மாவட்ட செய்திகள்

3 மற்றும் 6ம் வகுப்புகளுக்கு புதிய பாடத்திட்டம் அறிமுகம்..

வரும் கல்வியாண்டில், 3 மற்றும் 6ம் வகுப்பு களுக்கு புதிய பாடத்திட்டம் அமல்படுத்தப்பட உள்ளதாக சி.பி.எஸ்.இ., அறிவித்துள்ளது. மற்ற வகுப்பினருக்கான பாடத்திட்டங்களில் எவ்வித மாற்றமும் செய்யப்படவில்லை.

சி.பி.எஸ்.இ., எனப்படும் மத்திய இடைநிலை கல்வி வாரியத்தின் கீழ் ஏராளமான பள்ளிகள் இயங்கி வருகின்றன.

இந்த பள்ளிகளில் படிக்கும் மாணவர்களுக்கான பாடத்திட்டங்களை, என்.சி.இ.ஆர்.டி., எனப்படும் தேசிய கல்வியியல் ஆராய்ச்சி மற்றும் பயிற்சிக்கான தேசிய கவுன்சில் அமைப்பு வடிவமைத்து வருகிறது.

இதற்கிடையே, வரும் 2024 – 25ம் கல்வியாண்டில், 3 மற்றும் 6ம் வகுப்புகளுக்கு பாடப்புத்தகங்களை மாற்ற உள்ளதாக, என்.சி.இ.ஆர்.டி., அறிவித்துள்ளது.

இது தொடர்பாக, சி.பி.எஸ்.இ.,க்கும் தகவல் அனுப்பியுள்ளது.

இது குறித்து, சி.பி.எஸ்.இ., இயக்குனர் ஜோசப் இமானுவேல், அங்கீகாரம் பெற்ற பள்ளிகளுக்கு அனுப்பியுள்ள கடிதத்தில் குறிப்பிட்டுள்ளதாவது:

புதிய தேசிய கல்வி கொள்கையின்படி, 3 மற்றும் 6ம் வகுப்பு களுக்கு புதிய பாடத்திட்டங்கள் அறிமுகப்படுத்தப்பட உள்ளன.

இதற்கான புத்தகங்கள் அச்சடிக்கும் பணி முடிவடையும் நிலையில் உள்ளது. வரும் கல்வியாண்டில், 3 மற்றும் 6ம் வகுப்புகளுக்கு புதிய பாடத்திட்டங்களை பின்பற்ற வேண்டும்; மற்ற வகுப்புகளுக்கான பாடத்திட்டங்களில் எவ்வித மாறுதலும் இல்லை.

அரியலூர், திருச்சி, வேலூர், திருண்ணாமலை, விழுப்புரம் என 5 சுங்கச்சாவடிகளின் கட்டணத்தை வரும் ஏப்.1ம் தேதி முதல் உயர்த்தப்படுவதாக இந்திய தேசிய நெடுஞ்சாலைகள் ஆணையம் அறிவிப்பை வெளியிட்டுள்ளது. தமிழகத்தின் தேசிய நெடுஞ்சாலைகள் ஆணையத்தின் கட்டுப்பாட்டின் கீழ் 55 சுங்கச்சாவடிகள் உள்ளன. அதன்படி, ஆண்டுதோறும் ஏப்.1ம் தேதி சுங்கச்சாவடிகளின் கட்டணத்தை மாற்றி அமைப்பது வழக்கம்.

இந்தநிலையில், போக்குவரத்து அமைச்சகத்தின் ஒப்புதலின்படி, தமிழகத்தில் உள்ள 5 சுங்கச்சாவடிகளின் கட்டணங்களை உயர்த்த உள்ளதாக இந்திய தேசிய நெடுஞ்சாலைகள் ஆணையம் அறிவிப்பினை வெளியிட்டுள்ளது. அதன்படி, அரியலூர் மாவட்டத்தில் உள்ள மணகெதி சுங்கச்சாவடி, திருச்சி மாவட்டத்தில் உள்ள கல்லக்குடி சுங்கச்சாவடி, வேலூர் மாவட்டத்தில் உள்ள வல்லம் சுங்கச்சாவடி, திருவண்ணாமலை மாவட்டத்தில் உள்ள இனம்கரியாந்தல் சுங்கச்சாவடி மற்றும் விழுப்புரம் மாவட்டத்தில் உள்ள தென்னமாதேவி ஆகிய சுங்கச்சாவடிகளின் கட்டணத்தை வரும் ஏப்ரல் 1ம் தேதி உயர்த்தப்படும் என தெரிவிக்கப்பட்டுள்ளது.

ஒருமுறை பயணம் செய்வது மற்றும் ஒரே நாளில் திரும்பி வருவதற்கான சுங்கச்சாவடி கட்டணம் ரூ.5 முதல் 20 வரையிலும் உயர்கிறது. இதுமட்டுமல்லாது, மாதாந்திர சுங்கச்சாவடி கட்டணம் ரூ.100 முதல் ரூ.400 வரையும் உயர்த்தப்பட உள்ளன. ஏற்கனவே, நெடுஞ்சாலைகளின் உள்ள சுங்கச்சாவடிகளை அகற்ற வேண்டும் என வாகன ஓட்டிகள் கோரிக்கை விடுத்து வரும் நிலையில், தற்போது ஐந்து சுங்கச்சாவடிகளின் கட்டணத்தை உயர்த்தியுள்ளது பொதுமக்கள் இடையே பெரும் அதிர்ச்சியை ஏற்படுத்தியுள்ளது குறிப்பிடத்தக்கது.

நாகர்கோவில் – கன்னியாகுமரி ரெயில் நிலையங்கள் இடையே இரட்டை ரெயில் பாதை அமைக்கும் பணி நடைபெறுவதால் சில ரெயில்கள் ரத்துசெய்யப்பட்டுவதாகவும், சில ரெயில்கள் மாற்று இடத்தில் இருந்தும் இயக்கப்படுவதாக தெற்கு ரெயில்வே தெரிவத்துள்ளது.

இதுகுறித்து தெற்கு ரெயில்வே வெளியிட்டுள்ள செய்திக்குறிப்பில் கூறியிருப்பதாவது:-

நாகர்கோவிலில் இருந்து காலை 7.50 மணிக்கு புறப்பட்டு கோவை செல்லும் எக்ஸ்பிரஸ் ரெயிலும் (வண்டி எண்.16321), மறுமார்க்கமாக, கோவையில் இருந்து காலை 8 மணிக்கு புறப்பட்டு நாகர்கோவில் செல்லும் எக்ஸ்பிரஸ் ரெயிலும் (16322) இன்று (ஞாயிற்றுகிழமை) முதல் 27-ந்தேதி வரையில் ரத்துசெய்யப்படுகிறது.

இதேபோல, நாகர்கோவிலில் இருந்து காலை 7.50 மணிக்கு புறப்பட்டு கோவை செல்லும் எக்ஸ்பிரஸ் ரெயில் (16321) வரும் 28-ந்தேதி நாகர்கோவில் – நெல்லை இடையே பகுதியளவு ரத்துசெய்யப்பட்டு, அதற்கு மாற்றாக நெல்லையிலிருந்து காலை 9.15 மணிக்கு புறப்பட்டு கோவை செல்லும். மேலும், கன்னியாகுமரியிலிருந்து மாலை 5.25 மணிக்கு புறப்பட்டு அசாம் மாநிலம் திப்ருகார் செல்லும் விவேக் எக்ஸ்பிரஸ் ரெயில் (22503) வரும் 25-ந்தேதி (நாளை) முதல் 28-ந்தேதி வரை கன்னியாகுமரி – திருவனந்தபுரம் இடையே பகுதியளவு ரத்து செய்யப்பட்டு, அதற்கு மாற்றாக திருவனந்தபுரத்தில் இருந்து இரவு 7.40 மணிக்கு புறப்பட்டு திப்ருகார் செல்லும்.

சென்னை எழும்பூரில் இருந்து வரும் 24-ந்தேதி முதல் 26-ந்தேதி வரையில் காலை 9.45 மணிக்கு புறப்பட்டு குருவாயூர் செல்லும் எக்ஸ்பிரஸ் ரெயில் (வண்டி எண்.16127) ஒட்டன்சத்திரம் மற்றும் பழனி ரெயில் நிறுத்தத்தில் கூடுதலாக நின்று செல்லும். மறுமார்க்கமாக, குருவாயூரில் இருந்து வரும் 24-ந்தேதி முதல் 26-ந்தேதி வரையில் இரவு 11.25 மணிக்கு புறப்பட்டு சென்னை எழும்பூர் வரும் எக்ஸ்பிரஸ் ரெயில் (16128) ஒட்டன்சத்திரம் மற்றும் பழனி ரெயில் நிறுத்தத்தில் கூடுதலாக நின்று செல்லும்.

இவ்வாறு அதில் கூறப்பட்டுள்ளது

ராமநாதபுரம் செய்தியாளர்கள் சங்கத்தின் பொதுக்குழு மற்றும் புதிய நிர்வாகிகள் தேர்வு கூட்டம் இன்று (23.03.2024 ) நடைபெற்றது . இக்கூட்டத்தில் சங்கத்தின் புதிய தலைவராக இந்து தமிழ் திசை நாளிதழ் செய்தியாளர் கே.தனபாலன், செயலாளராக நியூஸ் 7 தமிழ் தொலைக்காட்சி செய்தியாளர் கே கே. குமார், பொருளாளராக சத்தியம் டிவி செய்தியாளர் பி. மகேஸ்வரன், கௌரவ தலைவராக தினமலர் நாளிதழ் உதவி ஆசிரியர் பழனிச்சாமி, துணைத் தலைவராக வசந்த் தொலைக்காட்சி செய்தியாளர் ஜி இளங்கோவன் ,இணைச்செயலாளராக தினபூமி நாளிதழ் செய்தியாளர் ஆர் . ரமேஷ், பாலிமர் தொலைக்காட்சி செய்தியாளர்ஏ . பிரபு ராவ், நிர்வாக குழு உறுப்பினர்களாக ராஜ் டிவி பாகற் செழியன், நமது அம்மா பாலமுருகன்,நியூஸ் 18 டிவி செய்தியாளர் வீரக்குமரன் , தந்தி தொலைக்காட்சி செய்தியாளர் சோனை முத்தன், மாலை முரசு டிவி செய்தியாளர் கண்ணன் பாபு ஆகியோர்களை ஏகமனதாக பொதுக்குழு கூட்டத்தில் தேர்வு செய்யப்பட்டனர். அதனைத் தொடர்ந்து புதிய நிர்வாகிகள் ராமநாதபுரம் மாவட்ட ஆட்சித் தலைவர் விஷ்ணு சந்திரன் மற்றும் மாவட்ட காவல் கண்காணிப்பாளர் சந்தீஷ் ஆகியோரே நேரில் சந்தித்து பொன்னாடை அணிவித்து புத்தகம் வழங்கி வாழ்த்து பெற்றனர். தேர்வாகியுள்ள சங்கத்தின் புதிய நிர்வாகிகளுக்கு ராமநாதபுரம் மாவட்ட அரசு துறை சார்ந்த அதிகாரிகள் மற்றும் அரசியல் பிரமுகர்கள் வாழ்த்துக்கள் தெரிவித்தனர்.

ஹைதரபாத் அணிக்கு எதிரான ஆட்டத்தில் கொல்கத்தா அணி 4 ரன்கள் வித்தியாசத்தில் த்ரில் வெற்றி..

17வது ஐபிஎல் லீக் தொடர் நேற்று அதாவது மார்ச் மாதம் 22ஆம் தேதி தொடங்கி நடைபெற்று வருகின்றது. இதில் லீக் கிரிக்கெட்டில் இன்று முன்னாள் சாம்பியன்கள் கொல்கத்தா நைட் ரைடர்ஸ் மற்றும் சன்ரைசர்ஸ் ஹைதராபாத் அணிகள் மோதிக்கொண்டது. இந்த போட்டி கொல்கத்தா ஈடன் கார்டன் மைதானத்தில் நடைபெற்றது. போட்டியில் டாஸ் வென்ற ஹைதராபாத் அணியின் கேப்டன் பேட் கம்மின்ஸ் பந்து வீச முடிவு செய்தார்.

அதன்படி முதலில் பேட் செய்த கொல்கத்தா அணி 20 ஓவர்கள் முடிவில் 7 விக்கெட்டினை இழந்து 208 ரன்கள் சேர்த்தது. அதிகபட்சமாக ரஸல் 64 ரன்களும், பிலிப் சால்ட் 54 ரன்களும் சேர்த்திருந்தனர். ஹைதராபாத் அணி சார்பில் நடராஜன் 3 விக்கெட்டுகளும், மார்கண்டே இரண்டு விக்கெட்டுகளும் கைப்பற்றினர்.

அதன் பின்னர் 209 ரன்கள் இலக்கை நோக்கி களமிறங்கிய ஹைதராபாத் அணியின் இன்னிங்ஸை இந்திய வீரர்களான மயாங்க் அகர்வால் மற்றும் அபிஷேக் சர்மா ஆகியோர் தொடங்கினர். இருவரும் பவர்ப்ளேவை சரியாக பயன்படுத்தி ஓவருக்கு 10 ரன்கள் என்ற கணக்கில் சிறப்பாக விளையாடினர். பவர்ப்ளேவின் கடைசி ஓவரில் மயாங்க் தனது விக்கெட்டினை 21 பந்தில் 32 ரன்கள் சேர்த்த நிலையில் இழந்தார். இவரது விக்கெட்டினை கொல்கத்தா அணியின் இளம் வேகப்பந்து வீச்சாளர் ஹர்சித் ராணா கைப்பற்றினார்.

போட்டியின் 8வது ஓவரில் மற்றொரு தொடக்க ஆட்டக்காரரான அபிஷேக் சர்மா 19 பந்தில் 32 ரன்கள் சேர்த்து ரஸல் பந்தில் தனது விக்கெட்டினை இழந்தார். விக்கெட்டுகள் விழுந்தாலும் அணியின் ஸ்கோர் ஓவருக்கு 10 ரன்கள் என்ற கணக்கில் இருக்கும்படியாக ஹைதராபாத் அணி விளையாடியது. 10 ஓவர்களில் அந்த அணி 2 விக்கெட்டினை இழந்து 99 ரன்கள் சேர்த்திருந்தது. அடுத்த 10 ஓவர்களில் ஹைதராபாத் அணிக்கு 110 ரன்கள் தேவை என்ற நிலையில் இருந்ததால், இரு அணி வீரர்களும் கிட்டத்தட்ட உயிரைக் கொடுத்து விளையாடினர்.

போட்டியின் 12வது மற்றும் 13வது ஓவரில் மார்க்ரம் மற்றும் ராகுல் த்ரிப்பாதி தங்களது விக்கெட்டினை இழக்க, போட்டி கொல்கத்தா பக்கம் மெல்ல மெல்ல சாயத் தொடங்கியது. கடைசி 7 ஓவர்களில் ஹைதராபாத் அணிக்கு 98 ரன்கள் தேவை என்ற இக்கட்டான சூழல் இருந்தது. ஆனால் களத்தில் இருந்த யான்சன் மற்றும் சமத் கூட்டணிக்கு கொல்கத்தா தொடர்ந்து நெருக்கடி கொடுத்து வந்தது.

கடைசியில் ஹைதராபாத் அணியின் வெற்றிக்கு 3 ஓவர்களில் 60 ரன்கள் தேவைப்பட்டது. 18வது ஓவரை வருண் சக்ரவர்த்தி வீசினார். அந்த ஓவரில் ஹைதராபாத் அணி 21 ரன்கள் சேர்த்தது. 19வது ஓவரில் 26 ரன்கள் சேர்த்தது, இந்த ஓவரை மிட்ஷெல் ஸ்டார்க் வீசினார். 20வது ஓவரை ஹர்சித் ராணா வீசினார். கடைசி ஓவரில் ஹைதாராபாத் அணி 2 விக்கெட்டினை இழந்து 8 ரன்கள் மட்டுமே சேர்த்தது. இதனால் கொல்கத்தா 4 ரன்கள் வித்தியாசத்தில் வெற்றி பெற்றது.

காங்கிரஸ் கட்சி மக்களவை தேர்தலுக்கான தேசிய அளவிலான 4-வது கட்ட வாக்காளர் பட்டியலை வெளியிட்டுள்ளது. இதில் 46 பேர் இடம் பெற்றுள்ளது.தமிழகத்தில் 9 இடங்களில் ஏழு இடங்களுக்கான வேட்பாளர் பெயர் அறிவிக்கப்பட்டுள்ளது.

1. திருவள்ளூர் (தனி)- சசிகாந்த் செந்தில்

2. கிருஷ்ணகிரி- கே. கோபிநாத்

3. கரூர்- ஜோதிமணி

4. கடலூர்- எம்.கே. விஷ்னு பிரசாத்

5. சிவகங்கை- கார்த்தி சிதம்பரம்

6. விருதுநகர்- மாணிக்கம் தாகூர்

7. கன்னியாகுமரி- விஜய் வசந்த்.

திருநெல்வேலி மற்றும் மயிலாடுதுறை ஆகிய தொகுதிகளுக்கான வேட்பாளர் பட்டியல் அறிவிக்கப்படவில்லை. அதேபோல் புதுச்சேரிக்கும் இன்னும் வேட்பாளர் பெயர் அறிவிக்கப்படவில்லை.கார்த்தி சிதம்பரம், ஜோதிமணி, விஜய் வசந்த், மாணிக்கம் தாகூர் ஆகியோருக்கு மீண்டும் வாய்ப்பு வழங்கப்பட்டுள்ளது.

நாதக சார்பில் தமிழ்நாட்டில் புதுச்சேரி உட்பட 40 தொகுதிகளில் போட்டியிடும் வேட்பாளர்கள் விவரங்கள் பின்வருமாறு:

1.  திருவள்ளூர் – மு.ஜெகதீஷ் சந்தர்
2.  வடசென்னை – மருத்துவர் அமுதினி
3.  தென் சென்னை – முனைவர் சு.தமிழ்ச்செல்வி
4.  மத்திய சென்னை – முனைவர் இரா.கார்த்திகேயன்
5.  திருப்பெரும்புதூர் – மருத்துவர் வெ.ரவிச்சந்திரன்
6.  காஞ்சிபுரம் (தனி) – வி.சந்தோஷ்குமார்
7.  அரக்கோணம் – பேராசிரியர் அப்சியா நஸ்ரின்
8.  வேலூர் – தி.மகேஷ் ஆனந்த்
9.  தருமபுரி – மருத்துவர் கா.அபிநயா
10.  திருவண்ணாமலை – மருத்துவர் ரா.ரமேஷ்பாபு
11.  ஆரணி – மருத்துவர் கு.பாக்கியலட்சுமி
12.  விழுப்புரம் – இயக்குநர் மு.களஞ்சியம்
13.  கள்ளக்குறிச்சி – இயக்குநர் ஆ.ஜெகதீசன்
14.  சேலம் – மருத்துவர் க.மனோஜ்குமார்
15.  நாமக்கல் – பொறியாளர் க.கனிமொழி
16.  ஈரோடு – மருத்துவர் மு.கார்மேகன்
17.  திருப்பூர் – மா.கி.சீதாலட்சுமி
18.  நீலகிரி(தனி) – ஆ.ஜெயகுமார்
19.  கோயம்புத்தூர் – ம.கலாமணி ஜெகநாதன்
20.  பொள்ளாச்சி – மருத்துவர் நா.சுரேஷ் குமார்
21.  திண்டுக்கல் – மருத்துவர் கைலைராஜன் துரைராஜன்
22.  கரூர் – மருத்துவர் ரெ.கருப்பையா
23.  திருச்சி – ஜல்லிக்கட்டு ராஜேஷ்
24.  பெரம்பலூர் – இரா.தேன்மொழி
25.  கடலூர் – வே.மணிவாசகன்
26.  சிதம்பரம் – ரா.ஜான்சிராணி
27.  மயிலாடுதுறை – பி.காளியம்மாள்
28.  நாகப்பட்டினம் – மு.கார்த்திகா
29.  தஞ்சாவூர் – ஹூமாயூன் கபீர்
30.  சிவகங்கை – வி.எழிலரசி
31.  மதுரை – முனைவர் மோ.சத்யாதேவி
32.  தேனி – மருத்துவர் மதன் ஜெயபால்
33.  விருதுநகர் – மருத்துவர் சி.கௌசிக்
34.  ராமநாதபுரம் – மருத்துவர் சந்திர பிரபா ஜெயபால்
35.  தூத்துக்குடி – மருத்துவர் ரொவினா ரூத் ஜேன்
36.  தென்காசி – சி.ச.இசை மதிவாணன்
37.  திருநெல்வேலி – பா.சத்யா
38.  கன்னியாகுமரி – மரிய ஜெனிபர்
39.  கிருஷ்ணகிரி – வித்யா வீரப்பன்
40.  புதுச்சேரி – மருத்துவர் ரா.மேனகா

நாம் தமிழர் கட்சி இதுவரை போட்டியிட்ட கரும்பு விவசாயி சின்னம், கர்நாடகத்தைச் சேர்ந்த வேறொரு கட்சிக்கு வழங்கப்பட்டதையடுத்து, நாம் தமிழர் கட்சி சார்பில் பரிந்துரைக்கப்பட்ட சின்னங்களில் மைக் சின்னம் ஒதுக்கப்பட்டுள்ளது குறிப்பிடத்தக்கது

மதுரையில் வணிகர் சங்க பேரமைப்பு சார்பில் “வணிகர் விடுதலை முழக்க மாநாடு” குறித்த ஆலோசனை கூட்டம்..

மதுரை அவனியாபுரத்தில் வணிகர் சங்க பேரமைப்பு சார்பில் “வணிகர் விடுதலை முழக்க மாநாடு” குறித்த ஆலோசனை கூட்டம் நடைபெற்றது. கூட்டத்திற்கு மதுரை மாவட்ட பேரமைப்பு தலைவர் அழகேசன் முன்னிலை வகித்தார். மாநில பொதுச்செயலாளர் கோவிந்தராஜுலு வரவேற்புரை கூறினார் மாநில பேரமைப்பு தலைவர் விக்ரமராஜா தலைமை உரை ஏற்றார்.

பின்னர் செய்தியாளர்களை சந்தித்து கூறும்போது தமிழ்நாடு வணிகர் சங்க பேரவை சார்பாக மே ஐந்தாம் தேதி வணிகர் விடுதலை முழக்கம் மாநாடு மதுரையில் நடைபெறுகிறது. இதுவரை 40 மாநாடுகள் நடத்தி இருக்கிறோம் இதுவரை காலையிலிருந்து மாலை முதல் வரை நடைபெறும். ஆனால் இந்த மாநாடு மாலை 4 மணி அளவில் தூங்குகிறோம். இந்த மாநாட்டில் இருந்து தமிழ்நாடு முழுவதும் இருந்து பல லட்சம் வணிகர்கள் வர உள்ளனர்.

குறிப்பாக மதுரையில் இருந்து பத்தாயிரம் வணிகர்கள் குடும்பத்துடன் கலந்து கொள்ள உள்ளனர். இந்த மாநாட்டில் எங்களுக்கு இழைக்கப்படுகின்ற கொடுமையான சட்ட விதிகளை அகற்ற கோரியும், சட்ட விதிகள் அமல்படுத்தும் போது வணிகர் சங்கத்தினரை அழைத்து பேச கோரியும் சாமானிய வணிகர்களை வரி சீரமைப்பு எனும் பேரில் கடைக்கு சீல் வைப்பு நடவடிக்கையை நிறுத்த கோரியும், கப்பலூர் டோல்கேட்டில் கடுமையான கட்டணம் வசூலிப்பதை கண்டித்து டோல்கேட்டை அகற்றக் கோரியும் பல்வேறு பிரகடன தீர்மானத்தை இந்த மாநாட்டில் அறிவிக்க உள்ளோம்.

இந்த மாநாடு பாராளுமன்ற தேர்தல் நடைபெற்று புதிய அரசு அமையும்முன் தேர்தல் முடிவுகளுக்கு முன்னதாக இந்த மாநாடு நடைபெறுகிறது. வணிகர்களின் தாகத்தை நிறைவேற்றக் கூடிய புதிய அரசு வணிகர்களை அழைத்து ஆலோசனை பெறக்கூடிய மாநாடாக இது அமையும். இந்த மாநாடு வெற்றி மாநாடாக அமையும் என்பதில் எங்களுக்கு நம்பிக்கை உள்ளது. இந்த மாநாட்டில் சிறு வணிகர்களின் பாதுகாப்பில்லாத சூழ்நிலை விளக்கப்பட உள்ளது. ஆன்லைன் வர்த்தகம் அமல்படுத்தும் போது சிறுவணிகர்கள் நிலை குறித்து விளக்க “விடுதலை முழக்க மாநாடு” நடைபெறுகிறது.

சிறு வணிகர்களை பாதுகாக்க இந்த அரசு சிறப்பு பாதுகாப்பு சட்டம் இயற்ற வேண்டும். வணிகர்களை தாக்குகிறவர்கள் வணிகரிடம் பொருட்களை வாங்கிக் கொண்டு தாக்குபவர்களுக்கு சிறப்பு பாதுகாப்பு சட்டத்தின் மூலம் நடவடிக்கை எடுக்க வேண்டும். மருத்துவர்களுக்கான சிறப்பு சட்டங்கள் உள்ளது போல் வணிகர்களுக்கு சிறப்பு சட்டத்தை உருவாக்க வேண்டும். வணிகர்களை தாக்கி காயத்தை ஏற்படுத்தும் நபர்கள் மீது சிறப்பு சட்டத்தின் மீது வழக்கு பதிவு செய்து சிறையில் தள்ள வேண்டும். வணிகர்கள் மக்களிடம் சேவை செய்கின்றனர். அவர்களுக்கு இந்த சிறப்பு பாதுகாப்பு சட்டத்தின் மூலம் வணிக விடுதலை முழக்க மாநாட்டில் பிரகடனத்தை அறிவிக்க உள்ளோம்

தேர்தல் நேரத்தில் ரூபாய் 50 ஆயிரம் மேல் கொண்டு செல்ல தடை குறித்த கேள்விக்கு, தேர்தலில் போட்டியிடும் வேட்பாளர்களுக்கு உண்டு 15 லட்சம் செலவு செய்ய வேண்டும் என்று கூறி இன்று 95 லட்சம் செலவு செய்ய சட்ட மாறுதல் கொண்டு வந்துள்ளது. அதேபோல் வணிகர்களுக்கும் சட்ட விதிகளில் மாறுதல் கொண்டு வர வேண்டும். 50,000 என்பது மிகவும் சொற்பத்தொகையாக உள்ளது 2 லட்சம் என்பதை மாற்ற வேண்டும். கரூரில் 47000 பணத்தை கொண்டு வந்த வியாபாரியை தாக்கி அதிகாரிகள் பறித்த இது போன்ற நிலைப்பாடுகளை காண முடிகிறது. மேலும் பணத்தைக் கொண்டு கருவூலத்தில் செலுத்தினாலும் அன்றைய தினத்தில் வேலை செய்ய முடியாத நிலை ஏற்படுகிறது.

அரசியல் கட்சிகள் எங்கு பணம் வைத்துள்ளனர் எங்கு கொண்டு போகின்றனர் என்பதை எல்லாம் அதிகாரிகளுக்கு தெரியும். ஆனால் பறிக்கப்படுவது எல்லாம் சாமானிய பொதுமக்கள் பணம் வணிகர்கள் பணம் மட்டுமே. திமுக தேர்தல் அறிக்கையில் டோல் கேட் அகற்றம் குறித்த கேள்விக்கு டோல்கேட் அகற்றப்பட வேண்டும் என்று வலியுறுத்தி வருகிறோம். செங்கல்பட்டு டோல்கேட்டில் அகற்றக்கோரி போராட்டம் ஈடுபட்டுள்ளோம். சென்னையில் கூட போருரில் இருந்து மூன்று டோல்கேட் உள்ளது. மொத்தம் 37 டோல்கேட்கள் உள்ளது இவற்றை அகற்றக்கோரி போராட்டம் நடத்தி உள்ளோம். மத்திய அமைச்சர் நிதின் கட்காரி கூட காலவதியான டோல் கேட் அகற்ற கூறியுள்ளார். டோல்கள் அகற்றப்பட வேண்டும் என்று கூறியுள்ளார்.

மதுரையை சுற்றி 5 டோல் உள்ளது குறித்த கேள்விக்கு, மதுரை மக்கள் சகிப்புத்தன்மையுடன் இருப்பவர்கள். முன்பு 50 காசு பெட்ரோல், டீசல் விலை ஏறினால் 100 போராட்டங்கள் நடைபெறும். இப்ப மக்கள் போராட்டம் செய்வது விட்டு விட்டார்கள். மருத்துவர்கள் கூறிய போல் சுகரை குறைக்க வேண்டும் என்று கூறியது போல் மக்களுக்கு உணர்வுகளை குறைக்க ஆரம்பித்து விட்டார்கள். ஆனால் வணிகர் சங்கம் இந்த பிரச்சனையை கையில் எடுக்கும். ஜிஎஸ்டி போன்ற குளறுபடுகள் உள்ள சூழ்நிலையில், சாதாரண வியாபாரிகள் மிகவும் பாதிக்கப்பட்டுள்ளனர். கார்ப்பரேட் கம்பெனிகள் மூலம் தான் வரிகள் கிடைக்கின்றது என்ற சூழ்நிலை உள்ளது. ஆனால் ஒரு சிகரெட்டு வியாபாரி கூட வரி கட்டி தான் சிகரெட் விற்பனை செய்கிறார் அரசு சாமானியர்களை ஒதுக்கி விட்டால் இந்தியா முழுவதும் 21 கோடி வியாபாரிகள் உள்ளோம் இவர்களுக்கு வேலை வாய்ப்பு ஏற்படுத்தி தருமா?

எத்தனையோ பேருக்கு வேலைவாய்ப்பை ஏற்படுத்தி தருகின்ற துறை வணிகர் சங்கம். வரும் நாடாளுமன்ற தேர்தலில் வணிகர் சங்க நிலை குறித்த கேள்விக்கு? எங்கள் கோரிக்கைகளை ஏற்று எழுத்துப்பூர்வமாக தரும் கட்சிகளுக்கு எங்கள் ஆதரவை பொதுக்குழு மூலம் அறிவிப்போம். பெயர் பலகை தமிழில் திறப்பது குறித்த கேள்விக்கு முன்பெல்லாம் ஒரு ஊருக்கு சென்றால் ஊரின் முகவரி கடை விலாசம் போன்றவை இருக்கும். ஆனால் தற்போது கார்ப்பரேட் கம்பெனிகள் வந்ததால் கார்ப்பரேட் நிறுவனங்களில் பெயர் மட்டுமே உள்ளது. ஆனால் ஆங்கிலத்தில் மட்டுமே உள்ளது. தற்போது தமிழில் பெயர் எழுத வேண்டும் என்று கூறுகிறோம். எந்த மொழியில் வைத்திருந்தாலும் நீங்கள் ஆனால் தமிழ் மொழியில் பேர் பலகை வைக்க வேண்டும் என்றும், ஊரின் பெயரை போட வேண்டும் என்று கூறுகிறோம் என விக்ரமராஜா கூறினார்.

செய்தியாளர் வி காளமேகம்

ராமநாதபுரம் வேலு மனோகரன் கலை, அறிவியல் மகளிர் கல்லூரி முதலாம் ஆண்டு பட்டமளிப்பு விழா கல்லூரி நிறுவனர் வி.மனோகரன் தலைமையில் நடைபெற்றது. மதுரை யாதவா கல்லூரி முதல்வர் (ஓய்வு) கண்ணன், மதுரை  ஆயிர வைஸ்யர் கல்லூரி முதல்வர் சிவாஜி கணேசன் ஆகியோர் சிறப்பு அழைப்பாளர்களாக கலந்து கொண்டனர். இவ்விழாவில் 2019-22, ஆண்டில் பயின்று பல்வேறு பாடப் பிரிவுகளில் அழகப்பா பல்கலை அளவில் பயின்ற சிறப்பிடம் பிடித்த 8 மாணவியர்  & 2020-23 ஆண்டில் பயின்று பல்வேறு பாடப்பிரிவுகளில்  பல்கலை அளவில் சிறப்பிடம் பிடித்த 7 மாணவியர் உள்பட 423 மாணவியருக்கு அழகப்பா பல்கலை துணை வேந்தர் ரவி பட்டம் வழங்கினார். துணை சேர்மன் பார்த்தசாரதி, அறக்கட்டளை உறுப்பினர்கள் முத்துக்குமார், தேவகி,  பத்மாவதி, செயலர் சகுந்தலா,  முதல்வர் காஞ்சனா உள்பட பலர் பங்கேற்றனர். இதில் கல்லூரி நிர்வாகிகள் ஆசிரியர்கள் மாணவிகளின் பெற்றோர்கள் திரளாக கலந்து கொண்டனர்.

தென்காசி மாவட்டத்தில் வாக்குப்பதிவு இயந்திரங்களுக்கு முதல்நிலை சுழற்சி (Ist Randomization)

தென்காசி மாவட்டத்திற்குட்பட்ட 219 சங்கரன்கோவில் சட்டமன்றத் தொகுதி, 220 வாசுதேவநல்லூர் சட்டமன்றத்தொகுதி, 221 கடையநல்லூர் சட்டமன்றத் தொகுதி, 222 தென்காசி சட்டமன்றத் தொகுதி, 223 ஆலங்குளம் சட்டமன்றத் தொகுதி ஆகியவற்றுக்கான வாக்குப்பதிவு இயந்திரங்களுக்கு முதல்நிலை சுழற்சி (Ist Randomization) மாவட்ட ஆட்சித்தலைவர் அலுவலகத்தில் அனைத்து அங்கீகரிக்கப்பட்ட அரசியல் கட்சி பிரதிநிதிகள் முன்னிலையில் மாவட்ட தேர்தல் நடத்தும் அலுவலர் / மாவட்ட ஆட்சித்தலைவர் ஏ.கே.கமல் கிஷோர் தலைமையில் நடைபெற்றது.

தென்காசி மாவட்டத்திற்குட்பட்ட 219 சங்கரன்கோவில் சட்டமன்றத் தொகுதி, 220 வாசுதேவநல்லூர் சட்டமன்றத்தொகுதி, 221 கடையநல்லூர் சட்டமன்றத் தொகுதி, 222 தென்காசி சட்டமன்றத் தொகுதி, 223 ஆலங்குளம் சட்டமன்றத் தொகுதி ஆகியவற்றுக்கான வாக்குப்பதிவு இயந்திரங்களுக்கு முதல்நிலை சுழற்சி (Ist Randomization) 22.03.2024 அன்று தென்காசி மாவட்ட ஆட்சித்தலைவர் அலுவலகத்தில் அனைத்து அங்கீகரிக்கப்பட்ட அரசியல் கட்சி பிரதிநிதிகள் முன்னிலையில் மாவட்ட தேர்தல் நடத்தும் அலுவலர் / மாவட்ட ஆட்சித்தலைவர் ஏ.கே.கமல் கிஷோரால் நடத்தப்பட்டது.

இதில் மாவட்ட வருவாய் அலுவலர் பத்மாவதி. மாவட்ட ஆட்சியரின் நேர்முக உதவியாளர் (பொது) அமிர்தலிங்கம், மாவட்ட ஆட்சியரின் நேர்முக உதவியாளர் (தேர்தல் கே.செல்வி), வாக்குப்பதிவு இயந்திரங்களுக்கான கண்காணிப்பு அலுவலர் செல்வி.மதிவதனா, மாவட்ட ஆட்சித்தலைவர் அலுவலக தனி வட்டாட்சியர் (தேர்தல்) ஹென்றி பீட்டர், தென்காசி மாவட்டத்திற்கான 5 சட்டமன்றத் தொகுதிகளுக்கான உதவி தேர்தல் நடத்தும் அலுவலர்கள், அங்கீகரிக்கப்பட்ட அரசியல் கட்சி பிரதிநிதிகள் ஆகியோர் கலந்து கொண்டனர். வாக்குப்பதிவு இயந்திரங்களுக்கான முதல்நிலை சுழற்சி நடத்தி முடிக்கப்பட்டு தென்காசி மாவட்டத்தில் உள்ள 5 சட்டமன்றத் தொகுதிகளுக்கான வாக்குப்பதிவு இயந்திரங்கள் கணிணி மூலம் ஒதுக்கீடு செய்யப்பட்டதற்கான அறிக்கை சட்டமன்றத் தொகுதி வாரியாக சம்பந்தப்பட்ட அரசியல் கட்சி பிரதிநிதிகளுக்கு வழங்கப்பட்டது.

தென்காசி மாவட்டத்தில் முதல்நிலை சோதனை முடிவுற்ற (Ist level checking) வாக்குப்பதிவு இயந்திரங்கள் வைக்கப்பட்டுள்ள தென்காசி நகர வேளாண்மை ஒழுங்கு முறை கிட்டங்கியானது அனைத்து அரசியல் கட்சி பிரதிநிதிகள் மற்றும் சம்பந்தப்பட்ட உதவி தேர்தல் நடத்தும் அலுவலர்கள் முன்னிலையில் தென்காசி மாவட்ட தேர்தல் நடத்தும் அலுவலர் மற்றும் மாவட்ட ஆட்சித்தலைவரால் திறக்கப்பட்டு சம்பந்தப்பட்ட தொகுதிகளுக்கு ஒதுக்கீடு செய்யப்பட்ட வாக்குப்பதிவு இயந்திரங்கள் மற்றும் VVPAT இயந்திரங்கள் ஆகியவை சட்டமன்றத் தொகுதி வாரியாக பிரிக்கப்பட்டு சம்பந்தப்பட்ட உதவி தேர்தல் நடத்தும் அலுவலர்களிடம் ஒப்படைக்கப்படும் என மாவட்ட தேர்தல் நடத்தும் அலுவலர் / மாவட்ட ஆட்சித்தலைவர் ஏ.கே.கமல் கிஷோர் தெரிவித்துள்ளார்.

செய்தியாளர்-அபுபக்கர்சித்திக்

தென்காசி மாவட்டத்தில் 100 சதவீதம் வாக்குப் பதிவை வலியுறுத்தி முதியோர் இல்லங்களில் விழிப்புணர்வு..

தென்காசி மாவட்டத்தில் 100 சதவீதம் வாக்குப்பதிவு மற்றும் நேர்மையாக வாக்களித்தல் ஆகியவற்றை வலியுறுத்தி பல்வேறு விழிப்புணர்வு முகாம்கள் நடத்தப்பட்டு வருகின்றன. அதன் தொடர்ச்சியாக குற்றாலத்திலுள்ள ரோஜாவனம் முதியோர் இல்லத்தில் முதியோர்களுக்கான விழிப்புணர்வு முகாம் மகளிர் திட்ட இயக்குநர் இரா.மதி இந்திரா பிரியதர்ஷினி தலைமையில் நடைபெற்றது.

இம்முகாமில் கலந்து கொண்ட அனைத்து முதியோர்களும் தேர்தல் விழிப்புணர்வு உறுதிமொழி எடுத்துக் கொண்டனர். அனைவருக்கும் தேர்தல் தொடர்பான துண்டு பிரதிகள் வழங்கப்பட்டன. ஜனநாயகம் கண்ணியத்துடன் வாக்களியுங்கள், 100% நேர்மையாக வாக்களிப்போம், இந்த மை நமது தேசத்தின் வலிமை, வாக்களிப்பது ஒவ்வொருவரின் கடமை,100% ஓட்டு இந்தியர்களின் பெருமை, நமது இலக்கு100% வாக்குப்பதிவு, வாக்களிப்பது நம் அனைவரின் ஜனநாயக கடமை போன்ற தேர்தல் விழிப்புணர்வு வாசகங்கள் அவர்களிடையே விளக்கிக் கூறப்பட்டன.

சாந்தோம் முதியோர் இல்லம் மற்றும் மிசன் இந்தியா முதியோர் இல்லம் போன்ற முதியோர் இல்லங்களிலும் முதியோர்களுக்கான தேர்தல் விழிப்புணர்வு முகாம்கள் நடைபெற்றன. முகாமிற்கான ஏற்பாடுகளை முதியோர் இல்லம் நிர்வாகிகள் மற்றும் அலுவலர்கள் சிறப்பாக செய்திருந்தனர். இந்நிகழ்ச்சியில் மகளிர் திட்ட உதவி திட்ட அலுவலர்கள் M.கலைச்செல்வி, P. டேவிட் ஜெயசிங், சமுக நலத்துறை சார்ந்த கேப்ரியல் பொன் ஆசிர், பானுப்பிரியா மற்றும் ரோஜா வனம் முதியோர் இல்லம் நிர்வாகிகள் உட்பட பலர் கலந்து கொண்டனர்.

செய்தியாளர்-அபுபக்கர்சித்திக்

இஸ்லாமிய சிம்மாசனங்கள்..!

பகுதி -3

கப்ளிசேட்

உஸ்மானிய பேரரசு -23

(கி.பி 1299-1922)

உஸ்மானிய பேரரசர்
முகம்மது காண்ஸ்டாண்டி நோபிள் நகரை கைப்பற்றி முழு துருக்கியையும்
கைப்பற்றி காண்ஸ்டாண்டி
நோபிள் நகரை தலைநகராக ஆக்கவும் திட்டம் தீட்டினார்.

பெருமானார் ஸல்லல்லாஹூ அலைஹிவ ஸல்லம் அவர்கள் சுபச் செய்தி சொன்ன காண்ஸ்டாண்டி
நோபிள் நகரை வெற்றிகொண்ட
தளபதியாகவும்,
தன்னுடைய வீரர்கள் அதன் வெற்றி வீரர்களாகவும், ஆகவும் இறைவனின் அருள் பெற்றவர்களாக ஆகவும் ஆசை கொண்டார்.

தனது 2,65,000 வீரர்களை கொண்ட படைமுன்பு வீரத்துடன் உரையாற்றி காண்ஸ்டாண்டி
நோபிள் நகரை வெற்றி கொண்டு இறைவனின் அருளையும், புதிய வரலாற்றையும், படைக்க வேண்டும் என்றார்.

நகரை நோக்கி தரைப்படை வீரர்கள் முன்னேறினர்.
உஸ்மானிய கப்பல் படை துருக்கிய கப்பல்களின் அணிவகுப்பால் உள்ளே நுழைய முடியவில்லை.

கப்பல்களை ஒன்றிணைத்து, பெரும் இரும்பு சங்கிலிகளால் பிணைக்கப்பட்டு,
கடல் பகுதிகளுக்குள்
நுழைய முடியாமல் பாதுகாப்பை பலமாக துருக்கிய கப்பல்படை செய்து இருந்தது.

முகம்மது தனது கப்பல்களை தனது தரைப்படை வரும் திசைக்கு நேர் பின்புறமாக மதில் சுவரை ஒட்டி கொண்டு வரச்செய்தார்.

துருக்கிய கப்பல்களின் பாதுகாப்பு கடற்கரையை சுற்றிய பகுதிகளில் மட்டுமே இருந்தது.

முகம்மது தனது கப்பல்படை
படையை பின்புறமாக கொண்டு சென்று நிறுத்திக் கொண்டார்.

அது கடல் பிறை போல வெளிப்புறமாக. வளைந்து இருந்ததால், அந்தப்பகுதியில் நடைபெறும் நிகழ்வுகளை சட்டென யாரும் பார்க்க முடியாது.
ஆகவே உஸ்மானிய கடற்படை அந்த இடத்தை சரியாக தேர்ந்தெடுத்தது.

அந்தப்பகுதியில் அலைகளின் சீற்றங்கள் மிக அதிகமாகவும், கடல் மிக ஆழமாகவும் இருந்ததால், அந்தப்
பகுதியிலிருந்து
எதிரிகள் உள்நுழைய
முடியாது என்று துருக்கிய மன்னர் நினைத்ததால் அந்தப்பகுதியில் பாதுகாப்பே இல்லை.

இதனை ஒற்றர்கள் மூலம் அறிந்த மன்னர் முஹம்மது சரியாக அந்த இடத்தை தேர்ந்தெடுத்தார்.

கடல் ஆழமாக இருந்ததால் பெரிய கப்பல்களை முடிந்தளவு கரை அருகில் தளபதிகள் கொண்டுவந்தனர்.

கப்பலிலிருந்து கரைக்கு ஐம்பது வீரர்களும், படையுடன் வந்த மர தச்சர்களும்
படகுகளில் சென்று கரை இறங்கினர்.

அவர்கள் கடற்கரை ஓரம் பழுது பட்டு நின்ற துருக்கிய கப்பல்களையும்
படகுகளையும்
ஒன்றிணைத்து பெரியபாலமாக‌ உருவாக்கினர்.

சில படகுகளை பலகைகளாக உடைத்து அதில் கொழுப்புகளை தடவினார்கள்.

முன்னேற்பாடுகள் முடிந்ததும், தொலைவில் நின்ற கப்பல்களுக்கு சமிஞ்சை செய்ததும்
அதிலிருந்த வீரர்களும், மற்றும் பொருள்களும், மளமளவென கரைக்கு வந்தன.

கொழுப்பு தடவப்பட்ட
பலகைகள் மேல் சிறிய படகுகளில் பொருட்களை ஏற்றி,
கரைக்கு எளிதாக இழுத்து வந்து சேர்த்தனர்.

மதிலின் கிழக்குப்பகுதியில் நடந்த எந்த நிகழ்வுகளையும் துருக்கிய வீரர்களால் கண்டுபிடிக்க முடியவில்லை.

அன்றைய இரவில்
விளக்குகள் அணைக்கப்பட்டு இருந்ததால், இந்த கடல் படை பெரும்பூதம் போல்
கடற்கரையில் இருந்தது.

பின்புற மதில் சுவரின் ஒரு வளைவான பகுதியை தேர்ந்தெடுத்து அதில் சில வீரர்கள் உள்நுழைய துவாரம் போடப்பட்டது.

உஸ்மானிய கடற்படை வீரர்கள் சிலர் சத்தமில்லாமல் கோட்டைக்குள் புகுந்தனர்.

அப்போது திடீரென கோட்டைக்குள் விளக்குகள் எரிந்தன.

வரலாறு படைக்க வரலாற்றை தொடர்ந்து வாசிப்போம்..!

திருப்பரங்குன்றம் இருப்பு பாதையில் ரயில் மோதி கொத்தனார் உயிரிழப்பு; ரயில்வே போலீசார் விசாரணை..

மதுரை மாவட்டம் திருப்பரங்குன்றம் மேட்டு தெருவை சேர்ந்தவர் குருசாமி. இவரது மகன் ராஜபாண்டி (வயது 28). இவர் வழக்கம் போல் இன்று அதிகாலையில் ரயில் தண்டவாளத்தை கடந்து சென்ற போது ரயில் மோதி சம்பவ இடத்தில் பலியானார். இது குறித்து மதுரை ரயில்வே போலீசாருக்கு தகவல் தெரிவிக்கப்பட்டது. அதன் பேரில் விரைந்து வந்த ரயில்வே எஸ் ஐ சையது குலாம் மற்றும் போலீசார் ராஜபாண்டி உடலை கைப்பற்றி மதுரை அரசு இராஜாஜி மருத்துவமனைக்கு உடற்கூறு ஆய்விற்கு அனுப்பி வைத்தனர். மேலும் இது குறித்து வழக்கு பதிவு செய்து ரயில்வே போலீஸார் விசாரணை வருகிறார்கள்.

செய்தியாளர் வி காளமேகம்

வத்தலக்குண்டு அருகே ஆவணமின்றி பிடிபட்ட பல கோடி ரூபாய் மதிப்பிலான,தங்க நகைகள் மற்றும் வெள்ளி பொருட்கள்! கருவூலத்தில் ஒப்படைத்த வட்டாட்சியர் தனுஷ்கோடி…

திண்டுக்கல் மாவட்டம் வத்தலக்குண்டு அருகே தேனி-மதுரை நெடுஞ்சாலையில் அமைந்துள்ள வத்தலக்குண்டு சோதனை சாவடியில் பாராளுமன்ற தேர்தல் நிலையான கண்காணிப்பு குழுவினர் (SST) பணியில் ஈடுபட்டுக் கொண்டிருந்தபோது, தேனியில் இருந்து வத்தலக்குண்டு நோக்கி வந்த தனியார் நகை நிறுவன சரக்கு வாகனத்தை நிறுத்தி சோதனையில் ஈடுபட்ட போது, தங்க நகைகள் 9-பெட்டிகளிலும் வெள்ளி நகைகள் 3-பெட்டிகளிலும் இருந்ததை கைப்பற்றி சோதனை செய்தத்தில் உரிய ஆவணங்கள் இன்றி எடுத்து வரப்பட்டது தெரிய வந்தது.

இதனை அடுத்து நிலக்கோட்டை தேர்தல் நடத்தும் துணை அலுவலரிடம் ஒப்படைக்கப்பட்டது. பின்னர் தேர்தல் நடத்தும் அலுவலரும் மாவட்ட ஆட்சியருமான பூங்கொடி அவர்களின் உத்தரவின் பேரில், தேர்தல் பிரிவு மதுரை மண்டல வணிகவரித்துறையினர்,வருமானவரித்துறையினர் வரவழைக்கப்பட்டு நகைகளை ஆய்வு செய்தனர்.

விசாரணையில் கோவையில் இருந்து தங்க நகைகளை நகைக்கடைகளுக்கு மொத்த வியாபாரத்திற்கு கொடுப்பதற்காக தேனி வந்ததாகவும், தேனியில் ஒப்படைத்து விட்டு வத்தலக்குண்டு நோக்கி வரும்பொழுது தேர்தல் நிலையான கண்காணிப்பு குழுவினர் (SST) சோதனையில் ஈடுபட்டு நகைகளை பறிமுதல் செய்தது தெரியவந்தது. பிடிபட்ட மொத்த நகைகளின் மதிப்பு ரூ 3,09,79,550 ஆகும். மேலும் முறையாக தேர்தல் ஆணையத்திடம் அனுமதி பெறாமல் கோடிக்கணக்கான ரூபாய் மதிப்பீட்டில் நகைகளை விற்பனைக்கு எடுத்து வந்ததும் தெரிய வந்தது.

இதனை அடுத்து தேர்தல் விதிமுறைகளை பின்பற்றாததாலும் உரிய ஆவணங்கள் இல்லாததாலும் நகைகளை துணை தேர்தல் நடத்தும் அலுவலரின் முன்னிலையில் நிலக்கோட்டை வட்டாட்சியர் தனுஷ்கோடி, நிலக்கோட்டை சார்நிலை கருவூலத்தில் கருவூல அதிகாரி ஜோதியிடம் ஒப்படைத்தார். பின்னர் முறையாக 9+3 நகைப் பெட்டிகளையும் இரண்டு மூட்டைகளாக பிரித்து மூடி முத்திரையிடப்பட்டு கருவூல காப்பக அறையில் வைத்து காவல்துறையினர் மற்றும் அதிகாரிகள் முன்னிலையில் மூடி முத்திரையிடப்பட்டு (சீல்) வைக்கப்பட்டது.

3.10 கோடி மதிப்பிலான நகைகள் தேர்தல் நிலையான கண்காணிப்பு குழுவினரால் சரக்கு வாகனத்தில் பிடிபட்ட சம்பவம் பரபரப்பை ஏற்படுத்தியுள்ளது.

தென்காசி நாடாளுமன்ற திமுக வேட்பாளர் ராணி ஸ்ரீகுமாருக்கு நகர திமுக மற்றும் கூட்டணி கட்சிகள் சார்பில் உற்சாக வரவேற்பு..

தென்காசி நாடாளுமன்ற தொகுதி திமுக வேட்பாளர் மருத்துவர் ராணி ஸ்ரீகுமாருக்கு தென்காசி தெற்கு மாவட்ட திமுக செயலாளர் வே. ஜெயபாலன் தலைமையில், நகர கழக செயலாளர் ஆர்.சாதிர் முன்னிலையில், தென்காசி காசி விஸ்வநாதர் கோவில் முன்பு நகர திமுக மற்றும் கூட்டணி கட்சிகள் சார்பில் மேலதாளங்கள் முழங்க உற்சாக வரவேற்பு அளிக்கப்பட்டது.

அதேபோன்று தென்காசி நாடாளுமன்ற தொகுதி திமுக வேட்பாளராக அறிவிக்கப்பட்ட மருத்துவர் ராணிக்கு கடையநல்லூர் மணிக்கூண்டு அருகில் தென்காசி தெற்கு மாவட்ட செயலாளர் வே.ஜெயபாலன் தலைமையில், தலைமை செயற்குழு உறுப்பினர் மா.செல்லத்துரை முன்னிலையில் உற்சாக வரவேற்பு அளிக்கப்பட்டது. இந்நிகழ்வில், தெற்கு மாவட்ட வர்த்தக அணி அமைப்பாளர் சுரண்டை முத்துக்குமார், தென்காசி தெற்கு மாவட்ட நிர்வாகிகள், திமுக முன்னோடிகள், உறுப்பினர்கள், கூட்டணி கட்சி அனைத்து பொறுப்பாளர்கள் உட்பட கலந்து கொண்டனர்.

தென்காசி நிகழ்ச்சியில், நகர்மன்ற துணைத் தலைவர் கே.என்.எல் சுப்பையா, அவைத்தலைவர் கிட்டு, துணை செயலாளர்கள் ராம்துரை, பால்ராஜ், பொருளாளர் ஷேக்பரீத், மாவட்ட பிரதிநிதிகள் மைதீன் பிச்சை, பாலசுப்பிரமணியன், நகர்மன்ற உறுப்பினர்கள் ஜெயலட்சுமி மகேஸ்வரி, கல்பனா, சுமதி, கார்த்திகா, மாவட்ட பொறியாளர் அணித்தலைவர் தங்கப்பாண்டியன், சாரதி, முருகன், மாணவரணி மைதீன், சன்ராஜா, சண்முகநாதன், ரகுமான், சாதாத், பாலாமணி, பாலசுப்பிரமணியன், கோபால் ஆகியோருடன்,

ராம், கங்காதரன், சாகுல் ஹமீது, ராமநாதன், அருணாச்சலம், பரமசிவன், முகமது ரபி, பழக்கடை குமார், செய்யது ஆபில், நாகூர் மீரான், சபரி சங்கர், பேக் அமீர், இசக்கி ரவி, கருதபாண்டி, முருகன், வேம்பு, சாகுல் ஹமீத், சேக்குலாசா, செய்யது பட்டாணி, சம்சுதீன், கூட்டணி கட்சி சார்பாக இந்திய யூனியன் முஸ்லிம் லீக் அபூபக்கர், விடுதலைச் சிறுத்தை கட்சி ஹக்கீம், சித்திக் சந்திரன், இந்திய கம்யூனிஸ்ட் கட்சி மாரியப்பன், மார்க்சிஸ்ட் கம்யூனிஸ்ட் கட்சி ஐயப்பன், காங்கிரஸ் மாடசாமி ஜோசியர், மதிமுக கார்த்திக் வெங்கடேஸ்வரன், உள்ளிட்ட பலர் கலந்து கொண்டனர்.

செய்தியாளர்-அபுபக்கர்சித்திக்

தமிழகத்தில் முதல் கட்டமாக ஏப்ரல் 19-ந்தேதி பாராளுமன்ற தேர்தல் நடக்கிறது. பாராளுமன்ற தேர்தலை எதிர்கொள்ள பிரதான கட்சியான தி.மு.க. முழு வீச்சில் தயாராகி உள்ளது. தமிழகத்தில் உள்ள 39 தொகுதிகளில் தி.மு.க. 21 தொகுதிகளில் போட்டியிடுகிறது.கூட்டணி கட்சிகளான காங்கிரஸ்-9, விடுதலை சிறுத்தைகள், மார்க்சிஸ்ட் கம்யூனிஸ்டு, இந்திய கம்யூனிஸ்டு ஆகிய கட்சிகள் தலா 2 இடங்களிலும், ம.தி.மு.க., கொங்குநாடு மக்கள் தேசிய கட்சி, இந்திய யூனியன் முஸ்லிம் லீக் ஆகிய கட்சிகள் தலா ஒரு இடத்தில் போட்டியிடுகின்றன. இதில் கொங்குநாடு மக்கள் தேசிய கட்சி உதயசூரியன் சின்னத்தில் போட்டியிட உள்ளது.திமுக கூட்டணியில் இடம் பெற்றுள்ள இந்திய யூனியன் முஸ்லிம் லீக் ராமநாதபுரம் தொகுதியில் போட்டியிடுகிறது.ஏணி சின்னம் கோரி இந்திய தேர்தல் ஆணையத்தில் ஐ.யூ.எம்.எல். கட்சி சார்பில் விண்ணப்பம் அளிக்கப்பட்டு இருந்தது.இந்நிலையில் ஐ.யூ.எம்.எல். கட்சியின் கோரிக்கையை ஏற்று ஏணி சின்னத்தை ஒதுக்கி இந்திய தேர்தல் ஆணையம் இன்று உத்தரவிட்டுள்ளது.ஐ.யூ.எம்.எல். கட்சியின் சார்பில் ராமநாதபுரம் தொகுதியில் நவாஸ் கனி களம் காண்கிறார்.

17வது ஐ.பி.எல். கிரிக்கெட் தொடர் நேற்று தொடங்கியது. சென்னை சேப்பாக்கம் மைதானத்தில் நடைபெற்ற முதல் லீக் ஆட்டத்தில் சென்னை சூப்பர் கிங்ஸ் – ராயல் சேலஞ்சர்ஸ் பெங்களூரு மோதின. இதில் டாஸ் வென்ற பெங்களூரு முதலில் பேட்டிங் தேர்வு செய்தது.

அதன்படி, பெங்களூரு தொடக்க வீரர்களாக கேப்டன் டூ பிளசிஸ், விராட் கோலி களமிறங்கினர். டூ பிளசிஸ் 35 ரன்களிலும், கோலி 21 ரன்களிலும் அவுட் ஆகி ஏமாற்றம் அளித்தனர். பின்னர் வந்த வீரர்கள் சொற்ப ரன்களில் ஆட்டமிழந்தனர். இறுதியில் அனுஜ் ராவத் உடன் ஜோடி சேர்ந்த தினேஷ் கார்த்திக் பொறுப்பான ஆட்டத்தை வெளிப்படுத்தினார். இறுதியில் பெங்களூரு 20 ஓவர்கள் முடிவில் 6 விக்கெட்டுகள் இழப்பிற்கு 173 ரன்கள் எடுத்தது. சென்னை அணியின் முஸ்தாபிசூர் ரகுமான் 4 விக்கெட்டுகளை வீழ்த்தினார்.

இதையடுத்து, 174 ரன்கள் எடுத்தால் வெற்றி என்ற இலக்குடன் சென்னை அணியின் தொடக்க வீரர்களக கேப்டன் கெய்குவாட், ரச்சின் ரவிந்திரா களமிறங்கினர். கெய்குவாட் 15 ரன்களிலும், ரவீந்திரா 37 ரன்களிலும் அவுட் ஆகினர். அடுத்துவந்த ரஹானே 27 ரன்களிலும், டேரெல் மிச்சேல் 22 ரன்களிலும் அவுட் ஆகினர்.

இதையடுத்து களமிறங்கிய ஷிவம் துபே, ரவிந்திர ஜடேஜா பொறுப்பான ஆட்டத்தை வெளிப்படுத்தினர். இறுதியில் சென்னை சூப்பர் கிங்ச் 18.4 ஓவரில் 176 ரன்கள் எடுத்தது. இதன் மூலம் ராயல் சேலஞ்சர்ஸ் பெங்களூருவை 6 விக்கெட்டுகள் வித்தியாசத்தில் வீழ்த்தி சென்னை சூப்பர் கிங்ஸ் அபார வெற்றிபெற்றது. ஷிவம் துபே 34 ரன்களுடனும், ஜடேஜா 25 ரன்களுடனும் களத்தில் இருந்து வெற்றிக்கு வழிவகுத்தனர். பெங்களூரு தரப்பில் அந்த அணியின் கிரீன் அதிகபட்சமாக 2 விக்கெட்டுகளை வீழ்த்தினார்.

ஐ.பி.எல். தொடரின் முதல் லீக் ஆட்டத்தில் பெங்களூருவை வீழ்த்தி சென்னை சூப்பர் கிங்ஸ் அபார வெற்றிபெற்றது.

ராமநாதபுரம் கேனிக்கரை அருகே தனியார் மஹாலில் திமுக சார்பில் அனைத்து கட்சிகளையும் அழைத்து இந்தியா கூட்டணியில்  ராமநாதபுரம் நாடாளுமன்றத் தேர்தலில் போட்டியிடும் இந்திய யூனியன் முஸ்லிம் லீக் வேட்பாளர் நவாஸ் கனி  அறிமுகம் கூட்டம் திமுக மாவட்ட செயலாளர் மற்றும் ராமநாதபுரம் சட்டமன்ற உறுப்பினரான காதர் பாட்ஷா முத்துராமலிங்கம் தலைமையில் பிற்படுத்தப்பட்டோர் நலத்துறை அமைச்சர் ராஜகண்ணப்பன் முன்னிலையில்  நடைபெற்றது. கூட்டத்தில் இந்தியா கூட்டணியில் இடம் பெற்றுள்ள  அனைத்து கட்சியின் மாவட்ட செயலாளர்கள் கலந்து கொண்டு வாழ்த்தி பேசினர். இதில் சென்ற பாராளுமன்ற தேர்தலை விட இந்த தேர்தலில் ஏணி சின்னத்தில் போட்டியிடும் இந்திய யூனியன் முஸ்லிம் லீக் வேட்பாளர் நவாஸ் கனிக்கு  அதிகப்படியான வாக்குகள் வித்தியாசத்தில் வெற்றி பெற செய்ய வேண்டும் என்று தெரிவிக்கப்பட்டது.

தி.மு.க தலைவரும் முதலமைச்சருமான மு.க.ஸ்டாலின் இன்று திருச்சியில் தேர்தல் பிரச்சாரத்தை தொடங்கினார். திருச்சியில் சிறுகனூரில் நடந்த பிரச்சார கூட்டத்தில் திருச்சி தொகுதி மதிமுக வேட்பாளர் துரை வைகோவுக்கும், பெரம்பலூர் தொகுதி தி.மு.க வேட்பாளர் அருண் நேருவுக்கும் வாக்கு சேகரித்து முதலமைச்சர் மு.க.ஸ்டாலின் உரையாற்றினார்.

அப்போது பேசிய முதலமைச்சர் மு.க.ஸ்டாலின், திருச்சி என்றாலே திருப்பு முனைதான். இந்த தேர்தலில் 40க்கு 40 வெற்றி பெற்று இந்தியாவிற்கே நாம் திருப்பு முனையை ஏற்படுத்த போகிறோம். புதிய வரலாற்றை நாம் எழுத போகிறோம்.

பாசிச பா.ஜ.க ஆட்சியை வீழ்த்தி இந்தியா கூட்டணியை ஒன்றியத்தில் அமரவை வைப்பதற்காக நடக்கக்கூடிய தேர்தல்தான் இந்த நாடாளுமன்ற தேர்தல். தேர்தல் என்பதால் பிரதமர் அடிக்கடி தமிழ்நாட்டிற்கு வருகிறார். இல்லை என்றால் வெளிநாட்டில்தான் இருப்பார்

தன்னுடைய ஆட்சி முடியபோகிறது என்பதால் பிரதமர் மோடிக்கு தூக்கம் வரவில்லை. அவரது முகத்திலும் கண்களிலும் தோல்வி பயம் தெரிகிறது. நான் கேட்ட கேள்விக்கு பிரதமர் மோடியால் பதில் சொல்ல முடியவில்லை. முடியாது.

தேர்தலுக்கு தேர்தல் பா.ஜ.க நடத்தும் கபட நாடகத்தை தமிழ்நாடு மக்கள் மட்டுமல்ல ஒட்டுமொத்த இந்திய மக்களும் இனி நம்ப மாட்டார்கள். உங்களை மன்னிக்கவும் மாட்டார்கள்

இப்போது நடைபெறும் தேர்தல் யுத்தம் இந்தியா கூட்டணிக்கும் பா.ஜ.க-வுக்குமானது அல்ல. பாசிச பா.ஜ.கவுக்கும் மக்களுக்கும் நடைபெறும் யுத்தம். இந்த தேர்தல் யுத்தத்தில் வெற்றிப் பெறப் போகிறவர்கள் மக்கள்தான். பாசிச பா.ஜ.க மண்ணோடு மண்ணாகும்.

10 ஆண்டுகால பா.ஜ.க ஆட்சியில் நடந்த ஊழல்கள் ஒன்றா இரண்டா?. அதற்கு இமாலய எடுத்துக்காட்டுதான் தேர்தல் பத்திரங்கள் ஊழல். இந்த ஊழல்கள் குறித்து நாம் மட்டுமல்ல இந்திய மக்களே கேள்வி கேட்டாளும் அவர்களிடம் பதில் இல்லை.

PM Cares என்ற பெயரில் பா.ஜ.க மிகப் பெரிய ஊழல் செய்துள்ளது. இந்தியா கூட்டணி ஆட்சிக்கு வந்த பிறகு இந்த ஊழல் ஊழலை முறையாக விசாரித்து அம்பலபடுத்தப்படும்.

தேர்தல் பிரச்சார கூட்டத்திற்கு வருவதற்கு முன்பு அமைச்சர் பொன்முடிக்கு பதவி பிரமாணம் செய்து வைத்துவிட்டுதான் இங்கு வந்து இருக்கிறேன். நம்முடைய பிரச்சாரத்தை ராஜ்பவனில் இருந்து தொடங்கி இருக்கிறோம். இது நிச்சயம் குடியரசு தலைவர் மாளிகையை அடையும்

பெங்களூருவில் வெடித்த குண்டு தமிழர்கள் வைத்த குண்டு என்று ஒன்றிய அமைச்சர் ஒருவர் பேசும் அளவிற்கு பா.ஜ.க வெறுப்பு தீயை வளர்த்துள்ளது. தமிழ்நாட்டு மக்கள் என்ன வன்முறையாளர்களா?. பயங்கர வாதிகளா?

ஒரு ரூபாய் கொடுக்கும் எங்களுக்கு ஏன் 29 பைசா கொடுக்கிறீர்கள் என்றுதான் நாங்கள் கேட்கிறோம். இதை கேட்டால் ஒன்றிய அமைச்சர் நிர்மலா சீதாராமன் மக்களுக்கு நிவாரணம் வழங்குவது பிச்சை என்று ஆணவமாக கூறுகிறார். இந்த ஆணவம் தான் பா.ஜ.கவை அழிக்கபோகிறது. மக்களுக்கு கொடுப்பது பிச்சை அல்ல. அது அவர்களது உரிமை.

மக்கள் பாதிக்கப்படும் போது அவர்களுக்கு உதவுவது கடமை. அதைத்தான் தி.மு.க அரசு சரியாக செய்து வருகிறது. கார்ப்பரேட் நிறுவனங்களுக்கு பல்லாயிரம் கோடி தள்ளுபடி செய்யும் அந்த கூட்டத்தில் போய் பிச்சை என்று நீங்க பேசுவீங்களா?. ஏழைகள் என்றால் அவ்வளவு இளக்காரமா?. மக்களுக்கு உதவ முடியவில்லை என்றால் எதற்கு நிதியமைச்சர் பதவி? என தெரிவித்துள்ளார்.

மதுரை கூடல் புதூர் பொதிகை நகர் பகுதியைச் சேர்ந்த 11 வயது சிறுமி தான் குடியிருந்து வரும் வீட்டில் கழிவறையில் மயங்கிய நிலையில் சிறுமியின் உறவினர்களால் நேற்று மீட்கப்பட்டு அரசு ராஜாஜி மருத்துவமனையில் சிகிச்சைக்காக அனுமதிக்கப்பட்டார். சிறுமியை பரிசோதித்த மருத்துவர்கள் சிறுமி ஏற்கனவே இறந்து விட்டதாக தெரிவித்தனர். இதைத்தொடர்ந்து சிறுமியின் உடல் பிரேத பரிசோதனைக்காக  அனுப்பி வைக்கப்பட்டது. சிறுமி உயிரிழந்ததை தொடர்ந்து சந்தேக மரணம் என போலீசார் வழக்கு பதிவு செய்தனர். மேலும் சிறுமி பாலியல் பலாத்காரம் செய்யப்பட்டிருக்க கூடும் என்கின்ற சந்தேகத்தின் அடிப்படையில் நேற்று சிறுமியின் வீட்டில் கைரேகை நிபுணர்கள் உதவியுடன் போலீசார் முகாமிட்டு விசாரணை மேற்கொண்டனர். இதனிடையே சிறுமியின் பிரேத பரிசோதனை சற்று நேரத்துக்கு முன்பு நிறைவு பெற்றது. இந்த பிரேத பரிசோதனையில் முதற்கட்டமாக சிறுமி பாலியல் பலாத்காரம் செய்யப்பட்டிருப்பது உறுதி செய்யப்பட்டுள்ளது.

இது தொடர்பாக மதுரை மாநகர காவல் ஆணையர் லோகநாதன் கூறியதாவது;

சிறுமி பாலியல் பலாத்காரம் செய்யப்பட்டிருப்பது பிரேத பரிசோதனையில் உறுதி செய்யப்பட்டுள்ளது. தற்பொழுது சந்தேக மரணம் என வழக்கு பதிவு செய்யப்பட்டிருப்பதை போக்சோ மற்றும்
கொலை வழக்காகவும் மாற்றப்படும். குற்றவாளியை நெருங்கி விட்டதாகவும் விரைவில் குற்றவாளி கைது செய்யப்படுவார் என்றும் தெரிவித்தார். கடந்த சில நாட்களுக்கு முன் புதுச்சேரியில் சிறுமி ஒருவர் பாலியல் பலாத்காரம் செய்து கொலை செய்யப்பட்டது குறிப்பிடத்தக்கது. தமிழகத்தில் அதே போன்ற ஒரு சம்பவம் நடந்துள்ளதை அடுத்து பெற்றோர்களிடையே பெரும் அச்சத்தை ஏற்படுத்தி உள்ளது.

செய்தியாளர் வி காளமேகம்