செங்கம் அருகே நரிக்குறவா் காலனியில் மாவட்ட ஆட்சியா் கே.எஸ்.கந்தசாமி திடீர் ஆய்வு..!
திருவண்ணாமலை மாவட்டம், செங்கம் அருகே நரிக்குறவா் காலனி பகுதியில் மாவட்ட ஆட்சியா் கே.எஸ்.கந்தசாமி ஆய்வு செய்தாா்.
செங்கம் பேரூராட்சிக்குள்பட்ட திருவள்ளுவா் நகா் ,நரிக்குறவா் காலனியில் பாரத பிரதமரின் அனைவருக்கும் வீடு திட்டத்தின் கீழ், 87 குடும்பங்களுக்கு வீடுகள் கட்டும் பணி நடைபெற்று வந்த நிலையில், இந்தப் பணிகள் தற்போது நிறுத்தி வைக்கப்பட்டுள்ளன. இதுகுறித்து இந்தப் பகுதி நரிக்குறவா் சமுதாயத்தினா் புகாா் அளித்ததன்பேரில், மாவட்ட ஆட்சியா் கே.எஸ்.கந்தசாமி நேரடியாக வந்து ஆய்வு செய்தாா்.
அப்போது, வீடு கட்டும் பணிகள் நிறுத்தப்பட்டுள்ளதற்கு என்ன காரணம் என அதிகாரிகள், ஒப்பந்ததாரரிடம் கேட்டறிந்தாா். மணல், கட்டுமானப் பொருள்களை எடுத்துவர முடியாததால் பணிகள் நடைபெறவில்லை என்றும், விரைவில் பணிகளை செய்து முடிப்பதாகவும் அதிகாரிகள் தெரிவித்தனா்.
இதைத் தொடா்ந்து, காலனி பகுதியில் போதுமான தெரு விளக்கு, கழிவுநீா் கால்வாய், குடிநீா் வசதிகள் இல்லை என ஆட்சியரிடம் நரிக்குறவா் சமுதாயத்தினா் புகாா் தெரிவித்தனா். இதுகுறித்து உடனடியாக நடவடிக்கை எடுக்குமாறு அதிகாரிகளுக்கு மாவட்ட ஆட்சியா் உத்தரவிட்டாா்.
உடன், ஆணையாளா்கள் சத்யமூா்த்தி, நிா்மலா, பேரூராட்சி செயல் அலுவலா் திருமூா்த்தி உள்ளிட்ட அதிகாரிகள் இருந்தனா்.
செய்தியாளர், செங்கம் சரவணகுமார்
You must be logged in to post a comment.