Home செய்திகள் மதுரையில் “தொலைநோக்கு 2019” வெற்றி தரும் பொறியியல் கருத்தரங்கம், நடைபெற்றது…

மதுரையில் “தொலைநோக்கு 2019” வெற்றி தரும் பொறியியல் கருத்தரங்கம், நடைபெற்றது…

by ஆசிரியர்

தமிழ்நாடு சுயநிதி பொறியியல், கலை மற்றும் அறிவியல் கல்லூரிகளின் கூட்டமைப்பு அரசு தொழில்நுட்பக் கல்வி இயக்ககம் விரைவில் நடத்தவுள்ள ஆன்லைன் கவுன்சிலிங் குறித்த விழிப்புணர்வுக் கருத்தரங்கினை மதுரையில் நடத்தியது. ‘தொலைநோக்கு 2019’ என்ற பெயரிலான இக்கருத்தரங்கில் 500-க்கும் மேற்பட்ட பெற்றோர்களும், மாணவர்களும் பங்கேற்றனர்.

நடப்பாண்டு பொறியியல் மாணவர் சேர்க்கைக்கான ஆன்லைன் கவுன்சிலிங் முறையானது, அண்ணா பல்கலைக்கழகத்திலிருந்து அரசு தொழில்நுட்பக் கல்வி இயக்ககத்துக்கு மாற்றப்பட்டுள்ளது. இதனைத் தொடர்ந்து, இந்த ஆன்லைன் கவுன்சிலிங் குறித்த விழிப்புணர்வையும், செயல்முறைகளையும் விளக்கமாக எடுத்துரைக்கவும், பொறியியல் படிப்பதனால் உள்ள வேலை வாய்ப்புகள் குறித்த தகவல்களைப் பகிர்ந்து கொள்ளவும் இந்த மாபெரும் இலவசக் கருத்தரங்கிற்கு ஏற்பாடு செய்யப்பட்டிருந்தது.

இந்நிகழ்ச்சியில் தமிழ்நாடு சுயநிதி பொறியியல், கலை மற்றும் அறிவியல் கல்லூரிகள் கூட்டமைப்பின் தலைவர் திரு. ஆர்.எஸ். முனிரத்தினம், துணை தலைவர் திரு. ஆர்.எஸ். ரகுராம் மற்றும் செயலாளர் டாக்டர் பி. செல்வராஜ் ஆகியோரது முன்னிலையில், ஹச்.சி.எல். டெக்னாலஜீஸ் நிறுவனத்தின் மதுரை மையத் தலைவர் திரு. சுப்பராமன் பாலசுப்ரமணியன், எல்.எம்.இ.எஸ். அகாடமியின் நிறுவனர் திரு. பிரேமானந்த் சேதுராஜன், கே7 கம்ப்யூட்டிங் நிறுவனத்தின் முதன்மை செயல் அதிகாரி திரு. கே. புருஷோத்தமன் மற்றும் அரசு தொழில்நுட்பக் கல்வி இயக்ககத்தின் மூத்த அதிகாரிகள் உள்ளிட்டோர் சிறப்புரை நிகழ்த்தினர்.

இக்கருத்தரங்கின் நிறைவில் பேசிய தமிழ்நாடு சுயநிதி பொறியியல், கலை மற்றும் அறிவியல் கல்லூரிகள் கூட்டமைப்பின் தலைவர் திரு. ஆர்.எஸ். முனிரத்தினம், துணை தலைவர் திரு. ஆர்.எஸ். ரகுராம் மற்றும் செயலாளர் டாக்டர் பி. செல்வராஜ் ஆகியோர் கூறுகையில் “பொறியியல் படிக்கும் மாணவர்களுக்கான வேலை வாய்ப்பு குறைந்து விட்டதாக ஒரு பரவலான தகவல் நிலவி வருகிறது. ஆனால் உண்மையில் 2017-18-ஆம் ஆண்டில் 1,20,000 பொறியியல் மாணவர்களுக்கு வேலை வாய்ப்பு கிடைத்துள்ளது. இந்த எண்ணிக்கை சென்ற ஆண்டு, அதாவது 2018-19-இல் 25% உயர்ந்து சுமார் 1,50,000 பொறியியல் மாணவர்கள் வேலை வாய்ப்பினைப் பெற்றுள்ளனர். இந்த வளர்ச்சி விகிதம் வரும் ஆண்டும் தொடரும் என்று எதிர்பார்க்கப்படுகிறது.

சிவில், மெக்கானிக்கல்,இ.சி.இ, இ.இ.இ, கம்ப்யூட்டர் சயன்ஸ், ஐ.டி,பயோ மெடிக்கல், மெக்காட்ரானிக்ஸ், ஏரோனாட்டிகள்,போன்ற பல்வேறு துறைகளிலும் ஏராளமான வேலை வாய்ப்புகள் கொட்டிக் கிடக்கின்றன. டி.சி.எஸ்,சி.டி.எஸ், இன்ஃபோசிஸ்,விப்ரோ, எச்.சி.எல், சிண்டல், ஹெக்சாவேர், கூகுள்,எல்&டி, கேட்டர் பில்லர், ஐ.பி.எம், ஜோஹோ, அக்சென்ச்சர் உள்ளிட்ட உலகின் பல்வேறு முன்னணி நிறுவனங்கள் ஒவ்வொரு ஆண்டும், புதிதாக வெளிவரும் சிறந்த பொறியியல் மாணவர்களுக்கு வேலை வாய்ப்பினை வழங்கிய வண்ணம் உள்ளன.

12-ஆம் வகுப்பு முடித்த பின் மற்ற துறைகளை எடுத்து படிக்கும் மாணவர்களை விடவும், பொறியியல் மாணவர்களுக்குத்தான் நல்ல வேலையும் அதிக சம்பளத்திற்கான வாய்ப்பும் கிடைக்கிறது. எனவே பொறியியல் படிப்பை மாணவர்கள் நம்பிக்கையோடு படிக்கலாம்” என்று கூறினர். தமிழ்நாடு சுயநிதி பொறியியல், கலை மற்றும் அறிவியல் கல்லூரிகளின் கூட்டமைப்பு தமிழகத்தில் 2014-ஆம் ஆண்டு முதல் செயல்பட்டு வருகிறது. இதில் 343 தனியார் பொறியியல் கல்லூரிகளும், 37 கலை மற்றும் அறிவியல் கல்லூரிகளும் உறுப்பினர்களாக உள்ளனர்.

கீழை நியூஸுக்காக மதுரை நிருபர் கனகராஜ்

EID MUBARAK

You may also like

Social Media Auto Publish Powered By : XYZScripts.com