல்வி நலத்திட்ட விழாவிற்கான நோட்புக், பேனா, பாக்ஸ் மற்றும் ஸ்கூல் பேக் உபகரணங்கள் வழங்கும் ஏற்பாடுகளை மாவட்ட செயற்குழு உறுப்பினர் நாராயணன் செய்திருந்தார்.

விழாவில் பள்ளி மாணவர்களிடம் பேசிய பேராசிரியர் ராம சீனிவாசன் கூறுகையில், 50 ஆண்டுகளுக்கு முன்பு இந்தியாவை பற்றிய கார்ட்டூன் வரையப்பட்டு அதில் நகைச்சுவையாக குறிப்பிடப்பட்டிருக்கும். இந்தியாவில் அனைவரும் வறுமையில் உள்ளனர். ஆகையால் அமெரிக்க குழந்தைகள் இந்த உணவை சாப்பிட்டு தங்கள் உடல் நலத்தை தேற்றிக் கொள்ளவும் என இருக்கும். தற்போது 50 வருடங்களுக்குப் பின் தற்போதைய கார்டூன் சித்திரத்தில் அமெரிக்க குழந்தைகளை நீங்கள் படித்து நல்ல வேலையில் இருங்கள் இல்லையேல் உங்கள் வேலைவாய்ப்பை இந்தியர்கள் பறித்துக் கொள்வார்கள் என்ற மாதிரி உள்ளது. இதற்கெல்லாம் காரணம் பிரதமர் மோடி அவர்களின் சீரிய முயற்சி. லண்டனில் உள்ள ஆக்ஸ்போர்டு பல்கலைக்கழகத்தில் உலகில் பல்வேறு பகுதியில் இருந்து மாணவர்கள் பயில்கிறார்கள். ஆனால் சாதனைளர்களாக விருந்து பெரும் மாணவர்கள் இந்தியர்களாக இருக்கின்றனர். இதற்கு நமது கல்வியே காரணம். மாணவர்கள் தாய் தந்தையரை மதியுங்கள். நமக்கு கல்வி கொடுக்கும் ஆசிரியரை மதியுங்கள். ஆசிரியரை குறை கூறாமல் பாடத்தில் காணும் செலுத்தி சாதனையாளராக மாறுங்கள் என பேராசிரியர் ராம சீனிவாசன் கூறினார்.

செய்தியாளர் வி காளமேகம்

நெல்லையில் மீண்டும் துளிர்விடும் கந்துவட்டி; மனித நேய ஜனநாயக கட்சி மாநில துணை செயலாளர் பிலால் ராஜா அறிக்கை..

நெல்லையில் மீண்டும் கந்துவட்டி துளிர் விட தொடங்கியுள்ளதாக மனிதநேய ஜனநாயக கட்சி துணை செயலாளர் அலிஃப் பிலால் ராஜா அறிக்கை வெளியிட்டுள்ளார். அதில், கந்து வட்டி கும்பல்கள் செய்யக்கூடிய அடாவடித்தனங்களை கண்டு அஞ்சாமல் அருகிலுள்ள காவல் நிலையத்தில் தைரியமாக புகாரளிக்க வேண்டும் என கேட்டுக் கொண்டுள்ளார். இது பற்றிய அவரது அறிக்கையில், நெல்லை மாவட்டத்தில் தொடர்ச்சியாக கந்து வட்டியால் பொதுமக்கள் பாதிக்கப்பட்டதும், அதன் விளைவாக கை குழந்தையோடு மாவட்ட ஆட்சியர் அலுவலகத்தில் குடும்பத்துடன் தீக்குளித்த சம்பவமும் நெல்லையின் மாறாத வடுகளாக உள்ளது. சில காலம் சத்தம் இல்லாமல் இருந்த இந்த கந்து வட்டி கும்பல்கள் இப்போது மீண்டும் துளிர் விட ஆரம்பித்துள்ளனர். குறிப்பாக தின கூலிகளாக உள்ளவர்களை அடிப்படையாகக் கொண்டு இந்த கந்துவட்டி கும்பல் செயல்படுகிறது.

தினசரி சிறிய அளவில் வியாபாரம் செய்யும் வணிகர்கள் மற்றும் உழவர் சந்தை போன்ற பகுதிகளில் உள்ள சிறு வியாபாரிகளை குறி வைத்து செயல்பட்டு வந்த இந்த கந்துவட்டி கும்பல், தின கூலிகளாக கொத்தனார், சித்தாள்களாக, லோடுமேன்களாக, பணியாற்ற கூடியவர்களையும் அதனை தொடர்ந்து ஹோட்டல் உணவகங்களில் அன்றாடம் தின கூலிகளாக இருக்கக்கூடிய புரோட்டா மாஸ்டர்கள், சப்ளையர்கள், சைனீஸ் மாஸ்டர்கள் போன்ற ஊழியர்களிடம் இந்த கந்துவட்டி கும்பல் ஆயிரம் ரூபாய்க்கு 250 ரூபாய் வட்டி என்ற விதத்தில் இருந்து துவங்கி அவர்களை தொடர்ச்சியாக நெருக்கடிக்கு ஆளாக்கி வருகின்றனர். அவ்வாறு தின வட்டியில் கட்ட தவறுபவர்களை அவர்களுடைய வீட்டுக்கு சென்று அடாவடித்தனமாக பேசுவதும், அவர்கள் பணியாற்றக்கூடிய உணவகங்களில் சென்று மிரட்டுவதுமான நிலை உள்ளது.

இவ்வாறாக பாதிக்கப்படக்கூடிய உணவக தொழிலாளர்கள் ஒரு பக்கம் பணி நெருக்கடியினாலும், இன்னொரு பக்கம் தங்களுடைய தன்னிறைவு பெற முடியாத வாழ்வாதார சூழ்நிலையால் இந்த கந்துவட்டி கும்பலாலும் கடுமையாக பாதிக்கப்படுகின்றனர். எனவே கந்துவட்டி கும்பல்கள் செய்யக்கூடிய அடாவடித்தனங்களை கண்டு அஞ்சாமல், உணவக ஊழியர்கள் தைரியமாக உங்களுடைய அருகாமையில் உள்ள காவல் நிலையங்களில் சென்று புகார் அளித்து மன அழுத்தத்தில் இருந்தும் தொடர்ச்சியான நெருக்கடியில் இருந்தும் மீள அதற்கான வழிவகைகளை சட்டம் உங்களுக்கு கொடுத்துள்ளது என்பதையும் நீங்கள் உணர வேண்டும், ஆகையால் இந்த கந்துவட்டி கும்பலிடம் இருந்து விடுபட அரசு காவல்துறையை உரிய முறையில் அணுகி நிவாரணம் பெற வேண்டுமென மனிதநேய ஜனநாயக கட்சியின் மாநில துணை செயலாளர் அலிஃப் பிலால் ராஜா தெரிவித்துள்ளார்.

செய்தியாளர்-அபுபக்கர்சித்திக்

அனைவருக்கும் வீடு வழங்கும் திட்டத்தின் கீழ் 205 பயனாளிகளுக்கு வீடு கட்டுவதற்கான ஆணை வழங்கல்..

கீழப்பாவூர் பேரூராட்சியில் அனைவருக்கும் வீடு வழங்கும் திட்டத்தின் கீழ் 205 பயனாளிகளுக்கு வீடுகட்டுவதற்கான ஆணை வழங்கும் விழா மாவட்ட ஆட்சித்தலைவர் ஏ.கே.கமல்கிஷோர் தலைமையில் நடந்தது. தென்காசி மாவட்டம் கீழப்பாவூர் தேர்வு நிலை பேரூராட்சி முத்தாரம்மன் கோவில் திருமண மண்டபத்தில் அனைவருக்கும் வீடு வழங்கும் திட்டத்தின் கீழ் 205 பயனாளிகளுக்கு வீடுகட்டுவதற்கான ஆணை வழங்கும் விழா தென்காசி நாடாளுமன்ற உறுப்பினர் ராணி ஸ்ரீகுமார், சட்டமன்ற உறுப்பினர்கள் எஸ்.பழனிநாடார் (தென்காசி), ஈ.ராஜா (சங்கரன்கோவில்) ஆகியோர் முன்னிலையில் மாவட்ட ஆட்சித்தலைவர் ஏ.கே.கமல்கிஷோர் தலைமையில் நடைபெற்றது.

பின்னர் மாவட்ட ஆட்சித்தலைவர் ஏ.கே.கமல்கிஷோர் தெரிவித்ததாவது, தென்காசி மாவட்டம் கீழப்பாவூர் தேர்வுநிலை பேரூராட்சியானது 14.18 ச.கி.மீ. பரப்பளவு கொண்டு 11 குக்கிராமங்களை உள்ளடக்கிய ஒரு நகரப்பகுதியாகும். இப்பேரூராட்சியானது 18 வார்டுகளாக பிரிக்கப்பட்டு 2011 மக்கள் தொகை கணக்கெடுப்பின்படி 22231 ஆகும். தற்போதைய மக்கள் தொகை சுமார் 28000 நபர்கள் வசித்து வருகிறார்கள். இப்பேரூராட்சி பகுதியில் குடியிருப்பு கட்டிடங்கள் 8701, வணிக கட்டிடங்கள் 1163, தொழிற்கூடங்கள் 29 எண்ணம் இருந்து வருகிறது. நகர் பகுதியில் வசிக்கும் மக்கள் தங்கள் வீடு குடிசையாகவோ அல்லது ஓட்டு வீடாகவோ இருக்குமாயின் அதனை முற்றிலுமாக அகற்றி புதிதாக காங்கிரீட் வீடு கட்டிகொள்ள கடந்த 2016ஆம் ஆண்டு முதல் அரசால் ஆணையிடப்பட்டுள்ளது. அதனைத் தொடர்ந்து கீழப்பாவூர் பேரூராட்சி பகுதியில் பெரும்பாலான குடியிருப்புகள் குடிசை மற்றும் ஓட்டு வீடுகளாக கட்டப்பட்டு மக்கள் குடியிருந்து வந்ததை முன்னிட்டு அரசின் நிதி ஒதுக்கீட்டின் கீழ் அனைவருக்கும் வீடு வழங்கும் திட்டத்தில் அரசு மானியத்துடன் பயனாளிகள் தாங்களாகவே காங்கீரிட் வீடுகளாக கட்டி கொள்ள நடவடிக்கைகள் மேற்கொள்ளப்பட்டு அத்திட்டத்தின் கீழ் கீழப்பாவூர் பேரூராட்சி பகுதியில் உள்ள பொதுமக்களிடம் முறையே விண்ணப்பங்கள் பெறப்பட்டு அதனை உரிய ஆவணங்களுடன் பரிசீலனை செய்து கீழ்கண்ட விவரப்படி பயனாளிகள் புதிதாக வீடுகள் கட்டி பயனடைந்து வருகின்றனர்.

2016-17 ம் ஆண்டுகளில் 270 பயனாளிகளுக்கு மதிப்பீடு தொகை (அரசு மானியம் பயனாளி பங்கு தொகையுடன்) 1215.00 இலட்சமும், 2017- 18 ம் ஆண்டுகளில் 100 பயனாளிகளுக்கு மதிப்பீடு தொகை (அரசு மானியம் பயனாளி பங்கு தொகையுடன்) 450.00 இலட்சமும் மற்றும் 2021-22-ம் ஆண்டுகளில் 226 பயனாளிகள் மதிப்பீடு தொகை (அரசு மானியம் – பயனாளி பங்கு தொகையுடன்) 1017.00 இலட்சம் என மொத்தம் மதிப்பீடு தொகை (அரசு மானியம் பயனாளி பங்கு தொகையுடன்) 2,68,200 இலட்சம் 596 பயனாளிகள் பயனடைந்துளளனர். இந்நிலையில், தற்போது சென்னை பேரூராட்சிகளின் இயக்குநர் ஆணையின்படி நடப்பு ஆண்டில் 205 பயனாளிகளுக்கு ரூ.922.50 இலட்சம் மதிப்பீட்டில் (பயனாளியின் பங்கு தொகையுடன்) அதற்கான ஆணை வழங்கும் விழா நடைபெற்று கொண்டிருக்கிறது. பயனாளிகளுக்கு வழங்கப்படும் அரசு மானியம் ரூ.2,10,000 முதல் தவணையானது பயனாளிகள் அடித்தளமட்டம் வேலை முடிவுற்றவுடன் ரூ.50,000-ம், இரண்டாம் தவணை ஜன்னல் மட்டம் வேலை முடிந்தவுடன் ரூ. ரூ.50,000-ம், மூன்றாம் தவணையாக மேற்கூரை மட்டம் வேலை முடிந்தவுடன் ரூ.50,000-ம் நான்காவது தவணையாக அனைத்து வேலை முடிவு பெற்றபின் ரூ.60,000-ம் பயனாளியின் வங்கி கணக்கில் வரவு வைக்கப்பட்டு வருகிறது. கட்டப்படும் வீட்டின் பரப்பளவு சுமார் 300 சதுரடிக்கு (28.22 ச.மீ) குறையாமல் கட்டப்பட வேண்டும் என மாவட்ட ஆட்சித்தலைவர் ஏ.கே.கமல் கிஷோர் தெரிவித்தார்.

இந்நிகழ்ச்சியில், கீழப்பாவூர் ஊராட்சி மன்ற தலைவர் பி.எஸ்.எம்.ராஜன், ஊராட்சி மன்ற துணைத்தலைவர் ராஜசேகர். உதவி இயக்குநர் (பேரூராட்சிகள்) அ. வில்லியம் ஜேசுதாஸ், செயல் அலுவலர் (கீழப்பாவூர்) மாணிக்கராஜ், உதவி மக்கள் தொடர்பு அலுவலர் (செய்தி) ரா.ராமசுப்பிரமணியன் மற்றும் மாமன்ற உறுப்பினர்கள், அரசு அலுவலர்கள், பொதுமக்கள் ஆகியோர் கலந்து கொண்டனர்.

செய்தியாளர்-அபுபக்கர்சித்திக்

தென்காசியில் நடந்த மக்கள் நீதிமன்றத்தில் 29 வழக்குகளுக்கு சுமூக தீர்வு..

தென்காசியில் நடைபெற்ற மக்கள் நீதிமன்றத்தில் 29 வழக்குகள் சுமூகமாக முடித்து வைக்கப்பட்டது. தென்காசி மாவட்ட ஒருங்கிணைந்த நீதிமன்ற வளாகத்தில் மக்கள் நீதிமன்றம் நடைபெற்றது. திருநெல்வேலி முதன்மை மாவட்ட நீதிபதி மற்றும் மாவட்ட சட்டப் பணிகள் ஆணைக்குழு தலைவர் வழிகாட்டுதலின் படி நடைபெற்ற மக்கள் நீதிமன்றத்திற்கு தென்காசி முதன்மை மாவட்ட நீதிபதி ராஜவேல் தலைமை தாங்கினார். தென்காசி முதன்மை சார்பு நீதிபதி மற்றும் வட்ட சட்ட பணிகள் குழு தலைவர் கிறிஸ்டல் பபிதா முன்னிலை வகித்தார். இந்தியன் ஓவர்சீஸ் வங்கி மேலாளர்கள், வழக்கறிஞர்கள் மற்றும் வழக்கில் சம்பந்தப்பட்ட பொதுமக்கள் கலந்து கொண்டனர். இதில் இந்தியன் ஓவர்சீஸ் வங்கி தென்காசி, இலஞ்சி, வீராணம், கடையநல்லூர், பாவூர்சத்திரம் மற்றும் சுரண்டை வங்கி கிளைகளில் இருந்து தொடரப்பட்ட 29 வழக்குகள் சுமூகமாக முடித்து வைக்கப்பட்டது. இவற்றில் ஒரு வழக்கு நீதிமன்றத்தில் நிலுவையில் இருந்தது. மற்ற 28 வழக்குகள் நீதிமன்றத்தில் தாக்கல் மட்டும் செய்யப்பட்ட வழக்குகள் என்பது குறிப்பிடத்தக்கது.

செய்தியாளர்-அபுபக்கர்சித்திக்

தமிழ்நாட்டில் சமூகநீதிக்கு துரோகம் இழைப்பது திமுக! பா.ம.க. தலைவர் அன்புமணி இராமதாஸ் குற்றச்சாட்டு..

விக்கிரவாண்டி தொகுதி இடைத்தேர்தலில் சமூகநீதிக்கு துரோகம் இழைப்பவர்களுக்கு தக்க பாடம் புகட்டுங்கள் என்று முதலமைச்சர் மு.க.ஸ்டாலின் கேட்டுக் கொண்டிருக்கிறார்.

அதையே நானும் சொல்கிறேன்….விக்கிரவாண்டி தொகுதி இடைத்தேர்தலில் சமூகநீதிக்கு துரோகம் இழைப்பவர்களுக்கு தக்க பாடம் புகட்டுங்கள்.

சமூகநீதிக்கு துரோகம் இழைப்பவர்கள் யார்? என்பதை என்பதை மக்கள் புரிந்து கொள்ள சில உண்மைகள்:

1.தமிழ்நாட்டில் சாதிவாரி மக்கள்தொகை கணக்கெடுப்பு நடத்த மாநில அரசுக்கு அதிகாரம் உண்டு என்று நீதிமன்றங்கள் தீர்ப்பளித்த பிறகும் சாதிவாரி கணக்கெடுப்பு நடத்தாமல் சமூகநீதிக்கு துரோகம் இழைப்பது யார்?

2.தமிழ்நாட்டில் 69% இட ஒதுக்கீட்டின் மீது கத்தி தொங்கிக் கொண்டிருக்கும் நிலையில், இட ஒதுக்கீடே போனாலும் பரவாயில்லை என்று சாதிவாரி கணக்கெடுப்பு நடத்த மாடோம் என முரண்டு பிடிப்பது யார்?

3.வன்னியர்களுக்கு இட ஒதுக்கீடு வழங்கக் கூடாது, அந்த இட ஒதுக்கீட்டை நீக்காமல் ஓய மாட்டோம் என்று கூட்டம் நடத்தி முழக்கமிட்டது எந்த சமூகம்? அந்தக் கூட்டத்தின் சிறப்பு விருந்தினராக கலந்துகொண்ட மருத்துவர் ஜெய ராஜ மூர்த்தி யாருடைய மைத்துனர்?

4.தமிழ்நாட்டில் அரசு கலை அறிவியல் கல்லூரிகளில் பிசி/எம்.பி.சி வகுப்பினருக்கான இடங்களை பட்டியலினத்தவருக்கு ஒதுக்கலாம், ஆனால், பட்டியலினத்தவருக்கும், பழங்குடியினருக்குமான இடங்களை அவர்களில் யாரும் இல்லாத சூழலிலும் யாருக்கும் ஒதுக்கக் கூடாது என்று ஆணையிட்டிருப்பது எந்த அரசு?

5.தமிழ்நாட்டில் வன்னியர்களுக்கு இட ஒதுக்கீடு வழங்கலாம் என்று உச்சநீதிமன்றம் தீர்ப்பளித்து இரண்டரை ஆண்டுகள் ஆகியும், வன்னியர்களுக்கு இட ஒதுக்கீடு வழங்காமல் ஏமாற்றுவது யார்

6.2019-ஆம் ஆண்டில் விக்கிரவாண்டியில் இடைத்தேர்தல் நடைபெற்ற போது, நாங்கள் ஆட்சிக்கு வந்தால் வன்னியர்களுக்கு 15% இட ஒதுக்கீடு வழங்குவோம் என்று கூறி ஆட்சிக்கு வந்த பிறகு அதை நிறைவேற்றாமல் ஏமாற்றுவது யார்?

7.தமிழ்நாட்டில் பட்டியலின மக்களின் மக்கள்தொகை கிட்டத்தட்ட 22% ஆக அதிகரித்துள்ள நிலையில், அதற்கு இணையாக அவர்களுக்கான இட ஒதுக்கீட்டை அதிகரிக்காதது எந்த அரசு?

8.சேலம் பெரியார் பல்கலைக்கழகத்தில் கல்வியியல் துறையில் பட்டியலினத்தைச் சேர்ந்தவர் என்பதாலேயே பேராசிரியர் தனலட்சுமிக்கு துறைத்தலைவர் பதவி மறுக்கப்பட்டதை கண்டுகொள்ளாமல் வேடிக்கைப் பார்ப்பது யார்?

9.தமிழ்நாட்டில் பட்டியலின மக்களின் நலன்களுக்காக ஒதுக்கப்பட்ட நிதியை அவர்களின் நலன்களுக்காக பயன்படுத்தாமல் வேறு திட்டங்களுக்கு திருப்பி விட்டது எந்தக் கட்சி அரசு?

10. கள்ளக்குறிச்சி கருணாபுரத்தில் நச்சுசாராயம் குடித்து உயிரிழந்தவர்களில் பெரும்பான்மையினர் பட்டியலின மக்கள். நச்சுசாராய உயிரிழப்புகள் குறித்த உண்மைகளை வெளிக்கொண்டு வருவதற்காக சி.பி.ஐ. விசாரணைக்கு ஆணையிட முடியாது என்று கூறி குற்றவாளிகளை பாதுகாப்பது எந்தக் கட்சி அரசு?

மேற்கண்ட அனைத்து வினாக்களுக்கும் விடை திமுக., மு.க.ஸ்டாலின் என்பது தான்.

ஆகவே, விக்கிரவாண்டி தொகுதி வாக்காளர்களே… சிந்திப்பீர், செயல்படுவீர், விக்கிரவாண்டி தொகுதி இடைத்தேர்தலில் சமூகநீதிக்கு துரோகம் இழைப்பவர்களுக்கு தக்க பாடம் புகட்டுங்கள்.!

தென்காசியில் மாற்றுத்திறனாளிகள் சிறப்பு குறைதீர்ப்பு கூட்டம்; மாவட்ட கலெக்டர் ஏ.கே.கமல் கிஷோர் அறிவிப்பு..

தென்காசி மாவட்டத்தில் மாற்றுத் திறனாளிகளுக்கான சிறப்பு குறைதீர்க்கும் நாள் கூட்டம் 04.07.2024 (நாளை) நடைபெறவுள்ளது என மாவட்ட ஆட்சித்தலைவர் ஏ.கே.கமல் கிஷோர் அறிவித்துள்ளார். இது பற்றிய செய்திக்குறிப்பில், தென்காசி மாவட்டத்தில் மாற்றுத்திறனாளிகள் அனைவரும் அரசின் திட்டங்களுக்கு விண்ணப்பித்து பயன் பெற வேண்டி மாற்றுத் திறனாளிகளுக்கான சிறப்பு குறைதீர்க்கும் நாள் கூட்டம் மாவட்ட ஆட்சித்தலைவர் ஏகே.கமல் கிஷோர் தலைமையில் மாவட்ட ஆட்சியரக கூட்டரங்கில் 04.07.2024 (நாளை) காலை 11:00 மணிக்கு நடைபெறவுள்ளது. மாற்றுத் திறனாளிகளுக்கான சிறப்பு குறைத்தீர்க்கும் நாள் கூட்டத்தில் தென்காசி மாவட்டத்ததை சார்ந்த அனைத்து வகையான மாற்றுத்திறனாளிகள் அனைவரும் தங்களுக்குத் தேவையான உதவிகள் பெற மாற்றுத் திறனாளிகளுக்கான தேசிய அடையாள அட்டை-நகல், குடும்ப அட்டை-நகல், ஆதார் அடடை-நகல், வாக்காளர் அட்டை-நகல் ஆகியவற்றுடன் விண்ணப்பித்து பயன் பெறலாம் என மாவட்ட ஆட்சித்தலைவர் ஏகே.கமல் கிஷோர் தெரிவித்துள்ளார்.

செய்தியாளர்-அபுபக்கர்சித்திக்

நிலக்கோட்டை வட்டாட்சியர் அலுவலகத்தில் கிராம நிர்வாக அலுவலரை தாக்கிய நபர்! அதிரடியாக கைது செய்த போலீசார்..

திண்டுக்கல் மாவட்டம் நிலக்கோட்டை தாலுகா பிள்ளையார் நத்தம் கிராமத்தில் கிராம நிர்வாக அலுவலராக ராஜ்குமார் என்பவர் பணியாற்றி வருகிறார்.

பிள்ளையார் நத்தம் கிராமத்தை சேர்ந்த குகன் என்பவரை விஏஓ ராஜ்குமார் ஒரு நிலம் சம்பந்தமாக விசாரணை செய்ததாக கூறப்படுகிறது.

இந்நிலையில் ராஜ்குமார் நிலக்கோட்டை வட்டாட்சியர் அலுவலகத்திற்கு தனது அலுவல் சம்பந்தமாக வந்துள்ளார். பின்னர் தனது சக ஊழியர்களோடு பேசிக்கொண்டு இருந்த போது குகன் என்பவர் வட்டாட்சியர் அலுவலகத்தில் அத்துமீறி நுழைந்து விஏஓ ராஜ்குமாரை சரமாரியாக தாக்கி கொலை மிரட்டல் விடுத்துள்ளார்.

இந்த சம்பவம் தொடர்பாக நிலக்கோட்டை காவல் நிலையத்தில் ராஜ்குமார் புகார் கொடுத்த நிலையில் காவல் சார்பு ஆய்வாளர் அருண் பிரசாத் குகனை கைது செய்து விசாரணை மேற்கொண்டார். அதன் பின்னர் வழக்கு பதிவு செய்து நிலக்கோட்டை போலிசார் குகனை சிறையில் அடைத்தனர்.

இந்த சம்பவம் நிலக்கோட்டை வட்டாட்சியர் அலுவலகத்திலும் கிராம நிர்வாக அலுவலர்கள் மத்தியிலும் பெரும் பரபரப்பை ஏற்படுத்தியுள்ளது.

தென்காசியில் தரிசு நிலம் என சான்றிதழ் வழங்க 5000 ரூபாய் லஞ்சம்; வருவாய் ஆய்வாளர் கைது..

தென்காசியில் விவசாயியிடம் தரிசு நிலம் என சான்றிதழ் வழங்க 5000 ரூபாய் லஞ்சம் வாங்கிய வருவாய் ஆய்வாளரை (ஆர்.ஐ) லஞ்ச ஒழிப்பு போலீசார் கைது செய்தனர். தென்காசி அருகேயுள்ள மத்தளம் பாறையைச் சேர்ந்த விவசாயி கதிரேசன் (34). இவர் தனது நிலத்திற்கு தரிசு நிலம் என சான்றிதழ் பெற தென்காசி தாலுகா அலுவலகத்தில் விண்ணப்பம் செய்திருந்தார். இது குறித்து கதிரேசன் தாலுகா அலுவலகத்தில் கேட்ட போது வருவாய் அலுவலரை சந்திக்கும் படி கூறியுள்ளனர். இதையடுத்து தென்காசி வருவாய் அலுவலர் தர்மராஜை நேரில் சந்தித்து தனக்கு தரிசு நில சான்றிதழ் வேண்டும் என விவசாயி கதிரேசன் கூறியுள்ளார். வருவாய் அலுவலர் மத்தளம்பாறை கிராம நிர்வாக அலுவலரை சந்திக்கும்படி கூறியுள்ளார்.

இதனை தொடர்ந்து கிராம நிர்வாக அலுவலரை சந்தித்து கதிரேசன் சான்றிதழ் குறித்து பேசியுள்ளார். கிராம நிர்வாக அலுவலர் நிலத்தை பார்வையிட்டு தரிசு நிலம் சான்றிதழ் வழங்க வருவாய் அலுவலருக்கு பரிந்துரை செய்து விட்டு, கதிரேசனிடம் வருவாய் அலுவலரை சந்திக்கும் படி கூறியுள்ளார். கதிரேசன் தென்காசி வருவாய் அலுவலர் தர்மராஜை சந்தித்த போது, தரிசு நிலம் சான்றிதழ் வேண்டும் என்றால் ரூ.20,000 தர வேண்டும் என தெரிவித்துள்ளார். கதிரேசன் தன்னால் அவ்வளவு பணம் கொடுக்க முடியாது என தெரிவிக்கவே, ரூ.5,000 தந்தால் தான் சான்றிதழ் தரமுடியும் என வருவாய் அலுவலர் தர்மராஜ் கூறிவிட்டார்.

இதனால் மனவேதனை அடைந்த கதிரேசன் இதுகுறித்து தென்காசி லஞ்ச ஒழிப்பு போலீசாரிடம் புகார் செய்தார். லஞ்ச ஒழிப்பு போலீசார் கூறிய அறிவுரையின் படி கதிரேசன் ரசாயன பவுடர் தடவிய ரூ.5,000 பணத்தை தென்காசி வருவாய் அலுவலர் அலுவலகம் சென்று அங்கிருந்த வருவாய் அலுவலர் தர்மராஜிடம் கொடுத்தார். அப்போது அங்கு மறைந்திருந்த லஞ்ச ஒழிப்பு டி.எஸ்.பி., பால்சுதர் தலைமையிலான போலீசார் விரைந்து சென்று தர்மராஜ் பணத்தை எண்ணிக் கொண்டிருந்த போது அவரை கைது செய்து பணத்தை பறிமுதல் செய்தனர். இதுகுறித்து லஞ்ச ஒழிப்பு போலீசார் வழக்கு பதிவு செய்து விசாரணை நடத்தி வருகின்றனர்.

செய்தியாளர்-அபுபக்கர்சித்திக்

மதுரை காமராஜர் பல்கலைக்கழகத்தில் உள்ள பெண்கள் விடுதியில் நள்ளிரவில் மர்ம நபர் நுழைந்ததால் பரபரப்பு – மர்ம நபர் மீது காவல் நிலையத்தில் புகார் கொடுக்க மறுக்கும் பல்கலைக்கழக நிர்வாகம் – மாணவிகள் வேதனை..

மதுரை மாவட்டம் நாகமலைப்புதுக்கோட்டை பகுதியில் மதுரை காமராஜர் பல்கலைக்கழகம் செயல்பட்டு வருகிறது.

பல்கலைக்கழக வளாகத்தில் விருந்தினர் மாளிகை மற்றும் துணை வேந்தர் மாளிகை அருகே மாணவிகள் தங்குவதற்கான தங்கும் விடுதி உள்ளது.

மாணவிகள் தங்கும் விடுகியில் பல்வேறு மாவட்டங்களில் இருந்தும் அண்டை மாநிலமான கேரளாவிலிருந்தும் ஏராளமான மாணவிகள் தங்கி படித்து வருகின்றனர்.

இந்நிலையில் நேற்று இரவு, பல்கலைகழக வளாகத்தில் உள்ள பெண்கள் தங்கும் விடுதிக்குள் மர்ம நபர் ஒருவர் திடீரென உள்ளே புகுந்துள்ளார்.

இதனை பார்த்த மாணவிகள் கூச்சலிட்ட நிலையில் அங்கிருந்த பாதுகாவலர் மற்றும் மாணவிகள் அவரை துரத்தி பிடித்துள்ளனர்.

மாணவிகளிடம் சிக்கிய நபர் மது போதையில் இருந்ததாக சொல்லப்படுகிறது. மது போதையில் இருந்த அந்த நபர் தான் தெரியாமல் வந்துவிட்டதாகவும் ஏற்கனவே இதுபோல வந்துள்ளேன் என்று ஒப்புக் கொண்டுள்ளார்.

இதே பெண்கள் விடுதியில் சில நாட்களுக்கு முன்பாக மர்ம நபர்கள் வந்து செல்வதாக மாணவிகள் கூறிய பொழுது வெறும் பிரம்மை என கூறி பல்கலை கழக நிர்வாகம் அலட்சியப்படுத்தி உள்ளது.

இந்த நிலையில் தற்போது மர்ம நபரை மாணவிகளே பிடித்து அவர எண் 100 மூலம் அழைத்து காவல்துறையினரிடம் ஒப்படைத்துள்ளனர்.

இது தொடர்பாக சம்பவ இடத்திற்கு வந்த நாகமலை புதுக்கோட்டை காவல் நிலைய போலீசார் மர்ம நபரை அழைத்து சென்ற நிலையில் சம்பவம் தொடர்பாக பல்கலைக்கழக நிர்வாகம் காவல் நிலையத்தில் புகார் ஏதும் தெரிவிக்காததால் முறையான விசாரணை மேற்கொள்ளாமல் காவல் நிலையத்திலிருந்து அந்த நபரை விடுவித்துள்ளதாகவும் கூறப்படுகிறது.

பல்கலை கழக இரவு காவலர்கள் பாதுகாப்பை மீறி மாணவிகள் விடுதிக்குள் மர்ம நபர் புகுந்த சம்பவத்தில் முறையாக நடவடிக்கை எடுக்காத பல்கலைக்கழக நிர்வாகத்தின் அலட்சியத்தால் தங்களது பாதுகாப்பு கேள்விக்குறியாக உள்ளதாக மாணவிகள் தரப்பில் தெரிவிக்கப்பட்டுள்ளது.

செய்தியாளர் வி காளமேகம்

இந்திய தண்டனைச் சட்டம் (ஐ.பி.சி.), குற்றவியல் நடைமுறைச் சட்டம் (சி.ஆர்.பி.சி.), இந்திய சாட்சியங்கள் சட்டம் உள்ளிட்ட பழைய ஆங்கிலேயர் கால சட்டங்களுக்குப் பதிலாக பாரதிய நியாய சன்ஹிதா (பி.என்.எஸ்.), பாரதிய நாகரிக் சுரக்ஷா சன்ஹிதா (பி.என்.எஸ்.எஸ்.), பாரதிய சாட்சிய அதினியம் ஆகிய 3 புதிய குற்றவியல் சட்டங்களை மத்திய அரசு அறிமுகப்படுத்திய நிலையில் இன்று முதல் அவை அமலுக்கு வந்துள்ளன. இந்நிலையில் புதிய சட்டங்களில் பெரும்பாலான அம்சங்கள் பழைய சட்டங்களை வெட்டி ஒட்டியதுதான் என்று காங்கிரஸ் மாநிலங்களவை எம்.பி பா.சிதம்பரம் விமர்சித்துள்ளார். புதிய சட்டங்கள் குறித்து அவர் தனது எக்ஸ் தள பதிவில் கூறியதாவது, ‘இன்று நடைமுறைக்கு வந்துள்ள 3 புதிய சட்டங்களில் 90 முதல் 99 சதவீதம் வரை பழைய சட்டங்களை வெட்டி ஒட்டிய வேலை தான் நடந்துள்ளது. புதிய சட்டங்களில் உள்ள சில அம்சங்களை நங்கள் வரவேற்றோம். இதற்கு பழைய சட்டங்களில் சில திருத்தம் கொண்டு வந்திருந்தாலே போதும். அதை விட்டுவிட்டு புதிதாக 3 சட்டங்களை உருவாக்கியது வீண் வேலை. அதுமட்டுமின்றி புதிய சட்ட விதிகளில் சில முன்னுக்குப் பின்னான குழப்பங்கள் உள்ளது. மாற்றங்கள் செய்யப்பட்ட சில அம்சங்கள் அரசியலமைப்புக்கு முற்றிலும் எதிரானது. இந்த அம்சங்கள் குறித்து பாராளுமன்ற நிலைக்குழுவில் உள்ள எம்.பிக்கள் கருத்து வேறுபாடு உள்ளதாக குறிப்பிட்டிருந்தும் அந்த விமர்சனங்களை அரசு கண்டுகொள்ளவில்லை. புதிய சட்டங்கள் குறித்த ஆக்கப்பூர்வமான விவாதம் எதுவும் பாராளுமன்றதில் நடைபெறவில்லை. சட்ட வல்லுனர்கள், பார் கவுன்சில் உறுப்பினர்கள், நீதிபதிகள், வழக்கறிஞர்கள் என பலர் புதிய சட்டங்களில் உள்ள குறைபாடுகளை சுட்டிக்காட்டியும் அவற்றை அரசு பொருட்படுத்தவில்லை. இதற்கு நேர் மாறாக எந்த விவாதமும் இன்றி புதிய சட்டங்களை அரசு தன்னிச்சையாக நிறைவேற்றியுள்ளது. இது அரசியலமைப்பின் மீது நேரடியாக நடத்தப்பட்ட தாக்குதல். இந்த புதிய சட்டங்கள் சிறிது காலத்துக்கு நீதிமன்றங்களுக்கு பெரும் சவாலாக இருக்கும். மேலும் வருங்காலத்தில் இந்த புதிய சட்டங்களில் அரசியலமைப்புக்கு எதிராக உள்ள அம்சங்கள் நீக்கப்பட்டு நீதித்துறையின் கொள்கைகள் நிலைநாட்டப்பட வேண்டும் என்று தனது பதிவில் தெரிவித்துள்ளார்.

ராமநாதபுரம் மாவட்டம் திருப்புல்லாணி ஒன்றியத்திற்கு உட்பட்ட பத்திரதரவா கிராமத்தில் மாநில வேளாண் வளர்ச்சி திட்டத்தின கீழ் வேளாண்மை தொழில்நுட்ப மேலாண்மை திட்டத்தின் மூலம் கிராம வேளாண் முன்னேற்றக் குழு என்ற தலைப்பில் விவசாயிகளுக்கு பயிற்சி முகாம் நடைபெற்றது .இப்பயிற்சியில் துணை வேளாண்மை அலுவலர் சையது முஸ்தபா கலந்து கொண்டு தரிசு நிலங்களை விளைநிலங்களாக மாற்றுவது எப்படி என்றும் சாகுபடி பரப்பை அதிகரிக்க செய்வது எப்படி என்று விளக்க உரை விவசாயிகளுக்கு வழங்கினார். தவமுருகன் உதவி வேளாண்மை அலுவலர் மண்ணுயிர் காத்து மண்ணுயிர் காப்போம் திட்டத்தில் விவசாயிகள் சம்பா நெல் சாகுபடிக்கு முன்பாக தக்கை பூண்டு சாகுபடி செய்து மடக்கி உழுது மண்வளத்தை பாதுகாக்கலாம் எனவும், மண் பரிசோதனையின் அவசியத்தை குறித்து விளக்கம் அளித்தார். இப்பயிற்சிகான ஏற்பாடுகளை உதவி தொழில்நுட்ப அலுவலர் ஜோசப் செய்திருந்தார். கிராமத்தில் உள்ள விவசாயிகள் திரளாக கலந்து கொண்டனர்.

நிலக்கோட்டை அருகே புதூர் கிராமத்தில் சாக்கடை நீர் தேக்கம்! நோய் பரவும் அபாயம்! எஸ்டிபிஐ பரபரப்பு குற்றச்சாட்டு..

திண்டுக்கல் மாவட்டம் நிலக்கோட்டை கோட்டூர் ஊராட்சிக்கு உட்பட்ட புதூர் கிராமத்தில் சுமார் 500 -க்கும் மேற்பட்ட வீடுகள் உள்ளது. இந்த கிராமத்தில் சாக்கடை நீர் செல்வதற்கு போதிய வழியில்லாமல் தேக்கம் அடைந்து பல வீடுகளின் வாசலில் தேங்கி கிடக்கிறது. இதனால் சிலர் நோய் வாய்ப்பட்டு தனியார் மருத்துவமனையில் சிகிச்சை பெற்று வருகின்றனர். இதில் இம்ரான் என்பவரின் குடும்பமே சிகிச்சை பெற்று வருவதாக கூறப்படுகிறது.

இந்நிலையில் இந்த சம்பவம் தொடர்பாக எஸ்டிபிஐ கட்சியின் திண்டுக்கல் மாவட்ட செயலாளர் தக்பீர் அலி கூறுகையில்;

கோட்டூர் ஊராட்சிக்கு உட்பட்ட புதூர் கிராமத்தில் அடிப்படை வசதிகள் ஏதும் இல்லை முக்கியமாக சாக்கடை நீர் செல்வதற்கு வழியில்லாமல் வீடுகள் முன்பு தேங்கி நிற்பதால் குழந்தைகள், கர்ப்பிணி பெண்கள் என பலரும் நோய் வாய்ப்பட்டு சிகிச்சை பெற்று வருகின்றனர். தேங்கி கிடக்கும் கழிவுநீரால் ஊர் முழுவதும் துர்நாற்றம் வீசுகிறது. இது சம்பந்தமாக பல முறை அதிகாரிகளிடம் முறையிட்டும் பதில் இல்லை. புதூர் மக்களை அரசும், அதிகாரிகளும் புறக்கணிக்கின்றனரோ என எங்களுக்கு சந்தேகம் ஏற்பட்டுள்ளது.

மேலும் தினம் தோறும் குறைந்தது நான்கு முறையாவது கோட்டூர் ஊராட்சி செயலாளர் பாண்டியராஜ் இவ்வழியாக தான் சென்று வருகிறார் அவரும் இந்த பிரச்சனைகளை கண்டு கொள்வதில்லை. கோட்டூர் ஊராட்சிக்கு உட்பட்ட அனைத்து கிராமங்களிலும் துப்புரவு பணியாளர்கள் செல்கின்றனர் ஆனால் புதூருக்கு மட்டும் வருவதே இல்லை.

மாவட்ட நிர்வாகமும் வட்டார வளர்ச்சி அதிகாரிகளும் இந்த ஊருக்கு முறையான சாக்கடை வசதிகளை செய்து தரவேண்டும் வாரத்திற்கு இரண்டு முறையாவது துப்பரவு பணியாளர்கள் வந்து சுத்தம் செய்து ஊர் மக்களை பாதுகாக்க வேண்டும். இல்லை என்றால் கிராம மக்களை ஒன்று திரட்டி நிலக்கோட்டை வட்டார வளர்ச்சி அலுவலகம் முற்றுகை போராட்டம் நடத்துவோம் என்று கூறினார். இந்நிகழ்வில் நிலக்கோட்டை நகர தலைவர் சபீன், கிளை தலைவர் மாசித், முபாரக், ஷகீத், யாத் அலி, ஊர் பொதுமக்கள் உட்பட ஏராளமானோர் பங்கேற்றனர்.

இராமநாதபுரம் மாவட்டம் உச்சிப்புளி அருகே கும்பரம் கிராமத்தில் வேளாண்மைத் துறையின் தொழில்நுட்ப மேலாண்மை முகமை திட்ட  2024-25ஆம் ஆண்டு கலைஞரின் அனைத்து கிராம ஒருங்கிணைந்த வேளாண்மை வளர்ச்சி திட்டத்தின் கீழ்  வேளாண் முன்னேற்றக் குழு காரீப்பருவ  பயிற்சி நடைபெற்றது. இப்பயிற்சியில் வேளாண்மை விற்பனை மற்றும் வேளாண் வணிகத்துறையின் உதவி வேளாண்மை அலுவலர் மோகன்ராஜ் விலை ஆதரவுத் திட்டத்தின் (Price Support Scheme)கீழ்  கொப்பரை கொள்முதல் செய்யப்பட்டு வருகிறது இத்திட்டத்தின் கீழ் கொள்முதல்  செய்யப்படும் விளை பொருட்களுக்கு உரிய தொகையானது இடைத்தரகு ஏதும் இன்றி கொள்முதல் செய்யப்பட்டு விவசாயிகளின் வங்கிகணக்கில் நேரடியாக வரவு வைக்கப்பட்டுவருகிறது. மேலும் மின்னணு தேசிய வேளாண் சந்நை திட்டம் (e-NAM),குளிர்பதன கிட்டங்கியில் விளைபொருட்கள்  இருப்பு வைத்திட வாடகை விபரம், பொருளீட்டுக்கடன் தொடர்பான திட்டங்கள் குறித்து விளக்கி கூறினார்.பயறு வகை விதைப் பண்ணை அமைக்கும் விவசாயிகளுக்கு அரசு சார்பில், உற்பத்தி  மானியம் வழங்கப்படுகிறது. விதைப் பண்ணை அமைக்க விரும்பும் விவசாயிகள், தங்கள் பகுதியில் உள்ள வட்டார வேளாண்மை விரிவாக்க மையங்களை அணுகலாம் எனத் உதவி விதை அலுவலர் ஆனந்த் தெரிவித்துள்ளார். கிராம வேளாண் முன்னேற்றக் குழுவின் நோக்கம் பயன்கள்,மற்றும் கலைஞர் அனைத்து கிராம ஒருங்கிணைந்த வேளாண் வளர்ச்சி திட்டத்தின்  நடப்பாண்டு மானியத்தில் பசுந்தாள் உர விதைகள், பண்ணை கருவிகள், தார்ப்பாலின் அடங்கிய தொகுப்பு உள்ளிட்டவை வழங்கப்படுகிறது என வட்டார தொழில்நுட்ப மேலாளர் பானுமதி கூறினார். மண் பரிசோதனை செய்வதன் முக்கியத்துவம் குறித்து உதவி வேளாண் அலுவலர் முகமது யூசுப் விவசாயிகள் இடையே விளக்கி பேசினார், தொடர்ந்து விவசாயிகளிடம் மண் மாதிரிகள் சேகரம் செய்யப்பட்டது. கும்பரம் கிராம நிர்வாக அலுவலர் மற்றும் கும்பரம் ஊராட்சி மன்ற தலைவர் உட்பட விவசாயிகள் திரளாக கலந்து கொண்டனர்.. பயிற்சி முடிவில் உதவி தொழில்நுட்ப மேலாளர் பவித்ரன் நன்றியுரை கூறினார் . 

திருப்பரங்குன்றம் ஒன்றிய அலுவலகத்தில் தரையில் அமர்ந்து தர்ணாவில் ஈடுபட்ட ஒன்றிய கவுன்சிலரால் பரபரப்பு..

மதுரை திருப்பரங்குன்றம் ஒன்றிய அலுவலகத்தில் வாயில் கருப்பு துணியுடன் தரையில் அமர்ந்து தர்ணாவில் ஈடுபட்ட ஒன்றிய கவுன்சிலரால் பரபரப்பு ஏற்பட்டது. விரகனுார் ஊராட்சி  பகுதியில் காவேரி கூட்டு குடிநீர், சாலை, சாக்கடை போன்ற முக்கிய பிரச்சனைகள் குறித்து பலமுறை கோரிக்கை வைத்தும் எந்தவித நடவடிக்கையும் மேற்கொள்ள வில்லை. இது குறித்து விரகனூர் ஊராட்சியில் நடைபெற்ற கிராம சபை கூட்டத்தில் கலந்து கொண்ட வட்டார வளர்ச்சி அலுவலர் பிரேமாவிடம் நேரடியாக புகார் செய்தும் கண்டு கொள்ளவில்லை என கூறி கவுன்சிலர் பார்த்திபராஜன் 3 மணி நேரம் தரையில் அமர்ந்து தர்ணாவில் ஈடுபட்டார். இதனைத் தொடர்ந்து அதிமுக ஒன்றிய குழு தலைவர் நிலையூர் முருகன் கவுன்சிலர் பார்த்திபராஜனிடம் மற்றும் வட்டார வளர்ச்சி அதிகாரியிடம் பேச்சு வார்த்தை நடத்தினார். இதனைத் தொடர்ந்து வட்டார வளர்ச்சி அலுவலர் பேராட்சி பிரேமா விரகனூர் பகுதியில் ஆய்வு செய்வதாகவும், அடிப்படை பிரச்சனைகளில் உடனடியாக தலையிட்டு தீர்வு செய்வதாகவும் உறுதியளித்ததன் பேரில் ஒன்றிய கவுன்சிலர் பார்த்திபராஜன் தனது தர்ணா போராட்டத்தை விலக்கிக் கொண்டார். இது குறித்து அதிமுக ஒன்றிய குழு தலைவர் நிலையூர் முருகன் கூறுகையில், விரகனூர் ஒன்றிய கவுன்சிலர் பார்த்திப ராஜன் காவிரி கூட்டு குடிநீர் மற்றும் சாலை போன்ற அடிப்படை வசதிகள் குறித்து கூறியவற்றை வட்டார வளர்ச்சி அலுவலர் செயல்படுத்தவில்லை என்றும் மேலும் சிறப்பு ஊராட்சி கிராம சபை கூட்டத்தில் கலந்து கொள்ள தகவல் தெரிவிக்கவில்லை என்றார். திருப்பரங்குன்றம் ஊராட்சி ஒன்றிய அலுவலகத்தில் ஒன்றிய கவுன்சிலர் பார்த்திப ராஜன் வாயில் கருப்பு துணி கட்டி திடீரென தரையில் அமர்ந்து போராட்டம் நடத்திய சம்பவம் பெரும் பரபரப்பை ஏற்படுத்தியுள்ளது. அப்பகுதிகளில் ஆய்வு செய்வதாக உறுதி அளித்ததை தொடர்ந்து இந்த பிரச்சனை முடித்து வைக்கப்பட்டது.

செய்தியாளர் வி காளமேகம்