விழிப்புணர்வு கட்டுரைகள்

இந்தியாவில் அதுவும் கீழக்கரையில் டெங்கு காய்ச்சலின் வீரியம் மிக கடுமையாக நிலவி வருகிறது. இது சம்பந்தமாக கீழக்கரையில் நகராட்சி நிர்வாகம் தவிர்த்து பல் வேறு சமூக அமைப்புகளும் டெங்கு காய்ச்சல் பற்றிய விழுப்புணர்வு செயல்பாடுகள் மற்றும் நிலவேம்பு கசாயம் வினியோகம் போன்ற செயல்களை மிக வீரியமாக செய்து வருகிறார்கள். ஆனால் டெங்கு கொசுவின் வீரியமோ அதைவிட வேகமாக கீழை நகரில் பரவி வருவது மிகவும் வேதனையான செய்தி.

இந்த மன வேதனைக்கு இதம் தரும் விதமாக சென்னையை மையமாக வைத்து செயல்படும் BRIOBLISS எனும் மருந்துகள் தயாரிக்கும் நிறுவனம் ஒன்று THROMBOBLISS Syrup எனும் இரத்த அணுக்களை 72 மணி நேரத்தில் அதிகரிக்கும் மருந்தை ஏழை, எளியவர்களுக்கு இலவசமாக கொடுக்கப்படும் என்ற அறிவிப்பை வெளியிட்டுள்ளார்கள். மேலும் இது சம்பந்தமாக கீழை நியூஸ் சார்பாக அந்நிர்வாகத்தை தெடர்பு கொண்ட பொழுது இந்நிறுவனத்தின் நிர்வாகிகளின் ஒருவரான R.சத்தியநாராயனண் என்பவர் இத்தகவலை உறுதி செய்ததுடன், ஏழை எளிய மக்களுக்கு இச்செய்தியை எத்தி வைக்குமாறும் கேட்டு கொண்டுள்ளார்.

மேலும் மருந்துகளின் தேவைகளுக்கு கீழ்கண்ட முகவரியில் தொடர்பு கொள்ளலாம்.

Admin Office: No. 14,
Elliots Beach Road,
North End, Besant Nagar,
Chennai – 600090.
Ph : 044 – 42646010.
Fax : 044 – 42646011.
Mob : 09444320704
Email :[email protected]

கட்டுரையாளர் : அபூவஸ்மீ (T.நெய்னா முஹம்மது, B.Sc., H.D.C.A.,)

இயந்திர கதியில் இயங்கிக் கொண்டிருக்கும் இந்த உலகில், நமது உரிமைகளையும், நாட்டில் நடைபெறும் ஒழுங்கீனங்களையும் பற்றி எடுத்துரைக்க நமக்கு நேரம் இல்லை. நாம் நம், அறியாமையினால் ஏமாறுவது ஒரு வகையில் ஏற்றுக் கொள்ளக் கூடியதாகும். ஆனால் நாம் தெரிந்தே ஏமாற்றப்படுவது பொறுக்க முடியாத குற்றமாக கருதப்படுகிறது. நுகர்வோராகிய நாம், மிகுந்த விழிப்புடனும், எச்சரிக்கையுடனும், மற்றவரால் ஏமாற்றப்படாமலும் இருத்தல் அவசியம்.

நுகர்வோரின் உரிமைகள் பற்றி விழிப்புணர்வு ஏற்படுத்தும் விதமாக மார்ச் 15ம் தேதி, உலக நுகர்வோர் தினம் கடைபிடிக்கப்படுகிறது. நுகர்வோரின் அடிப்படை உரிமைகளை விளக்குவது; அதன் மீது நடவடிக்கை எடுத்தல்; சந்தை குற்றங்களுக்கு எதிராக போராடுதல் ஆகியவை இதன் முக்கிய நோக்கங்களாக இருக்கிறது.

வியாபாரம் தோன்றிய நோக்கம் :

மனிதன் தனக்கு தேவையான ஒன்று பிறரிடம் இருக்கும் போது அதை அவனிடம் கேட்கிறான். பேரம் பேசுகிறான். அதற்கு ஈடாக தன்னிடம் உள்ளதை கொடுக்கிறான். இப்படி உருவானதுதான் வியாபாரம். ஆதிகாலத்தில் பண்ட மாற்றமாக அதாவது பொருளுக்கு பொருள் என்று இருந்துவந்த வியாபாரம் காலப்போக்கில் பணத்திற்கு பொருள் என்ற வியாபார முறைக்கு மாறிவிட்டன.

பணம் இருந்தால் போதும் எதையும் வாங்கலாம் என்ற அளவுக்கு பணம் வியாபாரத்தில் முக்கியத்துவம் பெற்று விட்டன. இதனால் வியாபார முறைகளும் மாறிவிட்டன. மாறிவிட்ட வியாபார முறைக்கு ஏற்ப மனிதனும் மாற்றிக்கொள்ள முயற்சிகிறான்.

வியாபாரத்தைப் பற்றி திருமறை :

வியாபாரத்தைப் பற்றி அல்லாஹ் தன் திருமறையில் 2:275 வசனத்தில் குறிப்பிடுகிறான்: அல்லாஹ் உங்களுக்கு வியாபாரத்தை அனுமதித்திருக்கிறான். ஆனால் அல்லாஹ் கூறும் வியாபாரத்தில் அளவை நிறுவையில் மோசடி, பொய்யான வாக்குறுதி, பொருள் கலப்படம், குறையுள்ள பொருள் விற்பனை, வாங்குபவரை ஏமாற்றுதல், பொருள் விற்பனைக்காக அல்லாஹ் மீது சத்தியம் செய்தல், பொருளை பதுக்குதல், கொள்ளையடித்தில், திருடுதல், அல்லாஹ் ஹராமாக்கிய பொருளை விற்பனை செய்தல் அல்லது வாங்குதல், வாங்கிய பொருள் கைக்கு வருவதற்கு முன் விற்பனை செய்தல் போன்ற எண்ணற்ற குறைபாடுகள் கிடையாது.

ஆனால் இன்றைய வியாபாரத்தில் இவையெல்லாம் வியாபார நுணுக்கங்களாக தலை தூக்கிவிட்டன. பலர் எந்த வியாபாரம் ஹலாலானது, எந்த வியாபாரம் ஹரமானது என்பதை அறியாமலேயே வியாபாரம் செய்து வருகின்றனர். இதனால்தான் வியாபாரியாக இருந்து வாழ்க்கையை நடத்தும் முஸ்லிம்கள் எப்படி நடந்துகொள்ள வேண்டும் என்பற்கு இஸ்லாம் சில வரையறைகளை விதிக்கிறது.

அளவையிலும், நிறுவையிலும் மோசடி கூடாது!

சில வியாபாரிகள் தாங்கள் விற்கக் கூடிய பொருட்களுக்கு அதிக லாபம் வரவேண்டும் என்பதற்காக ஒரு வழிமுறையைப் பின்பற்றுவார்கள். விற்கக் கூடிய பொருட்களில் “அளவையிலும், நிறுவையிலும் மோசடி” செய்வார்கள். இப்படி மோசடி செய்பவர்களைக் குறித்து அல்லாஹ் தன் திருமறையில் 83:1-3 வசனங்களில் கடுமையாக எச்சரிக்கின்றான்: அளவையிலும் நிறுவையிலும் யார் மோசடி செய்கிறார்களோ அவர்களுக்கு கேடுதான்.

அவர்கள் மனிதர்களிடம் இருந்து அளந்து வாங்கினால் நிறைய அளந்து கொள்வார்கள். ஆனால் அவர்கள் மற்றவர்களுக்கு அளந்தோ, நிறுத்தோ கொடுக்கும் போது குறைத்து விடுவார்கள். அளவையிலும் நிறுவையிலும் குறைத்து வியாபாரம் செய்வது வியாபார நுணுக்கமாக சில வியாபாரிகள் நினைக்கின்றனர். ஆனால் இது ஒரு மாபெரும் மோசடி. நபி (ஸல்) அவர்கள் கூறினார்கள்: “(அளவை, நிறுவை என) இரண்டு விஷயங்களில் பொறுப்பேற்றுள்ளீர்கள். இதில்தான் உங்களுக்கு முன் இருந்த சமுதாயத்தினர் அழிந்தனர்” என்று எச்சரித்தார்கள். (இப்னு அப்பாஸ் (ரலி) – திர்மிதீ).

நபி (ஸல்) அவர்கள் இந்த ஹதீஸில் சொன்ன அந்த அழிந்து போன சமுதாயத்தினர் யார் தெரியுமா? ஷுஐப் நபியின் சமுதாயத்தினர். மத்தியன்வாசிகள் அதாவது தோப்புகளில் வசித்தவர்கள் என்று அழைக்கப்படும் அந்த சமுதாயத்தினர். இந்த மத்தியன்வாசிகள் அளவையிலும் நிறுவையிலும் மோசடி செய்தனர்.

இம்மக்களைத் திருத்துவதற்காக அல்லாஹ் ஷுஐப் நபியை தன் தூதராக தேர்ந்தெடுத்து அச்சமுதாயத்திற்கு அனுப்பினான். ஷுஐப் நபி அல்லாஹ் காட்டித்தந்த ஏகத்துவக் கொள்கையை விளக்கி, அவர்கள் செய்துவரும் அளவை நிறுவை மோசடியை விட்டுவிடுமாறு எச்சரித்தார்கள். ஆனால் அம்மக்கள் அவரைப் பின்பற்றவில்லை. எனவே அல்லாஹ் அச்சமுதாயத்தை அழித்தான்.

ஷுஐப் நபி தன் சமுதாயத்தை எச்சரித்தைப் பற்றி அல்லாஹ் தன் திருமறையில் (7:85) மற்றும் (26:181-183) ஆகிய வசனங்களில் குறிப்பிடுகிறான்: அளவையும், நிறுவையையும் நிறைவாக கொடுங்கள். மக்களுக்கு அவர்களின் பொருட்களை குறைத்துவிடாதீர்கள் என எச்சரித்தார். ஆனால் அம்மக்கள் அவருடைய பேச்சை கேட்கவில்லை.

அச்சமுதாயத்தில் அல்லாஹ்வை ஏற்கமறுத்தவர்கள் கூறினார்கள். ஷுஐபைப் பின்பற்றினால் நீங்கள் உங்கள் வியாபாரத்தில் நஷ்டமடைந்துவிடுவீர்கள். அவரைப் பின்பற்றாதீர்கள் என்று கூறினார்கள். அவர்கள் செய்துவந்த இந்த அளவை நிறுவை மோசடிக்காக அல்லாஹ் அவர்கள் மீது பூகம்பத்தை ஏற்படுத்தி அழித்துவிட்டான். அளவை நிறுவை மோசடி செய்யும் வியாபாரிகள் இந்த சமுதாயத்திற்கு ஏற்பட்ட நிலை தங்களுக்கு ஏற்பட்டால் என்னவாகும் என்பதை உணரவேண்டும்.

வாங்குபர்களை ஏமாற்றுவது கூடாது!

அடுத்து வியாபாரிகள் லாபம் பெறுவதற்கு கையாளும் வழிமுறை “வாங்குபர்களை ஏமாற்றுவது”. இறையச்சம் இல்லாத எத்தனையோ வியாபாரிகள் தங்களுடைய பொருட்களின் குறைகளை மறைப்பதற்காக பல வழிமுறைகளைப் பின்பற்றுவார்கள். சிலர் குறையுள்ள இடத்தில் லேபிள்களை ஒட்டிவிடுவார்கள். சிலர் அதை பெட்டியின் அடிப்பாகத்தில் வைத்து மறைத்துவிடுவார்கள்.

சிலர் எக்ஸ்பைரியான பொருளின் தேதியை மாற்றுவார்கள் அல்லது அந்த இடத்தில் பேனாவால் அடித்துவிடுவார்கள். எப்படியாவது வாங்குபர்களை ஏமாற்றி பணம் சம்பாதிக்க முயற்சிப்பார்கள். இப்படிப்பட்ட வியாபார முறைக்கு நபி (ஸல்) அவர்கள் தடைசெய்தார்கள். ஒருமுறை நபி (ஸல்) அவர்கள் ஓர் உணவுக் குவியலைக் கடந்து சென்ற போது அதிலே தன் கையை விட்டவுடன் அவர்களுடைய விரல்களில் ஈரம்பட்டது.

அப்போது அக்கடைகாரரைப் பார்த்து: “இது என்ன ஈரம்?” என்று நபியவர்கள் கேட்டார்கள். அதற்கு அவர், “அல்லாஹ்வின் தூதரே! மழை நீர் இதில் விழுந்துவிட்டது” என்றார். அதற்கு நபியவர்கள், “மக்கள் பார்க்கும் விதமாக உணவு பொருளுக்கு மேலே அதை வைத்திருக்கக் கூடாதா?” என்று கூறிவிட்டு, “யார் மோசடி செய்கிறாரோ அவர் நம்மச்சார்ந்தவர் அல்ல!” என்று கூறினார்கள். (அபூஹுரைரா (ரலி) முஸ்லிம், திர்மிதீ, அபூதாவூத்).

இப்படி எடை போட்டு நிறுத்து வாங்கப்படும் பொருள் ஈரமாக இருந்தால், எடை கூடும். வாங்கும் நபர் அப்பொருளை வீட்டிற்கு கொண்டு போகும் முன்பே காய்ந்துவிட்டால், காய்ந்த அப்பொருளை மீண்டும் நிறுத்துப்பார்த்தால், அதன் எடை குறையும். இந்த மாதிரியான வேலை இன்று அதிகமாக ரேஷன் கடைகளில் நடைபெறுகிறது. இப்படி உண்மையை மறைத்து வியாபாரம் செய்வதை அல்லாஹ் தன் திருமறையில் (2:42) வசனத்தில் கடுமையாக கண்டிக்கின்றான்:

நீங்கள் தெரிந்துகொண்டே நல்லதுடன் கெட்டதை கலக்காத்தீர்கள். உண்மையை மறைக்காதீர்கள். வாங்கும் போதும், விற்கும் போதும் அல்லாஹ்விற்கு பயந்து செயல்பட வேண்டும். இப்படி ஒருவர் நடந்தால் அவருக்கு கிடைக்கும் நனமை என்ன தெரியுமா? நபி (ஸல்) அவர்கள் கூறினார்கள்: “வாங்கும் போதும், விற்கும் போதும், வழக்குரைக்கும் போதும் பெருந்தன்மையுடன் நடக்கும் மனிதருக்கு அல்லாஹ் அருள்புரிவானாக!” என்று கூறினார்கள். (ஜாபிர் பின் அப்துல்லாஹ் (ரலி) புஹாரி). அல்லாஹ்வின் அருள் மட்டும் கிடைத்தால் ஒருவன் இம்மையிலும், மறுமையிலும் வெற்றிபெற்றுவிடுவான் என்பது உறுதி.

வியாபாரத்தில் பொய்ச்சத்தியம் கூடாது!

அடுத்து வியாபாரிகள் லாபம் பெறுவதற்கு கையாளும் வழிமுறை “வியாபாரத்தில் பொய்ச்சத்தியம் செய்தல்”. வியாபாரத்தில் வியாபாரியின் நலன் அவனது லாபம் ஒருபுறம் இருந்தாலும், அந்த பொருளை வாங்கும் நுகர்வோர் நலன் மிக முக்கியம் என இஸ்லாம் கூறுகிறது. ஒரு பொருளை விற்பவன் அந்த பொருளின் பயன், அதன் தன்மை, அதன் உழைப்பு போன்றவற்றைக் கூறி விற்கலாம். அதே சமயம் அந்த பொருளின் தகுதிக்கு மீறியவற்றைக் கூறி, அதை நம்பவைப்பதற்காக இறைவன் மீது சத்தியம் செய்யும் நிலை இன்று பரவலாக பல வியாபாரிகளிடம் காணப்படுகிறது.

வியாபாரத்தின் அடிப்படையே விளம்பரம்தான். ஆனால் அந்த விளம்பரமே பொய்யாகவும், தகுதிக்கு மீறிய புகழாகவும் அமைவதன் நோக்கம், எப்படியாவது பொருளைவிற்று பணம் சம்பாதிக்க வேண்டும் என்ற ஒரு குறிக்கோள்தான். விளம்பரத்தைப் பார்த்து, பொய்யான வார்த்தைகளை உண்மையென நம்பி பொருளை வாங்கிச்செல்லும் கூட்டம் பெருகலாம். இதனால் அதிகளவில் பொருள் விற்கவும் செய்யலாம். ஆனால் அதிக விற்பனை காரணமாக கிடைக்கும் லாபத்தில் அல்லாஹ்வின் மறைமுகமான அருள் (பரக்கத்) இருக்குமா? என்றால் 100 சதவீதம் இருக்காது.

இன்னும் சொல்லப்போனால் லாபம் கூட அழிந்துபோகும். இது பற்றி நபி (ஸல்) அவர்கள் கடுமையாக எச்சரித்தார்கள். “(வியாபாரத்தில்) சத்தியம் செய்வது, சரக்கை விற்கச் செய்திடும். (ஆனால்) லாபத்தை அழித்துவிடும்” என்று கூறினார்கள். (அபூஹுரைரா (ரலி) முஸ்லிம், நஸாயீ, அஹ்மத், அபூதாவூத்). இவ்வாறு விற்கும் பொருளில் இல்லாததை இருப்பதாக பொய்ச்சத்தியம் செய்து விற்றால் மறுமை நாளில் எவ்வளவு பெரிய பாதிப்பு ஏற்படும் என்று மற்றொரு ஹதீஸில் நபி (ஸல்) அவர்கள் கூறினார்கள்.

“மறுமை நாளில் மூன்று நபர்களை அல்லாஹ் பார்க்க மாட்டான், அவர்களைத் தூய்மைப் படுத்தமாட்டான், அவர்களுக்குத் துன்புறுத்தும் வேதனை உண்டு என்று கூறினார்கள். அந்த மூவரில் ஒருவன் தனது வியாபாரப் பொருளில் இல்லாததை இருப்பதாக கூறி சத்தியம் செய்தவன்.” (அபூஹுரைரா (ரலி) புஹாரி).

இன்றைய வியாபாரத்தில் பொய்ச்சத்தியம் இல்லாமல் எதுவுமே இல்லை என்ற நிலை உருவாகிவிட்டது. எதற்கெடுத்தாலும் இறைவன் மீது பொய்ச்சத்தியம் செய்யும் பழக்கம் வியாபாரிகளிடம் பெருகிவிட்டது. ஒரு முஸ்லிம் வியாபாரத்தில் பொய்ச்சத்தியம் செய்து அதன் மூலம் வாங்குபரின் பணத்தை அல்லது அவரின் சொத்தை அபகரித்தால், மறுமையில் அவன் மீது கோபமாக இருக்கும் நிலையில் அல்லாஹ்வைச் சந்திப்பான்.

நபி (ஸல்) அவர்கள் கூறினார்கள்: “ஒருவன் ஒரு சத்தியம் செய்து அதன் காரணமாக மற்றொரு முஸ்லிமுடைய சொத்தைப் பறித்துக் கொண்டு, அதில் அவன் பொய்யனாக இருப்பின், மறுமையில் அவன் மீது கோபமாக இருக்கும் நிலையில் அல்லாஹ்வைச் சந்திப்பான் என்று நபி (ஸல்) அவர்கள் கூறினார்கள்.” (அஷ் அஸ் இப்னு கைஸ் (ரலி)புஹாரி, முஸ்லிம்).

ஒருவருடைய பணத்தை அநியாயமாக பொய்ச்சத்தியம் செய்து சாப்பிடுவதை அல்லாஹ் தடைசெய்துள்ளான். இது பற்றி அல்லாஹ் தன் திருமறையில் (2:188) வசனத்தில் குறிப்பிடுகிறான்: உங்களுக்கிடையே (ஒருவருகொருவர்) உங்கள் பொருட்களைத் தவறான முறையில் உண்ணாதீர்கள்! என்று கூறுகிறான்.

வியாபாரத்தில் போட்டி, பொறாமை கூடாது!

அவரவர் தன் குடும்பத்திற்குத் தேவையானதை பெற்றுக் கொள்ளவும், பணத்தைப் பெருக்கிக் கொள்ளவும் உதவியாக அமைவதுதான் வியாபாரம். ஆனால் சில சமயங்களில் தங்களுடைய வியாபாரத்திற்குப் போட்டியாக வரும் சக வியாபாரிகளை எதிரிகள் போல் பார்ப்பார்கள். இன்னொரு வியாபாரியின் வளர்ச்சியினை அழித்துத் தான் மட்டும் முன்னேற வேண்டும் என்ற குறிக்கோளாக செயல்படுவார்கள்.

உதாரணமாக ஒரு பொருளின் விலை 10 ரூபாயாக இருக்கும். அடுத்தவருடைய வியாபாரத்தைக் கெடுப்பதற்காக அந்த பொருளை 8 ரூபாயிக்கு விலையைக் குறைத்து விற்பனை செய்வார்கள் அல்லது ஒருவர் ஒரு பொருளை விலை பேசிக்கொண்டிருக்கும் போதே மற்றொருவர் தலையிட்டு அந்தப் பொருளை பேரம் பேசுவார். முதலில் பேசியவர் ஒரு லட்சத்திற்கு கேட்டால், இவர் ஒன்றரை லட்சத்திற்கு கேட்பார். தன் வியாபார எதிரி அழிய வேண்டும் என விலையை ஏற்றி விடுவது அல்லது வாங்க விடாமல் கெடுப்பது போன்ற செயல்களில் ஈடுபடுவர்.

வியாபாரத்தில் ஏற்படும் பொறாமையின் காரணமாக அந்த இருவருக்கும் இடையே வீண் சச்சரவு ஏற்பட்டு இருவருமே பாதிக்கப்படுவார்கள். மேலும் கடும் பகைவர்களாக மாறிவிடுவர். இது பற்றி நபி (ஸல்) அவர்கள் கடுமையாக எச்சரித்துள்ளார்கள். “ஒரு மூமின் மற்றொரு மூமினின் சகோதரர் ஆவார். தன் சகோதரரின் வியாபாரத்தில் தலையிட்டு வியாபாரம் பேச ஒரு மூமினுக்கு அனுமதியில்லை” என்று கூறினார்கள். (உக்பா இப்னு ஆமிர் (ரலி) இப்னுமாஜா, அஹ்மத்).

இதே போன்று மற்றொரு ஹதீஸில் “உங்களில் ஒருவர் தன் சகோதரன் செய்யும் வியாபாரத்தில் (குறுக்கீடு செய்து) வியாபாரம் செய்ய வேண்டாம்” என்று கூறினார்கள். (இப்னு உமர் (ரலி) புஹாரி, முஸ்லிம், திர்மிதீ, நஸாயீ, அபூதாவூத், இப்னுமாஜா, அஹ்மத்).

பொதுவாக வியாபாரத்தில் போட்டி இருந்தால் கூட பெரும் இழப்பு ஏற்படாது. ஆனால் வியாபாரத்தில் பொறாமை இருந்தால் இழப்பு அதிகமாக இருக்கும். சிலபேர் வாங்கும் நோக்கமில்லாமல், தன்னுடைய வியாபாரத்தின் எதிரி கூடுதலாக விலை கொடுத்து ஏமாறட்டும் என்ற நோக்கில் விலைபேசும் அற்ப புத்திக்காரர்கள் உண்டு. சிலர் விற்பனை பொருளின் விலை மதிப்பை அதிகப்படுத்தி விற்பனை செய்யும் எண்ணத்தில் தாமாக ஒரு ஆளை ஏற்பாடு செய்து அவனை விலை பேசும் இடத்தில் நிற்கச் செய்து அந்தப் பொருளின் விலையை கூடுதலாக கேட்கவைப்பான்.

ஏலம் போடும் இடங்களில் இதை நாம் பார்க்கலாம். ஏலம் போடுபவனைச்சுற்றி அவனது ஆட்களே நின்று கொண்டு கூடுதல் விலைக்கு ஏலம் கேட்பார்கள். (வாங்கும் நோக்கமின்றி விலையை உயர்த்திடும் நோக்கில்) விலையை கூடுதலாக்கிட முயல்வதற்கு நபி (ஸல்) அவர்கள் தடைவிதித்தார்கள். (இப்னு உமர் (ரலி) புஹாரி, முஸ்லிம், நஸாயீ, இப்னுமாஜா, அஹ்மத்).

பதுக்கல் வியாபாரம் கூடாது!

சில வியாபாரிகள் தங்களின் லாபத்தை பெறுக்குவதற்கு கையாளும் வழிமுறை வியாபாரப் பொருளை பதுக்கல் செய்தல். மக்களுக்குத் தேவையான பொருளை உரிய நேரத்தில் மார்க்கெட்டிற்கு கொண்டு வராமல் பதுக்கி வைத்துவிட்டு, விலை ஏறும்போது மார்க்கெட்டிற்கு கொண்டு வந்து அதிக விலையில் விற்று லாபம் அடைகிறார்கள். இந்த பதுக்கல் தன்மை மனிதனை இரக்கமற்றவனாக மாற்றிவிடும். பதுக்கல் செய்தவன் சாபத்திற்கு ஆளாகக் கூடியவன் என்று இஸ்லாம் கூறுகிறது.

இது பற்றி நபி (ஸல்) அவர்கள் கூறினார்கள்: “தேவையான பொருளைப் பதுக்கி வைக்காமல் உரிய நேரத்தில் அவற்றை அங்காடிக்குக் கொண்டு வருபவன் அல்லாஹ்வின் அருளுக்கு உரித்தவனாவான். மேலும் அல்லாஹ் அவனுக்கு வாழ்வாதாரங்களையும் வழங்குவான். இன்னும் அவற்றை பதுக்கி வைப்பவன் அல்லாஹ்வின் சாபத்திற்குரியவனாவான்” என்று கூறினார்கள். (உமர் (ரலி) இப்னுமாஜா).

அதிக லாபம் கிடைக்கவேண்டும், தானும் தன் குடும்பமும் நன்றாக இருந்தால் போதும், மற்றுவர்கள் எக்கேடு கெட்டாலும் பரவாயில்லை என்று எண்ணி சிலர் வியாபாரிகள் பதுக்கிவைக்கிறார்கள். பதுக்கல்காரர்களால் இந்தச் சமுதாயத்திற்கு பெரும் பாதிப்பும், பணவீக்கமும் ஏற்படுகிறது. நபி (ஸல்) அவர்கள் கூறினார்கள்: “பாவியைத்தவிர வேறு யாரும் உணவுப் பொருளைபதுக்கமாட்டார்கள்.” என்று கூறினார்கள். (மஃமர் இப்னு அப்துல்லாஹ் (ரலி) முஸ்லிம்).

பதுக்கல்காரன் என்பவன் பாவி. நாட்டிலுள்ள அனைவரும் குறைந்த விலையை எதிர்ப்பார்ப்பார்கள். எப்போது தங்கம் விலை இறங்கும். எப்போது குறைந்த விலையில் உணவுபொருட்கள், துணிமணிகள் மற்றும் அன்றாட அத்தியாவசியப் பொருட்கள் கிடைக்கும் என்று பொதுமக்கள் எதிர்ப்பார்ப்பார்கள். ஆனால் பதுக்கல்காரன் எப்பொழுது பொருளின் விலை உயரும் என்று எதிர்ப்பார்ப்பான். ஒரு பொருளின் விலையில் சரிவு ஏற்பட்டால் முதலில் வருத்தப்படுபவன் பதுக்கல்காரன்தான்.

அதேப் போன்று ஒரு பொருளின் விலையில் உயர்வு ஏற்பட்டால் முதலில் சந்தோஷப்படுபவன் பதுக்கல்காரன்தான். இந்தப் பதுக்கல்காரனைப் பற்றி நபி (ஸல்) அவர்கள் கூறினார்கள்: “தேவையான பண்டங்களைப் பதுக்கி வைப்பவன் எவ்வளவு கெட்டவனாக இருக்கிறான். அல்லாஹ் பொருளின் விலையை மலிவாக்கி விட்டால் இவன் வருத்தப்படுவான். விலை ஏறிவிட்டாலோ மகிழ்ச்சிகொள்கிறான்.” என்று கூறினார்கள். (முஅத் (ரலி) பைஹகீ).

கூட்டு வியாபாரத்தில் சக தோழரை ஏமாற்றுவது கூடாது!

சில வியாபாரிகள் கூட்டாக வியாபாரம் செய்வார்கள். அதில் அதிகம்பேர் தன்னுடைய சகதோழருக்கு மோசடி செய்துவிடுவார்கள். சில நேரங்களில் லாபத்தில் மட்டும் பங்குபெறுவார்கள். நஷ்டம் ஏற்படும் போது இது உன்னால் தான் வந்தது என்று கூறி அக்கூட்டுவியாபாரத்தை முறித்துவிடுவார்கள். இது பற்றி நபி (ஸல்) அவர்கள் கடுமையாக எச்சரித்துள்ளார்கள்.

“வியாபாரம் போன்ற வணிகத்தில், இரண்டு கூட்டாளிகளில் ஒருவர் தன்னுடைய தோழருக்கு மோசடி செய்யாத வரை அவர்களுடன் மூன்றாவது கூட்டாளியாக அல்லாஹ் இருப்பான் ” என்று கூறினார்கள். (அபூஹுரைரா (ரலி) அபூதாவூத்). இது பற்றி அல்லாஹ் தன் திருமறையில் (38:24) வசனத்தில் குறிப்பிடுகிறான்: நம்பிக்கை கொண்டு நல்லறங்கள் செய்வோரைத் தவிர, உங்களில் கூட்டுச் சேர்வோரில் அதிகமானோர் ஒருவர் மற்றவர் மீது அநீதி இழைக்கின்றனர்.

விற்கும் பொருளில் கலப்படம் கூடாது!

சில வியாபாரிகள் தங்களின் லாபத்தை பெறுக்குவதற்கு அடுத்து கையாளும் வழிமுறை விற்கும் பொருளில் கலப்படம் செய்தல். தரமான பொருளுடன் தோற்றத்தில் ஒன்றுபோல் இருக்கும் பொருட்களை அல்லது வேறுபொருளை அதனுடன் கலப்படம் செய்து விற்பார்கள். இன்றைய காலகட்டத்தில் அன்றாடம் தேவைப்படும் உணவுப்பொருட்களில் உடலுக்கும், உயிருக்கும் கேடு விளைவிக்கக்கூடிய செயற்கையான நிறங்களை உணவுப் பொருட்களில் கலப்படம் செய்து விற்பனை செய்கிறார்கள் சில இரக்கமற்ற வியாபாரிகள்.

குழந்தைகளின் உணவிலிருந்து பெரியவர்களின் உணவு வரை இந்த கலப்படம் இருக்கிறது. இந்த கலப்படபேர்வழிகள் சாதாரண பிளாட்ஃபார்மிலிருந்து ஓட்டல், மளிகைகடை மற்றும் பெரும் வியாபாரிகள் வரை இந்த மனித இரத்தத்தை பணமாக உறிஞ்சும் கலப்படம் விரிகிறது. நாம் நினைத்துப் பார்க்காத பொருட்களில் எல்லாம் கலப்படம் நிறைந்து காணப்படுகிறது.

வியாபாரத்தில் ஹலால் – ஹராம் பேணுவதை கைவிடல் கூடாது!

சிலர் வியாபாரத்தில் எது ஹலால்? எது ஹராம்? என்ற விளக்கம் இல்லாமல் வியாபாரத்தில் ஈடுபட்டு பணம் சம்பாதிக்கிறார்கள். இக்காலத்தில் மதுபானங்களையும், பீடி, சிகரெட், போதை தரக்கூடிய பாக்கு வகைகள் மற்றும் உடலுக்கு கெடுதல் தரக்கூடிய பொருளை லாபநோக்கோடு விற்பனை செய்கிறார்கள்.

மதுபானத்தினால் சீரழிந்து கிடக்கும் எத்தனையோ குடும்பங்களை கண்ணால் பார்க்கிறோம். தன் குடும்பம் சொகுசாக வாழவேண்டும் என்று எண்ணி ஹராமாக்கப்பட்ட பொருளை விற்று அந்த ஹராமான பொருளின் மூலம் சம்பாதித்த பணத்தை வைத்து, உண்பது, பருகுவது, ஆடைகளை அணிவது, ஆடம்பரமாக வீடுகளை கட்டுவது, கார் வாங்குவது இன்று பெருகிவிட்டது. இதனால் அவர்களின் உடலிலும், அவர்களைச் சுற்றிலும் ஹராம் நிரம்பி இருக்கிறது.

நபி (ஸல்) அவர்கள் கூறினார்கள்: “அல்லாஹ் யூதர்களை சபிப்பானாக! என்று மூன்று முறை கூறிவிட்டு, நிச்சயமாக அல்லாஹ் அவர்கள் மீது கொழுப்பை ஹராமாக்கினான். அவர்களோ அதை விற்பனை செய்து அதன் பணத்தில் சாப்பிட்டார்கள். அல்லாஹ் ஒரு சமுதாயத்தின் மீது எதை உண்ண ஹராமாக்கினானோ அதனுடைய பணமும் ஹராமாக்கிவிட்டான்” என்று கூறினார்கள். (இப்னு அப்பாஸ் (ரலி) அபூதாவூத்).

ஒரு வியாபாரிக்கு அல்லாஹ் தடுத்த ஹராமான வியாபாரத்தினால் வரும் வருமானத்தில் இவ்வுலகிலும் அல்லாஹ்வின் மறைமுகமான அருள் (பரக்கத்) இருக்காது, மறுமையிலும் அதற்கு தண்டனையாக சொர்க்கமும் கிடைக்காது. நபி (ஸல்) அவர்கள் கூறினார்கள்: “ஹராமின் மூலம் வளர்ந்த சதைக்கு நரக நெருப்பே தகுதியானது” என்று கூறினார்கள். (இப்னு அப்பாஸ் (ரலி) தப்ரானீ).

உதாரணமாக ஒரு மனிதர் ஹராமான வழியில் கிடைத்த பொருளில் சாப்பிட்டு, அந்த ஹராமான உணவின் மூலம் அவரது உடல் சதையில் சுமார் 1 மில்லி கிராம் எடையுள்ள சதை கூடிவிடுகிறது என்று வைத்துக்கொண்டால், இந்த 1 மில்லி கிராம் எடையுள்ள சதை சொர்க்கம் போக முடியாது. இது ஹராமான உணவின் மூலம் உருவானதால் இந்த 1 மில்லி கிராம் எடையுள்ள சதை நரகம் போக வேண்டும்.

இந்த 1 மில்லி கிராம் எடையுள்ள சதை நரகம் போக வேண்டுமென்றால் அந்த மனிதன் நரகம் போக வேண்டும். அப்பொழுதுதான் அந்த 1 மில்லி கிராம் எடையுள்ள சதை நரக நெருப்பில் எரிந்து அதற்குரிய தண்டனை பெறமுடியும். ஒரு மனிதன் அனைத்திலும் வெற்றிப்பெற்று, ஆனால் அந்த 1 மில்லி கிராம் எடையுள்ள சதை காரணமாக அவனால் முன்கூட்டியே சொர்க்கம் போகமுடியவில்லை.

எனவே ஹராமின் மூலம் வளர்ந்த சதைக்கு நரக நெருப்பே தகுதியானது. நபி (ஸல்) அவர்கள் மேலும் கூறினார்கள்: “ஒரு காலம் வரும். அப்போது மக்கள் தாங்கள் சம்பாதிப்பவை ஹலாலா?ஹராமா? என்பதை பொருட்படுத்தமாட்டார்கள்” என்று கூறினார்கள் (அபூஹுரைரா (ரலி) புஹாரி).

நபி (ஸல்) அவர்கள் கூறிய அந்த காலத்தில்தான் நாம் இன்று வாழ்ந்துகொண்டிருக்கிறோம். இன்று ஒரு மனிதன் தான் எந்த வழியில் சம்பாதிக்கிறோம் என்பதை பார்ப்பதில்லை. அவனுடைய நோக்கம் பணம் மட்டும்தான். பணமென்றால் அனைத்தையும் இழக்கத்தயாராகிவிடுகிறான்.

ஏன் நமது துஆ அங்கீகரிக்கப்படுவதில்லை?

சிலருக்கு என்னடா! நாம் அல்லாஹ்விடம் துஆ செய்கிறோம். ஆனால் நம்முடைய துஆ இதுவரை அல்லாஹ் அங்கீகரிக்கவில்லையே? என்று எண்ணம் தோன்றலாம். அதற்கு என்ன காரணம் தெரியுமா? நபி (ஸல்)அவர்கள் கூறினார்கள்: “ஒருவனது உடை, உணவு, பானம் ஆகியவை ஹராமானதாக இருக்கும் போது, அவனது துஆ எவ்வாறு அங்கீகரிக்கப்படும்?” என்று கூறினார்கள். (அபூஹுரைரா (ரலி) முஸ்லிம்). நாம் ஹராமான முறையில் சம்பாதித்துவிட்டு பிறகு நமது தேவைக்காக அல்லாஹ்விடம் துஆ செய்தால் அந்த துஆவிற்கு பதிலும் இருக்காது, பலனும் இருக்காது.

நேர்மையான வியாபாரிகளின் நிலை என்ன?

சரி! நேர்மையான வியாபாரிகள் இருக்கிறார்களே, அவர்களுடைய நிலை என்ன? ஒரு வியாபாரி உண்மையுடனும், நேர்மையுடனும் வியாபாரம் செய்தால் அவருக்கு மறுமையில் மிகப்பெரிய அந்தஸ்து இருக்கிறது. அது என்ன தெரியுமா? நபி (ஸல்) அவர்கள் கூறினார்கள்: “உண்மை பேசி, நாணயத்துடன் நடந்து கொள்ளும் ஒரு வணிகர் மறுமை நாளில் நபிமார்கள், உண்மையாளர்கள், ஷஹீதுகள் ஆகியோருடன் இருப்பார்” என்று கூறினார்கள். (அபூ ஸயீத் அல்குத்ரீ (ரலி) திர்மிதீ).

மேலும் வியாபாரம் செய்யும் போது இடையிடையே தர்மம் செய்ய வேண்டும். கொஞ்சம் எடையில் கூடுதலாக போவதால் ஒன்றும் பெரிய இழப்பு ஏற்படபோவதில்லை. உங்களையும் அறியாமல் வியாபாரத்தின் போது செய்த தவறுக்கு இந்த தர்மம் பரிகாரமாக அமையும். இது பற்றி நபி (ஸல்) அவர்கள் கூறினார்கள்: “வியாபாரிகளே! ஷைத்தானும் பாவமும் வியாபாரத்தின் போது ஆஜராகி வருவதால், உங்கள் வியாபாரங்களுடன் தர்மத்தையும் சேர்த்துக்கொள்ளுங்கள்” என்று கூறினார்கள். (பரா பின் ஆஸிப் (ரலி) திர்மிதீ, அபூதாவூத்).

இறுதியாக!

அன்பான வியாபாரிகளே! நீங்கள் மக்களின் அன்றாடம் தேவைகளை விற்பனை செய்கிறீகள். ஆனால் உங்கள் வியாபாரத்தில் மோசடி செய்யாதீர்கள்! எது ஹராம்? எது ஹலால் என அறிந்து வியாபாரம் செய்யுங்கள்! அல்லாஹ்வின் மீது பொய்ச் சத்தியம் செய்து பொருளை விற்பனை செய்யாதீர்கள்!

விற்பனை பொருளை பதுக்கல் செய்யாதீர்கள்! விற்பனை பொருட்களில் கலப்படம் செய்து அப்பாவி மக்களின் உயிர்களை குடிக்காதீர்கள்! அடுத்தவரின் வியாபாரத்தில் குறுக்கீடு செய்து, பொறாமை கொள்ளாதீர்கள்! கூட்டுத்தொழிலில் சகதோழரை ஏமாற்றாதீர்கள்! உங்களின் வியாபாரங்களுக்கு மத்தியில் அதிகம் தர்மம் செய்யுங்கள்!

உங்களின் வியாபாரம் செழிக்க அல்லாஹ் போதுமானவன்..!

கீழக்கரை கிழக்கு தெரு ஜமாஅத் சார்பாக நடத்தப்படும் சுகாதார அமைப்பு சார்பாக கிழக்குத் தெருவின் பல்வேறு பகுதிகளில் சுகாதாரத்தை வலியுறுத்தி விழிப்புணர்வு பேனர் வைக்கப்பட்டுள்ளது. இதில் பொதுமக்கள் அவசியம் கடைபிடிக்கவேண்டிய வழிமுறைகளை தெளிவாக எடுத்துரைக்கப்பட்டு உள்ளது.

இஸ்லாம் மார்க்கத்தில் சுத்தம் என்பது ஈமானின் ஒரு பகுதி என்பதை பகுதி மக்கள் உணர்ந்து செயல்பட்டால் நோய், நொடிகளில் இருந்து விடுபட்டு வாழலாம் என்று கேட்டுக் கொள்ளப்பட்டுள்ளது. இது போன்ற நல்லதொரு முயற்சியினை அனைத்து ஜமாஅத் அமைப்புகளும் செயலாற்ற முன் வர வேண்டும் என்பது பொதுமக்களின் ஆவலாக இருக்கிறது.

திமுக இளைஞரணி சார்பில் ‘ரத்த தான செயலி’ இன்று 01.03.17 அறிமுகப்படுத்தப்பட்டுள்ளது. அதனை கூகுள் ப்ளே ஸ்டோரில் ‘திமுக ரத்த வங்கி’ (DMK Blood Bank) என்று குறிப்பிட்டால் போதும். விருப்பமுள்ளவர்கள் செயலியைத் தரவிறக்கம் செய்துகொள்ளலாம். சாமானியர்களும் பயன்படுத்தும் வகையில் இந்த ரத்த தான செயலி மிகவும் எளிமையாக வடிவமைக்கப்பட்டுள்ளது. அதனுள்ளே கீழ் வரும் பகுதிகள் ஏற்படுத்தப்பட்டு உள்ளது.

மெயின் மெனு :

இதன் மெயின் மெனு பக்கத்தில் ரத்தம் கொடுக்க விரும்புபவர்களுக்கான முன்பதிவு, ரத்தம் வழங்குபவர்களின் பட்டியல், ரத்தம் தேவைப்பட்டால் கேட்க, ரத்த தானம் குறித்த பொதுவான தகவல்கள் ஆகியவை உருவாக்கப்பட்டுள்ளன.

ரத்த தானம் வழங்க விரும்புவோர் :

ரத்த தானம் வழங்க விரும்புவோர் தங்களின் தகவல்களை முன்பதிவுப் பக்கத்தில் பதிவு செய்துகொள்ளலாம். இதில் பெயர், தொலைபேசி எண், ரத்த வகை, ஈமெயில், முகவரி, கடைசியாக ரத்த தானம் செய்த தேதி ஆகிய விவரங்களைப் பதிவு செய்து கொள்ள வேண்டும்.

கொடையாளர்கள் பட்டியல் :

கொடையாளர்கள் பட்டியலில் அவர்களின் பெயர், ரத்த வகை, தொலைபேசி எண் கொடுக்கப்பட்டுள்ளது. அதில் அழைப்பு பொத்தானும், பகிர்தல் பொத்தானும் அமைக்கப்பட்டுள்ளன. தேவைப்பட்டால் கொடையாளர்களை அழைக்கவோ, அவர்களின் எண்களை நண்பர்களுடன் பகிரவோ செய்யலாம்.

ரத்தம் தேவைப்படுவோர் :

ரத்தம் தேவைப்படுவோர், எந்த ரத்த வகை வேண்டும், எந்த மருத்துவமனை, இடம், தொலைபேசி எண் ஆகியவற்றைப் பதிவிட வேண்டும். இதைத்தவிர ரத்த தானம் குறித்த முக்கியமான தகவல்களும், புள்ளிவிவரங்களும் கொடுக்கப்பட்டுள்ளன.

அதிகம் கேட்கப்படும் வினாக்கள் :

அதிகம் கேட்கப்படும் வினாக்கள் பகுதியில் ரத்த தானம் எவ்வளவு முக்கியமானது? ஏன் ரத்த தானம் செய்ய வேண்டும்? எதனால் ரத்த தானத்துக்கு 2 மாத இடைவெளி உள்ளிட்ட தகவல்கள் எல்லோரும் அறிந்துகொள்ள வேண்டியவை.

வெளிநாடு வாழ் இந்தியர்கள் செல்லாத 500, 1,000 ரூபாய் நோட்டுகளை மாற்றிக்கொள்ள கடைசி வாய்ப்பினை இந்திய ரிசர்வ் வங்கி அளித்து இருக்கிறது. இதற்கான கடைசி நாள் மார்ச் 31-ந்தேதி என தீர்க்கமாக தெரிவித்துள்ளது.

இதுகுறித்து இந்திய ரிசர்வ் வங்கி வெளியிட்டுள்ள அறிவிப்பு வருமாறு:-

கடந்த ஆண்டு நவம்பர் 9-ந்தேதியில் இருந்து டிசம்பர் 30-ந்தேதி வரையிலான காலகட்டத்தில் வெளிநாட்டில் இருந்த என்.ஆர்.ஐ.கள் மற்றும் அப்போது வெளிநாட்டுக்கு சென்றிருந்த இந்தியர்களுக்கு (இந்தியாவில் வசிப்பவர்கள்) செல்லாத 500, 1,000 ரூபாய் நோட்டுகளை மாற்றிக்கொள்ளும் வாய்ப்பை இந்திய ரிசர்வ் வங்கி அளித்து உள்ளது.

சென்னையில் உள்ள இந்திய ரிசர்வ் வங்கியில் இவர்கள் திங்கட்கிழமை முதல் வெள்ளிக்கிழமை வரை காலை 10 மணி முதல் பிற்பகல் 2.30 மணிவரை செல்லாத நோட்டுகளை மாற்றிக் கொள்ளலாம். இதற்கான கடைசி நாள் மார்ச் 31-ந்தேதி ஆகும். செல்லாத நோட்டுகளை மாற்றும்போது, சில ஆவணங்களை ரிசர்வ் வங்கியிடம் அவர்கள் வழங்கவேண்டும்.

வெளிநாட்டில் இருந்த, இந்தியாவில் வசிக்கும் இந்தியர்கள் :

கடந்த ஆண்டு நவம்பர் 9-ந்தேதி முதல் டிசம்பர் 30-ந்தேதிவரை வெளிநாட்டில் இருந்ததற்கான அத்தாட்சியாக பாஸ்போர்ட் நகல்

இந்திய குடியுரிமை கட்டுப்பாட்டு அதிகாரி இடும் முத்திரை அடங்கிய பாஸ்போர்ட் பக்கங்களின் நகல் மற்றும் பாஸ்போர்ட்டின் கடைசி பக்கங்கள்

அடையாளச் சான்று ஆவணம் அல்லது ஆதார் அட்டை நகல்

வருமான வரிக்கணக்கு எண் அட்டையின் நகல்

அனைத்து வங்கிக் கணக்குகளின் 8.11.16 முதல் 30.12.16 வரையிலான அறிக்கை நகல் ஆகியவற்றை காட்டவேண்டும்.

வெளிநாடு வாழ் இந்தியர்கள் (என்.ஆர்.ஐ.)

கடந்த ஆண்டு நவம்பர் 9-ந்தேதி முதல் டிசம்பர் 30-ந்தேதிவரை வெளிநாட்டில் இருந்ததற்கான அத்தாட்சியாக பாஸ்போர்ட் நகல்

இந்திய குடியுரிமை கட்டுப்பாட்டு அதிகாரி இடும் முத்திரை அடங்கிய பாஸ்போர்ட் பக்கங்களின் நகல் மற்றும் பாஸ்போர்ட்டின் கடைசி பக்கங்கள்

இந்தியாவுக்குள் சிவப்பு சானல் வழியாக வரும்போது ரூ.1,000 மற்றும் ரூ.500 நோட்டுகளைக் கொண்டு வருவதற்காக சுங்க வரித்துறையினர் அளிக்கும் நோட்டு மதிப்பு சான்றிதழ்

வருமான வரிக்கணக்கு எண் அட்டையின் நகல்

அனைத்து வங்கிக்கணக்குகளின் 8.11.16 முதல் 30.12.16 வரையிலான அறிக்கை நகல் ஆகியவற்றை காட்டவேண்டும்.

வெளிநாட்டு குடிமக்களாக இருக்கும் இந்தியர்கள், இந்திய வம்சாவளியினர், வெளிநாட்டினர் மற்றும் நேபாளம், பூடான், பாகிஸ்தான், வங்காளதேசம் ஆகிய நாடுகளில் வசிக்கும் இந்திய குடிமக்களுக்கு ரிசர்வ் வங்கி இந்த வசதியை அளிக்கவில்லை.

மேலும் அனைத்து விவரங்களையும் www.rbi.org.in என்ற இணையதளத்தில் வாசித்து தெரிந்து கொள்ளலாம். இவ்வாறு அதில் கூறப்பட்டு இருக்கிறது.

மேலும் வெளிநாட்டு குடிமக்களாக வசிக்கும் இந்தியர் யாராவது இந்தியாவுக்கு வரும்போது, தங்கள் கையில் உள்ள செல்லாத நோட்டுகளை விமான நிலையத்தில் உள்ள சுங்கத்துறை அதிகாரிகளிடம் கொடுக்க வேண்டும்.

அதிகபட்சமாக ரூ.25 ஆயிரத்துக்கான செல்லத்தக்க நோட்டுகளை சுங்கத்துறையினர் திருப்பித் தருவார்கள். உதாரணமாக ஒரு லட்சம் ரூபாய்க்கான செல்லாத நோட்டுகளைக் கொடுத்தாலும், ரூ.25 ஆயிரம்தான் திருப்பித்தரப்படும். அதுவும் வரும் ஜூன் மாதத்துக்குள் இந்தியாவுக்கு வந்தால் மட்டுமே இந்த சலுகையை அவர்கள் பெறமுடியும் என்பது குறிப்பிடத்தக்கது.

இராமநாதபுரம் மாவட்டத்தில் மீனவர்களின் வாழ்வாதாரத்தை பாதிக்கும் ஹைட்ரோ கார்பன் எரிவாயு கிணறுகள் தோண்டும் திட்டம் கைவிடப்பட வேண்டும் என்று மனிதநேய மக்கள் கட்சியின் தலைவர். பேராசிரியர் ஜவாஹிருல்லா கூறியுள்ளார்.

ஹைட்ரோ கார்பன் எரிவாயு கிணறுகள் தோண்டும் திட்டத்தில் கீழ் வரும் இராமநாதபுரம் மாவட்டத்தின் பல்வேறு பகுதிகள் இடம் பெற்றுள்ளன.

1. திருப்புல்லாணி (SN 236)
2. பெரியபட்டிணம் (SN 26)
3. ரெகுநாதபுரம் (SN 61/1C)
4. பனைக்குளம் (SN 81/1D)
5. களரி (SN 6)
6. புள்ளந்தை (SN 3)
7. களரி (SN 335/2B)
8. புத்தேந்தல் (SN 208/1B)
9. திருப்புல்லாணி (SN 24)
10. உத்திரகோசமங்கை (SN 121/122)
11. அச்சந்திபிரம்பு (SN 125)
12. பட்டணம்காத்தான் (SN 375)
13. பட்டணம்காத்தான் (SN 150)
14. பழங்குளம் (SN 103/104)
15. சித்தார்கோட்டை (SN 180/1A5)
16. தேவிபட்டினம் (SN 333)
17. பெருநயல் (SN 414)
18. அத்தியூத்து (SN 221/222)
19. ஆற்றங்கரை (SN 113/2B)
20. கீழ் நாகாச்சி (SN 127/6A2)
21. பிரப்பன்வலசை (SN 107/2A)
22. சட்டகோன்வலசை (SN 150/2B).

#SN – சர்வே எண்.
வரிசை எண் – ஹைட்ரோ கார்பன் கிணறுகளுக்கான எண்.

இது தொடர்பாக இன்று பேராசிரியர் ஜவாஹிருல்லா வெளியிட்ட அறிக்கையில், ”ராமநாதபுரம் மாவட்ட கடலோரப் பகுதிகளில் திருப்புல்லாணி, பெரியபட்டிணம், ரெகுநாதபுரம், பனைக்குளம், களரி,புள்ளந்தை, உத்திர கோசமங்கை, அச்சந்திபிரம்பு, பட்டணம்காத்தான், பழங்குளம், சித்தார்கோட்டை, தேவிப்பட்டினம், பெருநயல், அத்தியூத்து, ஆற்றங்கரை, கீழ்நாகாச்சி, பிரப்பன் வலசை, சுந்தரமுடியான் உள்ளிட்ட 22 இடங்களில் இந்திய இயற்கை எரிவாயு மற்றும் எண்ணெய் கழகம் (ஓ.என்.ஜி.சி.) ஹைட்ரோ கார்பான் எரிவாயு எடுக்கும் பணியில் ஈடுபட்டுள்ளது.

இந்த திட்டத்தை ராமநாதபுரம் மாவட்டத்தில் அனுமதிக்கக் கூடாது என்று நான் கடந்த சட்டப்பேரவையில் 2015 செப்டம்பர் 18 அன்று நடைபெற்ற சுற்றுச்சூழல் துறைக்கான மானியக் கோரிக்கை விவாதத்தின் போது பேசினேன். இந்த திட்டத்தால் மீனவர்களுக்கும் விவசாயிகளுக்கும் ஏற்படும் ஆபத்துகளை எனது உரையில் குறிப்பிட்டேன். அன்றைய சுற்றுச்சூழல் துறை அமைச்சர் இத்திட்டத்தை தமிழக அரசு அனுமதிக்காது என்று உறுதி அளித்தார்.

ஓ.என்.ஜி.சி. நிறுவனம் ராமநாதபுரம் மாவட்டத்தில் உள்ள மன்னார் வளைகுடா மற்றும் பாக்ஜலசந்தி கடற்பகுதி யுனஸ்கோ அமைப்பினால் கடல்வாழ் உயிர்க்கோள காப்பகமாக அறிவிக்கப்பட்டு பாதுகாக்கப்பட்டு வரும் பகுதியில் இந்த எரிவாயு கிணறுகளை தோண்டுவதால் இங்கு வாழும் அரிய வகை டால்பின், ஆமைகள், கடல் பசு, பவளப்பாறைகள், கடல் புற்கள், சங்குகள் உள்ளிட்ட உயிரினங்களின் பாதுகாப்பு கேள்விக்குறியாகி உள்ளது.

மேலும் தீர்த்தங்கரை பறவைகள் சரணாலயம், சக்கரக்கோட்டை கண்மாய் பறவைகள் சரணாலயம், திருப்புல்லாணி ஆதி ஜெகன்னாத பெருமாள் கோயில், தேவிப்பட்டிணம் நவ பாஷணம் தீர்த்தம் முதலிய முக்கியத்துவம் வாய்ந்த இடங்களுக்கு வெகு அருகில் எரிவாயு கிணறுகள் தோண்டுவதற்கு மத்திய அரசு அனுமதி அளித்திருக்கிறது.

இதனால் விவசாய நிலங்களுடன், கடல்வாழ் உயிரினங்கள் மற்றும் பறவைகள் உள்ளிட்ட பல்வேறு பல்லுயிர் பெருக்கமே ராமநாதபுரம் மாவட்டத்தில் அழிந்துவிடும் அபாயம் ஏற்பட்டுள்ளது. மேலும் கடலையே நம்பி இருக்கும் மீனவர்களின் வாழ்வாதாரமும், விவசாயத்தை நம்பியிருக்கும் விவசாயிகளின் வாழ்வாதாரமும் பாதிக்கப்படுகிறது.

எனவே ராமநாதபுரம் மாவட்டத்தில் கடல் வளமும் மீனவர்கள் மற்றும் விவசாயிகளின் வாழ்வாதாரத்தைப் பறிக்கும் வகையிலும், சுற்றுச் சூழல் அபாயம் மிக்க ஓ.என்.ஜி.சி. நிறுவனம் ஹைட்ரோ கார்பன் எரிவாயு கிணறுகள் தோண்டும் நடவடிக்கைகளைத் தடுத்து நிறுத்த தமிழக அரசு உரிய நடவடிக்கைகளை உடனே எடுக்க வேண்டும்.

தமிழக அரசு உரிய நடவடிக்கை எடுக்கத் தவறுமேயானால் ராமநாதபுரம் மக்களும் தங்கள் வாழ்வாதாரத்தை பெரிதும் பாதிக்கும் இந்த திட்டத்தை எதிர்த்துப் போராட முன்வர வேண்டும்” என ஜவாஹிருல்லா கூறியுள்ளார்.

கீழக்கரை பகுதியில் கடந்த சில மாதங்களாக, பாரத ஸ்டேட் வங்கியின் வாடிக்கையாளர்கள் சிலரை செல்போனில் தொடர்பு கொண்டு தான் வங்கி அதிகாரி என்று கூறி, வங்கி நம்பர், பாஸ்வேர்டு உள்ளிட்ட தகவல்களை கேட்டு மோசடி செய்வது தொடர்ந்து நடை பெற்று வந்தது. இதில் அப்பாவி வங்கி வாடிக்கையாளர்கள் பலர் இலட்ச ரூபாய்க்கும் மேல் ஏமாற்றப்பட்டு கீழக்கரை காவல் நிலையத்தில் புகார் அளித்துள்ளனர். ஏற்கனவே இது சம்பந்தமான பதிவினை கீழை நியூஸ் வலைதளத்தில் வெளியிட்டிருந்தோம்.

இந்நிலையில் கீழக்கரை பாரத ஸ்டேட் வங்கி கிளை சார்பாக முக்கிய அறிவிப்பு ஒன்று வெளியிடப்பட்டுள்ளது. அதில் வங்கியில் இருந்து பேசுவதாக அழைப்பு ஏதேனும் உங்களுக்கு வந்தால் எந்த ஒரு வங்கி பரிவர்த்தனை சம்பந்தமான தகவல்களையும் தெரிவிக்க வேண்டாம் என அறிவிக்கப்பட்டுள்ளது. மேலும் இந்த அறிவிப்பு குறித்த பேனர் பொதுமக்கள் கூடும் முக்கிய இடங்களிலும் வைக்கப்பட்டுள்ளது.

கீழக்கரை நகரில் டெங்கு காய்ச்சல் சர்வ சாதாரணமாக உலா வருகிறது. ஏராளமான பள்ளி செல்லும் குழந்தைகள் பாதிக்கப்பட்டு இராமநாதபுரம் தனியார் மருத்துவமனைகளில் அனுமதிக்கப்பட்டுள்ளனர். டெங்கு காய்ச்சல் பாதிப்பால் இரத்த அணுக்கள் இலட்சத்திற்கும் குறைவாக இருக்கும் குழந்தைகள் மதுரையில் இருக்கும் தனியார் மருத்துவமனைகளுக்கு பரிந்துரைக்கப்பட்டு அங்கு தங்கி சிகிச்சை பெற்று வருகின்றனர். இராமநாதபுரத்தில் டெங்கு காய்ச்சலுக்கு மருத்துவமனையில் 4 நாள்கள் தங்கி சிகிச்சை பெற ரூ.15000 முதல் ரூ.20000 வரை செலவாகிறது. இதுவே மதுரை என்றால் மருத்துவ செலவுகள் ரூ. 30000 ஐ தொட்டு விடுகிறது. இதனால் கீழக்கரை பகுதியின் நடுத்தர வர்க்க பெற்றோர்கள் படும் பாடு சொல்லி முடிக்க முடியாது.

இன்றைய சூழ்நிலையில் அதிகமாக பரவும் டெங்கு காய்ச்சல் பற்றி நாம் விழிப்புணர்வோடு இருப்பது அவசியம்.

டெங்கு காய்ச்சல் எவ்வாறு ஏற்படுகிறது? அதன் ஆரம்ப அறிகுறிகள் என்ன ?

ஏ.டி.எஸ். கொசுக்கள் மூலம் டெங்கு வைரஸ் பரவுகிறது. டெங்கு வைரஸ் உள்ள கொசு கடித்தால் உடலில் நெறி கட்டும். கொசு கடித்த 4 முதல் 6 நாட்களில் காய்ச்சல் அறிகுறி தோன்றும்.

டெங்கு காய்ச்சல் குழந்தைகளுக்கு வந்தால் எப்படி கண்டறிவது?

டெங்கு காய்ச்சல் குழந்தைகளுக்கு வந்தால் 103 முதல் 105 டிகிரி வரை காய்ச்சல் இருக்கும். கண்களை சுற்றி வலி, உடம்பு வலி அதிகமாக இருக்கும். வாந்தி வருவது போல் இருக்கும். வாந்தி எடுப்பர். 5 முதல் 7 நாட்களில் காய்ச்சல் குறைந்து விடும்.

காய்ச்சல் வந்த பின் டெங்கு வைரஸ் போய்விடுமா?

டெங்கு வைரஸில் காய்ச்சல் குறைந்த பின்தான் 2-ம் கட்ட பிரச்சினை ஆரம்பிக்கும், திடீரென முக்கு, வாயில் இருந்து ரத்தம் வரும். குடலில் ரத்தக்கசிவு ஏற்பட்டு மலம் கருப்பாக வெளியேறும். உடலில் ரத்தப் புள்ளிகள் தோன்றும். மூட்டு வலி எலும்பை நொறுக்கும் அளவுக்கு தசைவலி ஏற்படும். முறையான சிகிச்சை மூலம் குணப்படுத்தலாம்.

ஒருமுறை வந்தால் மறுபடியும் வருமா?

டெங்கு காய்ச்சலில் 4 வகைகள் உண்டு. ஒரு வகை காய்ச்சல் வாழ்வில் ஒரு முறை மட்டுமே வரும். ஆனால் பிற வகை காய்ச்சல் வருவதற்கு வாய்ப்பு உள்ளது.

மருத்துவ பரிசோதனையில் எப்படி கண்டறியலாம்?

உடலின் அறிகுறிகளை வைத்து கண்டறியலாம். எலிசா பரிசோதனை, ரத்த தட்டணுக்கள் குறைவை வைத்து கண்டறியலாம். டெங்கு மனிதர்களின் மூலம் பரவாது.

நல்ல உடல்நிலையில் உள்ளவர்களுக்கு டெங்கு காய்ச்சல் வருமா?

டெங்கு வைரஸ் கொசு யாரை கடித்தாலும் காய்ச்சல் வரும். ஒரு குழந்தைக்கு டெங்கு காய்ச்சல் இருந்தால் அந்த சமுதாயத்தில் 5 முதல் 7 குழந்தைகளுக்கு டெங்கு காய்ச்சல் இருக்கும்.

என்ன வகையான சிகிச்சை அளிப்பது?

டெங்கு காய்ச்சல் பாதித்த நோயாளிகளை தனிமைப்படுத்த வேண்டும். பெரும்பாலான வைரஸ் நோய்களுக்கு தனிப்பட்ட சிகிச்சை என்று இல்லை. இது வைரஸ் காய்ச்சல் என்பதால் ஆன்டிபயாடிக் மருந்துகள் வேலை செய்யாது. பாரசிட்டமால் மாத்திரை மட்டும் தான் கொடுக்க வேண்டும். ஆஸ்பிரின், ப்ரூபென் மாத்திரைகள் கொடுக்கக் கூடாது. ரத்த தட்டணுக்களை குறைக்கும் வகையிலான மருந்துகளை எடுத்துக் கொள்ளக் கூடாது. டாக்டர் ஆலோசனையின்படி நில வேம்பு கசாயம் தரலாம்.

வீட்டில் வைத்து சிகிச்சை அளிக்க முடியுமா?

பெரும்பாலான நோயாளிகள் வீட்டில் இருந்தே சிகிச்சை மேற்கொள்கின்றனர். நல்ல சத்தான உணவுகளை சாப்பிட வேண்டும். வயிற்றுப் போக்கிற்கு பயன்படுத்தும் ஓ.ஆர்.எஸ். பொடியை தண்ணீரில் கலக்கி குடிக்கத் தரலாம். போதுமான திரவ உணவை சாப்பிடுவது அவசியம்.

டெங்கு வைரஸ் பரவாமல் தடுப்பது எப்படி?

மழைநீர் மற்றும் தேங்கி இருக்கும் சுத்தமான நீரில் தான் டெங்கு கொசுக்கள் உற்பத்தி ஆகின்றன. வீடுகளில் பாத்திரங்களில் உள்ள தண்ணீரை முழுமையாக மூடி வைக்க வேண்டும். வாரத்துக்கு ஒரு முறை பாத்திரங்களை நன்கு தேய்த்து கழுவினால் கொசு முட்டைகள் வெளியேறி விடும்.

பிரிட்ஜ், ஏ.சி.யில் இருந்து வெளியேறும் தண்ணீரை உடனுக்குடன் சுத்தம் செய்ய வேண்டும். தண்ணீர் தொட்டிகளில் அபேட் மருந்து தெளித்தால் கொசு புழுக்கள் இறந்து விடும். புகை மருந்து தெளிப்பதன் மூலம் கொசுக்களை ஒழிக்கலாம். டெங்கு கொசுக்கள் மிக நீண்ட தூரம் செல்வதில்லை. ஒரு வீட்டில் டெங்கு கொசு உற்பத்தி ஆனால் அடுத்தடுத்த வீடுகளுக்கு பரவும். எனவே வீட்டையும், சுற்றுப்புறத்தையும் சுகாதாரமாக வைத்துக் கொள்ள வேண்டும்.

தமிழகத்தில் நீர்நிலை ஆதாரத்திற்கு சவாலாக இருக்கும் சீமை கருவேல மரங்களை மாநிலம் முழுவதும் அகற்ற உயர்நீதிமன்ற நீதிபதிகள் ஆணை பிறப்பித்து அனைத்து மாவட்ட நிர்வாகங்களுக்கும் மார்ச் 31 ம் தேதிக்குள் முழுமையாக அகற்ற உத்தரவு பிறப்பித்து இருந்தனர். தமிழகத்தின் வறட்சி மாவட்டமாக இராமநாதபுரம் மாவட்டம் அறிவிக்கப்பட்டு நீர் ஆதாரம் இன்றி விவசாயம் கடுமையாக பாதிக்கப்பட்டுள்ளது.

விவசாயிகள் நலன் கருதி உயர்நீதிமன்ற உத்தரவை அமுல் படுத்துவதில் மாவட்ட நிர்வாகத்திற்கு சமூக அமைப்புகளும், சமூக ஆர்வலர்களும் உறுதுணையாக இருக்க இப்பணி குறிப்பிட்ட காலகெடுக்குள் நடத்தி முடிக்க ஒத்துழைப்பு வழங்கப்பட்டு வருகிறது. இந்நிலையில் தற்போது மக்கள் நல பாதுகாப்பு கழகத்தினர் சீமை கருவேல மரங்களை அகற்ற அரிவாளோடு களமிறங்கியுள்ளனர்.

இன்று 26.02.17 மக்கள் நல பாதுகாப்புக் கழகத்தின் துணைத் தலைவர் மாணிக்கம் தலைமையில் மக்கள் நல பாதுகாப்புக் கழகத்தின் நிர்வாகிகள் கீழக்கரை தில்லையேந்தல் பஞ்சாயத்துக்கு உள்பட்ட 500 பிளாட் பகுதியில் மக்கள் நல பாதுகாப்புக் கழகம் சார்பாக கருவேல மரங்களை அகற்றும் விழிப்புணர்வு நிகழ்ச்சி நடைபெற்றது.

நிகழ்ச்சியில் மக்கள் நல பாதுகாப்புக் கழகத்தின் செயலாளர் முகைதீன் இப்ராகீம் பொருளாளர், முகம்மது சாலிஹ் ஹூசைன் மக்கள் செய்தி தொடர்பாளர் முகம்மது இஸ்மாயில், செயற்குழு உறுப்பினர் செய்யது முகம்மது பாதுஷா, அலையன்ஸ் சோசியல் சர்வீஸ் அமைப்பாளர் ஹபீப் முகம்மது ஆகியோர் கலந்து கொண்டு சீமை கருவேல மரங்களை வேரோடு வெட்டி அகற்றினர்.

தமிழகத்தில் சாலை விபத்துகளின் எண்ணிக்கை 1.5 சதவீதம் அதிகரித்துள்ளதாக தேசிய குற்ற ஆவணக் காப்பகம் தெரிவித்துள்ளது. நாட்டிலேயே தமிழகத்தில்தான் அதிகமான சாலை விபத்துகள் ஏற்பட்டுள்ளன. நாட்டின் மொத்த சாலை விபத்துகளில் 14.9 சதவீதம் தமிழகத்திலேயே நடைபெற்றுள்ளன.

இராமநாதபுரம் மாவட்டத்தில் முன் எப்போதும் இல்லாத அளவிற்கு இரு சக்கர வாகன விபத்துகள் அதிகரித்ததுள்ளது. இந்த சாலை விபத்துகளில் சிக்கி உயிரிழந்தோர் பெரும்பாலானோர் 25 வயதுக்கும் குறைவான இளைஞர்கள் ஆவர். கீழக்கரை நகரில் மட்டும் கடந்த இரண்டு ஆண்டுகளில் மட்டும் 10 க்கும் மேற்பட்ட வாலிபர்கள் இரு சக்கர வாகன விபத்துக்களில் உயிரிழந்துள்ளனர். 30 க்கும் மேற்பட்டோர் காயமடைந்துள்ளனர்.

இந்நிலையில் புது மடத்தில் ‘தவ்ஹீத் ஜமாஅத்’ சார்பாக, விழிப்புணர்வு பேனர் வைக்கப்பட்டுள்ளது. அதில் சிறுவர்களுக்கு அவர்களின் பெற்றோர்கள் 18 வயதுக்கு முன்னதாக இரு சக்கர வாகனங்களை வாங்கி கொடுத்து ஆபத்தை விலைக்கு வாங்க கூடாது என்று வலியுறுத்தப்பட்டு உள்ளது. இதை வாசிக்கும் சகோதரர்கள் முறையாக லைசன்ஸ் எடுத்து, போக்குவரத்து விதிகள் குறித்த போதிய விழிப்புணர்வும், கவனமாக வாகனம் ஓட்ட வேண்டும் என்ற பொறுப்புணர்வும் ஏற்பட்டாலேயே, சாலை விபத்துகளைத் தவிர்க்க முடியும்.

கீழக்கரை நகரில் நகராட்சி அலுவலகத்தின் பின்பகுதியிலும், பெத்தரி தெரு, கஸ்டம்ஸ் ரோடு, புது கிழக்குத் தெரு, வடக்குத் தெரு கொந்தக்கருணை அப்பா பகுதி உள்ளிட்ட பல்வேறு பகுதிகளிலும் சீமை கருவேல மரங்கள் அடர்ந்து காணப்படுகிறது.

இது குறித்து சமூக ஆர்வலர் அசன் ஹக்கீம் கூறும் போது ”இந்த சீமை கருவேல மரங்களை அகற்ற மாவட்ட நிர்வாகம் பல்வேறு முயற்சிகளை மேற்கொண்டு வருகிறது. ஆனால் அரசு அலுவலக வளாகங்களிலேயே இது போன்று கருவேல மரங்கள் இன்னும் அகற்றப்படாமல் இருப்பது வருத்தமளிக்கிறது. உடனடியாக கீழக்கரை நகரின் அனைத்து தெருக்களிலும் மண்டிக் கிடக்கும் கருவேல மரங்களை அகற்ற நகராட்சி நிர்வாகம் உடனடியாக நடவடிக்கை எடுக்க வேண்டும். தனியார் இடத்தில் நிற்கும் கருவேல மரங்களை அகற்ற முறையாக சம்பந்தப்பட்ட உரிமையாளர்களுக்கு நோட்டீஸ் அனுப்பி, அவர்கள் அகற்றாத போது அபராதம் விதிக்க தயங்க கூடாது” என்று தெரிவித்தார்.

நம் மண்ணுக்கு தீங்கு விளைவிக்கும் இந்த கருவேல மரங்களை அகற்ற நகராட்சி நிர்வாகத்தோடு சமூக நல அமைப்பினரும், பொதுமக்களும், சமுதாய கட்சியினரும் ஒருங்கிணைந்து செயலாற்றி கீழக்கரை நகரை கருவேல மரங்கள் இல்லாத செழிப்பான நகரமாக மாற்ற அனைவரும் முன் வர வேண்டும்.

கீழை நியூஸ் அரசாங்க ஆணை வெளியிட்டதிலிருந்து பல வகையான விழிப்புணர்வு செய்திகளையும், அதன் சார்ந்த சமூக அமைப்புகள் செய்து வரும் பணிகளையும், செய்திகளையும் மக்களுக்கு உடனுக்குடன் எடுத்துரைத்து வருகிறது.  இதற்கு எடுத்துக்காட்டாக சமீபத்தில் கருவேல மரங்களை அழிக்க உதவி வரும் கல்லூரிக்கு எல்லா வகையான ஆதரவும், பொருளாதார உதவிகளையும் கீழை நியூஸ் இணைய தளம் செய்து வருவது குறிப்பிடத்தக்கதாகும். அதே போல் இந்த வாரம் கீழை டி.வி யூடியூப் சேனல் வழியாக கருவேல சிறப்பு பதிப்பு வெளிட்டதும் குறிப்பிடத்தக்கது.

கீழக்கரையில்ஆன்லைன் மூலம் ரூ.50000 திருட்டு – வங்கி ATM கார்டு வைத்திருபோர் உஷார்

கீழக்கரை பாரத ஸ்டேட் வங்கி கிளையில் சேமிப்பு கணக்கினை வைத்திருக்கும் கீழக்கரை மேலத் தெருவை சேர்ந்த ஒருவரின் மொபைல் போனுக்கு தொடர்பு கொண்டு பேசிய ஆசாமி ரூ.50000 ஐ ஆன்லைன் மூலம் திருடியுள்ளது பெரும் பீதியை ஏற்படுத்தியுள்ளது.

இது குறித்து பாதிக்கப்பட்டவர் கீழை நியூஸ் வலைத்தளத்திற்கு அளித்துள்ள பேட்டியில் ”கடந்த ஒரு வாரம் முன்னதாக எனது மொபைலுக்கு பேசிய ஆசாமி.. தான் சம்பந்தப்பட்ட வங்கியில் இருந்து பேசுவதாகவும், வங்கி ATM கடந்த நான்கு மாதங்களாக உபயோகிக்காததால், ATM நம்பர், OTP மெசேஜ், பெயர், முகவரி உள்ளிட்ட விபரங்களை தருமாறும் கேட்டனர். அதனை நம்பி அனைத்து விபரங்களையும் சொன்னேன். அடுத்து இரண்டு நாள் கழித்து அக்கௌன்ட் பேலன்ஸ் வங்கியில் பார்த்த போது ரூ.50000 குறைத்துள்ளது. ஒரே நாளில் மூன்று முறை எனது ATM விபரங்களை உபயோகித்தது பணத்தை திருடியுள்ளனர்.” என்று வருத்தத்துடன் தெரிவித்தார்.

இது சம்பந்தமாக தற்போது கீழக்கரை DSP மகேஸ்வரியின் உத்தரவின் பேரில் காவல் நிலையத்தில் வழக்கு பதிவு செய்யப்பட்டு விசாரணை நடைபெற்று வருகிறது. பாதிக்கப்பட்டவருக்கு ஆலோசனை வழங்கி, அட்வகேட் சலீம், விடுதலை சிறுத்தைகள் கட்சியின் மாவட்ட நிர்வாகி யாசீன், கீழக்கரை நகர் செயலாளர் முஹைதீன் இபுறாகீம் சமூக ஆர்வலர் காதர் முஹைதீன் ஆகியோர்கள் உடனிருந்தனர்.

இது குறித்து இராமநாதபுரம் மாவட்ட வழக்கறிஞர்கள் சங்க செயலாளர் அட்வகேட் சலீம் கீழை நியூஸ் வலைத்தளத்திற்கு அளித்த பேட்டியில் ”இனி வரும் காலங்களில் எல்லாமே ஆன்லைன் பணபரிமாற்றமாக இருப்பதனால் பொதுமக்கள் மிக கவனமாக வங்கி கணக்கு விஷயங்களை கையாள வேண்டும். யாராவது உங்களை மொபைலில் தொடர்பு கொண்டு வங்கி கணக்குகள், பாஸ்வேர்டு போன்ற விபரங்களை கேட்டால் எக்காரணத்தை கொண்டும் கொடுக்க கூடாது. எந்த ஒரு வங்கியும் தன்னுடைய வாடிக்கையாளர் ATM கார்டு, வங்கி பண பரிவர்த்தனை குறித்த விபரங்களை கேட்பது கிடையாது. அது போல் யாராவது தொடர்பு கொண்டு பேசினால் உடனடியாக அந்த போன் நம்பரை குறித்து கொண்டு அருகில் உள்ள காவல் நிலையத்திற்கும், சம்பந்தப்பட்ட வங்கிக்கும் புகார் அளிக்க வேண்டும். ஆகவே பொதுமக்கள் இந்த விஷயத்தில் விழிப்புணர்வோடு செயல்பட்டு இது போன்ற ஆன்லைன் திருட்டுகளில் இருந்து தங்களை பாதுகாத்துக் கொள்ள வேண்டும்” இவ்வாறு தெரிவித்தார்.

இன்று இந்திய நாடு முழுவதும் டிஜிட்டல் இந்தியா என்று கூக்குரல் போட்டு கொண்டு இருக்கும் பொழுது அந்த டிஜிட்டல் உலகத்தின் சாதகங்களை மட்டுமே எடுத்துரைப்பதில் அரசாங்கம் மும்முரம் காட்டுகிறது, ஆனால் அதனுடைய மற்றொரு சாத்தியங்களை மக்களிடம் எடுத்துக்கூறி விழிப்புணர்வை ஏற்படுத்துவதும் அரசாங்கத்தின் கடமை.  அவ்வாறு முறையான விழிப்புணர்வு ஏற்படும் பட்சத்தில் மக்களும் இது போன்ற டிஜிட்டல் திருடர்களிடம் இருந்து தப்பிக்க வாய்ப்பிருக்கிறது.

்

கீழக்கரை நகரை திறந்த கழிப்பறையற்ற நகரமாக ஆக்குவது சம்பந்தமான விழிப்புணர்வு நிகழ்ச்சி இன்று (09-02-2017) காலை 11.00 மணியளவில் ஹமீதியா தொடக்கப்பள்ளி மற்றும் ஹமீதியா பெண்கள் மேல்நிலைப் பள்ளிகளில் நடைபெற்றது.

இந்நிகழ்ச்சி கீழக்கரை நகராட்சி சுகாதார அலுவலர் திண்ணாயிரமூர்த்தி தலைமையில் நடைபெற்றது. இந்நிகழ்வில் திறந்த வெளி கழிப்பறையால் ஏற்படும் தீமைகளைப் பற்றியும் அதனால் ஏற்படும் சுகாதாரக் கேடுகள் பற்றியும் மாணவ மாணவிகளுக்கு விளக்கப்பட்டது. மேலும் இந்நிகழ்ச்சியில் நகராட்சி சுகாதார ஊழியர்கள் ஹாஜா, சக்தி, மனோகரன் மற்றும் பள்ளிக் கூடத்தின் ஆசிரியர், ஆசிரியைகளும் கலந்து கொண்டனர்.

கீழக்கரையில் உள்ள தாசிம் பீவி கல்லூரி இராமநாதபுரம் மாவட்டத்தில் முன் மாதிரியாக சீம கருவேல மரங்களை அழிக்க பல திட்டங்களை வகுத்து செயல்படுத்தி வருகிறார்கள்.  கடந்த வாரம் தாசிம் பீவி கல்லூரி மாணவிகள் ஆயிரக்கணக்கான சீம கருவேல மரங்களை அகற்றி சாதனைப் படைத்தனர்.  அதைத் தொடர்ந்து கீழக்கரையில் சீமைக் கருவேல மரங்களின் தீமைகளை வலியுறுத்தி பேரணியும் நடத்தினார்கள்.

இன்று (08-02-2017) கல்லூரி நிர்வாகம் சீம கருவேல மரங்களை பெரிய அளவில் அகற்ற அடுத்த கட்ட நடவடிக்கையாக இயந்திரங்களை வைத்து செயல்படுத்த முடிவெடுத்துள்ளார்கள். இந்த செயல்பாடுக்கு அதிகமான பொருளாதார செலவுகள் ஆகும். உதாரணமாக இயந்திரங்களுக்கான வாடகை, வேலையில் ஈடுபடுவர்களுக்கான போக்குவரத்து செலவு’ சிற்றுண்டி செலவு, பாதுகாப்பு சாதனங்கள் போன்ற வகைகளுக்கு தேவைப்படுகிறது.  கல்லூரி நிர்வாகமும் அதிக அளவு பொருளாதார உதவிகள் செய்து வருகிறது  ஆனால் பொது மக்கள் சமூக ஆர்வலர்கள் புரவலர்கள் உதவி செய்யும் பட்சத்தில் இன்னும் விரியமாகவும் விரைவாகவும் செய்ய முடியும் என்று கல்லூர் நிர்வாகம் கருதுகிறது.  அதன் அடிப்படையில் வேண்டுகோள் முன் வைத்துள்ளார்கள்.  ஆர்வம் உள்ளவர்கள் கீழ்கண்ட கல்லூரி வங்கி கணக்கில் தங்களுடைய பொருளாதார உதவிகளை செலுத்தலாம்.

INDIAN BANK, KILAKKARAI

ACCOUNT NUMBER: 536471696

IFSC CODE: IDIB000K158

MICR CODE: 623019095

தமிழகத்திலேயே நம் இராமநாதபுரம் மாவட்டம் தான் வறட்சிக்கு பெயர் போன மாவட்டம் ஆகும். தண்ணியில்லா காடு, விவசாயமில்லா பூமி, பஞ்சம் பிழைக்க அதிகம் அயல் நாடு செல்லும் பகுதி, பின் தங்கிய மாவட்டம் என்றெல்லாம் தனி பெரும் பெருமை நமக்குண்டு. இதற்கெல்லாம் ஆணி வேறாக இருப்பது நம் வளத்தை எல்லாம் உறுஞ்சி சக்கையை மென்று துப்பி கொண்டிருக்கும் அரக்கனாகிய சீமை கருவேல மரங்கள். இதனை வேரோடு பிடுங்கி அழித்தொழிக்க நம் தேசத்தின் நான்கு தூண்களாகிய நீதிமன்றமும் அரசாங்கமும், அரசு துறை அலுவலர்களும், ஊடகங்களும் கை கோர்த்து களமிறங்கி விட்டனர். இவர்களோடு பொது நல அமைப்பினரும், பள்ளி கல்லூரி மாணாக்கர்களும் தம் ஜனநாயக கடமையாக தற்போது கருவேல அசுரனை அழித்தொழிக்க ஆயத்தமாகி விட்டனர்.

அதன் தொடர்ச்சியாக கீழக்கரையில் இன்று 06.02.2017 இராமநாதபுரம் மாவட்ட தொடக்க கல்வி துறை சார்பாக சீமை கருவேல மர ஒழிப்பு விழிப்புணர்வு பேரணி நடைபெற்றது. இந்த விழிப்புணர்வு பேரணியினை திருப்புல்லாணி கூடுதல் தொடக்க கல்வி அலுவலர் தங்க கனி மொழி துவங்கி வைத்து சீமை கருவேல மரங்களின் தீமைகளையும், இதனை வேரோடு அழிப்பதில் மாணவர்களின் பங்கினையும் விளக்கினார். அதன் பிறகு பேரணி அங்கிருந்து துவங்கி நகரின் முக்கிய வீதிகளின் வழியாக சென்றது. இந்த பேரணியில் பங்கேற்ற ஆறு பள்ளிகளை சேர்ந்த ஆயிரத்திற்கும் மேற்பட்ட மாணவ மாணவிகள் தங்கள் கைகளில் சீமை கருவேல மரங்களின் தீமைகளை வலியுறுத்தும் பதாகைகளை கையில் ஏந்தியபடி கோஷமிட்டு சென்றனர்.

இந்த விழிப்புணர்வு பேரணியில் ஹமீதியா தொடக்கப் பள்ளி, ஹைராத்துல் ஜலாலியா தொடக்கப் பள்ளி, இஸ்லாமியா தொடக்கப் பள்ளி, மஹ்தூமியா தொடக்கப் பள்ளி, சதக்கத்துன் ஜாரியா நடு நிலை பள்ளி, CSI நடு நிலை பள்ளி உள்ளிட்ட பள்ளிகளின் மாணவ மாணவிகள், தலைமையாசிரியர்கள், ஆசிரியர்கள், ஆசிரியைகள் பங்கேற்றனர். இந்த பேரணியினால், சீமை கரு வேல மரத்தின் தீமைகள் குறித்து பொதுமக்களுக்கு நல்லதொரு விழிப்புணர்வு கிடைத்தது வரவேற்கத்தக்கது. இந்த சிறப்பான பேரணியில் பங்கேற்ற மாணவ மாணவிகளுக்கும், ஆசிரிய பெருமக்களுக்கும் கீழை நியூஸ் வலை தளம் சார்பாக மனமார்ந்த வாழ்த்துக்களை தெரிவிப்பதில் பெருமிதம் கொள்கிறது.

பேரணியின் புகைப்படத்தொகுப்பு கீழே:-

கீழக்கரை நகரில் புதிய வீடு கட்டுபவர்களின் எண்ணிக்கை அதிக அளவில் உள்ளது. இதனால் கீழக்கரையில் செழிப்பான தொழிலாக, கட்டுமானத் தொழில் இருந்து வருகிறது. கீழக்கரை நகரின் குறுகிய தெருக்களுக்குள், வீடு கட்டுபவர்களால் கொட்டப்படும் மணல், ஜல்லி, செங்கல், கட்டுமான இடிபாடுகள் போன்றவைகள்,போக்குவரத்து மிகுந்த நேரங்களில் கொட்டப்படுவதால் பள்ளி, கல்லூரிகளுக்கு செல்லும் மாணவ, மாணவிகள் மட்டுமல்லாமல் இந்த தெருக்களை கடந்து செல்ல முயலும் இரு சக்கர வாகன ஓட்டிகளும் கடும் அவதிக்குள்ளாகி வருகின்றனர்.

இது குறித்து கீழக்கரை சட்டப் போராளி ஹமீது ராஜா அவர்கள் கூறும் போது ”சின்னக்கடை தெரு பகுதியில் கட்டப்படும் ஒரு வீட்டிற்கான மணல் வடக்கு தெரு கொந்தக்கருணை அப்பா பகுதியில் கொட்டி செல்கினறனர். இது வன்மையாக கண்டிக்கத்தக்கது. கீழக்கரையில் எந்தப் பகுதிக்கு போனாலும் கட்டுமானப் பொருள்களை நடு ரோட்டில் கொட்டி விட்டு போய் விடுகின்றனர். இதனால் இரு சக்கர வாகனங்களில் செல்பவர்கள், இடறி கீழே விழுது விபத்துகள் ஏற்படும் அபாயமும் இருக்கிறது.

இந்த தெருக்களை கடந்து செல்லும் பள்ளி வாகனங்களும், ஆட்டோக்களும், சாலையை ஆக்கிரமித்து கொட்டப்பட்டிருக்கும் மணல், ஜல்லி போன்றவற்றில் சிக்கி கடும் அவதி ஏற்படுகிறது. கீழக்கரை நகராட்சி பிரதான சாலைகளில் உள்ள மணல், ஜல்லி போன்றவற்றையும் உடனடியாக அப்புறப்படுத்த, கட்டிட உரிமையாளர்கள் மற்றும் காண்டிராக்டர்களுக்கு அறிவுறுத்த வேண்டும். சாலைகளில் போக்குவரத்துக்கு இடையூறாக இருக்கும் வகையில் கட்டுமான பொருள்களை கொட்டும் லாரிகள், டிராக்டர்கள் மீது தகுந்த நடவடிக்கை எடுக்க வேண்டும்” என்று தெரிவித்தார்.

மேலும் இப்பகுதியில் வாழும் மக்கள் இந்த சாலையின் கடந்த கால நிலையை சிந்தித்து பார்க்க வேண்டும். சிதிலமடைந்து கிடந்த இந்த சாலையை பல சமூக ஆர்வலர்களின் பல கட்ட போராட்டத்திற்கு பிறகே அரசாங்கத்திடம் இருந்து பெற முடிந்தது.  கஷ்டப்பட்டு பெற்ற இந்த சாலையை பேணி காக்க வேண்டியது இந்த பகுதி மக்களின் கடமையில் ஒரு பகுதியாகும்.  அந்த இடத்தின் கட்டுமானப் பணிக்கு அல்லாமல் வியாபார நோக்குடன் சாலைப்பகுதியை சீர்குலைப்பதை காணும் அச்சமயத்தில் தடுத்து நிறுத்த வேண்டும். அரசாங்கம் தரும் வசதிகளை தக்க வைத்து கொள்வதும் நம் கடமையாகும்.

சமுதாயத்தின் சுதந்திரம் என்பது, நாம் நினைப்பதை எல்லாம் செய்வது கிடையாது.  நாம் வாழ்ந்து வரும் சமுதாயத்தில் அனைவரும் அனைத்து சௌகரியங்களும் பெற்று வாழ்வதே.  ஆனால் தாம் செய்யும் செயலால் நாம் வாழும் சமுதாயத்துக்கு ஏற்படப்போகும் சிரமத்தைப் பற்றி கவலையில்லாமல் வாழ்வது மிகவும் வேதனைக்குரிய விசயம்.  எப்பொழுது ஒரு தனி மனிதனின் ஒழுக்கம் தழைத்தோங்குமோ அன்று சமுதாயம் முன்னேறும்.

ஜனவரி 30 இந்திய நாட்டின் தந்தை என்றழைக்கப்படும் காந்தியடிகள் மூச்சு நிறுத்ப்பட்ட நாள். அதுவே இன்று தியாகிகளின் திருநாளாக நினைவு கூறப்படுகிறது. ஆனால் அதே நாளில் மூச்சை நிறுத்தியவர்களின் பேரணியும் நடத்துவது அந்த தியாகத்தினை கொச்சைப் படுத்துவதாகவே இருக்கிறது. நம் நாட்டின் சுதந்திர போராட்ட தியாகிகளின் ஒவ்வொருவரின் தியாகத்தின் பின்னாலும் நிச்சயமாக ஒரு இஸ்லாமியனின் பங்களிப்பு உறுதியாக இருந்துள்ளது என்பதை யாரும் மறுக்க முடியாது.

நம் ஊர் கப்பலோட்டிய தமிழனுக்கு முதலில் பொருளாதாரத்தை வாரி வழங்கியவர் ஹாஜி பக்கிர் அகமது எனும் இஸ்லாமியர். அவர்கள் கொடுத்த தொகை அந்த காலத்தில் இரண்டு லட்ச ரூபாய் என்பது சரித்திரம் படித்தவர்களுக்கு தெரியும்.

காந்தியடிகள் வெள்ளையர்கள் கொடுத்த பட்டத்தை துறக்க வேண்டும் என்று அறிவுறுத்திய பொழுது அதிகளவில் பட்டங்களைத் துறந்தர்வர்கள் முஸ்லிம் சமுதாயம்தான். ஆங்கிலேயர் பட்டத்தை துறக்க மனமில்லாமல் பலர் இருந்த நேரத்தில் காயிதே மில்லத் அவர்கள் தன்னுடைய சட்டப்படிப்பை பாதியில் நிறுத்தி தேச பக்தியை வெளிகாட்டினார் அவ்வாறு அவர் செய்யாமல் இருந்திருந்தால் அவரும் ஒரு பாரிஸ்டர் ஆகியிருப்பார்.

நேதாஜி சுபாஸ் சந்திரபோஸ் அமைத்த இந்திய தேசிய ராணுவத்தின் முதல் ராணுவ ஜெனரலாக நியமிக்கப்பட்டவர் ஷா நவாஸ் கான் என்ற இஸ்லாமியர். அதே போல் இவருடைய ராணுவ படை அமைக்க பொரும் பொருள் உதவி செய்தவர் ரங்கூனில் இருந்த இந்திய வியாபாரி வள்ளல் ஹபீப் அவர்கள் கொடுத்த தொகை அந்த காலத்தில் ஒரு கோடி ரூபாய். நேதாஜி அவர்கள் அமைத்த மாதிரி மந்திரி சபையில் இருபது மந்திரிகள் இருந்தனர் அதில் ஐந்து பேர் இஸ்லாமியர் என்பதும் வரலாறு.

மகாத்மா காந்தி கள்ளுக் கடை மறியல் அறிவித்த பொழுது மதுரையில் பங்கேற்றவர்கள் பத்தொன்பது பேர் இதில் இஸ்லாமியர் பத்து பேர் என்பது குறிப்பிடதக்கது.

இந்திய நாட்டின் விடுதலைக்கு இஸ்லாமியப் பெண்களம் குறிப்பிடதக்க பங்களிப்பைச் செய்துள்ளார்கள். உதாரணமாக சுதந்திர இந்தியாவின் தேசிய கொடியை வடிவமைத்தவர் திருமதி.பத்ருதீன் தியாப்ஜி ஆவார்.

இஸ்லாமியர்களின் இத்தகைய அர்பணிப்பினாலயே இந்தியா விடுதலைப் போராட்டம் முக்கயத்தும் பெற்றது என்பதை குறிப்பிட எழுத்தாளர் குஷ்வந்த சிங் பின்வருமாறு எழுதுகிறார் “இந்திய விடுதலைக்காக சிறை சென்றவர்களிலும் உயிர் நீத்தவர்களிலும் இஸ்லாமியர் அதிகமாகவே இருந்தனர். அவர்களது மக்கள் தொகை விகிதாசாரத்தை விட விடுதலைப் போரில் மாண்டோர் எண்ணிக்கையின் விகிதாச்சாரம் அதிமாகவே இருந்தது. ” ( இல்லஸ்டிரேட் வீக்லி 2912-1975).

அதே சமயம் மௌலானா அபுல் கலாம் ஆசாத், ரபிக் அகமத் கித்வாய், காயிதே மில்லத் முஹம்மது இஸ்மாயில் போன்றவர்கள் இந்திய விடுதலைக்காக போராடியது மட்டும் அல்லாமல் நம் தேசத் தந்தையான காந்தியடிகளுடன் ஹிந்து முஸ்லிம் நல்லிணக்த்திற்காக பொரும் பாடுபட்டிருக்கிறார்கள் என்றால் மிகையாகாது. நாம் இங்கு உதாரணத்திற்காக சில பேர்களுடைய சரித்திரத்தைக் குறிப்பிட்டுள்ளோம், அனைவருடைய சரித்திரத்தையும் பட்டியலிட்டால் சொல்லிக்கொண்டே போகலாம்.

ஆனால் காலத்தின் கோலம் உண்மையாக விடுதலைக்காக தியாகம் செய்தவர்களின் வரலாறு மறக்கடிக்கப்பட்டு இருட்டடிக்கப்பட்டு இன்று வெள்ளையனுக்கு துணை போனவர்கள் விடுதலை தியாகிகளாக சித்தரிக்கப் படுவது மிகவும் வேதனைக்குரிய விசயம் ஆனால் உண்மைளை உரக்கச் சொல்வது ஒவ்வொரு உண்மையான இந்தியனின் தலையாய கடமையாகும்.

கீழக்கரை நகராட்சியின் ‘நகைச்சுவை‘ அறிவிப்புக்கு பொது மக்கள் பதில் கொடுக்க ‘கீழக்கரை மக்கள் களம்’ வேண்டுகோள்

கீழக்கரை நகரராட்சி சார்பில் பொது மக்களுக்கு அறிவிப்பு ஒன்று வெளியிடப்பட்டு இருக்கிறது. அதில் கீழக்கரை நகராட்சி எல்லைக்கு உட்பட்ட அனைத்து பகுதிகளிலும் (வார்டு எண் 1 முதல் 21 வரையிலான பகுதிகளில்) ‘தூய்மை இந்தியா’ திட்டத்தின் கீழ், கீழக்கரை பகுதியில் எந்த இடத்திலும், எவரும் மலம், ஜலம் திறந்தவெளியில் கழிக்காமல் சுகாதாரத்தை மிக சிறப்பாக பேணுவதாலும், நகராட்சி நிர்வாகம் பொது கழிப்பிட வசதிகளை நகரெங்கும் உலகமே போற்றும் படி அமைத்து தந்த படியாலும், OPEN DEFECATION FREE TOWN என்கிற பார் போற்றும் பட்டத்தை விரைவில் அரசுப்பூர்வமாக அறிவிக்க இருப்பதாக தெரிவிக்கப்பட்டுள்ளது.

மேலும் இதில் எவருக்கேனும் ஆட்சேபனை இருந்தால் இந்த அறிவிப்பு வெளியான தேதியிலிருந்து 10 நாள்களுக்குள் கடிதம் மற்றும் மின்னஞ்சல் வாயிலாக தெரிவிக்கலாம் என்று நகராட்சி ஆணையாளர் நகைச்சுவை அறிவிப்பை வெளியிட்டிருக்கிறார்.

கட்டி முடிக்கப்படாத நிலையில் உள்ள கழிப்பறை 

இது குறித்து கீழக்கரை மக்கள் களத்தின் துணைத் தலைவர் முஹம்மது சாலிஹ் ஹுசைன் கூறும் போது ”கீழக்கரை கலங்கரை விளக்கம் பகுதியில் நேற்று தான் நம்ம டாய்லெட் அமைப்பதற்கான வேலைகள் துவங்கப்பட்டுள்ளது. இந்த வேலைகள் முடிவடைந்து நல்ல முறையில் தண்ணீர் வசதி செய்யப்பட்டு பொதுமக்கள் பயன்பாட்டுக்கு வந்த பிறகு தான் திறந்த வெளியில் மலம் கழிக்கப்படாதது என்று இந்த பகுதியில் உறுதி செய்யப்பட முடியும். கலங்கரை விலக்கம் கடற்கரை பகுதிகளில் இன்றும் காலை நேரங்களில் திறந்த வெளி கழிப்பிடங்கள் எவ்வித இடையூறும் இன்றி செயல் பட்டு வருகிறது. அது மட்டுமில்லாமல் இன்னும் பல்வேறு வீடுகளில் கழிப்பிட வசதி இல்லாததால் ஏழை எளிய மக்கள்; வேறு வழியின்றி இது போன்று கடற்கரை, மயான பகுதிகளை திறந்த வெளி கழிப்பிடங்களாக பயன்படுத்தி வருகின்றனர்.

60000 மக்கள் தொகை கொண்ட நம் கீழக்கரை நகரில் 3 பொது கழிப்பிடங்கள் மட்டுமே உள்ளது. தற்போது நமது நகரம் தாலுகாவாக தரம் உயர்த்தப்பட்டுள்ள நிலையில் போதுமான பொதுக்கழிப்பிடம் இல்லாததால் வெளியூரிலிருந்து அரசு அலுவலகங்களுக்கு வரும் பொதுமக்கள் அவசர உபாதைகளை சரி செய்து கொள்ள முடியாமல் அவதிக்குள்ளாகி வருகின்றனர். அதற்காக மலேரியா கிளினிக் பின்புறம் நகராட்சி சார்பில் பொது கழிப்பிடம் கட்டும் பணி ஆமை வேகத்தில் நடைபெற்று வருகிறது.

இவையெல்லாம் பயன்பாட்டுக்கு வந்தபிறகு இது போன்ற அறிவிப்புகளை வெளியிட்டால் கீழக்கரை வாசிகள் மகிழ்ச்சியடைந்திருப்பார்கள். ஆனால் தற்போது நகராட்சியின் இந்த அறிவிப்பு முகம் சுளிக்கும் அளவிற்கே இருக்கிறது. ஆகவே வெளிநாடு வாழ் கீழக்கரை சொந்தங்கள், நண்பர்கள் நகராட்சி சார்பாக வெளியிடப்பட்டு இருக்கும் அறிவிப்புக்கு தகுந்த பதிலை அவர்களுடைய மின்னஞ்சல் முகவரிக்கு அனுப்பி உண்மையை நிலைநாட்டுமாறும், உடனடியாக நம்ம டாய்லெட் திட்டம் உள்ளிட்ட பொது கழிப்பறை திட்டங்களை உடனடியாக நகராட்சி நிர்வாகம் செயல்படுத்த அறிவுறுத்துமாறும் கீழக்கரை மக்கள் களம் சார்பாக கேட்டுக் கொள்கிறேன்” என்றார்