slider

கை நிறைய பணம் இருந்தும் தெருவில் நிற்கும் பொது மக்கள்…

கீழக்கரையில் பொது மக்கள் அவதி..

அவசரத் தேவைகளையும் நிறைவேற்ற முடியாத அவசர நிலை..

கீழக்கரையில் எந்த திசை திரும்பினாலும் மக்கள் கையில் இருக்கும் 1000, 500 நோட்டுகளை மாற்ற அலைமோதி திண்டாடும் காட்சிகள் மன வேதனை தரக்கூடியதாக இருக்கிறது.  கீழக்கரையில் உள்ள சில அரசு அலுவலகங்களாகிய நகராட்சி நிர்வாகம் மற்றும் மின்சார வாரியம் தவிர அனைத்து இடங்களிலும் 1000 மற்றும் 500 ரூபாய் நோட்டுக்கள் ஏற்றுக் கொள்ளப்பட மாட்டாது என்ற பலகைகள் காணப்படுகிறது.  இன்று காலை தபால் நிலையங்களில் புதிய நோட்டுக்கள் பெற்றுக் கொள்ளலாம் என்று அறிவிப்பைத் தொடர்ந்து மக்கள் அங்கு குவியத் தொடங்கினர் ஆனால் 11 மணி வரை எந்த முன்னேற்றமும் இல்லாததால் பொதுமக்கள் கலைந்து பிற வங்கிகளை நோக்கி படையெடுக்க தொடங்கினர்.  பாரத ஸ்டேட் வங்கியில் உள்ள தானியங்கி இயந்திரத்ததை தவிர வேறு எந்த வங்கியிலும் தானியங்கி இயந்திரங்கள் செயல்படாமல் பொதுமக்கள் சொல்ல இயலாத துயரங்களுக்கு ஆட்பட்டு வருகின்றனர்.

நேற்று மக்களின் துயரங்களை போக்கும் எண்ணத்தில் கீழக்கரை மக்கள் பாதுகாப்பு கழகம் சார்பாக பாரத ஸ்டேட் வங்கி அதிகாரிக்கு கூட்ட நெரிசலை சமாளிக்கும் வகையில் முறைப்படுத்த கோரிக்கை வைக்கப்பட்டது,  அதன் அடிப்படையில் இன்று காலை முதல் ஆண்கள் மற்றும் பெணகள் என தனி தனியாக கவுண்டர்கள் தொடங்கப்பட்டு உள்ளது.  ஆனால் டோக்கன் முறை செயல்படுத்தப்படாததால் இன்னும் மக்கள் வரிகை நீண்டு கொண்டே செல்கிறது.

இப்பொழுது ஏற்பட்டு இருக்கும் சில்லரை நோட்டுக்கள் மற்றும் புதிய நோட்டுக்கள் பற்றாகுறையால் பொது மக்கள் மிகவும் மன உளைச்சலுக்கு ஆளாகியுள்ளனர்.  சிறு வியாபாரிகள் தங்கள் அன்றாட வியாபாரங்கள் பாதிக்கப்பட்டு செய்வதறியாது திகைத்து நிற்கிறார்கள்.  மேலும் நோய்பட்டு இருக்கும் பொது மக்கள் சிகிச்சைக்கு சென்றாலும் புதிய நோட்களும், சிறிய தொகைகளும் இல்லாததால் சிகிச்சை பெற முடியாமல் உயிரை பணயம் வைத்தவர்களாக காணப்படுகிறார்கள்.  அரசு அதிகாரிகளும்,  நிறுவனங்களும் போர்கால அடிப்படையில் உரிய நடவடிக்ககைகள் எடுக்க வேண்டும் என்பதே மக்களின் இப்போதைய தலையாய கோரிக்கையாக இருக்கிறது.

அரசு அதிகாரிகள் கருணை காட்டுவார்களா?? பொதுமக்களுக்கு விடிவு காலம் பிறக்குமா??

திங்கட் கிழமை அரசு விடுமுறையா??

காலை 11.30 வரை அதிகாரிகள் இல்லாத கீழக்கரை நகராட்சி..

விழித்தெழுமா அரசாங்க அலுவலகம்.. மக்களுக்கு விடிவு காலம் பிறக்குமா??

 நீங்கள் இங்கு படத்தில் காண்பது நம் கீழக்கரை நகராட்சி அலுவலகத்தின் காலை 11.30 மணி நிலவரம். அரசு சேவைகளுக்காக மக்கள் அலுவலகத்தை நாடியபோது, அதிகாரிகள் இல்லாததால் மக்கள் அதிர்ச்சி.  திங்கட் கிழமையும் விடுமுறையோ என்று எண்ணும் அளவுக்கு அலுவல்கள் கவனிக்க அதிகாரிகள் இல்லாமல் அலுவலகம் வெறிச்சோடி கிடந்தது.  அரசியல் ஆட்சி முடிந்து அதிகாரிகள் ஆட்சி வந்தால் விடிவு பிறக்கும் என்று எண்ணியிருந்த மக்களுக்கு மீண்டும் ஏமாற்றம்.  என்று மாறும் இந்த அவல நிலை??.  இதுபோன்ற நிகழ்வு இது முதல் முறை அல்ல,  இது போன்று பலமுறை சமூக ஆர்வலர்களால் சுட்டிக்காட்டப்பட்டுள்ளது,  பின்னர் சிறிது காலம் மட்டும்,  முறையாக அலுவல்கள் நடக்கும்,  மீண்டும் வேதாளம் முருங்க மரத்தில் ஏறிய கதைதான்.  பொதுமக்களுக்கு வருடத்தில் சில நாட்கள்தான் பண்டிகை களைப்பு என்றால்,  கீழக்கரை நகராட்சி அதிகாரிகளுக்கு வாரந்தோறும் பண்டிகை களிப்புதான் போல தோன்றுகிறது.  இந்த செய்தி வெளியிடும் நேரத்தில் முக்கிய நிர்வாக அதிகாரிகளான ஆணையரோ,  தலைமை அலுவலரோ, சுகாதார ஆய்வாளரோ யாரையும் காணக் கிடைக்காமல் பொதுமக்கள் தங்கள் மனுக்களுடன் அலைந்து திரிந்ததை காண முடிந்தது.   கீழ் மட்ட பணியாளர்கள் சிலரை மட்டுமே காண முடிந்தது.  அலுவல் காரணமாக கூட்டஙக்ளில் ஈடுபட்டு இருந்தோம் என்று உப்புக்கு சப்பில்லாத காரணங்கள் நிச்சயமாக நாம் எதிர்பார்கலாம்.  அவ்வாறு இருந்தாலும் அந்த சமயத்தில் மக்கள் தேவைகளை கவனிக்க பொறுப்பு அலுவலர்களை வைப்பது கடமையாகும்.  விடுமுறை நாட்களில் கூட மக்களுக்காக உழைக்கும் எத்தனையோ நல்லுள்ளம் கொண்ட அரசு அலவலர்களின் மத்தியில், இது போன்ற ஓ.பி அடிக்கும் செயல், பொது மக்கள் மத்தியில் கடும் வெறுப்பினை சம்பாதித்துள்ளது.

கீழக்கரையில் தொடரும் அவலம்..

சாக்கடை பெருகெடுத்து ஓடும் சி.எஸ..ஐ பள்ளி பின்புறம்..

பொதுமக்களின்             ஏமாற்றமும்,                       எதிர்பார்ப்புகளும்…

கீழக்கரையில் மிகவும் பழமை வாய்ந்த பள்ளிக்கூடங்களில் ஒன்று சி.எஸ்.ஐ பள்ளியாகும். இவ்வழிதான் கீழக்கரையின் முக்கியத் தெருக்களான வடக்குத் தெரு, புதுத் தெரு போன்ற இடங்களுக்கு செல்லும் நுழைவு வழியாகும்.  இப்பகுதியும் சாக்கடையும் பிரியாத அம்சம் போல் ஆகிவிட்டது.  இங்கு வழிந்தோடும் சாக்கடையால் டெங்கு மற்றும் பல தொற்று நோய்களால் பாதிக்கப்பட்டு சிறுவர்களும், பெரியவர்களும் பெரும் அவதிக்கு உட்பட்டு வருகிறார்கள்.  இங்கு வசித்து வரும் ஆசிரியை ஒருவர் நகராட்சி அலுவலகத்தில் நேரடியாக சென்று அதிகாரிகளைப் பார்த்து மனு கொடுத்த பின்பும் இதுவரை எந்த ஒரு நடவடிக்கையும் எடுக்கப்படவில்லை என்பது மிகவும் வேதனையான விசயம்.  இங்கு தெருவில் விளையாடும் சிறுவர்கள் என்று தனக்கும் ஒரு தூய்மையான இடம் கிடைக்கும் என்ற ஏக்கத்திலேயே காணப்படுகிறார்கள்.  இப்பகுதியில் பல அரசியல்வாதிகளும், தொழில் செய்பவர்கள் வசித்து வந்தாலும் எந்த ஒரு முன்னேற்றமும் கடந்த காலங்களில் ஏற்பட்டது போல் தெரியவில்லை.  கடந்த ஆட்சியில் இருந்த நகர் மன்ற உறுப்பினர்களாலும் எந்த ஒரு முன்னேற்றமும் ஏற்படவில்லை, வரப் போகும் நகர் மன்ற உறுப்பினர்களாவது செய்வார்களா? நம் தெரு சுத்தமடையுமா என்று எதிர்பார்ப்பு அத்தெரு மக்களிடம் மேலோங்கி நிற்கிறது.  இந்நிலையில் மக்கள்நலப் பாதுகாப்பு கழகம் சார்பாகவும் மீண்டும் இப்பகுதி விசயமாக விரைவில் நிர்வாக அதிகாரிகளிடம் புகார் மனு அளிக்க இருக்கிறார்கள்.

இல்லையென்றால் இந்த தெருவுக்கும் சொந்த செலவில் சுத்தம் செய்யும் அரசியல்வாதி வந்தால்தான் விடிவு காலம் கிடைக்குமோ??

கீழக்கரை இஸ்லாமியா பள்ளியில் நாளை (06-11-2016) TNPSC (Group-4) தேர்வு நடைபெற உள்ளது

இந்த விஷயம் எத்துணை கீழக்கரை வாசிகளுக்கு தெரியும்

தமிழம் முழுவதும் இந்த தேர்வை 13 லட்சம் நபர்களுக்கு மேல் எழுதுகின்றனர். கீழக்கரையிலிருந்து எத்துனை பேர் என்றால்,  விடையாக ஒரு மிகப்பெரிய கேள்விக் குறிதான் வருகின்றது

TNPSC என்ற தமிழ்நாடு அரசுப்பணி தேர்வாணையம் நடத்தும் தேர்வில் தேர்ச்சி பெறும் நபர்கள் துணை கலெக்டர் முதல் துணை காவல் கண்காணிப்பாளர்(DSP), தாசில்தார், கிளர்க் (Clerk) வரை அரசுப் பணியில் நியமனம் செய்யப்படுகின்றனர். இன்று நமது ஊரில் இருக்கும் DSP யும் TNPSC தேர்வில் தேர்ச்சி பெற்று இப்பணிக்கு வந்தவர் தான் என்று உங்களுக்கு தெரியப்படுத்துக் கொள்கின்றேன்.

LKG யில் பிள்ளையை சேர்க்கும் பொழுதே துபாய்க்கு அனுப்ப வேண்டும் என்ற  குறிக்கோளுடன் நம் பிள்ளைகளை வளர்த்தால் நம் தலைமுறைகள் நம் நாட்டின் அதிகார வர்க்கத்தில் ஒரு போதும் பங்கெடுக்க முடியாது

துபாய்…துபாய்.. என்று நம் பிள்ளைகளை எதிர்காலமில்லாத பாலைவனத்திற்கு அனுப்ப ஆசை படாமல், நமது நாட்டிலேயே அரசு அதிகாரிகளாக வலம் வரச் செய்ய ஒவ்வொரு பெற்றோர்களும் விரும்பிட வேண்டும். இளமையை உறிஞ்சி, சொந்தங்களை பிரிந்து, பணத்தை மட்டுமே தரும் நிரந்தரம் இல்லாத இந்த துபாய் வாழ்க்கையை நமது பிள்ளைகளுக்கு ஒரு போதும் கொடுத்திட வேண்டாம்

பணம் மட்டுமல்ல வாழ்க்கை…

நம் பிள்ளைகளை அதிகார வர்க்கத்தினராக மாற்றுவோம்.

செய்தி மூலம், சகோதரர் MMK. ஜமால் இபுராஹிம் முகநூல் பக்கம்

வடக்குத் தெரு சமூக நல அமைப்பு (NASA)  சார்பாக நிலவேம்பு கசாயம் வினியோகம்..

கீழக்கரையில் உள்ள சமூக அமைப்புகளில் 20 வருட சமூக சேவையில் நிலைத்து இருக்கும் அமைப்பு நாசா (NASA – North Street Association for Social Activities)  என்று அறியப்படும் வடக்குத் தெரு சமூக நல அமைப்பாகும்.  வடக்குத் தெரு மக்களின் தேவையை அறிந்தும்,  சூழ்நிலைகளுக்கு ஏற்ப மக்களுக்கு பல சேவைகளை செய்து வருகிறார்கள்.  அதன் அடிப்படையில் கடந்த சில வாரங்களில் பெய்த மழையினால் ஏற்பட சாக்கடை மற்றும் கழிவு நீர் தேக்கம் ஆகியவற்றால் டெங்கு, மலேரியா போன்ற பல தொற்று நோய்கள் பரவும் அபாயம் ஏற்பட்டுள்ளது.  அதை தடுக்கும் முன் எச்சரிக்கை நடவடிக்கையாக இன்று வடக்கு தெருவில் நில வேம்பு கசாயம் வீடு தோறும் வினியோகம் செய்யும் நிகழ்ச்சியை தொடங்கினார்கள்.  அதைப்பற்றி அவ்வமைப்பின் கீழக்கரை தலைவர் சகோ.அரஃபாத் கூறுகையில்,  நில வேம்பு கசாயம் வினியோகத்திற்கு தெரு மக்கள் மத்தியில் நல்ல வரவேற்பு இருந்ததாகவும்,  ஒரே நாளில் அனைத்து வீடுகளுக்கும் வினியோகம் செய்ய இயலாத காரணத்தால் இன்னும் சில தினங்களுக்கு தொடரும் என்பதை தெரிவித்தார்.  மேலும் இந்த வினியோத்தில் நாசா அமைப்பு நிர்வாகிகள் மற்றும் தெரு இளைஞர்கள் அனைவரும் ஆர்வத்துடன் கலந்து கொண்டனர்.  இந்த முன்னெச்சரிக்கை நடவடிக்கையை தெரு மக்கள் அனைவரும் வெகுவாக பாராட்டினர்.

இராமநாதபுரத்தில் பொது சிவில் சட்டத்தை எதிர்த்து மாபெரும் கண்டன ஆர்ப்பாட்டம்..

“ஷரியத் சட்டத்தில் கை வைக்காதே“

இன்று (05-11-2016) இராமநாதபுரத்தில் பாப்புலர் ஃப்ரண்ட் ஆஃப் இந்தியா மற்றும் NWF சார்பாக மாபெரும் கண்டன ஆர்பாட்டம் ஏற்பாடு செய்யப்பட்டுள்ளது. சமீப காலமாக பாரதிய ஜனதா மத்திய அரசு சிறுபான்மை மக்களின் உரிமைகளை நசுக்குவது தொடர்ந்த வண்ணம் உள்ளது. சமீபத்தில் மத்திய அரசு கையில் எடுத்திருக்கும் விசயம் பொது சிவில் சட்டம் என்ற பெயரில் இஸ்லாமிய மார்க்கதின் உயிர் மூச்சான ஷரீஅத் சட்டத்தில் மாற்றத்தை கொண்டு வருவதாகும். இந்த சட்டத்திற்கு பல சமுதாயம் மற்றும் சமூக ஆர்வலர்கள் மத்தியில் கடுமையான எதிர்ப்பு கிளம்பியுள்ளது. அதை வலுப்படுத்தும் விதமாக இன்று பாப்புலர் ஃப்ரண்ட் ஆஃப் இந்தியா மற்றும் NWF சார்பாக இராமநாதபுரம் சந்தை திடலில் மாலை 4.30 மணி அளவில் ஷரியத் சட்டத்தில் கை வைக்காதே என்ற கோஷத்தை முன் வைத்து பொது சிவில் சட்டத்தை கொண்டு வரத் துடிக்கும் மத்தியில் உள்ள பாரதிய ஜனதா அரசைக் கண்டித்து மாபெரும் ஆர்ப்பாட்டம் நடைபெறுகிறது. இக்கூட்டம் பாப்புல் ஃப்ரண்ட் மாநில செயலாளர் ஜெ.முகம்மது ரசின் அவர்கள் தலைமையில் நடைபெறுகிறது. மேலும் பல அரசியல் மற்றும் பல சமூக அமைப்பில் உள்ள தலைவர்களும் கலந்து கொள்கிறார்கள். கீழக்கரையில் இருந்து அனைத்து பெண்கள் மதரஸா ஆசிரியை சகோதரி. ஆபிதா டீச்சர் கலந்து கொள்வது கவனிக்கப்பட வேண்டிய செய்தியாகும்.

கீழக்கரை மக்கள் களம் சார்பாக தகவல் அறியும் உரிமை சட்டம் சம்பந்தமான பயிற்சி முகாம்.

04-11-2016 அன்று கீழக்கரை வடக்குத் தெருவில் உள்ள இஸ்லாமிய அமைதி மையத்தில் கீழக்கரை மக்கள் களம் சார்பாக தகவல் அறியும் உரிமை சட்டம்; சம்பந்தமான பயிற்சி முகாம் ஏற்பாடு செய்யப்பட்டு இருந்தது.  கீழக்கரையைச் சார்ந்த சமூக ஆர்வலர் மற்றும் மக்கள் களத்தின் முக்கிய நிர்வாகியான சகோ.சாலிஹ் ஹீசைன்  அவர்கள் தலைமையில் நடைபெற்றது.  இந்நிகழ்ச்சியில் கீழக்கரையைச் சார்ந்த 20 பேருக்கும் மேற்பட்ட ஆர்வமுள்ள சகோதரர்கள் கலந்து கொண்டு தங்களின் சந்தேகங்களை கேட்டு அறிந்து கொண்டார்கள்.  இந்த பயிற்சியில் தகவல் அறியும் உரிமை சட்டம சம்பந்தமான செய்முறை விளக்கங்கள் மற்றும் எவ்வாறு அரசு அலுவல்கங்களில் இருந்து விபரங்கள் அறியும் முறைகள் பயிற்றுவிக்கப்பட்டன.  மேலும் இந்நிகழ்ச்சி முகநூல் பக்கத்தில் நேரடியாக ஒளிபரப்பு செய்யப்பட்டது, வெளியூர் மற்றும் வெளிநாட்டு சகோதரர்களும் விபரங்களை அறிந்து கொள்வதற்கு வசதியாக இருந்தது.  பின்னர் அந்நிகழ்ச்சியை தொடர்ந்து இன்று 05-11-2016 நிகழ்ச்சியில் நிரப்பம் செய்யப்பட்ட படிவங்களை அரசு அலுவலகங்கஞக்கு தபால் நிலையத்தில் இருந்து சம்பந்தப்பட்ட அதிகாரிகளுக்கு அனுப்பி வைக்கப்பட்டு அதனுடைய விளக்கமுறையும் பயிற்றுவிக்கப்பட்டது.  இதுபோன்ற நிகழ்ச்சிகள் சமுதாயத்துக்கு மிக முக்கியமானதாகவும், விழிப்புணர்வை உண்டாக்க கூடியதாகவும் இருக்கும் என்பதில் ஐயமேதுமில்லை.

கீழக்கரை வடக்குத் தெருவைச் சர்ந்தவர்கள் கொந்த கருணையப்பா பள்ளியை நோக்கியிருந்த ட்ரக் கொட்டகையை மறந்து இருக்க மாட்டார்கள்.  கீழக்கரைக்கு ஏர்வாடி ரோடு வழியாக நுழைபவர்கள் இந்த ட்ரக் கொட்டகையை கடந்துதான் சென்று இருப்பார்கள்.  இந்த ட்ரக் கொட்டகை பல வருடங்களாக பொது மக்களுக்கு எந்த தொந்தரவும் இல்லாமல் தனியாரால் பராமரிக்கபட்டு வந்தது.  இரண்டு வருடங்களுக்கு முன்பு அச்சொத்து அரசாங்கத்துக்கு உட்பட்டது என்று இடித்து தரைமட்டம் ஆக்கப்பட்டது.

பல கோரிக்கைகளுக்கு பின்னர் பொதுமக்கள் நடந்து செல்வதற்கு தொந்தரவாக இருந்த இடிமான பொருட்கள் அங்கிருந்து அகற்றப்பட்டு திறந்த வெளியாக இருந்தது.  அத்திறந்த வெளி மக்கள் பொது பயன் பாட்டிற்காக நகராட்சி நிர்வாகம்  வழி செய்து தரும் என்று நம்பிக்கையுடன் இருந்த அத்தெரு மக்களுக்கு எந்த ஒரு விடிவு காலமும் பிறக்கவில்லை.  சில வருடங்கள் பிறகு கடந்த பின்பு தனியாருக்கும் அரசாங்கத்துக்கும் ஏற்பட்ட சட்ட போரில் அரசாங்க தரப்பு வென்றதாக கூறி கம்பி வேலிகள் அமைக்கப்பட்டது.  கம்பி வேலிகள் அமைத்த பின்பு நகராட்சியால் இந்த இடம் தெருவுக்கு நடுவில் ஒரு குப்பைக் கிடங்காகவே மாற்றப்பட்ட வருகிறுது.

அதற்கு அடித்தளம் அமைத்தது போல் குப்பைகள் கொட்டி வைக்கப்படும் சுத்தம் செய்யப்படாத குப்பை டிரம்கள் அங்கு வைக்கப்பட்டது. அதைத் தொடர்ந்து தற்போது சுற்றபுறத்தைப் பற்றி கவலைப்படாத மக்களால் கழிவுகள் கொட்டப்படும் குப்பையும் , சுற்றி ஓடும் சாக்கடையும் நோய்களின் கூடாரமாக இடமாக மாறி வருகிறது.  சமீப காலமாக இத்தெருவில் டெங்கு மலேரியா மற்றும் கிருமி காய்ச்சல் அதிகமாக பரவி வருவது குறிப்பிடதக்கது.  இந்த சமூக அவலத்தை கீழக்கரை மக்களுக்காக களத்தில் இறங்கி இருக்கும் மக்கள் களம்,  பாதுகாப்பு கழகம் மற்றும் சட்டப் போராளிகள் கையில் எடுத்து அரசாங்கத்தின் கவனத்திற்கு எடுத்துச் செல்வார்களா??  மக்கள் நோய் நொடியில் இருந்து காப்பாற்றபடுவார்களா??  ஏக்கத்துடனும், எதிர்பார்ப்புடனும் வடக்குத் தெரு மக்கள்..

கீழக்கரை பள்ளி வாகன ஓட்டுனர்கள் வேலை நிறுத்தம் வாபஸ்..

கீழக்கரையில் சில தினங்களுக்கு முன்பு சகோதரர் ஒருவர் முதல்வர் தனிப்பிரிவுக்கு அனுப்பிய மனுவின் அடிப்படையில் அரசு அதிகாரிகள் முறையான உரிமம் இல்லாத ஓட்டுனர்கள் மீது நடவடிக்ககை எடுக்கப்பட்டு அபராதமும் விதிக்கப்பட்டது.  அதைத் தொடர்ந்து இன்று வாகன ஓட்டுனர்கள் இந்த செயலலைக் கண்டித்து வேலை நிறுத்தம் செய்யப் போவதாக அறிவித்து இருந்தார்கள்.  ஆனால் இந்த வேலை நிறுத்தத்தால் பள்ளி சிறார்கள் பாதிக்கப்படுவார்கள் என்பதைக் கருத்தில் கொண்டு சுமூகமான தீர்வு காண சமூக ஆர்வலர்கள் அமைதிப் பேச்சு வார்த்தைக்கு அழைப்பு விடுத்து இருந்தார்கள்.  அதன் அடிப்படையில் கீழக்கரையில் உள்ள புதிய பாலத்தில் இன்று காலை 10.30 மணி அளவில் வாகன ஓட்டுனார்களுடன் மக்கள் நலப் பாதுகாப்பு கழகம் மற்றும் கீழக்கரை மக்கள் களத்தின் சட்ட பிரிவான கீழக்கரை சட்டப் போராளிகள் தளம் மற்றும் பிற சமூக ஆர்வலர்கள் தலைமையில் கூட்டம் நடைபெற்றது.  இக்கூட்டத்தில் மக்கள் நலப் பாதுகாப்பு கழகத்தை சார்ந்த சமூக ஆர்வலர் சாலிஹ் ஹீசைன் அவர்கள் இந்த வேலை நிறுத்தத்தால் ஏற்படும் சிக்கல்களையும்,  பள்ளிச் சிறார்களுக்கு ஏற்படும் பிரச்சினைகளைக் குறித்து விரிவாக விளக்கி ஓட்டுனர்களுக்கு எடுத்துரைத்து வருங்காலங்களில் ஒற்றுமையாக செயல்படுவதற்கான வழிமுறைகளையும் விளக்கி கூறினார்.  இந்த சுமூகமான பேச்சு வார்த்தை மூலம் ஓட்டுனர்கள் போராட்டத்தை எந்த நிபந்தனைகளும் இன்றி வாபஸ் பெற்றுக் கொண்டனர்.  மேலும் சமூக ஆர்வலர்களளின் அறிவுரையின் பேரில் இன்று முதல் உடனடியாக திரும்பினர்.

ஆன் லைன் பெட்டிசன் குளறுபடி..

கீழக்கரை மக்கள் நல பாதுகாப்பு கழகம் ஆட்சியரிடம் மனு..

கீழக்கரை மற்றும் அதன் சுற்றுப்புறப்பகுதியில் செயல்படும் அரசுத் துறையிலும்,  அதுசார்ந்து எழும் பிரச்சினைகளை அரசு அதிகாரிகளின் கவனத்துக்கு எளிதாக கொண்டு செல்லும் வகையில் ஆன் லைன் பெட்டிசன் வசதி இருந்து வந்தது.  இதன் மூலம் ஒவ்வொரு வாரமும் குறைந்தது நூறுக்கும் மேற்பட்ட மனுக்கள் அரசு அதிகாரிகளின் கவனத்துக்கு கொண்டு செல்லப்பட்டது.  அத்தளம் onlinegdp.tn.nic.in என்ற முகவரியில் செயல்பட்டு வந்தது, அதில் தங்கள் குறைகளை 500 எழுத்துகக்களுக்கு மிகாமல் என தெரிவிக்கப்பட்டு இருந்தது. ஆனால் நடைமுறையில் 50 எழுத்துக்களுக்கு மேல் டைப் செய்ய முடிவதில்லை ஆகையால் பிரச்சினைகளை விரிவாக பொதுமக்களால் தெரிவிக்க முடியாத நிலை இருந்து வந்ததது.  மேலும் கடந்த சில தினங்களாக இணையதளமும் சரியான முறையில் இயங்காமல் தொழில் நுட்ப கோளாறு என்ற வாசகமும் வந்த வண்ணம் இருந்தது.  இந்த பிரச்சினைக்கு தீர்வு காண இன்று கீழக்கரை மக்கள் நல பாதுகாப்பு கழகம் சார்பாக சகோ.சாலிஹ் ஹீசைன் அவர்கள் மாவாட்ட ஆட்சியர் குறை தீர்க்கும் நாளில் மனு அளித்தார்.  அதைப் பெற்றறுக் கொண்ட மாவட்ட ஆட்சியர் இப்பிரச்சினையில் தலையிட்டு உடனடியாக தீர்வு காண்பதாக உறுதியளித்துள்ளார்

கீழக்கரையில் தமிழ்நாடு கேபிள் நிறுவனத்தின் மெத்தனப் போக்கு…

கீழக்கரை நகர் நல இயக்கம் சார்பாக ஆட்சியரிடம் மனு..’

கீழக்கரை அரசு பொது மருத்துவமனை வளாகத்தில் தமிழ்நாடு அரசு கேபிள் நிறுவனத்தின் சார்பாக பல்வேறு ஈ சேவை வழங்கப்படும் என அறிவிப்பு செய்யப்பட்டு அதற்கான சேவை மையமும் அமைக்கப்பட்டது. அங்கு தினந்தோறும் நூற்றுக்கணக்கான கீழக்கரை மற்றும் அதனைச் சுற்றியுள்ள பொது மக்கள் பல்வேறு சேவைகளுக்காக வந்த வண்ணம் இருக்கிறார்கள்.  ஆனால் அங்கு பணி புரியும் ஊழியர்களோ பொதுமக்களின் தேவைகளைக் கருத்தில் கொள்ளாமல் மெத்தனப் போக்கையே கையாள்கிறார்கள்.  எந்த விதமான சேவைகளுக்கும், எச்சமயத்தில் சென்றாலும் பிரிண்டர் பழுதாகியுள்ளது, பணியாட்கள் வேலைக்கு வரவில்லை போன்ற சலிப்படையும் பதிலே மக்களுக்கு கிடைக்கிறது.  அதற்கு மேலாக அங்கு பணிபுரியும் பெண் ஊழியர்கள் சேவைக்காக வரக்கூடிய பொதுமக்களை தரக்குறைவாக பேசுவதாகவும்,  நடத்துவதாகவும் பரவலான கருத்தும் நிலவி வருகிறது .இதனால் பொதுமக்கள் மிகவும் மன உளைச்சலுக்கு ஆளாகிறார்கள். இப்பிரச்சினையை தற்பொழுது கீழக்கரை நகர் நல இயக்கம் கையில் எடுத்துள்ளது.  அவ்வமைப்பின் சார்பாக மாவட்ட ஆட்சியரின் குறை தீர்க்கும் நாளான இன்று  செயலாளர் சகோ. பசீர் அகமது அவர்களால் மாவட்ட ஆட்சியரிடம் ஈ சேவை பிரச்சினையை தீர்க்க வலியுறுத்தி மனு அளிக்கப்பட்டது.  அம்மனுவை பெற்றுக் கொண்ட ஆட்சியர் நேரடியாக இப்பிரச்சினையில் தலையிட்டு நிரந்தர தீர்வு காண்பதாக உறுதியளித்துள்ளார்

கீழக்கரை நகராட்சிக்கு ஒரே ஒரு கேள்வி…

கீழக்கரை நகருக்கு விடிவு காலம் பிறக்குமா??

கீழக்கரை நகராட்சிக்கு ‘ஒரே ஒரு கேள்வி‘ – அதற்கு மட்டும் பதில் தந்தால் போதும் – தகவல் அறியும் உரிமை சட்டத்தின் துணை கொண்டு சாமானியர்கள் அதிரடி !

கீழக்கரை மக்கள் களம் சார்பாக, கீழக்கரை பகுதியில் தகவல் அறியும் உரிமை சட்டம் குறித்த விழிப்புணர்வு நிகழ்ச்சிகளும், இலவச பயிற்சி வகுப்புகளும் நடை பெறுகிறது. இதனால் நகரின் இளைஞர் பட்டாளம் தகவல் அறியும் உரிமை சட்டம் குறித்த விழிப்புணர்வினை அடைந்து வருகின்றனர்.  தற்போது கீழக்கரை நகராட்சிக்கு தகவல் அறியும் உரிமை சட்டத்தின் வாயிலாக இளைஞர்கள் பல கேள்விகளை, தங்கள் வார்டு சம்பந்தமாக கேட்க ஆரம்பித்துள்ளனர்.

தற்போது கீழக்கரை நகராட்சிக்கு, தகவல் அறியும் உரிமை சட்டத்தின் துணை கொண்டு ‘ஒரே ஒரு கேள்வி‘ மட்டும் கேட்கப்பட்டுள்ளது. அதற்கு பதில் தந்தால் போதும். அவர்கள் தரும் பதிலை கொண்டு இனி நம் கீழக்கரை நகரின் எதிர்கால பிரச்சனைகளுக்கு நல்லதொரு தீர்வுகளை பெறலாம்.

கீழக்கரை சிட்டி யூனியன் வங்கி பணம் இல்லை என்று கைவிரிப்பு..

பொதுமக்கள் செய்வதறியாது தவிப்பு..

வங்கி அதிகாரிகள் மற்றும் அரசாங்கத்தின் குற்றமா அல்லது மக்களின் குற்றமா??

கீழக்கரையில் சிட்டி யூனியன் வங்கி கடந்த சில வருடங்களாக தன் சேவையை மக்களுக்கு வழங்கி வருகிறது.  கடந்த இரண்டு வாரங்களாக அரசு புதிய பண மாற்றும் திட்டத்தால் அனைத்து வங்கிகளும் பல சிரமங்களுக்கு இடையில் மக்களுக்கு இயன்ற அளவில் சேவையை அளித்து வந்தார்கள்.  ஆனால் இன்று காலை சிட்டி யூனியன் வங்கி வாசலில் இருந்த பணம் கையிருப்பு இல்லை அதனால் இன்று பணப் பட்டுவாடா கிடையாது என்ற அறிவிப்பு பலகையை கண்டு பொதுமக்கள் அதிர்ந்து போனார்கள். இதனால் அன்றாட தேவைக்கு பணம் எடுக்க வந்த பொதுமக்கள் முக்கியமாக பெண்மணிகள், வயோதிகர்கள் பெரும் சிரமத்துக்கு ஆளாகினர்.  ரிசர்வ் வங்கியால் அங்கீகாரம் பெற்ற ஒரு வங்கி இவ்வாறு அறிவிப்பு கொடுப்பது இந்திய வங்கி சட்டமைப்புக்கு எதிரானதாகும்.  இந்திய வங்கி முறைபடுத்தும் சட்டமைப்பு 1949 5(B)யின் படி வங்கியானது தனது வாடிக்கையாளரின் பொருளாதாரத்தை அவர் முறையான வடிவில் கேட்கும் பட்சத்தில் திருப்பி பணமாகவோ,  வரவோலையாகவோ வழங்க கடமைப்பட்டதாகும்.  மேலும் வங்கியல் சட்டமைப்பு பிரிவு 24 மற்றும் 56வின் படி மக்களுக்கு தேவையை தீர்க்கும் வகையில் சட்டரீதியான குறைந்த பட்ச தொகையை வங்கியில் கையிருப்பு வைத்திருப்பது அவசியமாகும்.  ஆனால் இன்றைய அறிவிப்பின் படி வங்கயின்p பணிகள் சட்டரீதியான முறையில் கையாளப்படவில்லை என்பது தெளிவாகிறது.  இதன் மூலம் பொதுமக்கள் வங்கியின் மீது சட்டரீதியான நடவடிக்கை எடுக்க வழிவகுக்கிறது.  மேலும் இது சம்பந்தமாக கீழக்கரை சமூக நல அமைப்புகள் வங்கியின் மேலாளருக்கு முறையான மனுக் கொடுத்து விளக்கம் கேட்பது என்றும் அதற்கு சரியான முறையில் விளக்கம் கிடைக்காத பட்சத்தில் சட்டபூர்வமான நடவடிக்ககைள் எடுக்கலாம் என்று முடிவெடுத்துள்ளார்கள்