Home செய்திகள் நெல்லை மாவட்டத்தில் அனுமதியின்றி ஆழ்துளை கிணறு அமைத்தால் கடும் நடவடிக்கை-மாவட்ட ஆட்சியர் எச்சரிக்கை

நெல்லை மாவட்டத்தில் அனுமதியின்றி ஆழ்துளை கிணறு அமைத்தால் கடும் நடவடிக்கை-மாவட்ட ஆட்சியர் எச்சரிக்கை

by mohan

சுர்ஜித் வில்சன் ஆழ்துழை கிணற்றில் தவறி விழுந்து இறந்த சம்பவத்தை தொடர்ந்து தமிழகம் முழுவதும் பல்வேறு முன்னெச்சரிக்கை நடவடிக்கைகள் தீவிரப்படுத்தப்பட்டுள்ளது. அந்த வகையில் நெல்லை மாவட்டத்தில் அனுமதியின்றி ஆழ்துளை கிணறு அமைத்தால் கடும் நடவடிக்கை எடுக்கப்படும் என மாவட்ட ஆட்சியர் ஷில்பா பிரபாகர் சதீஷ் எச்சரிக்கை விடுத்துள்ளார். அதன் படி ஆழ்துளை கிணறுகள், திறந்த வெளி கிணறுகள் புதிதாக அமைக்கும் போது தமிழ்நாடு ஊரக வளர்ச்சி துறையின் அனுமதி பெற வேண்டும். இது குறித்த விதிமுறைகளை பின்பற்றி அனுமதி பெற்ற பின் தகுந்த பாதுகாப்பு நடவடிக்கைகளோடு பணிகளை தொடர வேண்டும். புதிய ஆழ்துளை கிணறுகள் மற்றும் திறந்த வெளி கிணறுகள் அமைக்க மற்றும் பராமரிப்பு மேற்கொள்ள விண்ணப்பம் உரிய உள்ளாட்சி அலுவலர்களுக்கு படிவம் A-யில் உரிய விண்ணப்ப கட்டணம் ரூ.100-க்கான வங்கி வரையோலையுடன் விண்ணப்பிக்க வேண்டும். அனுமதி படிவம் B-யில் 30 நாட்களுக்குள் உரிய அலுவலர்கள் உரிய அலுவலர்களால் வழங்கப்பட வேண்டும்.

உள்ளாட்சி அமைப்புகள் இந்த அனுமதி தொடர்பாக படிவம் C-யில் பதிவேடு பராமரிக்க வேண்டும். உள்ளாட்சி அமைப்புகள் படிவம் D-யில் மாதாந்திர அறிக்கையை மாவட்ட நிர்வாகத்துக்கு சமர்ப்பிக்க வேண்டும். மேலும் ஆழ்துளை கிணறு அமைத்தல் மற்றும் புதிய திறந்த வெளி கிணறுகள் அமைக்கும் ஒப்பந்தகாரர்கள் ரூ.1,500 கட்டணமாக செலுத்தி மாவட்ட ஆட்சியரிடம் பதிவு செய்ய வேண்டும். பதிவு செய்யப்பட்ட ஒப்பந்தகாரர்கள் மட்டுமே ஆழ்துளை கிணறுகள் மற்றும் திறந்த வெளி கிணறுகள் அமைக்க அனுமதி வழங்கப்படும்.பதிவு செய்யாத ஒப்பந்தகாரர்கள் உள்ளாட்சி விதிகளை மீறி பணிகள் செய்தால் காவல்துறை மூலம் உரிய நடவடிக்கை எடுக்கப்படும்.முறையாக அனுமதி பெற்று கிணறு வெட்டும் போதும், ஆழப்படுத்துதல் மற்றும் சீரமைக்கும் போதும் கிணற்றின் உரிமையாளர்கள் கீழ்கண்ட முறைகளை பின்பற்ற வேண்டும். பணியாளர்கள் தகுந்த முன்னெச்சரிக்கைகளுடன் ,பாதுகாப்பு உபகரணங்களுடன் பணியை செய்ய வேண்டும்.

கிணறு தோண்டும் பணியில் ஈடுபடும் பணியாளர்கள் சற்று நிறுத்தினாலோ அல்லது ஓய்வு பெறும் நேரத்தில் கிணறு மூடி இருக்கிறதா? என்பதை கவனிக்கப்பட வேண்டும்.கைவிடப்பட்ட ஆழ்துளை கிணறுகளை களிமண், மணல், கற்கள் கொண்டு சமதளமாக மூடப்பட வேண்டும்.ஆழ்துளை கிணறு தோண்டும் பணி முடிந்த பின்னர் கிணற்றை சுற்றி உள்ள குழிகளை மூடி இருக்க வேண்டும்.ஊரகப்பகுதியில் தனியார் நிலங்களில் உள்ள கைவிடப்பட்ட ஆழ்துளை கிணறுகள் மற்றும் திறந்த வெளி கிணறுகள் மகாத்மா காந்தி தேசிய ஊரக வேலை வாய்ப்பு திட்டத்தின் கீழ் மழை சேகரிப்பாக மாற்றிட தமிழக அரசு அறிவித்துள்ளது.

மேற்கண்ட அனைத்து நிபந்தனைகளையும் மீறி ஒரு நிலத்தின் உரிமையாளர் கைவிடப்பட்ட கிணற்றை மூடாமல் அப்படியே விட்டு விட்டால், உள்ளாட்சி சட்டத்தின் படி கிணற்றின் உரிமையாளர் மீது நடவடிக்கை எடுக்கப்படும்.மேலும் அனுமதி இல்லாமல் ஆழ்துளை கிணறு தோண்டினால் சட்டப்படி நடவடிக்கை எடுக்கப்படும் எனவும் மாவட்ட ஆட்சியர் அறிவித்துள்ளார்.நெல்லை மாவட்டத்தில் மாநகராட்சி, நகராட்சி, பேரூராட்சி மற்றும் கிராம ஊராட்சி பகுதிகளில் பயன்பாட்டில் இல்லாத ஆழ்துளை கிணறுகள் மற்றும் திறந்த வெளி கிணறுகள் பாதுகாப்பற்ற முறையில் இருப்பது குறித்து மாநகராட்சி பகுதியை சேர்ந்தவர்கள்- 0462-2329329, நகராட்சி பகுதியை சேர்ந்தவர்கள்-0462-561998, பேரூராட்சி பகுதியை சேர்ந்தவர்கள்- 1800 4251426, கிராம ஊராட்சிகள்- 0462- 2501279, மாவட்ட அவசர கட்டுப்பாட்டு அறை- 1077 ஆகிய தொலை தொடர்பு எண்களில் தொடர்பு கொண்டு தகவல் தெரிவிக்கலாம் என அறிவுறுத்தப்பட்டுள்ளது.

செய்தியாளர் அபுபக்கர்சித்திக்

EID MUBARAK

You may also like

Social Media Auto Publish Powered By : XYZScripts.com